Ayaw Pakyasa ang Pagtambong Niini nga Debosyonal
5 ka Leksiyon sa Kinabuhi nga Nakat-onan gikan sa Templo sa Salt Lake
Gikan sa pakigpulong nga gihatag ngadto sa mga estudyante sa BYU–Pathway Worldwide kaniadtong Oktubre 20, 2020. Basaha ang kompletong teksto diha sa byupathway.org.
“Pagkabalaan ngadto sa Ginoo”: kini nga mga pulong nga gikulit dinhi niini nga templo ug sa matag templo mao ang mga pulong nga ako gusto nga ikulit diha sa akong kasingkasing.
Dako nga mga pag-ayo gihimo sa Templo sa Salt Lake sa pagsuporta sa pundasyon. Kini mokabat og daghang panahon, kini dako og gasto, ug kini nagkayamukat!
Gibati ba nimo sukad nga ang imong kinabuhi sama og gamay niini? Gusto nimo nga mahimong ang labing maayong posible nga bersyon sa imong kaugalingon, ug nga ang proseso sa pag-ayo mahimong magkayamukat usab.
Akong nakita ang Temple Square kada adlaw ug naghunahuna og daghan mahitungod niini nga proseso sa pagtukod og usab ug sa mga leksiyon nga nakat-unan. Gusto kong mopakigbahin og pipila lamang niini nga mga leksiyon uban kaninyo.
Leksiyon 1: Kadaghanan sa mga pagpadayag dili mahitungod sa “unsa,” apan mahitungod sa “kanus-a.”
Nadungog ko si Elder David A. Bednar sa Korum sa Napulog Duha ka mga Apostoles nga nagtudlo niini nga kamatuoran sa dihang naghisgot mahitungod niining dako kaayo nga proyekto.
Miingon siya nga nasayod ang mga lider sa Simbahan sulod sa pipila ka panahon kabahin sa trabaho nga gikinahanglan sa paghimo sa templo nga makapasar sa bag-ong mga ordinansa sa pagtukod ug pag-amuma sa gambalay, apan ang panahon dili angay. Ang teknolohiya, ekipo, ug husto nga pundok sa motrabaho wala diha. Karon anaa kini, ug tan-awa unsa ang nahitabo!
Usahay kita nahibalo nga adunay kinahanglang mahitabo sa atong mga kinabuhi. Kita mahimong mag-ampo alang sa tubag ug mobati ingon og dili kita tubagon. Salig sa Ginoo ug sa Iyang tukmang panahon. Nasayod Siya sa kataposan gikan sa sinugdanan. Nasayod siya unsa ug kinsa ang atong gikinahanglan karon ug unsa ug kinsa ang atong gikinahanglan ugma. Kon mosalig kita Kaniya, Siya motabang sa pag-usab kanato nga mohaom sa panginahanglan alang sa pagbayaw ngadto sa mga kahangtoran.
Leksiyon 2: Takos nga mga paninguha nagkinahanglan og panahon ug panlimbasog.
Ang Templo sa Salt Lake mikabat og 40 ka tuig sa pagtukod!
Ang mga pioneer nakasinati og daghang mga kalisod, ug ang proseso hinay ug makahago. Unsa kaha kon kadto nga mga pioneer mibiya? Unsa kaha kon sila miingon, “Kini lisod kaayo,” ug miundang?
Ang pagbag-o diha niini nga templo mokabat og mga tuig—dili 40 ka tuig, apan ang proseso dili mahimong dali!
Ang pipila sa takos nga mga pangandoy ug mga tumong sa atong mga kinabuhi dili makab-ot sa usa ka adlaw, usa ka bulan, o gani usa ka tuig—ug ang pagkab-ot niini dili kanunayng sayon. Hunahunaa lamang kon unsa ka sa proseso sa pagkab-ot karon dayon samtang magpadayon ka sa imong edukasyon! Ayaw pagbiya niadtong mga butang nga ikaw mibati nga giaghat sa pagbuhat. Hunahunaa kini nga templo ug padayon sa pagtrabaho sa imong mga tumong ug matarong nga mga tinguha. Kini takos niini.
Leksiyon 3: Paghinulsol naghimo kanato nga mas lig-on ug kini usa ka tibuok kinabuhi nga proseso.
Ang templo hapit kanunay giayo ug gibag-o sukad sa pagpahinungod niini. Ang mga bongbong gisibug, air-condition gidugangan, sistema sa elektrisidad giusab, dungan sa daghan pang uban nga mga butang.
Ang atong mga kinabuhi anaa usab sa kanunay nga panginahanglan sa pag-ayo ug pagpalambo. Ang proseso sa paghinulsol, pagpalambo sa kaugalingon, ug pag-angkon og pagpamatuod usa ka tibuok kinabuhi nga paninguha.
Ang pundasyon sa templo gipalig-on pinaagi sa pagbomba og usa ka espesyal nga semento sa paghulip og bisan unsang liki nga tingali nahibilin sa panahon sa orihinal nga pagtukod o nga midako sa nanglabay nga mga katuigan. Kini nga templo gitukod sa bantilis nga bato [granite], ug nagtimbang kini ingon ka bug-at sa usa ka dakong barko nga kargahanan og mga eroplano. Ang mga liki diha sa pundasyon kinahanglang ayohon bisan og walay usa nga makakita niini.
Adunay mga kasaypanan diha sa atong tibuok nga mga kinabuhi, mga hagit nga tingali walay laing makakita. Kini nga mga kasaypanan mahimong mahulipan samtang kita maghinulsol—mga kasaypanan nga mahimong hulipan tungod kay si Jesukristo miula alang sa tanan natong mga sala ug mga kakulangan, tungod kay ang Iyang kalooy makahimo kanato nga hingpit. Sa tinuod, ang paghinulsol dili lamang mahitungod sa pagtarong sa atong mga kasaypanan apan mahitungod sa paghimo kanato nga mas lig-on ug mas maayo kay sa kita kaniadto, sama lamang sa templo.
Leksiyon 4: Kita makadan-ag sa Kahayag ni Kristo.
Usa sa akong paborito nga mga dapit sa Temple Square mao ang usa ka dapit diin imong makita ang Templo sa Salt Lake nga nidan-ag diha sa usa ka matahom, malinawon nga lim-aw sa tubig.
Si propeta Alma diha sa Basahon ni Mormon nangutana sa mga miyembro sa Simbahan og pipila ka importante nga mga pangutana. Usa niini mao, “kamo makahangad ba ngadto sa Dios… uban sa usa ka putli nga kasingkasing ug limpyo nga mga kamot…, ingon nga may hitsura sa Dios nga gikulit sa inyong mga panagway?” (Alma 5:19).
Sa laing pagkasulti, kon ang uban motan-aw kanimo, sila ba makakita sa Kahayag ni Kristo nga nidan-ag diha kanimo? Aron makakita og dan-ag, kinahanglan gayod nga adunay kahayag. Kon kita nahibalo kinsa ug kang kinsa kita—hinigugmang mga anak sa langitnong mga ginikanan nga may balaang mga kinaiya ug mahangturong padulngan1—kita mas may kalagmitang modan-ag sa Kahayag ni Jesukristo. Kita mas may kalagmitang makakita og klaro diha sa usa ka kalibotan nga nagtubo ang kangitngit.
Leksiyon 5: Walay usa sukad nga gipadpad ngadto sa pagkabalaan.
Diha sa nagdan-ag nga lim-aw, ang usa ka tawo makakita sa mga bintana, mga pultahan, mga taluktok sa templo, ug sa gikulit nga mga pulong, “Pagkabalaan ngadto sa Ginoo.” Napahinumduman ako nga si John Stott, usa ka Anglican nga pari, gikutlo nga nag-ingon, “Walay usa sukad nga gipadpad ngadto sa pagkabalaan.”
Nagpalanog niana nga hunahuna, si Elder Jeffrey R. Holland sa Korum sa Napulog Duha ka mga Apostoles mitudlo nga “walay butang nga akong nasayran nga labing maayo nga nahitabo lang.”2 Sa laing pagkasulti, kinahanglan atong tuyoon ug hunahunaong daan ang mahitungod sa pagpalambo sa kalidad sa pagkabalaan sa atong mga kinabuhi! Bisan ang labing ordinaryo sa mga buluhaton, gihimo uban ang pagtuyo, makatabang sa atong mga paningkamot nga mahimong mas balaan.
Kon ang pagkabalaan mao ang atong gitinguha, niana kinahanglan kita nga makita diha sa balaan nga mga dapit. Kini nga mga dapit naglakip sa mga templo, atong mga simbahan, ug atong mga panimalay. Ang usa sa mga rason kini nga mga dapit mga balaan tungod kay kini gipahinungod. Ang pagpahinungod nagpasabot nga “gi-set apart… [alang] sa usa ka sagrado nga katuyoan.”3 Kini usa ka verbo—usa ka aksyon nga pulong. Kon ang mga templo, mga chapel, ug mga panimalay gipahinungod isip balaang mga dapit—ug kon gusto ko sa akong kinabuhi nga mahimong balaan—nan ako kinahanglan gayod nga mohalad sa akong kinabuhi ngadto niana nga katuyoan. “Pagkabalaan ngadto sa Ginoo”: kini nga mga pulong nga gikulit dinhi niini nga templo ug sa matag templo mao ang mga pulong nga ako gusto nga ikulit diha sa akong kasingkasing.
Usa ka pundasyon. Kahayag. Tubig. Pagkabalaan. Makita nga mga pahinumdom sa atong lig-on nga pundasyon, ang Kahayag sa Kalibotan, Buhi nga Tubig, ang Usa nga Balaan sa Israel. Ako mopamatuod nga si Jesukristo buhi, nga ang Iyang kahayag ug ang Iyang gugma mga tinuod, ug nga Siya naghimo sa Iyang buhat sulod kanato.