Pagpangita og mga Tubag: Gikan sa Sister ngadto sa Sister
Sa Kalibotan nga Nagtubo ang Kangitngit, Unsaon Nato Pagbaton sa Paglaom ug Hingpit nga Kalipay?
Usa ka pangutana nga daghang matinud-anon nga mga sister nangutana, lakip kanako.
Ako aduna niining ngil-ad nga kinaiya sa pagsulti sa Langitnong Amahan unsay akong gihunahuna nga ako makahimo ug dili makahimo. Ako nahinumdom nga nagsulti Kaniya kausa isip usa ka bata nga dili ako gusto nga mabuhi atol sa kataposang mga adlaw tungod kay nahibaloan ko lamang nga ako dili makaagwanta sa ingon ka makasasala, dautan nga panahon.
Samtang ang kinabuhi nagpadayon, nakita ko gihapon ang akong kaugalingon nga nag-angkon nga dili ako makadumala sa nagtubo nga kangitngit sa kalibotan.
Makapahibulong kaayo, ang akong patriyarkal nga panalangin nga nag-ingon nga makaplagan nako ang hingpit nga kalipay dinhi niini nga kinabuhi. Ako sa kasagaran malibog kon sa unsang paagi ang Dios nagpaabot kanako nga makakaplag og hingpit nga kalipay sa usa ka kalibotan diin mas daghang mga tawo dayag nga nagpili, nagsuporta, ug nagpasiugda og kadautan.
Unsaon ni bisan kinsa pagdahom nga makakaplag og paglaom o malungtaron nga hingpit nga kalipay sa ingon nga kalibotan?
Kini tataw ang pagkalahi tali sa unsay gisulti sa akong patriyarkal nga panalangin kanako nga posible ug sama sa unsa ang panagway sa kalibotan karon naggiya kanako sa pagtuon sa tahas sa paglaom ug sa hingpit nga kalipay diha sa ebanghelyo ni Jesukristo.
Paglaom
Samtang nagsugod ako sa pagkat-on mahitungod sa paglaom, nakaagi ako og usa ka pahayag ni Elder Steven E. Snow, usa ka kanhi General Authority Seventy: “Ang atong paglaom sa Pag-ula [ni Jesukristo] mohatag kanato og gahom pinaagi sa paghatag kanato og mahangturong panglantaw. Ang ingon nga panglantaw motugot kanato sa pagtan-aw lapas pa niini nga kinabuhia ug paingon ngadto sa saad sa kahangturan. Kinahanglan dili kita masulod sa laang sa pig-ot nga mga limitasyon sa kanunayng mausab-usab nga mga gilauman sa katilingban.”1
Nakaamgo ako nga nasinati ko og personal kining gamhanan nga kamatuoran pipila ka tuig ang milabay. Sa hapit na ako mahuman sa akong misyon sa habagatang France, ang mga terorista miataki sa Paris, nagmugna og dakong pagbati sa kahadlok alang sa tanan diha sa nasod. Sa dihang kami miduol og mga tawo pagkahuman sa usa ka semana, sila sa kasagaran nangutana kanamo kon sa unsang paagi kami sa gihapon adunay hugot nga pagtuo sa Dios nga mitugot sa ingon ka grabe nga hitabo. Kami mipakigbahin og mga istorya sa kasulatan ngadto kanila, ug mitudlo kami sa gugma sa Dios ug sa plano sa kalipay. Ang mga tawo kinsa nakakaplag pag-usab og paglaom mao kadtong kinsa naminaw sa among mensahe ug naningkamot nga makabaton og mahangturong panglantaw.
Si Presidente Russell M. Nelson miingon: “Kon walay paglaom diha ni Kristo, walay pag-ila sa usa ka balaan nga plano alang sa katubsanan sa katawhan. Wala niana nga kahibalo, ang mga tawo nasayop sa pagtuo nga ang kinabuhi mubo ra kaayo ug mahimong mahanaw sa sunod nga adlaw—nga ang kalipay ug mga panag-uban sa pamilya dili magdugay.”2
Kon ang kakulang sa paglaom diha ni Kristo ang hinungdan sa pagkawala sa paglaom nga atong makita sa kasagaran sa kalibotan, niana sa tinuoray ang pagdugang sa atong hugot nga pagtuo ug paglaom diha ni Kristo makatabang kanato sa pagbaton og dugang pa nga paglaom sa kinabuhi. Si Elder Jeffrey R. Holland sa Korum sa Napulog Duha ka mga Apostoles nanghimatuod niini: “Tungod kay ang Pagpahiuli mipamatuod sa sukaranang kamatuoran nga ang Dios tinuod nga naglihok niini nga kalibotan, kita mahimong molaom, kita kinahanglang molaom, bisan kon nag-atubang sa labing malisod nga mga kalisdanan.”3
Usahay bisan nahibalo kita nga kinahanglang ibutang nato ang atong paglaom diha ni Kristo wala kini makapahimo nga mas sayon ang pagbuhat sa mao, ilabi na sa nagtubo nga kangitngit sa kalibotan nga naglibot kanato. Sa dihang misugod ako sa pagkanawad-an og kadasig, gusto kong hunahunaon kining maalamon nga tambag gikan ni Kevin J. Worthen, presidente sa Brigham Young University:
Kon gusto kita nga molig-on sa atong paglaom, kita kinahanglan gayod nga mopunting pa diha sa Manluluwas, ilabi na kon mobati kita nga walay paglaom. Usa sa labing yano apan labing gamhanan nga mga paagi nga kita makahimo niana mao ang pagsunod sa Iyang ehemplo pinaagi sa pagserbisyo sa uban. Sa atong pagbuhat sa mao, ang atong gihatagan og gibug-aton mabalhin gikan sa atong mga kaugalingon ngadto sa uban, ug mosugod kita sa pagbaton og mga tinguha alang sa ilang kaayohan. Kana nga paglaom mahimo dayong paubanan og kasigurohan nga si Kristo makatabang kanila ug nga Siya makahimo sa mao pinaagi kanato. Kini nga pagdugang sa hugot nga pagtuo ngadto sa atong matarong nga mga tinguha makapausab sa atong gamay, bag-o pa kaayo nga paglaom ngadto sa usa ka malungtaron, gamhanan, mas labing nindot nga matang sa paglaom nga makapausab kanato—ug sa uban.4
Sa pagbuhat lamang sa butang nga mas makapaduol kanato ngadto ni Kristo, makakaplag kita og mas dakong paglaom sa umaabot, walay pagsapayan kon unsa ang mga panghitabo sa kalibotan nga naglibot kanato. Samtang kita naglig-on sa atong relasyon uban Kaniya, kita makakat-on sa pagtan-aw sa kinabuhi pinaagi sa mahangturong panglantaw ug sa pag-ila sa mga kalisod ug pagsulay nga atong giatubang niini nga kinabuhi nga “sulod lamang sa mubo nga higayon” (Doktrina ug mga Pakigsaad 121:7).
Hingpit nga kalipay
Ug unsa ang mahitungod sa hingpit nga kalipay? Dili ba ania kita dinhi aron kita unta makabaton og hingpit nga kalipay? (Tan-awa sa 2Nephi 2:25.) Unsaon nato pagkakaplag og hingpit nga kalipay kon ang mga butang walay mga kapuslanan ug atong gibuhat kutob sa atong mahimo aron lamang makabaton og paglaom sa usa ka mas maayo nga kaugmaon?
Si Elder David A. Bednar sa Korum sa Napulog Duha ka mga Apostoles kausa mipasabot sa hingpit nga kalipay: “Ang atong panglantaw sa ebanghelyo makatabang kanato sa pagsabot nga ang hingpit nga kalipay labaw pa kay sa usa ka lumalabay nga pagbati o emosyon; hinoon, kini usa ka espirituhanong gasa ug usa ka kahimtang sa pagpuyo ug sa pagkahimong mausab.”5
Sa dihang ako nakadungog kaniya nga miingon niini, akong giusab ang paagi sa akong pagpangita og hingpit nga kalipay. Hangtod nianang higayona, ako nangita og mga pagbati sa tiunay nga kalipay, usa ka butang nga dili gayod mobiya ug molumos sa tanan nga mga pagbati sa kaguol o nasakitan. Apan ang pagpatin-aw ni Elder Bednar miabli sa akong mga mata ngadto sa ideya nga tingali wala ko makaplagi ang hingpit nga kalipay nga gisaad kanako tungod kay ako nangita sa sayop nga butang.
Imbis pangitaon ang mobati nga magmalipayon, ako kinahanglan unta hinoon nga mangita nga mahimong magmalipayon.
Sa unsang paagi ang tawo mahimong malipayon? Ako walay ideya.
Si Elder Bednar midugang, “Ang hingpit nga kalipay nagagikan sa pagbansay sa hugot nga pagtuo diha ni Ginoong Jesukristo, takos nga nagdawat ug matinud-anon nga nagtahod sa sagradong mga ordinansa ug mga pakigsaad, ug naningkamot aron nga mahimong lig-on nga nakabig ngadto sa Manluluwas ug sa Iyang mga katuyoan.”6
Si Presidente Nelson mitudlo usab:
“Ang kalipay nga atong gibati dili kaayo konektado sa mga sirkumstansya sa atong kinabuhi apan konektado kaayo sa gitutokan sa atong kinabuhi.…
“Ang hingpit nga kalipay usa ka gasa alang sa matinud-anon. Mao kini ang gasa nga moabot gikan sa tinuyo nga paningkamot sa pagpuyo og matarong nga kinabuhi, sama sa gitudlo ni Jesukristo.”7
Midan-ag kini og pagkaamgo kanako samtang ako nakakaplag og dugang pa nga mga kamatuoran mahitungod sa tinubdan sa hingpit nga kalipay.
Hugot nga pagtuo diha kang Jesukristo? Nahimong lig-on nga nakabig ngadto Kaniya ug sa Iyang mga katuyoan? Mao kini ang mga butang nga akong nadungog sa tibuok nakong kinabuhi. Kini ba ang tinuod nga yawe sa pag-usab sa unsay akong gibati mahitungod sa pagpuyo sa kalibotan atol niini nga panahon sa kangitngit?
Oo!
Samtang namalandong ako sa mga higayon sa akong kinabuhi sa dihang gibati ko ang labing dako nga paglaom ug kalipay, nakaamgo ako nga kini hapit sa kanunay mao ang higayon nga ako labing nakatutok sa paglig-on sa akong relasyon uban ni Kristo ug naningkamot nga mahimong mas mahisama Kaniya.
Bisan ako sa gihapon nanlimbasog og mga higayon sa kasubo o kawalay paglaom, ako nagbaton og paglaom ug hugot nga pagtuo nga samtang ako magpadayon nga magpaduol ni Kristo, Siya maanaa aron sa pagtabang kanako sa akong mga kahuyang. Ako adunay paglaom nga ugma damlag ako makaangkon og kahingpitan sa kalipay, ug samtang ako mangita sa kahayag sa Manluluwas ug magtinguha nga mahimong malipayon bisan sa mahagitong mga kahimtang, makaplagan ko ang matang sa kalipay nga gisaad ngari kanako sa akong patriyarkal nga panalangin ug nga gisaad ngari kanatong tanan—nga ang “ilang hingpit nga kalipay mahingpit sa kahangtoran” (tan-awa sa 2Nephi 9:18).