KŌVITI-19: Ko ha Faingamālie ke Toe Tokanga Ange ki he Meʻa Mahuʻinga ʻo e Ongoongoleleí
‘I he kotoa ʻo e hisitōliá, naʻe ‘i ai maʻu pē ha ngaahi fa‘ahitaʻu faingata‘a. ‘I he ʻaho ní, ‘oku tau fehangahangai kotoa mo e faingataʻa lahi naʻe fakatupu ʻe he KŌVITI-19. Kuo tau toutou fanongoa ia: ko e ngaahi taimi ʻeni ʻoku ʻikai malava ke fakatataua. ‘Oku hohaʻa hotau tokolahi fekau‘aki mo ʻetau mo‘ui leleí mo e lelei ʻa hotau ngaahi ʻofaʻangá. Kuo tau ongoʻi kotoa ʻa e ngaahi nunuʻa fakaʻekonōmika mo fakaeloto na‘e fakatupu ʻe he vailasi ko ‘ení. Hangē ʻoku ‘ikai ha meʻa ia ʻoku ʻi he tūkunga angamahení. Pea kuo uesia ʻa e ngāue fakafaifekaú mo e ngāue fakatemipalé. ‘Oku ongoʻi lōmekina ʻa e kakai tokolahi ‘i he ngāue ki hono fakaleleiʻi ‘o e ngaahi founga angamaheni ʻi ‘apí.
ʻE lava ʻe he fehangahangai mo e ta‘epau ʻo e kaha‘ú ʻo fakatupu ha ongoʻi loto tailiili mo e loto-hoha‘a—mahalo pē kuó ke ongo‘i ʻeni. Ka ‘i he lotolotonga ʻo e ngaahi moveuveu kotoa ko ‘ení, ʻoku ‘i ai ha ʻamanaki lelei! Neongo ʻa e ta‘epaú mo e ngaahi liliú, kuo teʻeki liliu ʻa e ngaahi meʻa ‘aongá mo e ngaahi tefitoʻi me‘a mahuʻinga ‘o e ongoongoleleí:
-
Mahalo naʻe kaniseli fakataimi pe fakangatangata ʻa e ngaahi fakatahaʻanga ʻo e lotú, ka ʻoku ʻikai ke fakangatangata ʻa e mo‘ui ʻaki ʻo e ongoongoleleí! ʻE lava ke tau hokohoko atu ʻa e lotú, tokoní, mo e ngāue ʻaki ʻa e ongoongoleleí ‘i hotau ngaahi ʻapí.
-
‘Oku kei ʻi Hono ngaahi langí ‘a e ʻOtuá.
-
ʻOku kei hoko pē Hono ‘Alo ko Sīsū Kalaisí, ko e ‘ulu ki he ngāué ni. ‘Okú Ne ʻafioʻi ʻa e ngaahi faingata‘a ʻo e māmaní pea mo ʻetau ngaahi faingata‘aʻia fakatāutahá. Kuó Ne talaʻofa, “ʻE ʻikai te u tuku ke tuenoa ʻa kimoutolu” (Sione 14:18) ʻOkú Ne ʻomi ʻa e Laumālie Māʻoni‘oní ke nofo ʻia kitautolu.1
-
Kuo uiuiʻi ʻe he ʻOtuá ha kau palōfita, kau tangata kikite, mo ha kau tangata ma‘u fakahā. Pea ʻoku fakafou ‘iate kinautolu ʻa ʻEne fokotu‘u ʻa e meʻa totonu ko ia ʻoku tau fie maʻu ke matuʻuaki ʻaki ʻa e ʻahiʻahi faingataʻa ko ʻení.2 Fakakaukau ki he naunau fakalēsoni foʻou ʻoku fakatefito ʻi ʻapí, fakataha mo ha ngaahi liliu kehe, ʻa ia naʻe tokoni ke teuteuʻi kitautolu ki he taimi ko ʻení mo mo‘ui ʻaki mo ngāue ‘i ha founga māʻolunga mo toputapu ange.3 ‘Oku ʻikai tupukoso ‘a e ngaahi liliu ko ʻeni ne toki fakahokó—na‘e fokotuʻu kinautolu ʻe ha ʻOtua tokaimaʻananga mo ‘ofa.
Neongo ‘a e moveuveú, mo e ngaahi meʻá ni, ‘oku lava ke tau toe tokanga ange ki he meʻa mahuʻinga ʻo e ongoongoleleí, ‘a ia ʻoku kau ai ‘a e tui ki he ʻEiki ko Sīsū Kalaisí.
Ka ʻe lava fēfē nai ke tau fakaʻaongaʻi ʻa e tui ko iá? Talu mei he kamata‘angá, mo hono fakaʻatā ‘e he ʻEikí ‘Ene kau ākongá ke matuʻuaki ʻa e ngaahi faingata‘á taʻe-ma‘u ʻa e ngaahi talí kotoa. ʻOku loloto ange ʻa e fakavaʻe ʻo ʻetau tuí ʻi he taimi ‘oku tau faka‘aongaʻi ai ‘a e tauʻatāina ke filí pea laka atu ki mu‘a ʻi he uhouhonga ‘o e taʻepaú. Naʻe toe lea ʻaki ʻeni ʻe ‘Eletā Niila L. ʻEnitaseni ʻo e Kōlomu ‘o e Kau ʻAposetolo ‘e Toko Hongofulu Mā Uá ʻo pehē, “ʻOku ʻikai te ke ‘iloʻi ʻa e meʻa kotoa pē, ka ‘oku feʻunga pē ʻa ho‘o ʻiló!”4
Ko e talanoa ʻo Nīfai mo hono ngaahi tokouá ʻi heʻenau feinga ke maʻu ʻa e ʻū lauʻipeleti palasá ko ha sīpinga ma‘ongoʻonga ia ki he me‘á ni. Na‘a nau ʻilo‘i ʻa e meʻa naʻe fie maʻu ke nau fakahokó: ke ‘omai ʻa e ʻū lauʻipeletí! Ne nau ʻilo‘i lelei ʻa e ʻuhingá. Ka naʻe ʻikai ke nau ʻilo ʻa e founga ke fakahoko ai iá. Hili ʻa e ‘ikai lava ʻa e feinga hono uá (vakai, 1 Nīfai 3:10–27), naʻe ‘ikai toe falala ʻa Nīfai ki hono ivi pē ʻoʻoná. Naʻe ‘ikai ke ne foʻi, ka na‘á ne toe feinga pē. Fakatokanga‘i hono fakaʻaongaʻi fakahangatonu ‘o e ngaahi lea ʻa Nīfaí ki he tūkunga ‘o e ʻaho ní:
“Pea naʻe tataki au ʻe he Laumālié, ʻo ʻikai te u tomuʻa ʻilo ʻa e meʻa te u faí.
Ka naʻá ku ʻalu atu pē” (1 Nīfai 4:6-7).
Neongo e lahi ʻa e ngaahi faka‘ilonga fehuʻi ‘i heʻetau mo‘uí, kapau te tau “laka atu” hangē ko Nīfaí, ʻo falala ki he ‘Otuá mo muimui ki Heʻene kau palōfitá mo fakatefito ‘i he tuí, te Ne tataki kitautolu. ‘I he taimi ʻe niʻihi ʻi he foungá ni, ʻe hoko ‘etau ngaahi fakaʻilonga fehu‘i ki he ngaahi palopalemá ko e fakavaʻe ki ha meʻa mahuʻinga.
Tau fakatupulaki muʻa ʻetau tui kia Sīsū Kalaisí, falala ki Heʻene kau tamaioʻeikí, pea mo ʻetau feʻofaʻaki ʻiate kitautolú ʻi heʻetau fehangahangai mo e kahaʻú. ʻE lava ke hoko ʻa e taimi puputuʻu lahi mo faingataʻa fakamāmanilahi ko ʻení ko ha potu toputapu ke tau toe ofi ange ai kiate Ia. ‘I heʻetau fai iá, ʻe fakafonu ʻe He‘ene melinó hotau ngaahi lotó, naʻa mo e lotolotonga ʻo e moveuveú, pea te tau maʻu ‘a e mālohi mo e ngaahi tali ʻoku tau fie maʻú.