Kakai Lalahi Kei Talavoú

Fakahā Fakataautaha Maʻaú

ʻOkú ke ʻilo fēfē ʻa e faikehekehe ʻi he fakahaá mo e ngaahi fakakaukau pē ʻa koé?

ʻOku tau moʻui ʻi ha māmani mohu faingamālie. ʻOku tau maʻu ʻa e tauʻatāina ke fili ʻetau ngāue maʻuʻanga moʻuí, akoʻangá, malí, feituʻu ʻoku tau fie nofo aí, mo ha ngaahi meʻa lahi ange. Ko ha tāpuaki fungani moʻoni ia maʻa hotau toʻu tangatá. Ka ʻi he tafaʻaki ʻe tahá, ʻokú ne fakafaingataʻaʻiaʻi ange e ngaahi fili ko ʻení koeʻuhí ʻoku faingataʻa ke fakahoko ha ngaahi fili ʻi he taimi ʻoku lahi fau ai ha ngaahi hala mo ha ngaahi faingamālie, te ne tataki kitautou ki ha ngaahi meʻa leleí. ʻOku tau fili fēfē nai e ngaahi meʻa totonú ʻi he taimi ʻoku fuʻu lahi ai ha ngaahi faingamālie ʻoku leleí? ʻI he taimi ʻokú ke ongoʻi hē mo puputuʻu ai ʻi he matangi ko ʻeni ʻo e ngaahi filí, manatuʻi ʻoku finangalo ʻa e Tamai Hēvaní ke tataki koe. Te ke lava ʻo fili ʻa e hala totonú mo maʻu ʻa e ngaahi tali ʻokú ke fekumi ki aí kapau te ke muimui ʻi Hono leʻó. Fakatokangaʻi e founga ʻokú Ne folofola atu ai kiate koé, falala kiate Ia, muimui he palōfitá, faʻa kātaki, ʻamanaki lelei ange, mo maʻu ha tui, pea ʻe tataki leva koe ʻi he hala totonú.

—Vira Vashchenko, Kyiv, Ukraine

Kuó u mātā ʻi heʻeku moʻuí kotoa e founga kuo tataki ai au ʻe he ʻEikí, pea ʻoku ou ʻiloʻi ʻoku tupu ʻeku maʻu e meʻa kotoa pē kuó u maʻú koeʻuhí ko Ia mo ʻEne tatakí. Naʻa mo e ngaahi taimi ʻoku ou fakakaukau ai ʻoku ou tuenoá, ka ʻi he ngataʻangá, ʻokú Ne fakahā mai mo ʻai ke u ongoʻi kuó Ne feʻao maʻu pē mo au. Ko hono ʻuhinga ia kuó u fai maʻu ai pē ʻa e fili ke ngāue maʻu pē ʻi he tuí, neongo e ngaahi taimi ʻoku ou ongoʻi tuenoa aí. Kiate aú, ʻoku ʻikai mahino maʻu pē hoku ngaahi ʻalungá, pea ʻikai ke u lava maʻu pē ʻo sio ki he meʻa ʻoku fakatatali maʻaku ʻi he kahaʻú, ka ʻoku ou faʻa ngāue maʻu pē ʻi he tui, pea ʻoku kamata leva ke u sio ki he māmá mo ʻiloʻi e toʻukupu ʻo e ʻOtuá ʻi heʻeku moʻuí. ʻOku ou ʻilo ʻoku ʻofa ʻa e Tamai Hēvaní mo Hono ʻAlo ko Sīsū Kalaisí ʻiate kitautolu, pea ʻokú Na hoifua ke tataki kitautolu, ka ʻokú Na finangalo foki ke tau tui kiate Kinaua mo ngāue ʻi he taimi ʻoku tau maʻu ai e ngaahi ueʻi mei he Laumālié.—

Indhira Mejia, Dominican Republic

ʻI heʻeku matuʻotuʻa angé, naʻe pau ke u ako e founga fetuʻutaki ʻa e Laumālié. ʻOku talanoa mai e Laumālié kiate au ʻo fakafou ʻi ha ngaahi fakakaukau mahino. Kuó u akoako fai ia ke u anga ki ai, ka ko e angamahení, ʻoku ou ongoʻi e Laumālié ʻi he ngaahi feituʻu fakalongolongó, ʻo hangē ko ʻeku fakaʻuli ki he ngāué ʻi heʻeku kaá. ʻOku ou ʻilo ʻoku ʻikai ko ʻeku ngaahi fakakaukaú ia koeʻuhí ʻe ueʻi au ʻe he Laumālié ʻi he taimi ʻoku ʻikai ke u fakakaukau ai ki he meʻa ko iá.

—Clarissa Mae Taylor, Utah, USA

ʻOku ou pehē ko e taha ʻo e ngaahi taukei fakaofo taha kuo pau ke tau akó ko e malava ko ia ke ʻiloʻi e fanafana leʻo vaivai ʻo e Laumālie Māʻoniʻoní. Kuo poupouʻi au ʻe he ako fakamātoato e folofolá ke u ʻiloʻi lelei ange ia. Kuó u tui maʻu pē ko ia ʻoku fekumi faivelengá te ne ʻiloʻi, pea ʻe fakahā ʻa e ngaahi meʻa lilo ʻa e ʻOtuá kiate kinautolu, ʻi he mālohi ʻo e Laumālie Māʻoniʻoní (vakai, 1 Nīfai 10:19). ʻI hono fakalea ʻe tahá, kapau ʻoku ou fie ʻiloʻi e Laumālié, ʻoku ʻikai totonu ke u fakaʻatā au ke u maʻu ha ngaahi fakakaukau taʻeʻaonga pe ko e ngaahi meʻa ʻoku hohaʻa fakaʻaho ki ai e moʻuí, ka ʻoku totonu ke u ngāue faivelenga mo fakangaloki au. Ko e toki taimi ia ʻe lava ke u ʻilo lelei ange ai e Laumālié koeʻuhí kuó u mateuteu ki ai! ʻI he founga tatau he ʻikai lava ke folau ha vaka lolotonga ha matangi, he ʻikai lava ke tau ongoʻi e Laumālié kapau ʻoku ʻalu ʻetau tokangá he ngaahi meʻa ʻo e māmaní ʻa ia he ʻikai lava ke tau mapuleʻí.—

Emmanuel Borngreat Dogbey, Accra, Ghana

ʻOku mau ʻiloʻi ʻi homau kiʻi fāmilí ʻa e Laumālié koeʻuhí ko e fiemālie ʻoku mau ongoʻí, tautautefito ki hoku husepānití mo au ko ha ongomeʻa mali. ʻI he taimi ʻoku fakatatau ai pē ki heʻema ngaahi fakakaukaú, ʻoku ʻikai ha taimi te ma teitei ongoʻi ai ko e meʻa totonú ia—ʻoku ʻi ai maʻu pē ha kiʻi veiveiua pe manavasiʻi. Ka ʻi he fakahaá, ʻokú ma ongoʻi fiemālie maʻu pē, naʻa mo e taimi ʻokú ma feinga ai ke kumi ʻuhinga pea ikai ngali ʻuhingamālie ʻa e ngaahi meʻá ʻi he kamataʻangá. ʻI he taimi ʻokú ma muimui ai mo ikunaʻi iá, ʻokú ma vakai maʻu pē ki he iku lelei ʻa e ngaahi meʻá pea fakaʻofoʻofa e meʻa kotoa. Ko e taimi ia ʻokú ma fesiofaki ai mo ma pehē, “ʻOi, kuo toki mahino ʻeni!”

—Maryana Wright, Utah, USA

Neongo ʻe lava ke tau maʻu kotoa ha fakahā fakataautaha ʻi ha ngaahi founga kehekehe, ka ʻoku ʻi ai ha meʻa ʻe taha ʻoku ʻikai toe veiveiua ʻene moʻoní: ʻOku folofola maʻu mai pē ʻa e ʻOtuá kiate kitautolu. Ko e fie maʻú pē ke tau loto fiemālie ʻo ngāue mālohi ke fakatupulaki hotau ivi malava ke ʻiloʻi mo ongoʻi Hono leʻó. Hangē ko e faleʻi ʻa Palesiteni Lāsolo M. Nalesoní, “Lotu ʻi he huafa ʻo Sīsū Kalaisí fekauʻaki mo hoʻo ngaahi hohaʻá, manavasiʻí, mo ho ngaahi vaivaí—ʻio, ʻa e ngaahi fakaʻānaua ʻo ho lotó. Peá ke fakafanongo leva! Tohi e ngaahi fakakaukau ʻoku haʻu ki ho ʻatamaí. Hiki e ngaahi meʻa ʻokú ke ongoʻí pea fakahoko ʻa e meʻa naʻe ueʻi koe ke ke faí. ʻI hoʻo toutou fai ʻeni ʻi he ʻaho ki he ʻaho, māhina ki he māhina, taʻu ki he taʻú, te ke ‘tupulaki ʻi he tefitoʻi moʻoni ʻo e fakahaá’” (“Fakahā maʻá e Siasí, Fakahā ki Heʻetau Moʻuí” Liahona, Mē 2018, 95).