Ayaw Pakyasa kining Debosyonal
Mao na Kini ang Panahon
Gikan sa usa ka debosyonal nga pakigpulong, “Pagmalinawon ug Hibaloi Nga Ako Mao ang Dios,” nga gihatag ngadto sa mga estudyante sa Ensign College sa Siyudad sa Salt Lake, Utah, USA, niadtong Nobyembre 3, 2020. Basaha ang kompletong teksto sa ensign.edu.
Giunsa ninyo paggamit ang inyong panahon, ug unsa ang inyong gigamitan niini, importante kaayo.
Gikan sa panahon ni Adan ug Eva hangtod sa panahon ni Joseph ug Emma Smith, ang kalibotan hinay-hinay nga nausab gikan sa usa ka henerasyon ngadto sa laing henerasyon. Walay mga suga sa kadalanan, mga suga sa sakyanan, ug suga sa tanang matang, ang mga tawo nakatagamtam og kabuhong sa natural nga langitnong kahayag. Sa mga siyudad karon, hinoon, imposible nga makita ang langit sa kagabhion nga sama sa nakita ni Abraham, ni Moises, ni Ruth, ni Elisabeth, ni Jesus, ug sa nahaunang mga Santos sa Ulahing mga adlaw.
Ang mga tawo sa kanhiay nga mga panahon nakatagamtam usab og usa ka natural nga kahilom. Apan karon, ang kasaba gikan sa mga sakyanan, eroplano ug musika hingpit nga milukop sa natural nga kalibotan. Bisan sa hilit nga mga kalasangan, ang kahilom kasagaran mabalda sa galupad nga jet diha ibabaw sa langit.
Ug ang katawhan sa mas nauna nga panahon nakasinati og kahilom sa paagi nga dili nato mahunahuna. Karon, bisan kon kita nag-inusara, kita mahimong nakatutok sa atong mga mobile device, computer nga mga laptop, ug mga telebisyon. Ang nagkausab kaayo nga kalibotan nga atong gipoy-an napuno sa mga butang nga molingaw ug mohimo kanato nga okupado.
Duna Ka Bay Panahon?
Isip usa ka Apostol, ako karon mangutana kaninyo og usa ka pangutana: Kamo aduna bay personal nga panahon sa kahilom? Naghunahuna ko kon kadtong kinsa nabuhi sa nangagi adunay mas daghang oportunidad kay sa kanato karon nga makakita, makabati, ug makasinati sa presensya sa Espiritu. Kon ang inyong kinabuhi walay panahon sa kahilom, mahimo bang inyong sugdan karon sa pagtinguha og pipila?
Importante kini nga mahimong hilom ug maminaw ug mosunod sa Espiritu. Ang tanan nagkinahanglan og panahon sa pagpamalandong ug paghunahuna. Bisan ang Manluluwas sa kalibotan, atol sa Iyang mortal nga pangalagad, migahin og panahon sa pagbuhat sa ingon: “Samtang iyang gipalakaw ang mga tawo. Mitungas siya nga nag-inusara sa usa ka bungtod aron mag-ampo: ug sa pagkagabii na, si Jesus didto pa gihapon, nag-inusara” (Mateo 14:23).
Kitang tanan nagkinahanglan og panahon sa pagpangutana sa atong kaugalingon o magbaton og regular nga personal nga pakighinabi sa atong kaugalingon. Kita sa kanunay daghan kaayo og buhat ug ang kalibotan saba kaayo nga lisod ang pagdungog sa langitnong mga pulong “Pagmalinawon ug hibaloi nga Ako mao ang Dios” (Salmo 46: 10; tan-awa usab sa Doktrina ug mga Pakigsaad 101: 16). Nagkinahanglan kita niini nga pasalig.
Ang mga elektronic nga mga himan usa ka panalangin, apan kini makabalda usab kanato gikan sa pagpaminaw sa “malinawon, nga hinay nga tingog.” Kini kinahanglan mahimong atong sulugoon dili ang atong mga Agalon. Pananglitan, kon unyang gabii kamo mopaambit og makapadasig nga mga hunahuna gikan niini nga debosyonal diha sa social media, ang inyong smartphone usa ka sulugoon. Kon kamo nagsurf sa internet—ilabi na kon kamo nangita og dili angay nga mga sulod—ang inyong smartphone mao ang inyong agalon.
Hinumdumi unsay nakat-unan ni Elijah: “Ang Ginoo wala diha sa hangin: … ang Ginoo wala diha sa linog: … ang Ginoo wala diha sa kalayo,” apan ang Ginoo namulong, sa “hinay nga hinagawhaw nga tingog” (1 Mga Hari 19:11–12).
Giunsa Ninyo Paggamit ang Inyong Panahon?
Sa tinuod lang, pila ka oras ang inyong gigahin sa matag adlaw sa inyong smartphone o tablet, wala pay labot sa trabaho, eskwelahan, o buhat sa Simbahan?
Ang paggamit niini tukma, ug kini usa ka panalangin. Apan, kon ang mga smartphone mosugod na sa pagbalda sa atong mga relasyon sa mga higala ug pamilya—ug gani labaw ka importante, sa Dios—kita kinahanglan nga mohimo og kausaban. Alang sa pipila kaninyo, ang kausaban mahimong gamay lang; alang sa uban, kini tingali mas dako.
Ako nabalaka usab nga ang sobrang pag-text, ang pag-Facebook, ang pag-tweet, ug ang pag-Instagram mopuli na sa panag-istoryahanay. Buot nakong ipasabot ang sinsero nga pakig-istorya, direkta ngadto sa usag usa. Buot nakong ipasabot ang pakig-istorya diha sa pag-ampo uban sa atong Langitnong Amahan. Buot nakong ipasabot ang mga butang nga labing importante sa kinabuhi.
Sagad kaayo, nga ang mga batan-on anaa sa samang kwarto uban sa pamilya o mga higala apan nagkapuliki sa pagpakigsulti sa tawo nga wala gani diha. Nataligam-an nila ang usa ka oportunidad sa pagpakig-istorya niadtong anaa sa duol. Kon inyong makita nga kini nahitabo, tingali kinahanglan nga mopadala kanila og usa ka mensahe pinaagi sa text aron makuha ang ilang pagtagad!
Pipila sa labing importanting butang nga akong nakat-onan sa akong kinabuhi miabot gikan sa pagpaminaw niadtong adunay talagsaon nga kasinatian, kadtong taas na og naabtan sa kinabuhi ug nakakat-on og daghang importante nga mga butang nga kinahanglan nakong mahibaloan. Palihog pahimusli ang oportunidad sa pagbisita ug pakigsulti sa inyong mga ginikanan, iyaan ug uyoan, ug mga apohan samtang sila anaa pa gihapon uban kaninyo.
Gitahod ba Ninyo ang Sagrado nga Panahon?
Nabalaka usab ako nga ang pipila kaninyo magsusi sa inyong email, Facebook, Twitter, o Instagram nga mga account o magpadala og mga mensahe sa text atol sa labing importanting panagtigom sa gipahiuli nga Simbahan ni Jesukristo sa mga Santos sa Ulahing mga Adlaw—ang atong sagrado nga miting sa sakramento. Niining importante nga miting kinahanglang atong tutukan ang Ginoo pinaagi sa pag-ampo, pagkanta og mga himno, ug pag-ambit sa timaan sa Iyang lawas ug dugo.
Ang miting sa sakramento dili ang panahon sa pagsusi sa social media, ang balita o score sa pang-atleta nga kalihokan. Dili kamo makakonektar sa Espiritu atol sa presentasyon sa sakramento samtang nagtan-aw kamo o nagpadala og usa ka mensahe sa inyong smartphone o sa inyong tablet. Kamo nagkinahanglan og espiritwal nga koneksyon nga nagkinahanglan sa Kahayag ni Kristo, nga mopahiluna diha sa inyong mga hunahuna ngadto sa inyong mga kasingkasing ubanan sa kainit sa gugma ug debosyon.
Nasayod ko nga daghan kaninyo adunay mga kasulatan ug ubang mga kapanguhaan sa Simbahan diha sa inyong mga phone ug tablet, ug ang pipila sa ginikanan ug mga lider sa Simbahan nabalaka niini nga kalamboan, apan ako wala. Ang Simbahan kanunayng mopahiangay sa pag-uswag sa teknolohiya aron sa pagtabang sa pagpadayon sa buhat sa Ginoo, ilabi na sa misyonaryo nga buhat.
Sama pananglit, karon 98 porsyento sa mga misyon sa tibuok kalibotan ang mga misyonaryo naggamit og smartphone isip kabahin sa ilang trabaho. Kini nahimong usa ka dakong panalangin, ilabi na taliwala sa pandemya nga COVID-19. Kini talagsaong mipalambo sa ilang abilidad sa pagkonektar sa uban samtang sila motrabaho sa pagpangita, pagtudlo, ug pagbunyag. Ang mga misyonaryo napanalanginan sa milagroso nga mga paagi.
Ang kasaysayan mobalik-balik ra sa paagi nga makapaikag kaayo. Kaniadto, ang Israel mipreserbar sa mga pulong sa mga propeta sa mga linukot. Sa usa ka panahon, ang unang mga Kristiyano migamit sa codex, ang unang bersyon sa modernong basahon.
Ania kita 2,000 ka tuig ang milabay, ug ang mga tawo nagbasa sa kasulatan diha sa mga smartphone o mga tablet—nagbasa sa mga kasulatan sama sa gibuhat ni Jesus sa dihang gihatagan Siya og linukot [scroll] sa Isaias aron basahon didto sa Nazaret. Mahimo usab ninyong “i-scroll” (tan-awa sa Lucas 4:17) sa pagpangita sa mga kasulatan, apan palihog, ayaw “pag-scroll” sa mga makabalda atol sa pasundayag sa sakramento. Sigurado gayod, nga atol niadtong pipila ka minuto makatutok kamo sa Pag-ula sa Manluluwas samtang kamo magtinguha sa Espiritu sa Ginoo sa pagpanalangin kaninyo alang sa umaabot nga semana.
Ikonsiderar ang pagbutang sa inyong smartphone o inyong tablet sa airplane mode alang sa tibuok panahon sa Dominggo. Kamo maka-access gihapon sa mga kasulatan, sa kinatibuk-ang komperensiya, mga pakigpulong, mga himno, ug sa mga manwal diha sa Gospel Library nga app, apan kamo dili mabalda sa umaabot nga mga mensahe sa text o sa uban nga mga pahibalo [notification].
Makakita ba Kamo og Panahon sa Pagdangop?
Agig dugang sa pagpangita og panahon sa paghunahuna ug pamalandong, nagkinahanglan usab kita sa pagpangita og usa ka dapit, sama sa gihisgotan sa Doktrina ug mga Pakigsaad, nga mahimong “usa ka panalipod, ug … usa ka dangpanan gikan sa unos” (Doktrina ug mga Pakigsaad 115:6).
Nagkinahanglan kita og espesyal nga panahon ug dapit nga kadangpan diin makahimo kita sa pagpalong sa atong mga electronik nga himan aron makakonektar kita sa Espiritu sa Dios.
Usa sa labing maayong dapit sa pagkonektar sa Espiritu anaa diha sa templo—ang balay sa Ginoo. Siyempre, mao gihapon ang masulti sa ubang gipahinungod nga mga gambalay sa Simbahan, lakip ang mga klasehanan sa seminary ug institute. Kita makakaplag og kadangpan sa atong mga panimalay o mga apartment kon kita mopili sa pagpalong lang sa mga butang ug magmalinawon ug masayod sa mga butang sa Dios.
Aron matabangan kita sa pagdiskobre sa kalibotan diin si Adan ug Eva, Abraham ug Sara, ug si Jose ug Maria nakakita sa Dios, ug sa pagtabang kanato nga makakita og lugar nga mabati ug maminaw sa tingog sa Ginoo karon, dapiton ko kamo sa pag-adto sa templo. Kita magpaabot sa panahon kon ang mga templo maabli na usab alang sa tanan nga mga ordinansa sa proxy. Sa higayon moabli na kini, dapiton ko kamo sa pag-adto kanunay kutob sa mahimo ug palonga ang inyong smartphone ug hiposa kini sa dili pa kamo mosulod sa nataran sa templo.
Sa tanang mga ordinansa sa balay sa Ginoo, makadungog kamo og matahom nga mga pinulongan, mga pulong ug mga saad nga gihatag sa Ginoo sa Iyang mga anak. Mao lang kini ang bugtong dapit nga inyong madungog kadtong matahom, makadasig nga mga pulong.
Kon kamo dili pa sarang alang sa usa ka rekomend sa templo karon, dapiton ko kamo sa pag-andam sa inyong kaugalingon aron mahimong takos sa rekomend sa templo ug moadto sa templo kutob sa mahimo. Hinaot nga magbaton og tinguha sa pagkuha og rekomend ug sa pag-adto sa templo kanunay.
Akong ipaniguro kaninyo nga kon moadto kamo sa templo o mobisita sa nataran sa templo, kamo maglakaw sa sagrado, balaan nga yuta. Kamo makadungog sa hinay, hinagawhaw nga tingog sa Espiritu diha sa templo o sa mga sagrado nga mga nataran niini sa paagi nga dili gayod madungog diha sa mall, sa mga restawran, ug sa publikong mga dapit. Sa pagkatinuod, ang templo mao ang usa ka maanindot nga dapit aron makadawat og tubag sa inyong mga pag-ampo.
Makagahin ba Kamo og Panahon Karon?
Ang kalibotan nga atong gipuy-an karon hilabihan ka paspas nga nagpalayo gikan sa mga pagtulon-an ni Kristo sa mga balaod niini ug sa mga paagi niini sa kinabuhi. Si Satanas naningkamot og sobra pa sa paglibog sa mga anak sa Dios ug sa pagpahisalaag sa mga pinili gikan sa pagtuman sa ilang katungdanan ug sa pagdawat sa kahingpitan sa mga panalangin sa Ginoo.
Gusto ni Satanas nga kamo wala nay panahon alang sa maayo nga batasan nga inyong nakat-onan sa panimalay, sa seminary ug sa institute, ug sa inyong misyon—sama sa paghimo og inadlaw-adlaw nga pagtuon sa kasulatan, pag-ampo adlaw-adlaw, takos nga moambit sa sakramento kada semana, ug sa paghatag og tinuoray, kinasingkasing nga serbisyo. Gusto usab niya nga kamo nga wala naapil sa importanting butang ug mahinungdanong pakigbisog, dili magmatinguhaon sa pag-apil.
Apan hinumdumi, kita anaa sa pakigubat—usa ka sumpay nga pakiggubat nga gisugdan didto sa kalibotan sa wala pa dinhi sa yuta. Ayaw paghinan-aw nga dili moapil. Gahini og panahon kadtong importanting mga gawi sa matag adlaw. “Isul-ob ninyo ang tanang kahimanan sa gubat nga gihatag sa Dios,” sama sa gidapit ni Pablo nga atong buhaton. “Kay wala kita makig-away batok sa dugo ug unod, kondili batok sa mga daotang espirituhanong gahom diha sa kalangitan, sa mga pangulo, sa mga anaa sa gahom ug sa mga daotang gahom nga nagmando niining kalibotan sa kangitngit.” (Tan-awa sa Mga Taga-Efeso 6:11–12.)
Isip usa ka Apostol ni Ginoong Jesukristo, nagdapit ako kaninyo sa paggahin og panahon sa pag-apil sa gubat. Isul-ob ang tibuok hinagiban sa Dios, ug buhata kini karon. (Tan-awa sa Alma 34:32.) Ayaw paghulat hangtod kamo maminyo, magsugod sa inyong tibuok kinabuhi nga trabaho o magkahamtong. Ang Ginoo nagkinahanglan kaninyo karon!