Digital Lamang: Mga Young Adult
Unsa Kaha Kon Ako Dili Makaingon nga “Ako Nasayod”?
Dili igsapayan ang kalig-on sa inyong pagpamatuod, adunay usa ka dapit alang kaninyo sa Simbahan.
Ang akong pagpamatuod naglangkob og duha ka bahin: mga butang nga akong nahibaloan nga tinuod ug ang mga butang nga akong gituohan nga tinuod.
Nasayod ug nagtuo: Gigamit nako ang duha ka pulong kon magpaambit ako sa akong pagpamatuod.
Importante kini nga mga pulong kanako—dili lamang tungod kay kini nga nagkalain-laing pinulongan usa ka tukma nga hulagway sa akong tinuohan, apan tungod kay kini nagpahinumdom kanako nga wala ako nagkinahanglan og hingpit nga kahibalo sa matag doktrina o hingpit nga tubag sa matag pangutana sa kasaysayan sa Simbahan aron ipahayag ang akong pagtuo sa gipahiuli nga ebanghelyo ni Jesukristo.
Adunay usa ka dapit sa Simbahan alang sa tanang tawo, dili igsapayan ang kalig-on sa ilang mga pagpamatuod. Apan ang uban kanato sa Simbahan adunay kalagmitan nga motandi sa atong mga pagpamatuod ngadto sa uban—ilabi na kon kita nakigbisog sa mga pangutana o mga pagduhaduha sa mga aspeto diin ang uban daw nagpamatuod nga adunay kasegurohan. Usahay kon makadungog ako sa mga miyembro sa Simbahan nga mosangyaw sa pulpito sa unsay ilang nasayran nga tinuod, kini makapahunahuna nako sa kaugalingon nakong pagpamatuod—ug sa mga pagpamatuod sa kinatibuk-an.
“Unsa kaha kon ako dili makaingon nga ‘Ako nasayod’?”
“Unsa kaha kon ako adunay mga pangutana—ug gani mga pagduhaduha—mahitungod sa pipila ka aspeto sa ebanghelyo?”
“Aduna bay usa ka dapit alang kanako sa Simbahan?”
Usa ka istorya sa Bag-ong Tugon naghatag kanako og dako kaayo nga paglig-on sa kasegurohan nga ang mga panalangin sa ebanghelyo anaa alang sa tanan niadto kinsa mobutang sa ilang hugot nga pagtuo kang Jesukristo. Usa ka lalaki midala sa iyang nasakit nga bata ngadto ni Jesus, nga naghangyo, “Busa kaluy-i ug tabangi intawon kami kon makahimo ka.”
Mitubag si Jesus, “Nganong miingon ka man, kon makahimo? Ang tanan mahimo sa tawo nga may pagtuo.”
Ang lalaki mihatag dayon og dili kasagaran nga tubag, usa ka tubag nga nagpakita nga ang iyang pagtuo giubanan og gamay nga pagkawalay pagtuo: “Ug dihadiha ang amahan sa bata miingon nga naghilak, duna koy pagtuo apan dili pa kini igo. Tabangi intawon ako.”
Si Jesus dayon miayo sa bata. (Tan-awa sa Marcos 9:14–27.)
Si Jesus wala mangayo sa lalaki og hingpit nga kahibalo sa wala pa Siya mihimo og milagro. Ni wala Siya namugos og dili matarog nga hugot nga pagtuo. Ang lalaki nga naghangyo sa makaayo nga hikap sa Manluluwas alang sa iyang anak mipahayag og pagtuo ug, diin kana nagkulang, usa ka tinguha nga motuo.
Ug kadto igo na alang kang Jesus.
Kini nga leksiyon magamit nganhi kanato nga nagtinguha sa makaayo nga gahom ni Kristo sa atong kinabuhi karon. Sama sa gipahinumdom kanato sa mga propeta ug apostoles sa modernong panahon, ang tinguha nga motuo igo na sa pagsugod.1 Tinuod, nangandoy kita sa pagpalig-on sa atong mga pagpamatuod; nagtinguha kita og usa ka lig-on nga pagtuo nga motubo ngadto sa hingpit nga kasayoran (tan-awa sa Alma 32:21–22, 26–34). Apan hangtod nga dili pa kana mahitabo, ang paglaom nga ang mga saad sa ebanghelyo ni Jesukristo tinuod ug ang tinguha nga motuo nga ang ebanghelyo gipahiuli na nganhi sa yuta pinaagi sa mga propeta sa modernong panahon igo na alang kanato aron makapadayon sa unahan nga adunay pagtuo.
Busa unsa man ang inyong mabuhat kon kamo dili mobati nga kamo makasulti nga “Ako nasayod”? Kamo makaseguro nga adunay usa ka dapit alang kaninyo sa Simbahan ni Jesukristo. Kamo masaligon nga makapahayag sa inyong pagpamatuod kabahin sa unsay inyong gituohan nga tinuod—ug bisan kon unsa ang inyong gilaoman nga tinuod—samtang nag-ambit sa mga panalangin sa ebanghelyo. Ug ang matag usa kanato mahimong kanunay nga motawag sa Dios pinaagi sa pag-ampo, nga magsulti, “Duna koy pagtuo apan dili pa kini igo. Tabangi intawon ako,” ug magtan-aw sa Iyang gugma nga mosulod sa atong mga kinabuhi ug sa Iyang mga milagro nga mopakita.