Iloaina o Togafiti a lo Tatou Fili
E alala le tusitala i Arisona, ISA.
O le nofouta i togafiti a le fili e mafai ona fesoasoani i soo o Iesu Keriso ia utuvai mai i Lona mana ma le malosi e faatoilalo ai Satani ma e mulimuli ia te ia i taua o loo i luma atu.
Ata pue mai le Getty Images
Ina ua ou auauna atu i le militeli, o se tasi o mea muamua sa ou aoaoina o le taua o le iloa e uiga i le fili ina ia mafai ai ona tau lelei e faasaga ia i latou. Sa ou faaaluina le taimi e suesue ai i metotia ma auala o fili ina ia mafai ai ona ou atiina ae ni fuafuaga e atamai ai ma faatoilaloina i latou i le tulaga na matou feiloai ai i le taua.
Ona o o tatou fili faaleagaga, o Satani ma e ua mulimuli ia te ia, tatou te le vaaia i latou, e tele ina galo ai ia i tatou o loo latou autilotilo mai ia i tatou ma taumafai e faaosooso i tatou. Na lapatai mai Peresitene George Q. Cannon (1827–1901) o le Au Peresitene Sili: “Ua ou faia le faaiuga e faapea, afai e tatala o tatou mata e vaai i le lalolagi o agaga o loo siomia ai i tatou, … o le a tatou le leoleoina ma faatamala ma le le popole pe na i ai ia i tatou le Agaga ma le mana o le Atua ma i tatou pe leai; ae o le a faaauau pea ona tatou mataala ma le agaga tatalo i lo tatou Tama Faalelagi mo lona Agaga Paia ma ana agelu paia ia faatasi ma i tatou e faamalolosia ai i tatou e faatoilalo faatosinaga leaga uma.”1
O le malamalama i le mana ma tomai o le tiapolo e mafai ona fesoasoani ia i tatou e iloa ai le faaleagaina ma le faatamaiaga e ono oo i ai o loo saili o ia ma ana au e faatiga mai ia i tatou. E tatau ona tatou nofouta i taimi uma ma saunia a tatou auala o le puipuiga ma le osofaiga e aloese ai mai le pauu atu i faaosoosoga ma faatosinaga.
Na amata le taua i le muai olaga.
Ina ua tatou tau i le Taua i le Lagi, sa tatou le tau ma fana ma pomu ae o le molimau ma le talitonuga. Na aoao mai Peresitene Russell M. Nelson: “O lenei taua i le lagi e le o se taua o le faamasaaina o le toto. O se taua o manatu feteenai—o le amataga o le finauga.”2
Na o mai soo o le Tama Faalelagi ma Iesu Keriso i le lalolagi ma tino faaletino. O loo i ai foi Satani ma ana au i le lalolagi, ae ua na o ni agaga.3 O le taua lea na amata i le muai olaga e lei muta. Talu mai le taimi o Atamu, na faaauau pea e Satani ma lana autau toatele ona tau faasaga ia i latou o e sa lagolagoina le Tama ma Lana fuafuaga o le faaolataga. Na taua e Elder Ulisses Soares o le Korama a Aposetolo e Toasefululua: “O le taua o le lelei e tetee atu ai i le leaga o le a faaauau pea i o tatou olaga atoa talu ai o le faamoemoega o le fili o le faia o tagata uma ia pagatia e pei o ia. O le a taumafai Satani ma ana au e faafenumiai o tatou mafaufauga ma puleaina e ala i le faaosoosoina o i tatou ia agasala. Afai latou te mafaia, o le a latou faaleagaina tagata lelei uma. Ae ui i lea, e taua le malamalama e na o le pau le tulaga latou te maua ai le mana e pulea ai i tatou pe afai lea tatou te faatagaina.”4
O autau a le tiapolo e le itiiti le fuainumera. Faatasi ai ma le “o le tasi vaetolu o au o le lagi” (Mataupu Faavae ma Feagaiga 29:36) na tulieseina mai le lagi faatasi ma Satani, o le tele o agaga e i lalo o lana poloaiga. “Ua siomia i tatou e temoni, ioe, ua lio i tatou e agelu a le ua saili e faaumatia o tatou agaga” (Helamana 13:37).
E pei lava o le taua i le lalolagi, e ala i le aoaoina o mea tatou te mafaia e uiga i le tetee atu i malosiaga faaleagaga—o o latou gafatia, malosiaga ma vaivaiga, ma uunaiga—e mafai ona tatou saunia ai e tau lelei e faasaga ia i latou. E mafai ona tatou aoaoina ni nai auala autu e faaaoga e Satani e ala i le suesueina o tusitusiga paia ma upu a perofeta o aso nei.
1. E tuu e le fili le faamamafa i le osofaia o e sili ona malolosi.
Na faaalia e Peresitene Siaosi A. Samita (1817–75) o le Au Peresitene Sili lenei mea ina ua ia faamatala mai lenei fagogo mai Saina:
“O se tagata, sa malaga atu i le atunuu, sa sau o ia i se aai tele, ua matua mauoa ma ofoofogia; sa ia tilotilo i ai ma fai atu i lana taiala, ‘Atonu o se nuu sili ona amiotonu lenei, aua e na o le toatasi lava le tiapolo o loo ou vaai i ai i lenei nuu maoae.’
“Sa tali mai le taiala, ‘Lau susuga, e te le malamalama; o lenei aai e matua amioleaga lava … lea e manaomia ai le na o le tasi le tiapolo e taofia ai i latou uma.’
“O le malaga mamao teisi atu, sa tau atu ai i se ala gaoa ma vaaia ai se toeaina o taumafai ia oo atu i le tafā mauga, na siomia e ni tiapolo tetele, lapopoa, ma foliga talatala se fitu.
“‘Aisea,’ o le tala lea a le tagata malaga, ‘atonu o se toeaina matuai amioleaga lava lenei, sei vaai i le tele o tiapolo o loo siomia o ia.’
“O lenei mea,’ na tali mai ai le taiala, ‘na o le pau lea o le tagata amiotonu i totonu o le atunuu ma e toafitu tiapolo e sili ona tetele o loo taumafai e aveese o ia mai lona ala ae e le mafai ona latou faia.’”5
Afai e mafai e Satani ona taitai ese se tagata o le Ekalesia, ua ia maua se manumalo sili atu nai lo se tasi e lei faia lava se feagaiga ma le Atua. Na aoao mai Elder Larry R. Lawrence, o se tagata ua malolo faamamaluina o le Au Fitugafulu: “Ua mataitu e le tiapolo tagata uma, ae maise lava i latou o e ua sili ona gafatia mo le fiafia e faavavau. Ua manino lava lona lotoleaga i soo se tasi o le ua i luga o le ala i le faaeaga.”6
O se taua e sili atu ona taua e manumalo ai le fili pe afai e faatoilaloina se taitai o le Ekalesia e le fili. Na tusia e Peresitene Spencer W. Kimball (1895–1985) e faapea: “E manao Satani i tagata uma lava, ae maise lava, o loo ia atuatuvale mo tagata taitai o e o i ai le uunaiga. Atonu e mafai ona ia taumafai ma le malosi tele e fai atu i tagata o e atonu o le a avea ma ona tetee aupito sili, o lea e mafai ai e tagata i nofoaga maualuluga o e na faatauanauina le toatele o isi ia aua nei avea ma auauna ia Satani.”7
O le iloaina o le a tuu e Satani ana au i ona fili sili ona malolosi e mafai ona fesoasoani ia i tatou e saunia ai e fetaiai ma taua i le olaga atoa. E mafai ona uunaia i tatou e faaauau pea ona faatutu puipuiga e faasaga i lo tatou fili faaleagaga.
O le iloaina o lenei mea e mafai foi ona fesoasoani ia i tatou a o tatou faasoa atu le talalelei i a tatou uo ma aiga. Na saunoa mai Elder Ronald A. Rasband o le Korama a Aposetolo o Toasefululua: “O loo tatou i ai i le taua ma Satani mo agaga o tagata. Na tusia laina o le taua i lo tatou muai olaga. Na liliu ese Satani ma le tasi vaetolu o fanau a lo tatou Tama i le Lagi mai i Ana folafolaga o le faaeaga. Talu mai lena taimi, o loo tau pea auauna a le fili ma [tagata] faamaoni o ē ua filifilia le fuafuaga a le Tama.”8
A o tatou faasoa atu le talalelei i le iloaina o le a oo foi tagata uma i a latou lava taua e faasaga ia Satani, e mafai ona tatou saunia lelei e iloa na taua ma auai faatasi ma isi i le tau faasaga ia te ia e tusa lava po o a o latou talitonuga.
2. O Satani ma ana au amioleaga o le a taumafai e taofia mea e tutupu e tāua faaleagaga.
Mafaufau i faataitaiga nei mai tusitusiga paia:
-
Sa tuu atu e Satani le uunaiga tele ia Atamu ma Eva e aai i le fua faasaina i le faatoaga o Etena, ma le talitonu o le faia o lena mea, e mafai ai ona ia faaumatiaina le fuafuaga o le faaolataga a o lei mafai ona toe alualu i luma (tagai Mose 4:6–12).
-
Ina ua uma ona vaai Mose faafesagai ma le Atua, “sa alaga Satani ma le leo tele, ma sa leoleoa i luga o le eleele, ma poloaiina” Mose e ifo atu ia te ia (Mose 1:19).
-
Ina ua uma ona anapogi Keriso mo aso e 40 ma sa talanoa ma le Tama Faalelagi, sa taumafai Satani e faaosooso ia Keriso e faaaoga sese Lona mana (tagai Mataio 4:2–11; Luka 4:1–13).
-
Na lofituina Iosefa Samita i le pogisa a o lei faaali mai le Tama Faalelagi ma Iesu Keriso ia te ia e amata ai le Toefuataiga o le talalelei i le lalolagi (tagai Iosefa Samita—Talafaasolopito 1:15–17).
O le toatele o isi i tusitusiga paia i le aluga o taimi, sa i ai ni uunaiga leaga e tuu i o latou luga e taofi ai la latou vaega i le fuafuaga a le Tama Faalelagi.
I o tatou olaga, e tatau ona tatou nofouta o le a tuu e Satani po o e mulimuli ia te ia le faamamafa i le mauaina o le pule ina ia taofia ai se mea paia na tupu po o taunuuga o lena mea na tupu. E toafia i tatou ua pauu atu i na faaosoosoga, oo i tofotofoga faaletagata lava ia, pe feagai ma se faafitauli ao lumanai ai se mea faaleagaga na tupu i o tatou olaga? O le mauaina o se valaauga fou, saunia e alu i le malumalu, po o le auai i soo se mea faaleagaga e seasea lava ona sologa lelei.
Na saunoa Peresitene Polika Iaga (1801–77) i se tasi taimi, “Pe a faamanuiaina tagata taitoatasi i faaaliga vaaia, faaaliga ma faaaliaga maoae, ia faaeteete laia, ona ua latalata atu le tiapolo ia te oe, ma o le a faaosoosoina oe e tusa ai ma le faaaliga vaaia, faaaliga, po o le faaaliaga maoae ua e mauaina.”9
3. O le uunaiga a le tiapolo o le faamaualuga.
I le muai olaga, sa fai atu Satani i le Tama Faalelagi, “o le a ou togiolaina tagata uma … ; o le mea lea, ia tuu mai ia te au lou mamalu ”(Mose 4:1). O lena faamaualuga na oo atu ai i lona pau ma afua ai ona tuli o ia i fafo. Sa tusia e Isaia:
“Ua e paʼū ifo lava mai le lagi, E, Lusifelo e, le atalii o le taeao! …
“Ona sa e fai ifo i lou loto, o le a ʼOu alu aʼe i le lagi, o le a ou sii loʼu nofoalii i luga aʼe o fetu a le Atua: …
“… O le a avea A’u e pei o Le Silisili Ese ”(Isaia 14:12–14).
E tatau ona tatou faaeteete i lo tatou lava faamaualuga ma aloese mai le faatagaina o Satani e faaaoga e faaosooso ai i tatou. Mo se faataitaiga, e mafai e Satani ona faaaoga lo tatou faamaualuga e faaosooso ai i tatou ina ia le fiafia e ala i se mea e fai mai ai se tasi e faapea tatou te le toe foi mai i le lotu. Pe e mafai foi ona ia faaaogaina lo tatou faamaualuga e uunaia ai i tatou ina ia taulai atili atu i le mea sao nai lo le faalogo ma le alofa atu i se isi tagata.
O le iloa o auala a Satani e mafai ona fesoasoani ia i tatou e faatoilalo ai o ia.
O loo taumafai Satani ma ana au e faatoilalo i tatou. Ua siomia i tatou e nei fili ma ua tatou gauai atu i a latou taumafaiga i aso uma o o tatou olaga. E le tatau ona tatou manatu faatauvaa i lo latou malosi pe mafaufau foi i a latou mafuaaga e le manatu mama i ai.
Ae peitai, ua saunia i tatou mo lenei taua talu ai a o lei fananau mai i tatou. O Peresitene Iosefa F. Samita (1838–1918) na i ai se faaaliga vaaia na ia iloa ai le tele o agaga filifilia o e sa “maua a latou lesona muamua i le lalolagi o agaga ma sa saunia i latou e tutulai mai i le taimi e tatau ai o le Alii e galulue i lana tovine mo le faaolataga o agaga o tagata” (Mataupu Faavae ma Feagaiga 138:55–56). O tagata uma i lenei lalolagi na filifili e mulimuli i le fuafuaga a le Tama Faalelagi i le muai olaga ma e mafai ona toe faia.
Na silafia e lo tatou Tama Faalelagi o nei aso e gata ai o le a tumu i tulaga lamatia, piopio, ma le taufaalata. Ina ia faatoilaloina Satani ma ana mea na oo i ai, o malosiaga mamana i taua mulimuli a o lei oo i le Afio Mai Faalua o le Faaola, e tatau ona tatou taumafai ia avea ma nisi o afafine ma atalii e sili ona malolosi ma faamaoni o le Atua.