Faatoilaloina o le Faailoga Lanu ma le Faailoga Tagata: E Mafai Ona Tatou Fausia Ni Alalaupapa

A o tatou fesoasoani e faapotopoto Isaraelu ma faatuina Siona, e mafai ona tatou faalauiloa atu le faaaloalo mo fanau uma a le Atua.

Ata

two happy girls as friends hold hands

O se tasi o upumoni mamana o le talalelei toefuataiina — o se tasi e i ai se aafiaga loloto — e faapea “e tofu i tatou ma se gafatia paia ona o tagata taitoatasi o se atalii po o se afafine o le Atua. E tutusa tagata uma i Lana silafaga.”¹

A o saili tagata o le Ekalesia e mulimuli i le poloaiga ina ia tasi (tagai i le Mataupu Faavae ma Feagaiga 38:27) ma ia aumai i luma ma faatu le faamoemoe o Siona (tagai i le Mataupu Faavae ma Feagaiga 6:6), na valaaulia i tatou e Peresitene Russell M. Nelson “ia taimua i le lafoaia o uiga ma soo se faatinoga o le faailogalanu” ma faasoa atu ni auala e mafai ona tatou “faailoa atu le faaaloalo mo fanau uma a le Atua.”² Ua ia uunaia i tatou, a o tatou fausia Siona, ia fausia foi ni alalaupapa o le faauo, galulue faatasi, ma le malamalama.³

“Tatou te fesootai uma lava, ma ua ia i tatou se tiutetauave na tuuina mai e le Atua e fesoasoani e faaleleia atili ai le olaga mo i latou o loo siomia ai i tatou,” na ia saunoa ai. “E le tatau ona tutusa pe foliga tutusa i tatou ina ia i ai le alofa o le tasi i le isi. E le tatau foi ona tatou malilie faatasi ma le tasi ma le isi ina ia alofa le tasi i le isi. Afai e i ai so tatou faamoemoe e toe maua mai le agalelei ma lagona o tagata o loo tatou moomoo i ai, e tatau ona amata ia i tatou taitoatasi, o le tagata e toatasi i le taimi. “⁴

O Loo I Ai se Avanoa mo Tagata uma

Ua uunaia i tatou e Peresitene Nelson “ina ia faalautele lo tatou li’o o le alofa e opo mai ai le aiga atoa o tagata.”⁵ E mafai faapefea e i tatou o tagata o le Ekalesia ona fesoasoani e fausia se nuu o le Au Paia i le lalolagi atoa lea e lagona ai e tagata uma le taliaina ma le taumafai e ola i le filemu ma le lotogatasi o le tasi ma le isi e tusa lava po o le a le ituaiga, atunuu, aganuu, aoaoga feusuai, vaitausaga, itupa, aoaoga, tulaga tau tamaoaiga, tulaga o le gafatia, pe soo se isi lava eseesega?

O le tali o le, ioe, e ala i lo tatou Faaola o Iesu Keriso. E pei ona saunoa mai Peresitene Dallin H. Oaks, Fesoasoani Muamua i le Au Peresitene Sili, “Ua na o le talalelei lava a Iesu Keriso e mafai ona tuufaatasia ma aumaia le filemu i tagata o ituaiga ma atunuu.”⁶ E mafai e Iesu Keriso ona suia o tatou loto (tagai i le Mosaea 5:2). Ua ia te Ia le “mana e faamalolo ai” (Mareko 3:15).

A o tatou o mai i tatou lava ia Keriso, tatou te maua se malamalama loloto atu i le upumoni loloto na a’oa’o mai e Peresitene Nelson, o le Alii ua “valaaulia tagata uma e o mai ia te Ia.”⁷

O loo i ai se avanoa i le Ekalesia a le Faaola mo tagata uma o e naunau e mulimuli ia te Ia ma “ia faamuamua le Atua” i o latou olaga. O le finagalo alofa o le Atua e le faalagolago i le ituaiga, le lanu o tatou pa’ū, po o isi uiga ae, o lo tatou tuuto atu ia te Ia ma lo tatou naunau e tausi Ana poloaiga.⁸

E Mafai Ona Tatou Taimua i le Aapa Atu

Afai tatou te maua i totonu o i tatou lava se mea e atagia mai ai uiga faaalia po o amioga e tusa ai ma le faailoga tagata, e manaomia ona tatou lafoaia i a tatou taumafaiga ina ia tasi, aua afai tatou te le tasi, e le o i tatou o Ana (tagai Mataupu Faavae ma Feagaiga 35:2; 38:27). “E tatau i tagata o le Ekalesia ona taimua i le faatupulaia o le faaaloalo mo fanau uma a le Atua. … Ua latou taumafai e avea ma tagata agalelei i mea uma, ma tetee atu i soo se ituaiga o faailogalanu. “⁹

I le avea ai ma tagata o le “tino o Keriso” (1 Korinito 12:27), tatou te manaomia le tasi ma le isi, “ina nei i ai i le tino se maseiga, a ia fetausiai faatasi uma itu tino. Pe afai e tiga le tasi itu tino, ia tiga faatasi ai itu tino uma lava.” (1 Korinito 12:25–26).

O le tatalo, suesue, ma le manatunatu loloto e mafai ona fesoasoani ia i tatou e iloa ai le auala e mafai ai ona tatou alolofa atili i le Atua ma Ana fanau uma. O le fausia o uiga lelei e ono faauigaina o le faatoilaloina o o tatou lava faaituau, mafaufauga, po o talitonuga taatele a o tatou fegalegaleai ai ma le tasi ma le isi. O le faia o se taumafaiga ia malamalama i aafiaga o i latou e le pei o i tatou e mafai ona pupula ai o tatou mata i vaaiga eseese ae taua.

Na saunoa foi Peresitene Oaks e faapea, o “le masalosalo o tagata ese po o le faatautee i faigauo pe e oo lava i le alofa pe a fua mai i fesootaiga patino le malamalama ma le faaaloalo masani.¹⁰

I itulau o loo mulimuli mai, o le a e vaaia ai aafiaga, manatu, ma malamalamaaga e uiga i le fausiaina o alalaupapa a o tatou fausia Siona.