E Na’o le Faatekinolosi: Autalavou Matutua
O Auala e 4 e Manatua ai Lou Taua Paia
E faigofie ona galo po o ai moni lava i tatou—o fanau a matua faalelagi ma se tofi taua paia. O nai auala nei ia manatua.
O le malamalama i lo tatou faasinomaga paia e mafai ona tatou maua ai le malosi, mautinoa, ma le faamoemoega. Ae o o tatou olaga i aso taitasi e masani ona faatumulia i tofotofoga ma mea faalavefau ia e mafai ona faigofie ai ona galo ia i tatou po o ai i tatou o ni fanau a le Atua e i ai le taua e faavavau ma gafatia e le faatapulaaina.
O le mea e laki ai, ua ofoina mai e taitai o le Ekalesia ni fautuaga e fesoasoani ia i tatou e manatua ai lo tatou taua paia.
1. Aoao ia Iloa le Agaga
“O le taua faaleagaga o lona uiga o le faatauaina o i tatou lava i le auala o loo faatauaina ai i tatou e le Tama Faalelagi, ae le o le auala e faataua ai e le lalolagi i tatou. Sa fuafuaina lava lo tatou taua ae tatou te lei o mai i lenei lalolagi. ‘E le mafuatia le alofa o le Atua ma o le a tumau pea e faavavau.’ …
“… A tatou lagonaina le Agaga, … tatou te iloaina o mea ua tatou lagonaina ua mai lo tatou Tama Faalelagi. …
‘Mafaufau o loo e faitauina tusitusiga paia i se taeao ma ua musumusu lemu atu le Agaga ia te oe o mea o loo e faitauina e moni. O mafai ona e iloaina le Agaga ma fiafia ua e lagonaina Lona alofa ma agavaa e mauaina?
“…. Atonu e seāseā, ona tatou maua se faailoaga tele faaleagaga i o tatou olaga; ae e mafai ona tatou olioli soo i musumusuga mālū a le Agaga Paia, o loo faamaoniaina le upumoni o lo tatou taua faaleagaga.”1
—Sister Joy D. Jones, sa avea muamua ma Peresitene Aoao o le Peraimeri
2. Tumau i le Ala o le Avea ma Soo
“Atonu o le usiusitai e le o le faagasologa tele lea o le tau gagauina, mimiloina ma le sasaina faamalosi o o tatou loto i se mea e le talafeagai ma i tatou. Nai lo lena, o le faagasologa lea tatou te iloaina ai mea o loo fauina moni ai lava i tatou.
‘Ua foafoaina i tatou e le Atua Silisili ese. O Ia o lo tatou Tama Faalelagi. O i tatou moni o Ana fanau agaga. Ua foafoaina i tatou i anomea faalelagi sili ona taua ma silisili ona lelei, ma o lea o loo tatou tauaveina ai i totonu o i tatou lava se totino o le paia.
“… O le pefu ma le eleelea o le lalolagi e pisipisia ai o tatou agaga, ma faigata ai ona iloaina ma manatuaina lo tatou tofi ma le faamoemoega.
“Ae e le mafai ona suia ai o tatou tagata moni. O le paia autu o lo tatou natura e tumau pea. Ma o le taimi tatou te filifili ai e liliu atu o tatou loto i lo tatou Faaola pele ma savavali i le ala o le avea ma soo, e tupu lava se mea faavavega. E faatumulia e le alofa o le Atua o tatou loto; o le malamalama o le upumoni e faatumulia ai o tatou mafaufau; e amata ona leai so tatou manao i le agasala; ma tatou le toe mananao ai e savavali i le pouliuli.
“E oo ina tatou le vaai atu i le usiusitai o se faasalaga ae o se ala laveai e tau atu i lo tatou taunuuga paia. Ma e amata faasolosolo lava ina aveesea mea piopio, mea eleelea, ma tapulaa o lenei lalolagi. E iu lava, ina faaalia mai le agaga e faavavau e silisili ona taua, o le tagata faalelagi o loo i totonu o i tatou, atoa ai ma se susulu o le lelei e avea ma o tatou natura.”2
---Peresitene Dieter F. Uchtdorf, Fesoasoani Lua talu ai i le Au Peresitene Sili
3. Vaavaai mo le Aao o le Atua i Lou Olaga
“O le a se mea e tatau ona e sailia mo lou lava olaga? O a vavega a le Atua e faamanatu atu ai ia te oe o loo latalata mai o Ia, ma faapea mai, ‘O lea Ou te i ai iinei’? Mafaufau i na taimi, o nisi o aso taitasi, na faatino ai e le Alii se mea i lou olaga—ona toe galue ai foi lea. …
“… E tofu i tatou ma se uiga paia i totonu. Pe a tatou vaaia le Atua o galue e ala mai ia i tatou ma faatasi ma i tatou, tau ina faamalosiauina i tatou, ma faafetaia mo lena taitaiga. Ina ua fetalai mai lo tatou Tama o i le Lagi, ‘O la’u galuega ma lo’u mamalu lenei—ia aumaia le tino ola pea ma le ola faavavau o le tagata’ [Mose 1:39], Sa talanoa o Ia e uiga i Ana fanau uma—aemaise lava o oe.”3
—Elder Ronald A. Rasband o le Korama a Aposetolo e Toasefululua
4. Aua Nei Galo Lou Faasinomaga Paia
“E i ai se faasinomaga taua se tasi tatou te faasoa atu i le taimi nei ma le faavavau, o se tasi e le tatau lava ona aveesea i la tatou vaai. … O oe ma o le a avea pea oe o se atalii po o se afafine agaga o le Atua. …
“O le mea moni faavae o matua faalelagi e le na o sa‘u upumoni po o sau upumoni. O le upumoni e faavavau. Ua tusia i mataitusi lapopoa, matatetele, ma mataitusi tetele. O le malamalama i lenei upumoni—malamalama moni i ai ma taliaina—o le suia lea o le olaga. E tuuina atu ai ia te oe se faasinomaga tulaga ese e leai se tasi e mafai ona aveesea mai ia te oe. Ae e sili atu nai lo lena, e tatau ona e maua ai se lagona tele o le taua ma se lagona o lou taua e le iu. Ma le mea mulimuli, ua tuuina atu ai ia te oe se faamoemoega paia, mamalu, ma agavaa i le olaga. …
“… Ou te augani atu ia te outou taitoatasi ia faamolemole ia tausisia lo outou faasinomaga paia i le totonugalemu o mea uma tou te faia.”4
---Peresitene M. Russell Ballard, Sui Peresitene o le Korama a Aposetolo e Toasefululua.