Ua Na’o Tusiga Faatekinolosi: Talavou Matutua

O Motugaafa e 5 e Fiafia ai i le Kerisimasi Pe Afai Ua E Mamaoese mai le Aiga

Saunia e Alexandra Palmer

Mekasini a le Ekalesia

O auala nei e lima e faatoilalo ai faanoanoaga o le Kerisimasi pe afai o loo e faaaluina na o oe ia aso malolo.

E alala le tusitala i Iuta, ISA.

O se tasi o pese masani o le Kerisimasi o le pese a Elevisi o le “Blue Christmas [Kerisimasi Faanoanoa].” Ou te lē fiafia i ai. E ui lava, o upu, “o le a i ai sa’u Kerisimasi faanoanoa e aunoa ma oe. O le a ou faanoanoa tele i le mafaufau atu ia te oe” e mafai ona sili atu ona fetaui mo talavou matutua. Pe e mo misiona, galuega, aoga, pe ona o i tatou po o o tatou aiga e nonofo i atunuu mamao, e toatele i tatou e tatau ona faaaluina le Kerisimasi e mamao ese mai o tatou aiga ma uo.

O le Kerisimasi o se aso malolo maoae e faamanatu ai le soifua mai o le Faaola, ae o le tele o tu ma aga masani o le Kerisimasi e taulai atu i le faaaluina o taimi ma isi: tatou te potopoto e aai faatasi; tatou te tuuina atu meaalofa i isi; tatou te usuina ni pese pe faitau faatasi le tala o le soifua mai o le Faaola.

E mafai la faapefea ona e faia ia anoa le Kerisimasi pe afai o e faaaluina ai na o oe? O manatu nei e lima. E tusa lava pe o oe o se faifeautalai e mafai lava ona e faia nei gaoioiga, e ui atonu e tatau ona e fetuunaia pe faia i latou i se aso sauniuni.

1. Ia faaauau pea a outou tu ma aga masani.

E le faapea ona e te le o mafuta faatasi ma lou aiga o le a le mafai ona e faaauau ai pea tu masani faaleaiga. Ia fai kuki gingerbread lelei na po o tamales manaia. Pe, fatu sa oe lava tu masani. A’o e filifili po o le fea o tu masani e fai, ia taulai atu i [tu masani] ia e faamanatu atu ia te oe ia Keriso: a o e taulai atu i le Faaola, e le gata e te lagona le agaga o le Kerisimasi ae faapea foi le Agaga Paia, o Lana uunaiga e aumaia ia te oe le filemu faaopoopo ma le mafanafana.

2. Taulai atu i ou tupuaga.

O le toatele o o’u tuaa na o mai mai Nouei, ma o le tele o a’u manatuaga o le Kerisimasi e tutotonu i tu masani ma meaai faaNouei. A aunoa ma lo’u aiga, semanu e na o sina vaega o nei tu masani e mafai ona ou faia, ae e mafai lava ona ou mafaufau o’u tupuaga. O le vaitaimi o le Kerisimasi o le taimi lelei lava lea e fai ai le galuega o talafaasolopito o aiga, pe o le sailia o igoa e ave i le malumalu, toe saili pe na faapefea ona faaaluina e ou tuaa o latou aso malolo, po o le tusitusi foi i lau api o talaaga. Po o a lava mea e te filifili e fai, o le toe mafaufau i ou tupuaga o le a fesoasoani e te lagona atili ai le fesootai atu i lou aiga—o i latou uma o loo soifua ma i latou ua maliliu—ma aumai ia te oe se faamoemoega sili atu.

3. Ia faatasitasi ma isi.

E ono manaomia e lenei mea le lototele, aemaise lava pe afai e te matamuli, ae e te le tau faaaluina atoa lau Kerisimasi na o oe. Ma e te le tau faia foi ni mea e te le toafimalie ai: ia faatasitasi ma isi talavou matutua mo le taumafataga o le afiafi, pesepesega, pe tafafao. Atonu e i ai isi tagata e pei o outou e lē o faaaluina lo latou Kerisimasi i le aiga, o lea ia taulai faapitoa atu i na tagata e mafai ona faaaogaina se valaaulia faauo.

4. Fiafia i le tau pe teuteu faalelei totonu.

E faalagolago i le mea o loo e nofo ai, o le Kerisimasi o le ogatotonu o vaitau sili ona malulu po o le sili ona mafanafana, o lea ia faaaoga lelei! Alu e faase’e po o le savali sopo, faase’e aisa po le tietie uila. Po o le, afai e te le fiafia i gaoioiga i fafo, nofo i totonu ma tuu i luga ni teuteuga. E tele teuga faigofie o le Kerisimasi e mafai ona e faia e faamanaia ai lou fale.

5. Auauna atu i isi.

O nai mea laiti o le a faigofie atu ona avatua oe i le agaga o le Kerisimasi nai lo le auauna atu. Ua saunia e le Ekalesia le tele o punaoa e fesoasoani ia te oe ia mafai ai ona auauna atu i isi, pe e ala i le faalauiloa o le #LightTheWorld po o le JustServe.org. Ua faamanatu mai ia i tatou e Sister Jean B. Bingham, o le Peresitene Aoao o le Aualofa e faapea “o faatinoga faigofie o le auauna atu e mafai ona i ai ni aafiaga loloto i isi—faapea foi ia i tatou lava. O le a le mea na faia e le Faaola? E ala i Ana meaalofa faalelagi o le Togiola ma le Toetu … ’e leai lava se isi na i ai se uunaiga loloto faapea [i] e uma na soifua ma e o le a soifua i luga o le fogaeleele.’ Ae sa Ia ataata foi i [isi], talanoa i [isi], savavali ma [isi], faalogo atu i [isi], faaavanoa se taimi mo [isi], faamalosiau atu, aoao atu, fafaga, ma faamagalo atu. Sa Ia auauna atu i aiga ma uo, tuaoi ma tagata ese foi, ma sa Ia valaaulia ē masani ma ē pele ia olioli i faamanuiaga silisili o Lana talalelei.”¹

Atonu e te le o i ai i le fale mo le Kerisimasi, ae e mafai lava ona e faia ia faapitoa lou aso malolo. Na saunoa mai Peresitene Thomas S. Monson (1927–2018), “A ia i tatou le agaga o le Kerisimasi, tatou te manatuaina o Ia o lē e ona le aso soifua lea tatou te faamanatuina i lenei vaitau o le tausaga: ‘Aua o le aso nei ua fanau ai i le aai o Tavita lo outou Faaola, o le Alii ia o Keriso’ (Luka 2:11).”²

O Le A se Mea e Mafai Ona Ou Faia?

O le a se mea e mafai ona ou faia? Faaalu sina taimi i le FamilySearch.org e aoao atili ai e uiga i lou aiga pe asiasi i le justserve.org e sue ai auala e mafai ona e fesoasoani ai i lou alalafaga.

Aoao Atili

Ina ia faitau atili i tala i auala e faatoilalo ai le tuuatoatasi, siaki le vaega o le autalavou matutua i le Ensign po o le Liahona a Tesema 2019.

Tagai foi i le AM Faalevaiaso, o loo i ai i le vaega o Autalavou Matutua i le polokalama o le Gospel Library, mo anotusi fou, ma musuia mo le autalavou matutua i vaiaso taitasi.

E mafai ona e auina mai au lava tala, manatu, ma manatu faaalia i le liahona.ChurchofJesusChrist.org. Ua le mafai ona tatalia lo matou fia faalogo atu ia te outou!

Faamatalaga

1. Jean B. Bingham, “Auauna Atu e pei ona Faia e le Faaola,” Ensign po o le Liahona, Me 2018, 104.

2. Thomas S. Monson, “ Toe Mauaina o le Agaga o le Kerisimasi,” Ensign po o le Liahona, Tes. 2012, 4.