Pagpangita ni Jesukristo diha sa Daang Tugon
Kining lima ka kamatuoran makatabang kanato nga makaila sa atong Manluluwas sa atong pagtuon sa kasulatan niining tuiga.
Light of the Wold [Kahayag sa Kalibotan], ni Walter Rane, mahimong dili makopya
Usa ka adlaw, nasugatan ni Jesukristo ang duha sa Iyang mga disipulo diha sa dalan tali sa Jerusalem ug sa Emmaus. Samtang naglakaw sila, Siya mitudlo kanila mahitungod sa Iyang tahas ingon nga gihulagway diha sa mga kasulatan nga atong gitawag karon nga ang Daang Tugon.
“Ug gipasabot ni Jesus kanila ang gisulti mahitungod kaniya sa tibuok Kasulatan, sugod sa mga basahon nga gisulat ni Moises hangtod sa mga sinulat sa tanang propeta” (Lucas 24:27). Ang pagkat-on mahitungod sa Manluluwas ug sa Iyang misyon usa ka halawom nga espirituhanong kasinatian alang sa mga disipulo, ug sila mihangyo Kaniya nga magpabilin pa og taas-taas nga panahon (tan-awa sa Lucas 24:28–32).
Sama niadtong nag-unang mga sumusunod ni Kristo, kita adunay oportunidad nga makaila sa atong Manluluwas sa mas makahuloganon nga paagi samtang suhiron nato ang Daang Tugon niining tuiga. Kini nga talaan, inubanan sa mga basahon ni Moises ug Abraham diha sa Perlas nga Labing Bililhon, mohatag kanato og mas kompleto nga panabot kon kinsa Siya—Iyang kinaiya, Iyang misyon, ug sa Iyang relasyon sa Iyang Amahan ug sa matag usa kanato. Gikinahanglan nato kini nga panabot aron makadawat sa gasa sa kinabuhing dayon (tan-awa sa Juan 17:3).
Sa ubos mao ang lima ka kamatuoran nga makatabang kanato nga makaila ug mas makasabot ni Jesukristo sa tibuok niining karaan, balaan nga basahon.
Kamatuoran 1: Si Jesukristo Mao si Jehova
Diha sa Bag-ong Tugon, atong mabasa ang mahitungod sa usa ka panahon sa dihang si Jesukristo mipaila sa iyang Kaugalingon isip si Jehova. Ang mga tawo nangasuko ug misulay sa pagbato Kaniya tungod sa pagpasipala (tan-awa sa Juan 8:59). Wala sila makaamgo og bililhon nga kamatuoran nga padayon nga wala masabti sa kadaghanan karon: nga si Jesukristo mao si Jehova, ang Dios sa Daang Tugon.1
Tingali kabahin sa rason nga ang pagkatawo sa Manluluwas diha sa Daang Tugon kasagaran wala masabti mao kay ang ngalan nga “Jesukristo” wala gigamit diha sa basahon. Hinuon, ang mga tagsulat migamit og pipila ka titulo nga nagpasabot Kaniya, sama sa “Dios,” “Ako Mao,” o “ang Ginoo.”2 Sa dihang masayod kita niini, magsugod kita nga mas klarong makakita ni Jesukristo sa tibuok nga kasulatan. Sama pananglit:
-
Sa dihang nakig-istorya si Moises sa “Dios” sa nagdilaab nga sampinit, nakig-istorya siya kang Jesukristo (tan-awa sa Exodo 3:6)3
-
Sa samang paagi, si Jesukristo mipaila sa iyang Kaugalingon isip “ang Halangdon nga Ako Mao” ngadto kang Joseph Smith (Doktrina ug mga Pakigsaad 29:1).
-
Si Juan Bautista gitawag aron sa pag-andam sa dalan “sa Ginoo” (Mateo 3:3). Kini usa ka katumanan sa Isaias 40:3, nga nanagna ni Jesukristo.
-
Tan-awa ang tsart sa pahina 17 alang sa ubang mga ehemplo bahin ni Jehova sa tibuok kasulatan.
Kamatuoran 2: Mga Butang ug mga Panghitabo Makatudlo Kanato mahitungod sa Atong Manluluwas
Si Adan ug Eva gisugo sa pagsakripisyo og mga hayop isip kabahin sa ilang pagsimba. Ang maong mga sakripisyo nagpahinumdom kanato nga si Jesukristo, ang Kordero sa Dios, mitugot sa iyang Kaugalingon nga mapatay isip kabahin sa Iyang Pag-ula.
Adam and Eve Offering Sacrifices [Si Adan ug Eva nga Naghalad og mga Sakripisyo], ni Keith Larson
Ang Daang Tugon buhong sa mga simbolo ug mga istorya nga makapahinumdom kanato sa tabang nga gitanyag sa Manluluwas. Sama pananglit:
-
Daghang mga kasulatan ang naghulagway sa mga panahon diin ang matinud-anong mga tawo gisugo sa pagsakripisyo og mga hayop isip kabahin sa ilang pagsimba. Sama pananglit, ang mga anak sa Israel gisultihan sa pagsakripisyo og nating karnero ug sa pagmarka sa ilang mga pultahan gamit ang dugo niini. Kadtong mihimo niini gipanalipdan gikan sa makamatay nga sakit didto sa Ehipto. Ang maong mga sakripisyo nagpahinumdom kanato nga si Jesukristo, ang Kordero sa Dios, mitugot sa iyang Kaugalingon nga mapatay isip kabahin sa Iyang Pag-ula. Ang Iyang sakripisyo nagluwas kanato gikan sa pisikal ug espirituhanon nga kamatayon. (Tan-awa sa Exodo 12:13.)
-
Sa dihang si propeta Elias gikinahanglan nga molayas alang sa iyang kinabuhi ug motago sa desiyerto, mibati siya nga magul-anon ug miingon nga nangandoy siya nga unta patay na siya. Samtang natulog siya, milagrosong adunay pan ug tubig nga nakita aron sa pag-alima ug pagpabaskog kaniya, naglig-on kaniya nga mopadayon. Kini makapahinumdom kanato nga si Jesukristo mao ang Buhi nga Tubig ug ang Pan sa Kinabuhi. Siya mao ang atong kataposang tinubdan sa paglaom. (Tan-awa sa 1 Mga Hari 19:1–8.)4
-
“Ang imong pulong maoy suga nga magtultol kanako,” usa ka salmista misulat (Salmo 119:105; emphasis gidugang). Si Miqueas nagpamatuod , “Bisag ania kami sa kangitngit karon, ang Ginoo maghatag kanamog kahayag” (Miqueas 7:8; emphasis gidugang). Ang ilang mga pulong nagpahinumdom kanato nga si Jesukristo mao ang Kahayag sa Kalibotan, nga naggiya kanato balik sa atong langitnong panimalay.
Samtang magbasa kamo, mahimong makadiskobre kamo og uban nga mga butang nga makapahinumdom kaninyo ni Jesukristo ug sa Iyang abilidad sa pagluwas kanato—sama sa dihang naluwas ang pamilya ni Noe diha sa arka gikan sa lunop, o sa dihang gihatagan si Jonas og panahon sa paghinulsol samtang anaa sulod sa balyena. Kini nga mga hitabo makapahinumdom kanato nga ang Manluluwas makaagak kanato latas sa mga unos sa kinabuhi, ug nga Siya kanunay mohatag kanato og mga oportunidad nga makabalik sa hustong dalan. (Tan-awa sa Genesis 7:1; Jonas 1:17.)
Kamatuoran 3: Si Jehova usa ka Personal nga Dios
Usahay ingon og ang Dios sa Daang Tugon masuk-anon ug mapanimaslon. Kinahanglan natong hinumdoman nga ang orihinal nga mga tagsulat sa basahon nahisakop sa karaan nga mga kultura nga adunay mga kostumbre ug mga paghulagway nga tingali lisod natong masabtan sa hingpit karon. Ang manwal sa Dali, Sunod Kanako , mga panaghisgotanay sa grupo, ug paglamdag gikan sa Espiritu Santo makatabang kanato sa pagpahiuyon sa unsay atong mabasa sa Daang Tugon sa unsay atong nahibaloan mahitungod ni Jesukristo gikan sa ubang mga basahon sa kasulatan.
Ug ania ang usa ka mabantayan nga kinaiya ni Jehova nga mahimong pamilyar sa mga estudyante bahin sa Manluluwas: Siya usa ka personal nga Dios. Ang iyang pagpanginlabot, sa halangdon ug ginagmay nga mga paagi, nagpakita nga Siya kanunay andam sa pagluwas niadtong kinsa mosalig Kaniya. Ania ang pipila ka ehemplo sa Iyang Daang Tugon nga pagpangalagad:
-
Human nakalapas si Adan ug Eva, gibistihan sa Ginoo, o gihapinan, sila og mga sapot nga panit (tan-awa sa Genesis 3:21). Ang Hebreohanon nga pulong alang sa Pag-ula nagpasabot nga “hapinan” o “pasayloon.”
-
Siya midapit ni Enoch sa paglakaw uban Kaniya (tan-awa sa Moises 6:34) ug gibayaw ang katawhan sa Zion (tan-awa sa Moises 7:69).
-
Giandam Niya si Joseph aron sa pagluwas sa iyang pamilya ug sa dili maihap nga ubang tawo gikan sa kagutom (tan-awa sa Genesis 37–46).
-
Gigiyahan Niya ang mga anak sa Israel latas sa kamingawan (tan-awa sa Exodo 13:21–22).
-
Gibisita Niya si Aaron ug Miriam aron sa paglig-on sa ilang pagtuo sa buhi nga propeta (tan-awa sa Numeros 12:5).
-
Gigiyahan Niya si Ruth ug gipatunhay ang Iyang kagikanan pinaagi sa iyang [Ruth] binhi (tan-awa sa Ruth 3:10–11; 4:14–17).
-
Gitawag Niya ang batang lalaki nga si Samuel pinaagi sa ngalan (tan-awa sa 1 Samuel 3:3–10).
-
Gihatagan niya og kusog si Ester aron maisogon nga moluwas sa iyang katawhan (tan-awa sa Ester 2:17; 8:4–11).
Kamatuoran 4: Si Jesukristo Motabang Kanato nga Makig-away sa Atong mga Gubat
Usahay ang inadlaw-adlaw nga kinabuhi mabati nga daw usa ka gubat. Kita anaa gayod sa tunga-tunga sa usa ka espirituhanon nga gubat tali sa maayo ug daotan, dili sama sa mga gubat nga gihulagway diha sa Daang Tugon. Uban sa mga sundalo sa karaan, kita mosangpit, “Giyahi, Kami Jehova.”5 Niini nga mga kasulatan, atong madungog ang Iyang makahupay nga tubag:
-
“Dili ko gayod ikaw pakyason o biyaan” (Josue 1:5).
-
“Dili kamo angay malisang ug maluya tungod sa kadako sa panon sa kaaway nga misulong kaninyo kay ang gubat dili inyo kondili iya sa Dios” (2 Cronicas 20:15).
-
“Lig-onon … ko ikaw, panalipdan ug luwason” (Isaias 41:10).
-
“Ubanan ug panalipdan ko ikaw” (Jeremias 1:8).
Kamatuoran 5: Nagpadayon ang mga Saad sa Ginoo
Mas konektado kita ngadto sa matinud-anong mga tawo sa Daang Tugon kay sa atong gidahom. Ang karaang mga manalagna nagpaabot ug misulat mahitungod sa mortal nga kinabuhi ni Jesukristo. Si Isaias, sama pananglit, mihulagway sa Ginoo gamit ang mga pulong nga gamhanan kaayo nga kini nahimo nga kabahin sa musika nga kanunay natong gipaambit sa Pasko sa Pagkabanhaw ug sa Pasko (tan-awa sa Isaias 7; 9; 40; ug 53).6
Sama niadto nga mga propeta, kita usab nagpaabot sa pag-anhi ni Kristo—kining higayona nagpaabot sa Iyang pagbalik aron personal nga maghari dinhi sa yuta.7 Ug samtang andamon nato ang kalibotan alang sa Iyang Ikaduhang Pag-anhi, mokuha kita og kalig-on gikan sa mga kamatuoran ug sa mga saad nga unang narekord diha sa Daang Tugon, sama sa:
-
Patriyarkal nga mga panalangin, nga naglakip og deklarasyon sa atong nahisakopan nga balay sa Israel. Ang pakigsaad nga gihimo sa Ginoo ngadto ni Abraham liboan ka tuig ang milabay magamit ngari kanato isip mga miyembro sa pakigsaad sa Simbahan karon, dili igsapayan kon unsa kita nga tribo nahisakop. (Tan-awa sa Genesis 13:14–17; Abraham 2:9–11.)
-
Ang sugo sa pagbalaan sa adlawng Igpapahulay, diin ang Ginoo miingon nga “ang ilhanan tali kanako ug kaninyo ug sa inyong kaliwatan aron kamo masayod nga ako, ang Ginoo, maoy nagpili kaninyo aron mahimong akong katawhan” (Exodo 31:13).
-
Ang sagradong mga paghugas, mga pagdihog, ug pagsul-ob nga kabahin sa pagsimba sa templo karon unang gihatag ngadto kang Aaron ug sa iyang kaliwatan (tan-awa sa Levitico 8).
Hunahunaa kon unsa ka daghan nga matarong nga mga lalaki ug mga babaye ang misakripisyo aron sa pagdala kanato dinhi niini nga punto sa kasaysayan sa tawo. Mopalambo kita gumikan sa pundasyon sa ilang sagrado nga mga paningkamot ug moambit sa ilang panglantaw sa usa ka kalibotan nga gigiyahan sa Manluluwas. Sama sa gitudlo ni Presidente Russell M. Nelson: “Human sa mga 4,000 ka tuig sa pagpinaab[o]t ug pagpangandam, kini mao ang gitakda nga panahon kanus-a pagadad-on ang ebanghelyo ngadto sa mga kaliwatan dinhi sa yuta. Kini mao ang panahon sa gisaad nga pagpundok sa Israel. Ug kinahanglan kitang moapil!”8
Usa ka Talagsaon nga Tuig sa Pagtuon
Christ in a Red Robe [Si Kristo nga Nagsul-ob og Pula nga Kupo], ni Minerva Teichert, sa maayong kabubut-on sa Church History Museum
Anaa sa atong mga kamot ang istorya sa sinugdanan sa katawhan—atong istorya isip mga Kristiyano sa pakigsaad. Tungod sa Pagula ni Jesukristo, nasayod kita kon sa unsang paagi matapos kini nga talagsaon nga panaw. Si Satanas pagalaglagon, ug ang matarong magmadaogon. Apan sa unsang paagi molambo ang atong indibidwal nga istorya?
Mopili ba kita nga molakaw uban ni Jesukristo niining tuiga? Mohangyo ba kita Kaniya nga magpabilin uban kanato, mahinamon nga maminaw sa unsay Iyang itudlo?
Siya mao ang mahigugmaon, personal nga Manluluwas kansang tingog atong madungog diha sa Doktrina ug mga Pakigsaad, kansang kinabuhi narekord diha sa Bag-ong Tugon, ug kansang mga pagtulun-an klaro nga gitudlo diha sa Basahon ni Mormon. Uban sa gamay nga pagbansay, kita makakita usab sa Iyang pagpangalagad nga kanunayng nahitabo diha sa mga pahina sa Daang Tugon. Siya mao ang sentro sa nangagi, kasamtangan, ug kaugmaon sa katawhan. Siya kaniadto—ug sa kanunay—mag-uban kanato sa matag lakang diha sa agianan.