Digital Lamang: Mga Young Adult
Pagpangita kang Kristo ug sa mga Pakigsaad: Mga Mahinungdanong Paagi ni Nephi sa Pagbasa sa Daang Tugon
Si Nephi mipaambit og pipila ka panabot nga makatabang nimo sa imong pagtuon.
Litrato pinaagi ni Bethany Ellice Draper
Ganahan kong mobasa sa Daang Tugon. Sulod sa mga katuigan, nakadiskobre ko og duha ka mahinungdanong paagi sa pagpangita diha sa Daang Tugon nga magdala og hingpit nga kalipay ug makapalambo sa panabot: ni Kristo ug sa mga pakigsaad.
Ania ang pipila ka paagi nga kita makapangita ni Kristo ug sa mga pakigsaad sa atong pagtuon sa Daang Tugon niini nga tuig.
Pagpangita kang Kristo
Si Nephi, kinsa mibasa sa mga kasulatan gikan sa mga palid nga tumbaga, miingon, “Tan-awa, ang akong kalag nahimuot diha sa pagpamatuod ngadto sa akong mga katawhan sa kamatuoran sa pag-anhi ni Kristo; kay, tungod niini nga katuyoan ang balaod ni Moises gikahatag; ug ang tanan nga mga butang diin gikahatag sa Dios gikan sa sinugdanan sa kalib[o]tan, ngadto sa tawo, mao ang naghulagway kaniya” (2 Nephi 11:4).
Makakaplag kita kang Jesukristo diha sa Daang Tugon sa daghang paagi.
Ang Dios sa Daang Tugon
Tungod kay nasayod kita pinaagi sa modernong pagpadayag nga si Jesukristo mao ang Dios sa Daang Tugon (tan-awa sa Doktrina ug mga Pakigsaad 110:3–4), kita makakita sa Iyang gahom diha sa Paglalang ug samtang ang Tighatag sa Balaod sa Bukid sa Sinai nagtudlo sa Israel unsaon sa pagkahimong sama sa Dios. Nahibalo kita bahin sa Iyang grasya sa pagkatubos gikan sa pagkaulipon diha sa Ehipto, sa Iyang gugma sa pag-amuma sa Iyang katawhan didto sa kamingawan ug paghaw-as kanila ngadto sa gisaad nga yuta, ug sa Iyang padayon nga kamahunahunaon pinaagi sa pagpadala og mga propeta ug pagtanyag og kapasayloan ngadto sa Israel dihang sila naghinulsol sa ilang mga sala.
Mga Kinaiyahan ni Jesukristo
Adunay daghan nga kinaiyahan (o representasyon) bahin ni Jesukristo diha sa mga istorya sa Daang Tugon, ang daghan niini nagtag-an sa Iyang umaabot nga pag-anhi sigon sa narekord diha sa Bag-ong Tugon ug sa Basahon ni Mormon. Ang istorya bahin ni Abraham ug Isaac nagtag-an sa Dios nga Amahan nga nagsakripisyo sa Iyang Anak, nga si Jesukristo. Si Jose miluwas sa iyang mga igsoong lalaki gikan sa pisikal nga kagutom, sama nga si Jesukristo miluwas kanato gikan sa espiritwal nga kagutom. Si Moises mihaw-as sa iyang katawhan gikan sa pagkaulipon sama nga si Jesus mihaw-as kanato gikan sa sala. Ang Ginoo mitudlo sa mga anak ni Israel sa gahom sa hugot nga pagtuo diha Kaniya ug sa Iyang Pag-ula diha sa istorya bahin sa bitin nga tumbaga sa kamingawan. Si Elijah ug Eliseo mihimo sa Manluluwas nga sanglitanan samtang sila miayo sa masakiton ug mibuhi sa patay.
Mga Panabot sa Manluluwas sa Bag-ong Tugon
Si Jesukristo sa simbolikanhong paagi diha sa mga istorya sa Daang Tugon ug sa balaod ni Moises. Ang mga istorya bahin sa Pagpalabay ug sa pagsakripisyo diha sa balaod ni Moises nagpunting kang Kristo. Sa pagtagna sa misyon ni Jesukristo, ang mga propeta sa Daang Tugon miayo sa masakiton ug mibuhi sa patay. Pinaagi ni propeta Jeremias, ang Ginoo misaad kanato og “bag-ong kasabotan [pakigsaad]” (Jeremias 31:31; tan-awa usab sa bersikulo 32).
Diha sa Bag-ong Tugon, si Jesus miabot isip maoy katumanan sa balaod ug mga propeta sa Daang Tugon. Gipamulong Niya ang bag-ong pakigsaad diha sa Wali Ibabaw sa Bungtod ug mipasiugda sa mga simbolo sa pakigsaad atol sa Pagpalabay nga pagpangaon sa Kataposang Panihapon. Gitudloan kita ni Jesus sa paghigugma ug pagserbisyo sa usag usa dihang Siya miayo sa masakiton ug mibuhi sa patay. Iya kitang gitubos gikan sa sala ug kamatayon pinaagi sa Iyang Pag-ula, ug giestablisar Niya ang Iyang Simbahan dinhi sa yuta. Kon kita moila ni Jesus isip ang Dios sa Daang Tugon, mas makasabot kita bahin Kaniya diha sa Bag-ong Tugon.
Pagtinguha sa mga Pakigsaad
Si Nephi usab mitudlo kanato sa pagpangita diha sa kasulatan sa mga pakigsaad: “Ug usab ang akong kalag nahimuot diha sa mga pakigsaad sa Ginoo diin siya mihimo ngadto sa atong mga amahan” (2 Nephi 11:5).
Si Presidente Russell M. Nelson mipasabot usab og maayo sa kaimportante sa mga pakigsaad. Miingon Siya:“Ang labing dako nga pagdayeg nga madawat niining kinabuhia mao nga mailhan nga usa ka tighupot sa pakigsaad. Ang mga ganti alang sa tighupot og pakigsaad madawat niini nga kinabuhi ug human sa kinabuhi dinhi.”1
Pagkaanindot nga saad! Bisan human sa bunyag ug paghimo og mga pakigsaad sa templo, tingale dili kita makamatikod kon unsa kadako ang epekto niini nga mga saad alang sa mas maayo natong inadlaw-adlaw nga pagpakabuhi. Apan ang Daang Tugon nagpahinumdom kanato unsa gayod ang buot ipasabot sa pagkahimong “mga tawo sa pakigsaad” ug sa unsang paagi kita mas makasabot sa mga panalangin ug mga responsibilidad nga nagauban niini.
Ang nag-unang pakigsaad nga gihisgotan diha sa Daang Tugon mao ang saad sama kang Abaraham. Makakaplag kita og mga kamatuoran mahitungod sa ebanghelyo ni Jesukristo diha sa pakigsaad, nga mogiya ngadto kang Jesukristo, kang kinsa kita makakaplag og kaluwasan.
Aniay pipila ka paagi nga ang Daang Tugon makatabang nato sa mas dugang nga pagsabot ug pagtuman sa atong mga pakigsaad.
Pagsabot sa Atong Tahas diha sa Pakigsaad sama kang Abraham
Ang pakigsaad sama kang Abraham usa ka sumpay-sumpay sa mga saad ug mga panalangin nga gihatag ngadto ni Abraham nga nagpadayon hangtod karong adlawa diha sa “bag-o ug walay kataposang pakigsaad” nga gipahiuli pinaagi ni Propeta Joseph Smith (tan-awa sa Doktrina ug mga Pakigsaad 132:30–31). Si Presidente Nelson mitudlo:
Ang Ginoo mipakita niining ulahing mga adlaw sa pagbag-o sa pakigsaad sama kang Abraham. Ngadto ni Propeta Joseph Smith, ang Agalon mipahayag:
“‘Si Abraham nakadawat og mga saad mahitungod sa iyang binhi, ug sa bunga sa iyang mga bat-ang—kang kinsa nga mga bat-ang kamo gikan, … akong sulugoon nga si Joseph. …
“‘ Kini nga saad inyo usab, tungod kay kamo gikan kang Abraham’ [Doktrina ug mga Pakigsaad 132:30–31].”2
Pinaagi niini nga pakigsaad, ang Ginoo mimugna og matarong nga pamilya diin Iyang ikatudlo ang Iyang ebanghelyo ug madala ang Iyang mga anak ngadto kang Jesukristo. Si Apostol Pablo mitudlo kanato nga kon kita moduol kang Kristo, mamahimo kita nga kabahin sa pamilya ni Abraham: “Kon kamo iya na ni Cristo, mga kaliwat kamo ni Abraham ug madawat ninyo ang gisaad sa Dios” (Mga Taga-Galacia 3:29; tan-awa usab sa bersikulo 27). Pinaagi sa pakigsaad sama kang Abraham, ang mga miyembro sa Ang Simbahan ni Jesukristo sa mga Santos sa Ulahing mga Adlaw mamahimo nga balay sa Israel ug mga manununod sa mga panalangin sa mga pakigsaad sama kang Abraham.
Makakat-on kita mahitungod sa atong tahas diha sa pakigsaad pinaagi sa pagsusi sa mga kinabuhi niadtong anaa sa Daang Tugon, pinaagi sa pagtuon sa mga saad nga gihimo sa Ginoo ngadto sa Iyang mga anak diha sa mga kasugoan, ug pinaagi sa pagpaminaw sa karaang mga propeta kinsa nangamuyo uban sa mga anak ni Israel sa paghinulsol ug pagtuman sa ilang mga pakigsaad.
Pagpangita sa Gisaad nga mga Panalangin pinaagi sa Atong mga Pakigsaad
Samtang basahon nato ang Daang Tugon, mahimo kitang mangita og mga indikasyon bahin sa Ginoo nga nagbulig sa mga saad nga gihimo diha sa pakigsaad kang Abraham. Ang tulo ka nailhan kaayong panalangin mao ang yuta, nga nagsimbolo sa usa ka kabilin sa gingharian sa Langitnong Amahan; sa kaliwatan, nga maoy saad nga magpadayon ang mahangtorong paglambo; ug mga panalangin sa ebanghelyo ug sa pagkapari, “diin mao ang mga panalangin sa kaluwasan, gani sa kinabuhi nga dayon” (Abraham 2:11).
Si Abraham gisaaran nga pinaagi sa iyang binhi “panalanginan ko ang tanan nga nasod sa kalibotan” (Genesis 12:3). Nagpasabot kini nga si Jesukristo moanhi sa kalibotan pinaagi sa kaliwatan ni Abraham ug mopanalangin sa kanasoran sa yuta pinaagi sa Iyang Pag-ula ug Pagkabanhaw (tan-awa sa Mga Taga-Galacia 3:16).
Unsa nga mga panalangin ang imong nakita sa imong kinabuhi karon tungod sa pakigsaad sama kang Abraham?
Ang Katungdanan sa Pagpundok sa Israel
Kauban sa mga panalangin, isip kabahin sa pakigsaad sama kang Abraham naglakip sa pihong mga responsibilidad. Pinaagi sa pagtuon sa Daang Tugon, makakat-on kita unsaon sa pagpakabuhi nga magsubay sa atong mga pakigsaad. Isip kapamilya ni Abraham, ang mga miyembro sa Simbahan gitawag sa pagpundok sa Israel. Kon kita moapil sa misyonaryo nga buhat, sa pagpangalagad, sa buhat sa templo, mga calling sa Simbahan, ug pagtudlo ug pagpasanay sa atong mga pamilya, atong gipundok ang Israel pinaagi sa pagdala sa uban paduol kang Kristo.
Si Presidente Nelson mitudlo nga, “Bisan kanus-a nga mobuhat kamo og bisan unsa nga makatabang ni bisan kinsa—sa matag habig sa tabil—nga padulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug sa templo, nagtabang kamo sa pagpundok sa Israel.”3
Ang Pagkat-on sa Paghigugma sa Daang Tugon
Karong tuiga samtang magbasa ka sa Daang Tugon alang sa atong Dali, Sunod Kanako nga pagtuon, makakat-on ka sa paghigugma sa mga pagtulon-an pinaagi sa pagsunod sa ehemplo ni Nephi bahin sa pagtan-aw niining duha ka tema: si Kristo ug mga pakigsaad. Sa paghimo niini, masabtan nimo si Jesukristo, Iyang Pag-ula, ug Iyang ebanghelyo. Makat-onan usab nimo ang dugang pa mahitungod sa “bag-o ug walay kataposang pakigsaad” ug ang imong tahas diha niini isip disipulo ni Kristo ug isip sakop sa balay ni Israel.
Ang mga istorya ug mga pagtulun-an nga anaa sa Daang Tugon makatabang nato nga mapalambo ang atong relasyon tali sa Manluluwas ug ang atong panabot ug pasalig sa atong kaugalingon nga mga pakigsaad.