Magpakabuhi “Ingon og”Natuman Na ang mga Saad sa Dios
Usa ka yano nga pulongan ang nakatabang kanako nga makakita sa mga paagi nga ang Dios nagtuman sa Iyang mga saad, lakip niadtong anaa sa akong patriyarkal nga panalangin, bisan kon tingali wala nako kini nasinati karon.
Mga paghulagway sa litrato gikan sa Getty Images
Usahay ang pagbaton og mahangtoron nga panglantaw mabati nga daw usa ka panalangin ug usa ka tunglo. Samtang nahupay ako sa pagkahibalo nga ang mga butang mamaayo ra sa kataposan, ang kahangtoran mabati nga daw taas kaayo nga panahon nga maghulat. Si Elder Neal A. Maxwell (1926–2004) sa Korum sa Napulog Duha ka Apostoles mitudlo nga ang “Dios nagpuyo og mahangturong karon diin ang kaniadto, karon, ug ang umaabot anaa kanunay sa Iyang atubangan.”1 Kini nga pagtulun-an nakapahunahuna kanako nga ang Dios wala lamang makakita kanako nga naghulat alang sa mga saad karon apan nakakita usab sa epekto sa katumanan niadto nga mga saad sa kahangtoran. Samtang wala akoy bana o mga anak niini nga yuta sa pagkakaron, Siya nakakita kanako isip usa ka asawa ug inahan. Samtang matag adlaw akong nagpakita og tawhanong kahuyang ug kaluya, Siya nakakita kanako isip usa ka nahimaya, nahingpit nga binuhat. Ug tungod kay Siya nakakita kanako niana nga mahangtorong mga tahas, ako mahimong makapaabot ug magpakabuhi “ingon og” (Jarom 1:11) kana nga mga butang nahitabo na.
Ang magpakabuhi nga “ingon og” nagkinahanglan og pagtuo nga ang Dios usa ka tigtuman og saad. Samtang ang “tigtuman og saad” dili usa ka pulongan gikan sa kasulatan, nahimo kini nga usa sa akong paborito nga mga paghulagway Kaniya. Ang mga kasulatan mga basahon sa mga saad. Ang Iyang balaan nga templo usa ka balay sa mga saad. Ang akong mga pakigsaad Kaniya mao ang akong personal nga mga saad. Ang Iyang buhat usa ka buhat sa mga saad. Ug Siya usa ka tigtuman og saad nga mahinamon sa pagbubo og mga panalangin sa Iyang katawhan (tan-awa sa Doktrina ug mga Pakigsaad 109:21). Siya mihinumdom ni Raquel, miluwas ni David, mipakaon sa babaye sa Sarefat, migiya sa mga anak sa Israel ngadto sa usa ka yuta sa saad, ug mipasiugda sa dugay nang gisaad nga Pagpahiuli sa Iyang ebanghelyo. Ug labaw nga importante sa tanan, Siya mipadala sa Iyang Bugtong Anak, sa “pagpahinabo sa pagka-imortal ug sa kinabuhi nga dayon sa tawo”(Moises 1:39). Sa pagkatinuod, sa tibuok kasulatan “ang Ginoo mipadayag sa Iyang Kaugalingon ug sa Iyang hingpit nga kinaiya … aron himoon ang hunahuna sa tawo nga makabutang og pagsalig Kaniya nga walay pagpanagana” (Bible Dictionary, “Faith”).
Tungod kay ang Dios usa ka Dios sa mga saad, usahay mahimong lisod alang kanako nga makasabot kon nganong wala pa matuman ang piho nga mga saad sa akong kinabuhi. Nakaila ko og daghang ubang tawo nga mibati og susama sa dihang girebyo ang ilang patriyarkal nga mga panalangin o gikonsiderar ang ubang mga panalangin sa pagkapari ug mga pag-aghat gikan sa Espiritu Santo. Mao nga sa unsang paagi kita magpakabuhi nga “ingon og” kadto nga mga panalangin natuman na? Ganahan kong mopaambit og tulo ka ideya.
1. Hunahunaa ang Nagkalain-lain nga Saad
Usa sa importante nga mga butang sa pagtuo nga ang Langitnong Amahan usa ka tigtuman og saad mao ang pagkahibalo sa nagkalain-lain nga mga saad nga Iyang gihatag kanato. Pipila sa mga saad daw mas makapahinam o mahinungdanon kay sa uban, ug mao kana ang mga saad nga sagad natong gitutokan. Samtang atong giila nga daghan niini nga mga saad dili makompleto niini nga kinabuhi, gilaoman nato nga makadawat og pipila ka tipik niini sa mortalidad ug magpakabuhi nga matinud-anon aron sa umaabot nga adlaw makaangkon og katumanan niini. Sama pananglit, nagpaabot kita nga “mabanhaw ang tanan nga mga tawo” (2 Nephi 9:22), sa hingpit nga kalipay sa pagdala og “usa ka kalag [ngadto Kaniya]” (Doktrina ug mga Pakigsaad 18:15), kaluwasan gikan sa “tunok sa unod” (2 Mga Taga-Corinto 12:7), usa ka mahangtoron nga kaminyoon ug pamilya, ug sa kataposan, kahimayaan ug pagkahimong sama sa atong langitnong mga ginikanan.2
Ang ubang mga saad mahimong gagmay ug yano ug usahay gani gibalewala. Kini nga mga saad nakapahimong posible sa pagpangita og hingpit nga kalipay sa mortalidad ug naglakip sa mga butang sama sa kanunayng pagbaton sa “Espiritu [ni Kristo] uban [kanato]” (Doktrina ug mga Pakigsaad 20:77), sa pagkahibalo nga “Igo … ang [Iyang] grasya” (2 Mga Taga-Corinto 12:9), pagsinati og “kalinaw niini nga kalib[o]tan” (Doktrina ug mga Pakigsaad 59:23), ug mahimong “magmalipayon sa bisan unsang kahimtang.”3 Si Kristo nagsaad, “Dili ko kamo biyaan nga daw mga ilong tuwapos. Mobalik ako kaninyo” (Juan 14:18).
Ang Iyang mga saad sama ka walay kinutoban sa Iyang gahom ug sa Iyang gugma. Samtang mogahin kita og panahon nga mas hingpit nga moila sa unsay Iyang gisaad, atong madugangan ang kalagmitan nga kita makakita og dugang nga katumanan sa Iyang mga saad ug, busa, mas mosalig Kaniya isip usa ka tighupot og saad.
2. Ilha Iyang Kamot
Tingali adunay daghang higayon sa kinabuhi sa dihang nakatutok ra kaayo ko sa daw mas mahinungdanon nga mga saad o sa usa ka piho nga saad nga akong gilaoman nga wala nako mabantayi kon unsay gibuhat sa Ginoo alang kanako sa kasamtangan. Sagad nga makakita kita og ebidensiya alang sa bisan unsa nga atong gipangita. Kon mangita kita og katumanan, makita nato ang pakig-uban sa Ginoo sa atong adlaw. Makakita kita sa mga pultahan nga Iyang giablihan alang kanato. Makakita kita og “mga pasalig” (Alma 58:11) nga Iyang gipadala kanato.
Usa ka paagi nga ako nakakat-on sa pagkakita sa Iyang pakig-uban miabot gikan kang Presidente Henry B. Eyring, Ikaduhang Magtatambag sa Unang Kapangulohan, kinsa mitudlo mahitungod sa pagtipig og inadlaw nga rekord kon sa unsang paagi nato nakita ang kamot sa Dios nga nagtabang sa pagpanalangin kanato sa matag adlaw.4 Kining inadlaw nga pagpamalandong ug pagrekord mahimong mas nakapausab kanako kay sa ubang butang. Pinaagi niini, nagsugod ako sa pagkakita nga ang Ginoo nagsuporta kanako sa matag adlaw ug nagtuman og daghan nga mga saad nga labaw pa sa akong gihunahuna.
Nagpuyo kita sa usa ka kalibotan diin daghan ang nakatutok sa unsay kulang sa ilang mga kinabuhi. Daghan kaayo kanato ang nagsugod sa adlaw uban sa mga hunahuna nga kita dili paigo ug motapos niini nga daw kita napakyas. Tingali mibati kita nga daw kita walay igong oras, kwarta, kusog, kaisog, paglaom, hugot nga pagtuo, ug uban pa. Kini nga matang sa panglantaw naghimong lisod kaayo sa pagkakita sa bisan unsang katumanan sa mga saad.
Ang himno nga “Karon sa Atong Pag-ambit sa Sakramento” nag-ingon, “Gisud-ong ang kal[u]-oy mo, nga walay utlanan.”5 Sulod sa katuigan, ang akong pagpangandam alang sa sakramento nakatutok sa mga sayop nga akong nahimo sa (mga) semana nga milabay ug sa kakulang nga akong gipakita. Ang tanan lang nga akong nakita mao ang kon unsa ako ka layo gikan sa pagkahimong sama ni Kristo. Human ang Espiritu mitudlo kanako pinaagi niining mga pulong sa awit, misugod ako sa pagtutok kon sa unsang paagi nako nakita ang Iyang “kal[u]oy … nga walay utlanan” atol sa miaging semana. Samtang namalandong ako, nakita nako ang katumanan sa mga saad. Nakita nako nga Siya miuban kanako. Siya mihupay, mihatag og kusog, ug milig-on kanako. Siya mituman sa Iyang mga saad.
3. Tabangi Siya nga Matuman ang Iyang mga Saad ngadto sa Uban
Pipila ka Pasko ang milabay, ako adunay daghang kasinatian nga mipalig-on sa akong pagsabot sa Iyang tinguha sa pagtuman sa Iyang mga saad ngadto sa Iyang mga anak. Imbes nga mahadlok og laing mingaw nga panahon sa Pasko, mihukom ako nga tinguhaon nako nga mamahimong instrumento Niya sa bisan unsang paagi nga gikinahanglan Niya ako nga mamahimo. Mao nga kada adlaw nangutana ako Kaniya kon kinsa ang nagkinahanglan nga makabati sa Iyang gugma nianang adlawa ug sa unsang paagi labing maayo nakong mapaambit kana nga gugma alang Kaniya. Pinaagi sa Espiritu Santo nakasaksi ako og mga milagro ug mibati sa hingpit nga kalipay sa pagkahimong usa ka instrumento sa Iyang mga kamot sa pagtuman sa pipila ka gagmay ug yano nga mga saad. Nagpadayon ako sa pag-ampo matag adlaw nga mahimo niana nga instrumento alang Kaniya.
Kon kita mopili sa pagsalig sa Dios ug magpakabuhi nga “ingon og” ang mga saad natuman na, kita makakaplag og kusog nga mobangon gikan sa higdaanan, magpakabuhi sa matinud-anong paagi, ug mapailobon nga maghulat bisan kon kini daw lisod buhaton. Sama ni Sara, mopili kita nga “[mo]salig … nga tumanon sa Dios ang iyang gisaad” (Mga Hebreo 11:11). Sama ni Abraham, kita magtinguha nga “[dili kawad-an og] paglaom nga matuman gayod ang gisaad sa Dios” (Mga Taga-Roma 4:20) samtang “m[o]laom … bisan sa panahon nga wala [nay] paglaom” (Mga Taga-Roma 4:18).
Ang pagpakabuhi nga “ingon og” magkalahi sa matag tawo. Alang kanako, nagpasabot kini nga dali ug makanunayon akong maghinulsol, magsalig nga ang akong mga paningkamot nagtabang kanako nga mahimong sama Kaniya. Motuman ako sa mga pakigsaad nga ako nang gihimo, nasayod nga ang mga pagpili nga akong himoon karon mopanalangin sa akong bana ug pamilya. Mangayo ako og kusog nga “dili … mobiya” (Doktrina ug mga Pakigsaad 19:18) gumikan sa kamingaw, ug mangita ako og mga oportunidad sa pagbayaw sa uban. Magmugna ako og usa ka panimalay karon diin maayo ang akong bation kabahin sa pagpadako og mga anak.
Ang pagsalig sa Iyang mga saad dili kanunay nga usa ka sayon nga pagpili. Ang paghulat sa Ginoo nagkinahanglan og hugot nga pagtuo kang Jesukristo nga usahay mabati nga daw kini hapit sobra kay sa atong matawag. Apan mipamatuod si Alma, “Siya motuman sa tanan niya nga mga saad diin siya mihimo nganha kanimo, kay siya mituman sa iyang mga saad diin siya mihimo ngadto sa atong mga amahan” (Alma 37:17). Segurado ang mga saad sa Dios, ug nasayod ako nga ang Manluluwas motanyag og bisan unsang tabang ug suporta nga gikinahanglan nato samtang magtinguha kita sa pag-ila ug pagsalig sa atong Amahan sa Langit, kinsa momatuod sa “iyang pulong … sa matag higayon” (Alma 25:17). Kay sa pagkatinuod “walay Dios nga sama kanimo, sa langit ug sa yuta nga nagtuman sa kasabotan ug nagpakita sa gugmang walay paglubad ngadto sa imong mga sulugoon nga nagsunod kanimo sa kinasingkasing gayod” (1 Mga Hari 8:23).