Mga Young Adult
Ang Mando sa Ginoo nga “Pangitaa ang Pagtulun-an”
Ang pagbaton og edukasyon dili lamang usa ka maayo nga ideya alang sa inyong kaugmaon—kini usab usa ka sugo gikan sa Ginoo.
Litrato pinaagi ni Robyn Jones
Sa Daang Tugon, si Hana nagsulti kanato nga “ang Ginoo nga Dios nasayod sa tanan” (1 Samuel 2:3). Ug ang moderno nga pagpadayag nagpakita kanato nga tinuod gihapon kini karon. Ang Dios naghatag kanato sa panudlo nga “pangitaa … gikan sa labing maayo nga mga basahon ang mga pulong sa kaalam; pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118).
Apan kon maghisgot kita mahitungod sa pagpangita og pagtulun-an o kahibalo, wala lang kita nagpasabot sa upat ka tuig nga degree sa kolehiyo nga matang sa edukasyon (bisan og kana pwede nga makonsiderar)—kini labaw pa gayod kay sa niana! Ang pagpangita og kahibalo naglakip sa pormal nga edukasyon, ubang pagbansay sa usa ka piho nga butang [specialty], pagkat-on sa ebanghelyo, ug dili pormal nga pagkat-on.
Adunay rason nga ang Simbahan nanag-iya og mga unibersidad, nagpasiugda og programa sa online nga mas taas nga edukasyon (BYU–Pathway Worldwide) ug adunay programa sa pagkat-on sa ebanghelyo alang sa mga young adult (institute sa relihiyon)—tungod kini, sama sa gipasabot ni Elder Dieter F. Uchtdorf sa Korum sa Napulog Duha ka Apostoles, “Alang sa mga miyembro sa Simbahan, ang edukasyon dili lamang usa ka maayo nga ideya—kini usa ka sugo.”1
Kalibotanon nga Pagkat-on: “Makapangandam sa Tanan nga mga Butang”
Sukad sa sayong mga adlaw sa Simbahan, ang edukasyon taas na og prayoridad. Sa dihang ang mga Santos mipuyo sa Kirtland, Ohio, sa mga 1830, misugod sila og pang-edukasyon nga mga institusyon sama sa Tulunghaan sa mga Propeta (nag-unang gigamit sa pag-andam sa mga misyonaryo), usa ka Tulunghaan alang sa mga Elder, usa ka Hebrew nga eskwelahan, usa ka hayskol, ug labing importante ang Templo sa Kirtland, kansang katuyoan mao ang mahimong “usa ka balay sa pagkat-on” (Doktrina ug mga Pakigsaad 109:8). Sa wala madugay, sa Nauvoo, giestablisar nila ang University of the City of Nauvoo, ang Nauvoo Seminary, ug pribado ug publiko nga mga eskwelahan. Hugot silang nagtuo nga ang “pag-angkon ug kahibalo, parehong kalibotanon ug sagrado, usa ka halangdon nga paninguha.”2
Samtang ang mga Santos mibalhin sa kasadpan, mipadayon sila sa pagtukod og mga eskwelahan o mga akademiya sa ilang mga pamuy-anan. Apan matinguhaon kaayo silang makat-on nga mipahigayon sila og mga klase sa mga balay sa mga tawo, sa mga tolda, o gani sa gawas. Si Presidente George A. Smith (1817–75), Unang Magtatambag sa Unang Kapangulohan, mirekord kon sa unsang paagi ang unang mga lumulupyo sa Iron County, Utah, mipundok palibot sa usa ka daob diha sa hilabihan ka tugnaw nga mga temperatura sa Pebrero aron maminaw sa iyang pagpanudlo bahin sa batadila [grammar] sa Iningles, nga nagpasa-pasa og usa ka libro sa batadila tali sa ilang mga kaugalingon tungod kay kini mao lamang ang anaa nila.3
Kini nga matang sa kadasig alang sa pagkat-on mao ang atong kabilin isip mga miyembro sa Simbahan! Ang mga propeta ug ubang mga lider sa Simbahan padayon nga nag-awhag kanato sa pagbaton og edukasyon. Si Presidente Russell M. Nelson nagtudlo:
“Tungod sa atong sagradong pagtagad alang sa matag tawhanong kaalam, atong gikonsiderar ang pag-angkon og edukasyon isip relihiyoso nga responsibilidad. …
“Busa ang akong tambag … mao ang pagpadayon sa inyong edukasyon, bisan asa man kamo, bisan unsa ang inyong interes ug oportunidad, sa bisan unsang paagi nga inyong matino nga kamo labing maayo nga makaserbisyo sa inyong pamilya ug sa katilingban.”4
Adunay daghang rason sa pagtinguha og edukasyon: makatabang kini kanato nga mas makasabot mahitungod sa katawhan ug sa kalibotan sa atong palibot, ug kini mohatag kanato og katakos sa pagtudlo sa atong mga anak, pagserbisyo sa Simbahan ug sa komunidad, ug pagsangkap sa atong kaugalingon ug sa atong mga pamilya. Sama sa gitudlo ni Presidente Gordon B. Hinckley (1910–2008):
“Aduna kamoy usa ka mandato gikan sa Ginoo sa pag-edukar sa inyong hunahuna ug sa inyong mga kasingkasing ug sa inyong mga kamot. Ang Ginoo miingon, ‘Pagtudlo kamo nga makugihon … sa mga butang diha sa langit ug diha sa yuta … ; mga butang nga anaa sa panimalay, mga butang nga atua sa layong dapit; ang mga gubat ug ang mga kagubot sa mga nas[o]d, ug ang mga paghukom nga anaa sa yuta; ug ang kasay[o]ran usab sa mga nas[o]d ug sa mga gingharian—nga kamo unta maandam diha sa tanan nga mga butang’ (Doktrina ug mga Pakigsaad 88:78–80).
“Gusto sa Ginoo nga bansayon ninyo ang inyong mga hunahuna ug kamot aron mahimong impluwensya alang sa kaayo samtang nagpadayon sa inyong kinabuhi. … Ang inyong edukasyon makapalig-on sa inyong pagserbisyo sa Simbahan.”5
Espirituhanon nga Pagkat-on: “Masay[o]d sa mga Misteryo ug Malinawon nga mga Butang”
Sama nga importante ang edukasyon diha sa lawak klasehanan, ang atong espirituhanon nga edukasyon gani mas kinahanglanon sa atong panaw sa mortalidad.
Sa dihang nagserbisyo siya isip ang commissioner sa Church Educational System, si Elder Kim B. Clark, usa ka emeritus General Authority Seventy, miingon:
“Ang labing importanting kahibalo nga kinahanglan nimong maangkon mao ang kahibalo sa mga butang sa Dios. …
“Ang pagbutang og una sa espirituhanong kahibalo diha sa inyong hunahuna ug kasingkasing mosiguro nga mosalig kamo sa Ginoo ug sa Balaang Espiritu sa inyong pagkat-on, nga inyong makita ang tanang butang nga inyong tun-an diha sa kahayag sa Iyang ebanghelyo, ug nga magpadayon kamo sa pagkat-on og maayo sa tibuok ninyong kinabuhi.”6
Karon aduna kitay daghan kaayong kapanguhaan sa pagtabang kanato sa atong paninguha sa pagkat-on sa ebanghelyo. Dili lamang nga kita adunay mga kasulatan ug mga pulong sa buhi nga mga propeta, apan aduna usab kitay Dali, Sunod Kanako, kinatibuk-ang komperensiya, mga klase sa Sunday School, ug home evening, kining tanan mga kahigayonan alang sa makanunayon nga pagkat-on sa ebanghelyo. Ang sagrado nga mga templo gituyo usab sa pagtudlo kanato sa mga paagi sa Dios.
Ang mga young adult makapahimulos usab sa institute sa relihiyon nga programa sa Simbahan, nga naglakip og mga kurso bahin sa tanan gikan sa mga kasulatan ngadto sa kasaysayan sa Simbahan ngadto sa tabang sa pagpakabuhi og mabungahon nga kinabuhi. Ang pag-apil sa institute makatabang kaninyo nga mahimong mas maayo nga eskolar sa mga kasulatan, makahatag kaninyo og mga kahigayonan sa pakighigala, ug, kon kamo estudyante sa kolehiyo o unibersidad, makahatag og balanse sa inyong kalibotanon nga pagkat-on.
Kon hatagan nato og prayoridad ang espirituhanon nga pagkat-on sa atong kinabuhi, mapanalanginan kita og “pagpadayag ug dugang nga pagpadayag, kahibalo ug dugang nga kahibalo, nga [kita] masay[o]d sa mga misteryo ug malinawon nga mga butang—nga nagdala og hingpit nga kalipay, niana nga nagdala og kinabuhi nga dayon” (Doktrina ug mga Pakigsaad 42:61).
“Moila … [sa] Dios ug kang Jesukristo”
Sa atong tanang pagkat-on—kalibotanon o espirituhanon—adunay usa ka bahin sa kahibalo nga gikinahanglan natong tinguhaon labaw sa tanan. Si Elder Michael John U. Teh sa Seventy mitudlo: “Kinahanglan natong ilhon nga ang pagkaila sa Manluluwas mao ang labing importante nga tinguhaon sa atong kinabuhi. Kinahanglan nga kini ang mag-una sa bisan unsa pa nga mga butang.”7
Ang mga kasulatan nagtudlo sa samang butang:
“Pagtubo diha sa grasya ug kahibalo sa atong Ginoo ug Manluluwas nga si Jesukristo” (2 Pedro 3:18).
Ang “tinuod nga kasay[o]ran … mao ang kasay[o]ran sa ilang Manunubos” (Helaman 15:13).
“Kini mao ang kinabuhing dayon, nga ang mga tawo moila kanimo nga mao ang bugtong matuod nga Dios ug kang Jesukristo nga imong gipadala” (Juan 17:3).
Kon mogahin kita og panahon aron tinuorayng makaila sa Langitnong Amahan ug ni Jesukristo, mas maayo kitang mamahimong sama Kanila. Ug ang pagbuhat sa ingon makatabang usab kanato nga makakaplag og katuyoan samtang magpadayon kita sa tibuok kinabuhi. Si Presidente Spencer W. Kimball (1895–1985) mipasabot, “Sa tanang mga bahandi sa kahibalo, siya miingon, ang labing mahinungdanon mao ang kahibalo mahitungod sa Dios, sa Iyang pagkaanaa, sa Iyang gahom, sa Iyang gugma, ug sa iyang mga saad.”8
Tibuok Kinabuhi nga Pagkat-on
Isip mga young adult, kinahanglan natong tinguhaon ug pahimuslan ang matag kahigayonan sa pagpangita og pagtulun-an ug pag-angkon og edukasyon—diha sa eskwelahan ug sa ebanghelyo. Nagtandi sa edukasyon ngadto sa pagkahimong andam nga adunay lana sa atong mga lampara (tan-awa sa Mateo 25:1–13), si Sister Mary N. Cook, kanhi Unang Magtatambag sa Kinatibuk-ang Kapangulohan sa Young Women, mitudlo: “Karon ang panahon alang ninyo sa makugihong pagdugang sa inyong espirituhanong kahibalo—tolo matag tolo—pinaagi sa pag-ampo, pagtuon sa kasulatan, ug pagkamasulundon. Karon ang panahon sa pagpadayon sa inyong edukasyon—sa hinay-hinay.”9
Hinumdomi nga ang Langitnong Amahan misugo kanato sa pagpangita og pagtulun-an. Ug ang abilidad nga makakat-on usa ka tinuod nga gasa gikan Kaniya. Kon ang pormal nga edukasyon ingon og dili makab-ot, mahimo kamong mag-ampo alang sa giya ug direksiyon.
Ang tibuok kinabuhi nga pagkat-on mahimong mao ang usa sa labing makatagbaw nga mga aspeto sa atong mga kinabuhi. Kon mamuhunan kita sa atong pagkat-on karon, makaugmad kita og sundanan sa tibuok kinabuhi nga pagkat-on nga motabang kanato nga mahimong mas maayo nga mga ginikanan sa atong mga anak, mas maayo nga empleyado sa atong mga agalon, mas maayo nga mga lungsoranon sa atong komunidad, mas maayo nga mga alagad sa atong isigkatawo, ug mas maayo nga mga disipulo ni Kristo.