Na o Masini Faatekinolosi: Tamā o Aso e Gata Ai
O Se Malaga Saogalemu i le Olaga
E alala le tusitala i Texas, ISA.
Sa ou manao e faia mea uma ou te mafaia e saunia ai mea uma o le a manaomia e le ma atalii pepe e faatautaia ai ma le manuia lenei olaga.
A o amata e le aufaigaluega o le vaalele a latou faatonuga masani mo le saogalemu, sa ou siakiina ina ia mautinoa o lo‘u atalii, o Max, sa faamauina i totonu o le nofoa pepe i o’u autafa i luga o le vaalele.
Sa ou tomanatu i le aso na fanau ai Max i ni nai masina na muamua atu. Ina ua ou siiina o ia mo le taimi muamua i le falemai, sa ou naunau e faia mea uma i lo‘u malosi e tausia ai o ia ia saogalemu, aoao o ia i le auala e maua ai le fiafia, ma saunia mea uma na te manaomia e faatautaia ai ma le manuia lenei olaga.
Ou te mautinoa o le toatele o tamā e oo i nei lagona. Sa patino lava lo‘u ootia a o ou tilotilo atu i ona mata ma manatua le tauiviga o le lē mafai ona maua ni fanau lea na muamua atu i lona fanau mai, faatasi ai ma le malosi faaletino, faalelagona, ma le faaleagaga na oo ia te a’u ma lo‘u toalua.
Sa faatoa faamatala mai e le aufaigaluega o le vaalele le auala e faaaoga ai ufi fofoga o le okesene mai luga i le taimi o se faalavelave faafuasei, ma ina ua taunuu mai se tasi o i latou i le matou atulaina, sa ia te ia se vaaiga o le matuia a‘ia’i. Sa ia tusi sa‘o mai ia te a‘u. “Afai e pa‘u mai i lalo ia ufi fofoga, fai muamua lau ufi fofoga ae e te lei fesoasoani ia te ia,” sa ia fai mai ai, ma faasino atu ia Max. Mo se mafuaaga, o le faamamafa na ia fai mai ai le upu o le muamua na taia ai au e pei o le uila.
O le vaai atu i fafo o le faamalama o le vaalele, sa ou vaai faalemafaufau ai i le vaaiga—o ufi fofoga o le okesene o loo pauu mai i lalo, ma le masalosalo o le a ou lagona le toafimalie i le faamaimauina o soo se taimi e fesoasoani ai ia Max. Ona oo mai lea o le manatu i upu na fetalai atu ai Iesu Keriso ia Peteru, e tasi lava lona manaoga i lena taimi o le auauna atu lea ma puipuia le Faaola: “Pe a liua mai oe, ona e faamalosi ai lea i ou uso” (Luka 22:32).
Ma na taia ai au: o le auala sili e mafai ona ou fesoasoani ai ia Max o le fesoasoani muamua lea ia te au lava ia. Sa ou iloaina afai ou te manaomia le mautinoa o faamauina lelei la’u ufi fofoga o le okesene, o le a na o ni nai sekone e alu ai, ae e mafai ai loa ona ou fesoasoani atoatoa ma le tatau ia Max. Sa ou mafaufau mo le vaega o totoe o le faigamalaga e uiga i mea laiti ma faatauvaa—e sili atu ona taua e faavavau nai lo ufi fofoga o le okesene—e mafai ona ou faia muamua lena mea o le a tuu ai au i le tulaga sili ona lelei e fesoasoani ai ia Max, ia liua muamua ona faamalosia ai lea o isi.
O nei mea o loo mulimuli mai e na o ni nai minute lava o lo‘u taimi e alu ai ae ua faia se eseesega tele i le faamalosia o a’u:
-
O le tootuli i le tatalo e fesoasoani ou te maua ai le taulaiga talafeagai ina ia faia se talanoaga faamaoni ma le Tama oi le Lagi.
-
O le faaaogaina o se api po o se pepa o faamatalaga faakomepiuta e tusi ai i lalo mafaufauga ma malamalamaaga ua fatuina ai se aafiaga faatamaoaigaina o le suesueina o tusitusiga paia mo au.
-
O le taofi e fesili, “O le a le uiga moni o lena mea?” po o le “O le a le uiga o lena mea ia te au?” a o tapuai ai i le malumalu po o le toe faamanatuina o lauga o konafesi aoao ua fesoasoani ou te maua ai se malamalama taua ma se malamalamaaga.
-
O le tusitusi i lalo o auala na ou vaaia ai le aao o le Alii i lo‘u olaga i le faaiuga o aso taitasi, ua fesoasoani ou te iloa gofie ai Lana faatosinaga ma lagona ai le latalata atili atu ia te Ia.1
Ou te manatunatu i le mea moni e faapea, na aoao mai Keriso ia i tatou “ia muai saili le malo o le Atua ma lana amiotonu; ona faaopoopoina atu lea o ia mea uma ia te outou” (Mataio 6:33; ua faaopoopo le faamamafa). Pe a ou mafaufau e uiga i “nei mea uma,” ou te vaai faalemafaufau i faamanuiaga uma o loo faatalitali mai le Tama oi le Lagi e liligi mai i luga o lo tatou aiga a o tatou filifili ma le faamoemoe o Ia e avea ma o tatou Atua i aso taitasi (tagai Ieremia 24:7).
E tele taimi ou te lagona ai le le agavaa o se tamā ma tatalo mo tali ma le taitaiga “i le taimi tonu lava” e manaomia ona ou fesoasoani atu i isi (Mataupu Faavae ma Feagaiga 100:6). Ina ua ou faia se taumafaiga magafagafa e taulai muamua atu i la‘u sootaga ma lo’u Tama oi le Lagi ma Iesu Keriso, ou te lagona le i ai i se tulaga sili atu e fesoasoani ai i isi, aemaise lava lo‘u aiga.
Ou te iloa e mafai ona avea lo‘u olaga ma se lesona aupito sili e mafai ona ou aoao atu ia Max ma isi. A o ou liua loloto atili i le Tama Faalelagi ma Iesu Keriso, e mafai ona ou faamalosia atili i latou o siomia au.
Pe a tutupu faalavelave faafuasei faaleagaga, faalelagona, po o le faaletino o le olaga, pe a o ese atu ia ufi fofoga faafaatusa o ufi fofoga, ma pe a manaomia e isi la tatou fesoasoani, afai tatou te faia mea laiti ma faatauvaa e faamautinoa ai se liua mausali ia Iesu Keriso ma Lana talalelei, ona tatou i ai lea i le tulaga sili ona lelei e fesoasoani ai i isi e o mai ia te Ia, le Fomai Sili ma le Faaola o o tatou agaga.