“Ko e Fekauʻaki ʻa e Talanoa Fakatātā ʻo e Ngaahi Talēnití mo Hoku Uiuiʻi ko e Tokotaha Tā Piano ʻa e Palaimelí,” Liahona, Siulai 2022.
Kakai Lalahi Kei Talavoú
Ko e Fekauʻaki ʻa e Talanoa Fakatātā ʻo e Ngaahi Talēnití mo Hoku Uiuiʻi ko e Tokotaha Tā Piano ʻa e Palaimelí
ʻOku ʻafioʻi ʻe he ʻEikí ʻa e founga ke ngāue ʻaki ai hotau ngaahi talēnití ke tāpuekina kitautolu mo e niʻihi ʻoku tau tokoniʻí.
Naʻe ui mai ʻeku palesiteni Palaimelí ʻi heʻene fakaʻilonga ke u kamatá, “Te u toʻo e kiʻi meʻangāue tokoni ki he fanongó peá u lue ʻi he holó kae ʻoua kuo ʻikai ke u toe lava ʻo fanongo atu. Tau vakai angé pe ko e hā hono mamaʻo pea ʻikai ke u toe lava ʻo fanongó!” Naʻá ku tā ʻa e ngaahi nota kamata ki he “Ko e Siasi ʻo Sīsū Kalaisí” (Tohi Hiva ʻa e Fānaú, 48) ʻi he pianó, pea kamata ke hiva e kau hiva leʻo kei siʻí.
ʻI he taimi ʻoku ʻikai ke tau fakafuofuaʻi ai ʻa e leʻo lahi ʻe lava ke hiva ai e fānau Palaimelí, ʻoku tau hiva leva ha ngaahi hiva ʻi ha ngaahi vave kehekehe mo fakatātaaʻi. Ko e fuofua taimi ia ke u foki ai ki he Palaimelí talu mei he ʻaho ne hoko ai hoku taʻu 12, pea ʻoku ʻikai ke u tui ki he fonu fiefia ʻa e feituʻú ni.
ʻI he ngaahi taʻu siʻi kuo hilí, naʻe ʻikai ke u teitei fakakaukau ko e founga lahi te u ngāue ʻaki ai hoku ngaahi malava fakamūsiká ko hono tā e ngaahi hiva Palaimelí ʻi he uike takitaha. Kuó u ako lahi ʻaupito ki hono tā ʻo e pianó mo e vaioliní ʻi he konga lahi ʻo ʻeku moʻuí peá u tui ʻi ha taimi lōloa te u femoʻuekina maʻu pē ʻi he mūsiká.
Ka ʻi hoku ngaahi taʻu kimui ange ʻi he ʻunivēsití, naʻe mahuʻinga kiate au ke maʻu ha mataʻitohi mo maʻu ha ngāue taimi kakato. Naʻe ʻikai ke u toe ongoʻi ʻoku fuʻu mahuʻinga ʻa e ako tā fakataha mo e ʻōkesitulaá ʻi ha ngaahi houa lahi ʻi he uiké pea mo e akoako tā fakamātoató. Naʻá ku kei saiʻia pē ʻi he mūsiká mo feinga ke tangutu ʻi muʻa ʻi he hiliʻanga pepa mūsiká, ke u lava ʻo kei pukepuke ha konga lahi ʻo e meʻa ne u malavá, ka naʻe lahi ange ʻa e ʻikai ke u toe tā e meʻaleá.
Ka ne u toki saiʻia pē ai kimuí ni. ʻOku kehe hono fakaʻaongaʻi hoku talēnití ki he Palaimelí mei he ngaahi feʻauhi mo e ngaahi fakaʻaliʻali fakamafasia naʻá ku faʻa ngāue mālohi ki aí, ka ne hangē ʻoku lelei ange ʻeni ia kiate aú. Ko e taha pē ia ʻo e ngaahi taimi kuó u ongoʻi moʻoni ai kuó u lava ʻo fakaʻaongaʻi hoku ngaahi talēnití ki he lelei ʻa e niʻihi kehé.
Ko Hono Vahevahe Hoku Ngaahi Talēnití
ʻI he talanoa fakatātā ʻo e ngaahi talēnití, ʻoku ʻamanaki ʻa e ʻeikí ʻe fai ʻe heʻene kau tamaioʻeikí ha ngaahi meʻa maʻongoʻonga ʻaki ʻa e ngaahi talēniti ʻokú ne foaki kiate kinautolú. Neongo ʻokú ne vahe kehekehe ʻo fakatatau ki he meʻa ʻoku nau malavá, ka ʻoku ʻamanaki ʻe fakaʻaongaʻi ʻe he tamaioʻeiki takitaha ʻa e ngaahi talēnití ʻi ha founga ʻe fakatupulaki ai e meʻa ne nau maʻu kimuʻá (vakai Mātiu 25:15, 21).
Naʻá ku mahuʻingaʻia moʻoni he talanoa fakatātā ko ʻení ʻi heʻeku kei siʻí. Neongo ko e ngaahi talēniti ʻi he talanoa fakatātaá ko ha mahuʻinga fakapaʻanga, ka ʻe lava pē ʻo fakatatau kinautolu ki hotau ngaahi pōtoʻi ngāue mo e ngaahi meʻa te tau malava fakatāutahá, pea ne u loto ke u ngāue mālohi ke u fakalakalaka mo fakalahi e ngaahi talēniti ne u maʻú. Ko ia ʻi heʻeku feʻao mo e moʻuí mo e ngaahi fatongia ʻo ha tokotaha ako ʻi he kolisí, naʻe ʻikai ke u faʻa ongoʻi fiemālie ʻi he ʻikai ke u fai ha meʻa lahi ange ʻaki e ako fakamūsika kotoa ne u maʻú. Naʻá ku fifili pe naʻá ku hangē nai ko e tangata tailiili naʻá ne “fufū [ʻene] talēnití ʻi he kelekelé,” ʻo tanu ko ʻene manavasiʻi naʻa mole ia meiate iá (Mātiu 25:25).
Ka ʻi heʻeku kamata ʻi hoku uiuiʻi foʻoú, naʻe ʻikai ke u maʻu ʻa e ongo ko iá. Neongo naʻe ʻikai ke u fai ha meʻa lahi ange hangē ko ia ne u faʻa faí, ka naʻá ku ongoʻi fiefia ʻi he taimi kotoa pē ne u tangutu ai he pianó ʻi he tuliki ʻo e loki Palaimelí, he naʻá ku ʻiloʻi naʻá ku tokoni ki he fānaú.
ʻI he taimi ne fakamatalaʻi ai ʻe Sīsū Kalaisi ʻa e fakatupulaki ʻe he tangata naʻá ne maʻu e ngaahi talēniti ʻe nimá, ʻene ngaahi talēnití, naʻá Ne pehē naʻe ʻalu ʻa e tangatá ʻo “fakatau ʻaki ia” (Mātiu 25:16). ʻI hono fakalea ʻe tahá, naʻe pau ke vahevahe ʻe he tangatá ʻa e meʻa naʻá ne maʻú mo e niʻihi kehé kae lava ke fakalakalaka mo tupulaki.
Naʻe kamata ke u fakatokangaʻi naʻe ʻikai ʻuhinga ʻa e tuku ia hoku taimí ki hono tā e pianó ki ha fānau longomoʻui tokolahi he Sāpate kotoa peé, ʻoku ʻikai ai ke u fakahoko e meʻa ʻoku ou malavá. Ko e tā piano ʻi he Palaimelí ko ha fakatau ia; ʻoku ou tā ʻa e hivá, peá u mātā e ngaahi fakamoʻoni fakaʻofoʻofa ʻa e fānau ʻi hoku uōtí. Ko e lahi ange ʻeku tangutu ʻi he tuliki ʻo e loki Palaimelí, ko e lahi ange ia ʻeku ongoʻi moʻoni ʻoku ou “tupulaki” ʻi he faingamālié ni.
Faitāpuekina ʻi Hotau Ngaahi Uiuiʻí
ʻOku ou tui naʻe ueʻi fakalaumālie ʻa e uiuiʻí. Naʻe hoko ia ʻi ha taimi ʻi heʻeku moʻuí ne u fefaʻuhi ai mo ʻeku tuí peá u faʻa ongoʻi lōmekina ai ʻi he moʻuí. Ko e uiuiʻi ko ʻení ko ha fakamanatu ia ke fakamālohia hoku fakavaʻe ʻi he ongoongoleleí pea tokanga taha ki he faingofua mo e fakaʻofoʻofa ʻo e ngaahi moʻoni taʻengatá. Ne u fakamālohia ʻeku fakamoʻoní fakataha mo e fānau ne u ngāue ki aí, ʻa ia ko e taha ia ʻo e ngaahi taumuʻa totonu ʻo e uiuiʻí.
ʻE lava ke faingataʻa ʻa e ngaahi uiuiʻí; taimi ʻe niʻihi ʻoku ui kitautolu ke tau fai ha ngaahi meʻa ʻoku ʻikai ke tau ongoʻi feʻunga ki ai pea ʻoku fie maʻu ki ai ha konga lahi hotau taimí. Taimi ʻe niʻihi ʻoku fehangahangai ia—mahalo te tau ongoʻi hangē ʻoku ʻikai fakaʻaongaʻi kakato ʻe hotau uiuiʻí ʻa e ngaahi meʻa ʻoku tau malavá pea ʻe toe lelei ange ʻetau ngaahi ngāué ʻi ha feituʻu kehe. Ka ʻoku ʻafioʻi ʻe he ʻEikí e founga ke fakaʻaongaʻi ai hotau ngaahi talēnití ʻi ha founga ʻoku ʻikai ngata pē ʻi hono tāpuakiʻi e kakai ʻoku tau tokoniʻí ka ko kitautolu foki.
Hangē ko ia kuó u ako mei he meʻa kuó u aʻusiá, ʻoku tupulaki ʻetau moʻuí ʻi ha faʻahinga ngāue pē ʻoku tau fai ke tokoni ki he ʻEikí. Kapau te tau fakatapui hotau taimí mo e ngaahi talēnití ki he ʻEikí, te Ne fakaʻaongaʻi maʻu pē kinautolu ki heʻetau leleí.