Ua Na’o Tusiga Faaeletonika: Autalavou Matutua
E I Ai Ni Fesili? O Upumoni Nei e 5 ia Manatua
Sa tele ni au fesili ina ua ou auai i le Ekalesia, ae ua ou aoaoina le mea e fai e maua ai tali.
I Iapani, sa ou ola ae ma aoao e uiga i mea sa ou le malamalama i ai. O lea la, ae ou te lei auai i le Ekalesia, sa i ai ni au fesili e uiga i le atulaulau ma le faamoemoega o le olaga.
Ina ua amata au lesona mai faifeautalai, sa ou lagona le lofituina i fesili. Sa ou faamatala atu sa ou sailia ni tali mai le tele o punaoa eseese ae ou te lei lagonaina se mautu i mea sa ou mauaina. Sa la aoaoina au e mafai lava ona ou faalagolago i le Alii e taitai au i le upumoni.
Talu mai lena taimi, sa mafai lava ona ou sailia tali mai ia te Ia ma mulimuli i le Agaga e faaauau pea ona faalolotoina lau molimau.
O upumoni nei e lima ua ou aoaoina e uiga i le i ai o ni fesili i le ala:
E LE Afaina Le I Ai o Ni Fesili.
O fesili e mafai ona foliga taufaafefe, ae e finagalo le Tama Faalelagi ia tatou faia ni fesili i le faatuatua ina ia mafai ai ona faateleina lo tatou faatuatua ia Iesu Keriso. E mafai ona tatou vaai i faataitaiga a perofeta o e na faia fesili amiotonu e pei o Nifae (tagai 1 Nifae 17–18), le uso o Iareto (tagai Eteru 2–3), ae maise lava Iosefa Samita, o lana fesili faatauvaa na taitai atu ai i le Toefuataiga o le talalelei (tagai Iosefa Samita—Talafaasolopito 1:5–13).
2. E Silafia e le Atua Mea Uma
Ina ua ou faitauina le 2 Nifae mo le taimi muamua, sa ou iloaina e oo lava ia Nifae na i ai ni fesili. Ae sa ia tuu atu lona faalagolago i le Alii nai lo “le lima o le tagata” (2 Nifae 4:34). O lea, ina ua i ai ni au fesili, sa ou faatuatuaina foi le Alii. Sa ou tatalo faamaoni, suesue i tusitusiga paia, ma suesue i upu a perofeta e faalatalata atu ai ia te Ia ma faalagolago i Lana taimi a o lei oo i se isi lava mea.
Atonu e foliga mai e faigofie ona maua tali a le lalolagi, ae o le Atua o le punavai moni o le upumoni ma le malamalama. Ma e i ai pea lo tatou avanoa ia te Ia e taiala ai i tatou i le upumoni—o se faamanuiaga ofoofogia lena!
Pei ona sa aoao mai Peresitene Russell M. Nelson, “E mafai ona tatou tatalo i lo tatou Tama Faalelagi ma maua mai le taiala ma le taitaiga, ia lapata’ia e uiga i mea lamatia ma mea faalavefau, ma ia mafai ai ona faataunuu mea e le mafai ona tatou faia e i tatou lava ia.”1
3. Tatou te Manaomia Aafiaga ma le Alii i Aso Taitasi
E i ai taimi e faaosoosoina ai au e alu ese mai le Tama Faalelagi pe a ou faalogo i leo o le lalolagi, aemaise lava i latou o loo i luga o ala o faasalalauga faaagafesootai. O loo faia e le fili mea uma na te mafaia e taitai ese ai i tatou mai le upumoni. Ma e masani ona ia tuuina mai ia i tatou ni upumoni-afaafa ma ni manatu e foliga mai e le afaina ma faatosina.
Peitai ua aoao mai foi Peresitene Nelson e faapea “o le vaifofo i togafiti a Satani ua manino: tatou te manaomia i aso taitasi aafiaga o le tapuai atu i le Alii ma le suesueina o Lana talalelei. … Avatu ia te Ia se vaega talafeagai o lou taimi. A e faia lenei mea, ia matau le mea o loo tupu i lou malosiaga lelei faaleagaga.”2
O le faaavanoa o le taimi mo Ia i aso taitasi o le a fesoasoani ia i tatou e iloatino ai le leo o le fili ma le siufofoga o le Alii.
4. O Le Tausia o Feagaiga e Valaaulia ai le Mana o le Atua
E mafai ona faaosoosoina e faataga a tatou fesili e faatoilalo ai lo tatou faatuatua ma le faamoemoe ia Iesu Keriso. E mafai foi e le lalolagi ona faia le manatu o le solia o a tatou feagaiga e foliga mai e moomia. Ae ou te molimau atu o le mulimuli i upu a perofeta ma le tausia o au feagaiga, ua mafai ai ona ou maua se vaaiga e faavavau lea na fesoasoani ia te au e lagona atili ai le filemu ma le olioli nai lo se isi lava taimi muamua, e tusa lava pe aunoa ma tali uma. Ou te iloa, e pei ona aoao mai Peresitene Nelson, “o sauniga ma feagaiga tatou te maua ai le mana faaleatua,”3 ma na ou lagonaina lena mana e saili ma talitonu i upumoni e ala i le tausia o au feagaiga.
5. E Mafai Ona Tatou Filifili e Talitonu
Pe a e feagai ma ni fesili e lei taliina, mafaufau i mea e te iloa. Manatua o loo faatasi le Tama Faalelagi ma oe e tusa lava pe le mafai ona e mauaina ni tali i le taimi lava lena.
Ou te iloa le lagona o le i ai o ni fesili e lei taliina ma le feagai ai ma faaosoosoga mai le lalolagi. Ae ua ia i tatou le meaalofa taua ma le faamalosiau a le Agaga Paia. O le mulimuli i le Agaga e le faapea o le a tatou maua vave ni tali, ae o lona uiga e mafai ona taialaina i tatou i taimi uma i le upumoni. A o ou sailia le Tama Faalelagi ma Iesu Keriso, ou te lagonaina le olioli ma le malosi mai le Agaga i aso taitasi e agai ai pea i luma ma le faatuatua. Ou te manatua e ui lava i o tatou tauiviga, e i ai pea ia i tatou le mana e “filifili ai e talitonu.”4
Ou te matua faafetai lava mo lo’u malamalama i le talalelei ma mo fesili e faatagaina ai au e faafailele ma faatupulaia la’u molimau ia Iesu Keriso.