Si Jesukristo Mihatag Kanako og Paglaom sa Pagpakabuhi
Ang tagsulat nagpuyo sa Japan.
Pipila ka tuig ang milabay, dili nako gustong mabuhi pa, apan ang ebanghelyo ni Jesukristo mipakita kanako og kahulogan sa kinabuhi.
Unom ka tuig ang milabay, misulay ko sa pagtapos sa akong kinabuhi.
Bag-ohay lang ko nga gi-diagnose nga may diperensiya nga schizoaffective, usa ka lisod nga sakit sa utok, ug nahugno ko. Akong gibati nga ako walay bisan kinsa nga mga higala. Akong gibati nga wala makonektar sa akong pamilya. Gibati ko og tumang kaguol ug hilabihan nga nag-inusara sukad sa akong kinabuhi. Gibati usab nako ang kawalay paglaom tungod kay wala nako makita ang bisan unsang katuyoan sa pagpakabuhi.
Misugod ko sa pagbaton og mga hunahuna nga ang kinabuhi sa tanan mas maayo pa kon wala ko, ug dili nako gusto nga mabuhi pa. Busa usa ka gabii, sa hilom nga paagi misulay ako sa pagtapos sa akong kinabuhi.
Apan gikaloy-an pa gyod, nahibaloan sa akong pamilya ug gidala ko sa ospital diin gi-admit ako aron matabangan sa akong sakit sa hunahuna.
Sulod sa pipila ka semana, wala pa gihapon ako makakita og bisan unsang katuyoan sa kinabuhi ug mibati nga walay kalipay o kahayag. Ang akong kasingkasing dili na mobati. Apan sa kadugayan nakaamgo ko nga tinuod gyod nga ako wala mag-inusara, ug dili ko gustong mamatay. Samtang ako midawat og propesyonal nga tabang, nagsugod ko sa pagkakita og klaro nga ang akong pamilya ug mga higala nagmahal kanako, ug milambo ang akong kahimsog sa panghunahuna hangtod nga nakabaton ko og usa ka nabag-o nga paglaom sa pagpakabuhi. Gusto nakong makakaplag og hingpit nga kalipay ug kahulogan sa akong kinabuhi pag-usab. Akong gibati gayod karon nga ang Langitnong Amahan kadto kinsa mihatag kanako og laing higayon ug mipuno sa akong kasingkasing og paglaom.
Ang Ginoo Kanunayng Magtanyag Kanato sa Iyang Kahayag
Misugod ko sa pagtambong sa unibersidad, diin akong gipakigkitaan ang dugay nang kaila. Wala kaayo ko nakaila kaniya, apan adunay butang nga lahi kabahin niya. Siya adunay sanag, maabibahon nga panagway. Akong nahibaloan gikan sa ubang mga kaklase nga bag-o lang siyang nahibalik gikan sa pagserbisyo og “misyon.” Wala koy ideya unsa kadto, apan sa dihang mipasabot siya nga naglangkob kini og pagbiya sa iyang mga higala ug pamilya sulod sa duha ka tuig, naglibog kaayo ko. Ingon og malipayon ug masanagon kaayo siya, apan kon ako naa sa iyang kahimtang, basin og mingawon kaayo ko.
Samtang gilig-on namo ang panaghigalaay, misugod siya sa pag-istorya nako kabahin sa iyang simbahan. Gikan sa akong kasinatian nga misulay sa pagtapos sa akong kinabuhi, ako adunay lahi nga hunahuna nga tingali ang Dios tinuod. Akong nadungog ang mga tawo nga mohisgot Kaniya ug ni Jesukristo kaniadto, apan dili ko sigurado unsa ang tuohan. Mao nga usa ka adlaw, akong gipangutana ang akong higala, “Motuo ka ba sa Dios?” Dihadiha dayon, siya mipakigbahin og puno sa pagbati ug makapausab sa kinabuhi nga pagpamatuod ngari nako nga mitisok og mga binhi sa hugot nga pagtuo sa akong kaugalingong kasingkasing. Makakita ko kon unsa ka dakong kalipay ug kahayag ang nahatag sa ebanghelyo kaniya, ug gusto ko nga makasinati usab niana nga kalipay.
Samtang mipadayon ko sa pagpangutana kaniya, siya mihatag nako og usa ka Basahon ni Mormon ug misulti kanako nga kini makahatag kanako og mga tubag kabahin sa kinabuhi. Gipaila-ila ko niya ngadto sa mga misyonaryo. Misugod usab ko sa pag-apil kaniya sa miting sa sakramento, diin ang mga tawo nga adunay maanindot kaayong kahayag nga naglibot kanila mipakita kanako og gugma ug mipahinumdom kanako sa kamaayo nga anaa sa kalibotan.
Ako nakakat-on kabahin ni Jesukristo, sa akong balaan nga pagkatawo ug katuyoan, sa gugma sa Dios ug sa maulaon nga sakripisyo sa Manluluwas, ug unsa ang gipasabot niana alang kanako. Human sa tulo ka semana, ako nabunyagan ug nakompirma isip usa ka miyembro sa Ang Simbahan ni Jesukristo sa mga Santos sa Ulahing mga Adlaw.
Ang ebanghelyo nakahatag kanako og usa ka bag-ong pagbati sa kalipay ug kalinaw nga wala pa nako nabati sukad. Human masayod sa akong sakit sa panghunahuna, wala ko nagtuo nga magmalipayon pa ko pag-usab. Apan ang pagkasayod nga ako wala gayod nag-inusara sa akong mga panglimbasog mipuno sa akong kinabuhi sa kahayag.
Nakakat-on ko nga lapas sa bisan unsang mangitngit nga kalisdanan, ang Ginoo kanunayng nagtanyag kanato sa Iyang kahayag.
Ang Kinabuhi usa ka Gasa
Human sa pipila ka tuig, nakadawat ko sa mga panalangin sa templo ug miresulta sa pagminyo sa higala nga mipaila-ila kanako sa ebanghelyo. Nasilyo kami sa Sapporo Japan Temple. Ako mapasalamaton kaayo sa kahayag, gugma, ug paglaom nga gidala ni Jesukristo sa akong kinabuhi ug mga relasyon. Pinaagi sa pagpangita ug pagpalawom sa akong hugot nga pagtuo diha Kaniya ug sa mga kamatuoran sa ebanghelyo pinaagi sa pag-ampo, pagtuon sa kasulatan, ug pagtambong sa templo, hingpit ko nga nakaamgo kon unsa ka dako nga gasa ug kahigayonan ang akong kinabuhi.
Kini dako kaayo og kahulogan kanako nga si Kristo mihatag sa Iyang kinabuhi aron ako mahimong mabuhi. Kana nga kahibalo tinuod gayod nga miusab sa akong panglantaw sa akong mga panglimbasog uban sa sakit sa panghunahuna, ug ako mapasalamaton kaayo sa matag adlaw nga ako makasinati sa kinabuhi uban Kaniya sa akong kiliran.
Akong balikon ang mga pulong ni Elder Jeffrey R. Holland sa Korum sa Napulog Duha ka Apostoles, kinsa miingon:
“Ngadto ni bisan kinsa … nga anaa sa panglimbasog, bisan unsay inyong mga kabalaka o mga kalisod, ang kamatayon pinaagi sa paghikog napamatud-an nga dili maoy tubag. Dili kini makahupay sa kasakit nga inyong gibati o nga sa inyong hunahuna kamo ang hinungdan. Dinhi sa kalibotan nga nagkinahanglan gayod sa tanan nga kahayag nga maangkon niini, palihog ayaw pagamyi ang mahangtoron nga kahayag nga gibutang sa Dios sa inyong kalag sa wala pa kini nga kalibotan. Pakigsulti sa uban. Pangayo og tabang. Ayaw gub-a ang kinabuhi nga gibuhisan ni Kristo sa Iyang kinabuhi aron matunhay. Masugakod ninyo ang mga panglimbasog niining mortal nga kinabuhi tungod kay kami motabang ninyo sa pagpas-an niini. Mas lig-on kamo kay sa inyong hunahuna. Anaa ang tabang, gikan sa uban ug ilabi na gikan sa Dios. Gipangga kamo, ug gipakabili ug gikinahanglan. Nagkinahanglan kami kaninyo!”1
Nag-atubang pa gihapon ko og mga hagit, apan karon ako nasayod nga ang akong kinabuhi adunay katuyoan. Ako gimahal og maayo sa akong Langitnong Amahan ug ingon man sa daghan pa. Ako nasayod nga ako makapangayo alang sa temporal ug espirituwal nga tabang. Makanunayon nakong gipahinumdoman ang akong kaugalingon sa pagbaton og mahangtorong panglantaw, mohinumdom nga ang Manluluwas nakasabot sa matag kasakit ug pagkadili makiangayon nga akong gibati, ug gihunahuna kon sa unsang paagi Siya makatabang nako nga mas mahisama Kaniya diha sa pag-atubang sa mga pagsulay.
Ako nagtuo ni Jesukristo ug sa Iyang ebanghelyo. Ako nasayod nga diha Kaniya, ako kanunayng makabuntog sa mangitngit nga mga panahon ug makakaplag og kahayag pag-usab. Tungod Kaniya, ako nakadiskobre nga posible gayod ang paghigugma sa kinabuhi ug pagbaton og kalipay ug kalinaw, bisan taliwala sa mga hagit. Mapasalamaton kaayo ko sa matag adlaw alang sa kahulogan ug sa paglaom nga Iyang gidala sa akong kinabuhi. Ako nasayod nga kon kita mosalig Kaniya, Siya kanunayng mohatag kanato og paglaom sa atong mga kinabuhi.