Ang Akong Higala Adunay mga Pangutana mahitungod sa Ebanghelyo: Unsaon man Kon Ako Walay mga Tubag?
Ako wala masayod kon ako adunay bisan unsang mga tubag nga makatabang sa akong roommate, apan ang Espiritu mitabang nako sa pagpangita og mga tubag nga akong gikinahanglan.
“Paminaw nako wala gyod nako mabati ang Espiritu o ang gugma sa Dios alang nako.”
Kini nga mga pulong gikan sa akong roommate sa kolehiyo nakapaguol kaayo nako. Anaa kami taliwala sa usa ka taas nga paghisgot sa ebanghelyo diin siya ingon og adunay mas daghang pangutana kay sa akong matubag.
Unsaon nako sa pagpasabot kon sa unsang paagi nako nabati ang gugma sa Dios ngadto sa tawo nga nagtuo nga sila wala gayod mobati niini? Unsaon nako siya sa pagtabang nga makit-an ang mga tubag sa mga pangutana sa ebanghelyo kon ako usab walay ikatubag sa tanan? Unsaon man kon akong mapaambit kanang butang nga masaypan og sabot?
Mibati og kadesperado sa pagtabang kaniya, militok ko og hilom nga pag-ampo alang sa tabang. Samtang miuswag ang among panag-istorya, daghang mga kasulatan nga may kalabotan sa usa ka hilisgotan mipuno sa akong hunahuna (hilabihan ko kamapasalamaton sa akong pagtuon sa kasulatan ug sa klase sa institute nianang higayona). Ang akong kasingkasing ug hunahuna napuno sa daghan kaayong kamatuoran nga akong gihunahuna sa pagpaambit niining tanan ngadto kaniya tungod kay gusto kaayo nako nga ihikyad ang ebidensiya ug kombinsihon siya sa kamatuoran sa ebanghelyo. Apan nabati nako ang Espiritu nga nag-aghat nako sa pagpili lang og pipila ka mga butang nga ipaambit nga labing maayong magamit sa iyang mga pangutana.
Akong gipaambit ang pipila sa akong kaugalingong mga kasinatian ngadto niya aron sa paghatag og konteksto sa akong mga tubag, ug sa paagi nga, ako usab nakahatag sa akong pagpamatuod. Adunay mga pangutana nga sa akong pamati ako dili sarang sa pagtubag, ug miangkon ko ngadto niya nga wala ko masayod sa tanang butang, apan ako adunay hugot nga pagtuo.
Gibati og Kakulang sa Katakos
Kini daw usa ka malamposon nga panag-istoryahanay, apan sa tibuok gabii akong gi-kwestiyon ang akong mga paningkamot. Mibati ko og kakulang sa katakos; wala gyod ko masayod sa tanang tubag ug mibati nga daw dili igo ang akong nabuhat sa pagtabang kaniya.
Apan sa wala pa ako natulog, akong gibasa ang Doktrina ug mga Pakigsaad 100. Ang mga bersikulo 6 ug 7 ang nakadani kanako. Giingon dinhi:
“Kay ihatag kini kaninyo sa takna gayod, oo, sa diha gayod nga higayon, unsa ang inyong isulti.
“… Kamo mopahayag sa bisan unsa nga butang nga inyong ipahayag sa akong ngalan, diha sa kaligdong sa kasingkasing, diha sa espiritu sa kaaghop, sa tanan nga mga butang.”
Ako namalandong sa among panag-istoryahanay ug nahingangha kon unsa ka dali nakong nahinumdoman ang mga kasulatan ug mga kinutlo. Ang Espiritu namulong sa akong kasingkasing, ug ako nasayod nga ako gigiyahan Kaniya aron masayod unsa ang isulti. Mibati ko og kamasaligon nga ako nakatubag “diha sa kaligdong sa kasingkasing, diha sa espiritu sa kaaghop.” Ako nasayod nga sakto ang akong pagpakgang sa akong kaugalingon gikan sa pagsulay sa paggamit og mga kamatuoran ug ebidensiya sa pagkombinsir kaniya ug sa pagpaambit lang sa mga kamatuoran nga sa akong pagtuo kinahanglan niyang madunggan nianang higayona.
Kini nga kasinatian nakatabang nako nga makaamgo kon unsa ka dako ang pagpakabana sa Dios alang sa akong roommate ug alang sa tanan kanato.
Makasalig Kita sa Espiritu sa Pagpaambit sa Kamatuoran
Kini nga panag-istoryahanay mahimong wala makapausab sa bisan unsa nga dinagkong butang sa iyang kinabuhi, apan kini nakahimo gayod og kalainan diri nako. Wala ko magdahom nga ang akong mga pulong modala sa akong roommate sa dihadiha dayon, walay pagduhaduha nga pagpamatuod. Ug kini wala. Apan ako nasayod nga siya karon mas nakasabot sa pipila ka mga aspeto sa ebanghelyo ug gibati nga mas malinawon.
Ako nasayod nga ang akong mga tubag dili perpekto. Apan nasayod usab ko nga ang Langitnong Amahan nasayod ug nahigugma sa matag usa sa Iyang mga anak, ug Siya migiya kanako sa pagsulti unsa ang labing makatabang kaniya. Si Presidente Henry B. Eyring, ang Ikaduhang Magtatambag sa Unang Kapangulohan, miingon, “Ang yanong pagdungog sa mga pulong sa doktrina makatisok sa binhi sa hugot nga pagtuo diha sa kasingkasing.”1
Busa samtang ang akong roommate aduna pa gihapoy mga pangutana, ang kamatuoran nga akong gipaambit kaniya tingali makatabang sa pagpatubo ug pagpalig-on sa iyang pagpamatuod labaw pa kay sa iyang nahibaloan. Ug alang nako, ang pagpaambit niadtong mga kamatuoran nakapalig-on sa akong pagpamatuod kon unsa ka dako ang paghigugma sa Dios sa Iyang mga anak. Ako nasayod nga samtang kita magbaton og kaisog sa pagpaambit kon unsa ang anaa sa atong kasingkasing ug mosalig sa Espiritu, Siya mogiya kanato aron makahibalo kon unsa ang isulti aron mapaambit ang gugma ug kahayag ni Jesukristo ngadto ni bisan kinsa, ilabi na niadtong kinsa nagpangita sa kamatuoran.