Na Tuuina Mai e Iesu Keriso ia te A’u le Faamoemoe e Ola Ai
E nofo le tusitala i Iapani.
I ni nai tausaga ua mavae, sa ou le toe fia ola ai, ae sa faaali mai e le talalelei a Iesu Keriso ia te a’u le uiga o le olaga.
I le ono tausaga talu ai, sa ou taumafai ai e faamuta lo’u ola.
E le’i leva ona maua a’u i le faaletonu o le mafaufau, o se gasegase faigata o le mafaufau, ma sa ou matuā faanoanoa. Sa ou lagona e pei e leai ni a’u uo. Sa ou lagona le leai o se fesootaiga ma lo‘u aiga. Sa ou faanoanoa ma o se lagona o le tuuatoatasi pito sili lea sa ou i ai i lo’u olaga. Sa ou lagonaina foi le leai o se faamoemoe aua ou te le’i vaai i se faamoemoega o le olaga.
Sa amata ona i ai ni o’u mafaufauga o le a sili atu i tagata uma le iai e aunoa ma a’u, ma sa ou le toe fia ola. I se tasi la po, sa ou taumafai ai e faamuta filemu lo’u ola.
Ae i le agalelei, na iloa ai e lo’u aiga ma ave a’u i se falemai lea sa taofia ai a’u mo se fesoasoani i lo’u soifua maloloina faalemafaufau.
Mo ni nai vaiaso, ou te le’i vaai lava i se faamoemoega o le olaga ma sa ou le lagonaina se olioli po o se malamalama. Sa faasolo ina le fia auai lo’u loto. Ae na iu lava ina ou iloaina e le’i tuua na o a’u, ma ou te le’i fia oti. A o ou mauaina se fesoasoani faapolofesa, sa amata ona manino la’u vaai sa alolofa lo’u aiga ma au uo ia te a’u, ma sa faaleleia lo’u soifua maloloina faalemafaufau seia oo ina ou maua se faamoemoe faafouina mo le olaga. Sa ou manao e toe maua le olioli ma le uiga i lo’u olaga. Ua ou lagonaina nei le malosi o le Tama Faalelagi lea na tuuina mai ia te a’u se isi avanoa ma faatumulia lo’u loto i le faamoemoe.
O Le a Ofoina Mai Pea e le Alii Ia i Tatou Lona Malamalama
Sa amata ona ou auai i le Iunivesite, lea sa ou feiloai ai i se uo ua leva. Ou te le’i iloaina lelei o ia, ae sa i ai se mea na ‘ese e uiga ia te ia. Sa ia te ia se foliga susulu, ma le fiafia. Sa ou aoao mai isi tagata o le vasega e faapea faatoa foi mai lava o ia mai le auauna atu i se “misiona.” Sa ou le iloa po o le a lena mea, ae ina ua ia faamalamalama mai e aofia ai le tuua o ana uo ma aiga mo le lua tausaga, sa ou matuā le mautonu lava. Sa foliga mai sa matuā fiafia ma olioli o ia, ae ana faapea o a’u, semanu ou te matuā lagonaina lava le tuuatoatasi.
A o ma fausia se faigauo, sa amata ona ia talanoa mai ia te a’u e uiga i lana Ekalesia. Mai lo’u aafiaga i le taumafai e faamuta lo’u ola, sa ou maua ai se manatu tulaga ese atonu e moni le Atua. Sa ou faalogo i tagata o ta’ua muamua o Ia ma Iesu Keriso, ae sa ou le mautinoa po o le a le mea e talitonu i ai. I se tasi aso, sa ou fesili ai i la’u uo, “E te talitonu i le Atua?” O le taimi lava lena, sa ia faasoa mai ai se molimau faananau ma le suia o le olaga ia te a’u lea na totoina ai ni fatu o le faatuatua i lo’u lava loto. Sa mafai ona ou iloa le tele o le olioli ma le malamalama na tuuina mai e le talalelei ia te ia, ma sa ou manao foi ia maua lena olioli.
A o faaauau pea ona ou fai atu ia te ia ni fesili, sa ia tuuina mai ia te a’u se Tusi a Mamona ma fai mai ia te a’u o le a aumaia ai ia te a’u ni tali e uiga i le olaga. Sa ia faailoa atu a’u i faifeautalai. Sa amata foi ona ou auai atu ma ia mo le sauniga faamanatuga, lea na faaali mai ai ia te a’u e tagata e i ai se malamalama susulu e uiga ia i latou le alofa ma faamanatu mai ia te a’u le agalelei i le lalolagi.
Sa ou aoao e uiga ia Iesu Keriso, lo’u faasinomaga paia ma le faamoemoega, le alofa o le Atua ma le taulaga togiola a le Faaola, ma le uiga o lena mea mo a’u. Ina ua mae’a le tolu vaiaso, sa papatisoina ma faamauina a’u o se tagata O Le Ekalesia a Iesu Keriso o le Au Paia o Aso e Gata Ai.
Ua tuuina mai e le talalelei ia te a’u se lagona fou o le olioli ma le filemu ou te le’i lagonaina muamua. Ina ua ou iloa lo’u ma’i faalemafaufau, ou te le’i manatu o le a ou toe fiafia. Ae o le iloaina e lē tuua lava na o a’u i a’u tauiviga na faatumulia ai lo’u olaga i le malamalama.
Sa ou aoaoina e sili atu nai lo soo se faigata pogisa, o le a ofoina mai pea e le Alii ia i tatou Lona malamalama.
O le Ola o se Meaalofa
Ina ua mavae ni nai tausaga, sa ou maua faamanuiaga o le malumalu ma i’u ai ina ou faaipoipo i le uo lea na faailoa maia a’u i le talalelei. Na faamauina i ma’ua i le Malumalu o Sapporo Iapani. Ou te matuā faafetai lava mo le malamalama, alofa, ma le faamoemoe ua aumaia e Iesu Keriso i lo’u olaga ma sootaga. E ala i le sailia ma le faalolotoina o lo’u faatuatua ia te Ia ma i upumoni o le talalelei e ala i le tatalo, suesueina o tusitusiga paia, ma le auai i le malumalu, ua mafai ai ona ou iloa atoatoa le telē o se meaalofa ma se avanoa o lo’u olaga.
E taua tele ia te a’u le tuuina mai e Keriso o Lona soifua ina ia mafai ona ou ola. O lena malamalama na suia moni ai la’u vaaiga i a’u tauiviga ma le soifua maloloina faalemafaufau, ma ou te matuā faafetai lava i aso uma ua ou oo ai i le olaga faatasi ma Ia i o’u autafa.
Ou te toe ta’u atu upu a Elder Jeffrey R. Holland o le Korama a Aposetolo e Toasefululua, sa faapea mai:
“I soo se tasi … o o tatou talavou iina o tauivi, po o a lava ou popolega po o faigata, o le oti e ala i le pule i le ola ua manino lava e lē o le tali lea. O le a le faamatuuese atu le tiga o loo e lagona po o atonu o loo e mafaufau o e faapogaiina. I se lalolagi ua matua manaomia le malamalama uma e mafai ona ia maua, faamolemole aua ne’i tuuitiitia le malamalama faavavau na tuuina e le Atua i lou agaga a o le’i i ai lenei lalolagi. Talanoa i se tasi. Fesili atu mo se fesoasoani. Ia aua ne’i faatama’iaina se ola lea na tuuina mai e Keriso Lona soifua ina ia faasaoina ai. E mafai ona e onosaia faigata o lenei olaga faitino aua o le a matou fesoasoani ia te oe e onosaia. E te malosi atu nai lo le mea o e manatu ai. O loo maua le fesoasoani, mai i isi aemaise lava mai le Atua. E alofagia ma taua ma manaomia outou. Matou te manaomia outou!”1
O loo ou feagai pea ma luitau, ae o lenei ua ou iloa e i ai se faamoemoega o lo’u olaga. E alofagia tele a’u e lo’u Tama Faalelagi ma le toatele o isi. Ou te iloa e mafai ona ou aapa atu mo le fesoasoani faaletino ma le faaleagaga. E masani ona ou faamanatu ia te a’u lava ia ia tausisia se vaaiga e faavavau, ia manatua e malamalama le Faaola i tiga uma ma le le talafeagai ou te lagonaina, ma mafaufau pe mafai faapefea ona Ia fesoasoani ia te a’u ia avea atili e faapei o Ia i le feagai ai ma tofotofoga.
Ou te talitonu ia Iesu Keriso ma Lana talalelei. Ou te iloa o Ia, e mafai ai lava ona ou faatoilaloina taimi pogisa ma toe maua ai le malamalama. Ona o Ia, ua ou iloa ai e mafai moni lava ona alofa i le olaga ma maua le olioli ma le filemu, e oo lava i lu’itau. Ou te matua faafetai lava i aso uma mo le uiga ma le faamoemoe ua Ia aumaia i lo’u olaga. Ou te iloa afai tatou te faalagolago ia te Ia, o le a Ia aumaia pea ia i tatou le faamoemoe i o tatou olaga.