Sa I Ai Ni Fesili a La’u Uo e uiga i le Talalelei: Ae Faapefea Pe Ana Ou Le Maua Tali?
Ou te le’i iloa pe i ai ni a’u tali o le a fesoasoani i la’u uo e ma te potu faatasi, ae na fesoasoani le Agaga ia te a’u e su’e tali sa ou manaomia.
“Ou te manatu ou te le’i lagonaina lava le Agaga po o le alofa o le Atua mo a’u.”
O upu nei mai la’u uo i le kolisi na olopalaina ai a’u. Sa loloto sa maua talanoaga faaletalalelei lea sa foliga mai sa tele atu ana fesili nai lo le mea e mafai ona ou taliina.
E mafai faapefea ona ou faamatalaina le auala na ou lagonaina ai le alofa o le Atua i se tasi sa manatu latou te le’i lagonaina lava? E mafai faapefea ona ou fesoasoani ia te ia e saili tali i fesili o le talalelei ina ua ou le mauaina uma tali? Ae faapefea pe afai ou te faasoa atu se mea e mafai ona malamalama sese i ai?
I le lagonaina o le naunautai e fesoasoani ia te ia, sa ou faia ai se tatalo le leoa mo se fesoasoani. A o faagasolo le ma talanoaga, e tele mau e faatatau i se autu na fetuleni mai i lo’u mafaufau (sa ou matua faafetai lava mo a’u suesuega o tusitusiga paia ma le vasega inisitituti i lena taimi). Sa faatumulia lo’u loto ma lo’u mafaufau i le tele o upumoni sa ou mafaufau e faasoa atu ia te ia ona sa ou matuai manao lava e fofola atu faamaoniga ma faatalitonu o ia i le moni o le talalelei. Ae sa ou lagonaina le uunaiga a le Agaga ia te a’u e filifili na o ni nai mea se lua e faasoa atu e sili ona faatatau i ana fesili.
Sa ou faasoa atu nisi o o’u lava aafiaga ia te ia e avatu ai le faamatalaga i a’u tali, ma i se auala, sa mafai ai fo’i ona ou tuuina atu la’u molimau. Sa i ai ni fesili ou te le’i lagonaina le agavaa e tali, ma sa ou tautino atu ia te ia ou te le’i iloaina mea uma, ae sa ou faatuatua.
Lagonaina o le Le Atoatoa
Sa foliga mai o se talanoaga faamanuiaina, ae o le po atoa na totoe sa ou fesiligia ai a’u taumafaiga. Sa ou lagona le le atoatoa; Ou te le’i iloaina uma tali ma lagona e le’i lava se mea na ou faia e fesoasoani ai ia te ia.
Ae ou te le’i moe, sa ou faitauina le Mataupu Faavae ma Feagaiga 100. O fuaiupu 6 ma le 7 na taula’i iai la’u vaai. Na faapea mai:
“Aua o le a tuu atu ia te oulua i le itula tonu lava, ioe, i le minute tonu lava, mea e te lua fai atu ai.
Ae Ou te tuu atu ia te oulua se poloaiga, ia oulua alaga atu soo se mea lua te alaga atu i loʼu igoa, i le mamalu o le loto, i le agaga o le agamalu, i mea uma.”
Sa ou tomanatu i le ma talanoaga ma sa ou maofa moni lava i le vave ona oo mai o tusitusiga paia ma upusii ia te a’u. Sa fetalai mai le Agaga i lo’u loto, ma sa ou iloaina sa taitaiina a’u e Ia ia iloa le tala e fai atu. Sa ou lagona le mautinoa sa ou tali atu “i le faamaoni o le loto, i le agaga o le agamalu.” Sa ou iloaina sa ou sa’o i le taofia o a’u lava mai le taumafai e faaaoga mea moni ma faamaoniga e faatalitonu ai o ia ma faasoa atu na o upumoni sa ou manatu e tatau ona ia faalogo i ai i lena taimi.
O lenei aafiaga na fesoasoani ou te iloa ai le tele o le popole o le Atua mo la’u uo ma i tatou uma.
E Mafai Ona Tatou Faalagolago i le Agaga e Faasoa Atu Upumoni
Atonu e le’i suia tele e lenei talanoaga se mea i lona olaga, ae sa faia ai se eseesega i lo’u olaga. Ou te le’i faamoemoeina a’u upu e taitai atu ai la’u uo e ma te potu faatasi i se molimau vave, ma le lē maluelue. Ma e latou te le’i faia. Ae ou te iloa ua malamalama lelei nei o ia i nisi o vaega o le talalelei ma lagona atili ai le filemu.
Sa ou iloa e le’i atoatoa a’u tali. Ae sa ou iloaina foi e silafia ma alofa le Tama Faalelagi i Ana fanau taitoatasi, ma sa Ia taitaia a’u e ta’u atu mea o le a sili ona fesoasoani ia te ia. Na saunoa mai Peresitene Henry B. Eyring, Fesoasoani Lua i le Au Peresitene Sili, “Tau lava o le faalogo i upu o le aoaoga faavae e mafai ona totoina ai le fatu o le faatuatua i le loto.”1
A o i ai pea ni fesili a la’u uo ma te potu faatasi, o upumoni na ou faasoa atu ia te ia e mafai ona fesoasoani e tuputupu a’e ai ma faamalosia ai lana molimau e sili atu nai lo le mea o le a ou iloaina. Ma mo a’u, o le faasoaina atu o na upumoni na faamautuina ai la’u molimau i le tele o le alofa o le Atua i Ana fanau. Ou te iloa a tatou maua le lototele e faasoa atu ai mea o i o tatou loto ma faalagolago i le Agaga, o le a Ia taialaina i tatou ia iloa le mea e fai atu e faasoa atu ai le alofa ma le malamalama o Iesu Keriso i soo se tasi, aemaise lava ia i latou o loo sailia le upumoni.