Naʻe ʻOmi ʻe Sīsū Kalaisi ha ʻAmanaki Lelei Ke u Moʻui
ʻOku nofo ʻa e tokotaha naʻá ne faʻú ʻi Siapani.
ʻI he ngaahi taʻu siʻi kuo hilí, naʻe ʻikai ke u toe fie moʻui, ka naʻe fakahā mai ʻe he ongoongolelei ʻo Sīsū Kalaisí kiate au ʻa e ʻuhinga ʻo e moʻuí.
ʻI he taʻu ʻe ono kuohilí, naʻá ku feinga ke fakangata ʻeku moʻuí.
Ne toki ʻiloʻi pē ʻoku ou puke ʻi he mahaki schizoaffective, ko ha fokoutua fakaeʻatamai faingataʻa, pea naʻá ku loto mamahi. Naʻá ku ongoʻi ne hangē ʻoku ʻikai haku ngaahi kaungāmeʻá. Naʻá ku ongoʻi ʻoku motuhi au mei hoku fāmilí. Naʻá ku ongoʻi loto-mafasia mo tuenoa ʻi ha toe taimi ʻi heʻeku moʻuí. Naʻá ku toe ongoʻi foki ʻoku siva e ʻamanakí koeʻuhí naʻe ʻikai ke u sio ki ha taumuʻa ʻo e moʻuí.
Naʻe kamata ke u maʻu ha ngaahi fakakaukau ʻe lelei ange ʻa e tokotaha kotoa pē kapau he ʻikai te u kau ai, pea naʻe ʻikai ke u toe fie moʻui. Ko ia ʻi ha pō ʻe taha, naʻá ku feinga fakalongolongo ke fakangata ʻeku moʻuí.
Ka ʻi he angaʻofa, naʻe ʻiloʻi ʻe hoku fāmilí pea nau ʻave au ki ha falemahaki ʻa ia naʻe tali ai au ke u maʻu ha tokoni ki heʻeku moʻui lelei fakaeʻatamaí.
ʻI ha ngaahi uike siʻi, naʻe teʻeki pē ke u sio au ki ha taumuʻa ʻo e moʻuí pea naʻe ʻikai ke u ongoʻi ha fiefia pe maama. Naʻe fakaʻau ke momoko hoku lotó. Ka naʻe faifai peá u fakatokangaʻi naʻe ʻikai ke u tuenoa moʻoni, pea naʻe ʻikai ke u fie mate. ʻI heʻeku maʻu ha tokoni fakapalōfesinalé, naʻe kamata ke mahino kiate au naʻe ʻofa hoku fāmilí mo e ngaahi kaungāmeʻá ʻiate au, pea naʻe tupulaki ʻeku moʻui lelei fakaeʻatamaí kae ʻoua kuó u maʻu ha ʻamanaki lelei foʻou ki he moʻuí. Naʻá ku fie maʻu ke u toe maʻu ʻa e fiefiá mo e ʻuhingá ʻi heʻeku moʻuí. ʻOku ou ongoʻi mālohi he taimí ni ko e Tamai Hēvaní naʻá Ne ʻomi kiate au ha toe faingamālié pea fakafonu hoku lotó ʻaki ʻa e ʻamanaki leleí.
ʻE Foaki Mai Maʻu Pē ʻe he ʻEikí ʻEne Māmá Kiate Kitautolu
Naʻá ku hū ki he ʻunivēsití, ʻo u fetaulaki ai mo haku kaungāmeʻa fuoloa. Naʻe ʻikai ke u ʻiloʻi lelei ia, ka naʻe ʻi ai ha meʻa naʻe kehe fekauʻaki mo ia. Naʻá ne maʻu ha fofonga fiefia moʻoni. Naʻá ku ʻilo mei hoku ngaahi kaungā ako kehé naʻe toki foki mai mei he “ngāue fakafaifekaú.” Naʻe ʻikai ke u ʻilo pe ko e hā ia, ka ʻi heʻene fakamatalaʻi mai naʻe kau ai ʻa e mavahe mei hono ngaahi kaungāmeʻá mo e fāmilí ʻi ha taʻu ʻe uá, naʻá ku puputuʻu ʻaupito. Naʻe hangē naʻá ne fuʻu fiefia mo nēkeneká, ka ʻo kapau naʻá ku fakahoko ʻa e meʻa naʻá ne fakahokó, naʻá ku mei taʻelata ʻaupito.
ʻI heʻema langaki ha feohi fakakaungāmeʻá, naʻe kamata ke ne talanoa mai fekauʻaki mo hono siasí. Naʻá ku maʻu ha fakakaukau pau mei he meʻa naʻá ku aʻusiá ʻi heʻeku feinga ke fakangata ʻeku moʻuí, mahalo ʻoku ʻi ai moʻoni ʻa e ʻOtuá. Naʻá ku ʻosi fanongo kimuʻa ki he lau ʻa e kakaí ʻo kau kiate Ia mo Sīsū Kalaisí, ka naʻe ʻikai ke u fakapapauʻi pe ko e hā e meʻa te u tui ki aí. Naʻá ku fehuʻi ange ki hoku kaungāmeʻá ʻi ha ʻaho ʻe taha, “ʻOkú ke tui nai ki he ʻOtuá?” Naʻá ne vahevahe mai ʻi he taimi pē ko iá ha fakamoʻoni mālohi mo liliu moʻui ʻa ia naʻá ne tō ha ngaahi tenga ʻo e tuí ʻi hoku lotó. Naʻá ku lava ʻo sio ki he lahi ʻo e fiefia mo e maama naʻe ʻoange ʻe he ongoongoleleí kiate iá, pea naʻá ku fie maʻu foki ke u aʻusia ʻa e fiefia ko iá.
ʻI he hokohoko atu ʻeku fakafehuʻia iá, naʻá ne ʻomi ha Tohi ʻa Molomona kiate au mo talamai te ne ʻomi e ngaahi tali fekauʻaki mo e moʻuí. Naʻá ne fakafeʻiloaki au ki he ongo faifekaú. Naʻe kamata foki ke u kau fakataha mo ia ʻi he houalotu sākalamēnití, ʻa ia naʻe hā mai mei he kakaí ha maama fakaʻofoʻofa fekauʻaki mo kinautolu ʻo nau fakahaaʻi mai ʻa e ʻofá mo fakamanatu mai ʻa e ngaahi lelei ʻi he māmaní.
Naʻá ku ako fekauʻaki mo Sīsū Kalaisi, hoku tuʻunga fakalangí mo e taumuʻá, ʻofa ʻa e ʻOtuá mo e feilaulau fakalelei ʻa e Fakamoʻuí, pea mo hono ʻuhinga kiate aú. Hili ha uike ʻe tolu, naʻe papitaiso mo hilifaki nima au ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimuí Ní.
Kuo ʻomi ʻe he ongoongoleleí ha ongoʻi fiefia mo ha nonga foʻou kuo teʻeki ke u ongoʻi kimuʻa. Hili ʻeku ʻilo ki heʻeku puke fakaeʻatamaí, naʻe ʻikai ke u fakakaukau te u toe fiefia. Ka ʻi heʻeku ʻiloʻi ʻoku ʻikai ke u tuenoa ʻi hoku ngaahi faingataʻaʻiá, ne fakafonu ʻeku moʻuí ʻaki e māmá.
Naʻá ku ako ʻe foaki mai maʻu pē ʻe he ʻEikí ʻEne māmá kiate kitautolu, ʻo mahulu atu ʻi ha toe faingataʻa mafatukituki.
Ko e Moʻuí Ko ha Meʻaʻofa.
Hili ha ngaahi taʻu siʻi, ne u maʻu e ngaahi tāpuaki ʻo e temipalé pea iku ʻo u mali mo e kaungāmeʻa naʻá ne fakafeʻiloaki au ki he ongoongoleleí. Naʻe silaʻi kimaua ʻi he Temipale Saporo Japan. ʻOku ou houngaʻia ʻaupito ʻi he maama, ʻofa, mo e ʻamanaki lelei kuo ʻomi ʻe Sīsū Kalaisi ki heʻeku moʻuí mo e ngaahi vā fetuʻutakí. ʻI heʻeku fekumi mo fakaloloto ʻeku tui kiate Iá pea mo e ngaahi moʻoni ʻo e ongoongoleleí ʻo fakafou ʻi he lotú, ako folofolá, mo e ʻalu ki he temipalé, kuó u lava ai ʻo ʻiloʻi kakato ʻa e lahi ʻo e meʻafoaki mo e faingamālie ʻoku ou maʻu ʻi heʻeku moʻuí.
ʻOku mahuʻinga fau kiate au ʻa e foaki ʻe Kalaisi ʻEne moʻuí kae lava ke u moʻui. Naʻe liliu moʻoni ʻe he ʻilo ko iá ʻeku fakakaukau ki hoku ngaahi faingataʻaʻia ʻi he moʻui lelei fakaeʻatamaí, pea ʻoku ou houngaʻia he ʻaho kotoa pē ke u aʻusia ʻa e moʻuí mo Ia ʻi hoku tafaʻakí.
ʻOku ou toe ʻoatu e lea ko ʻeni ʻa ʻEletā Sefilī R. Hōlaní ʻo e Kōlomu ʻo e Kau ʻAposetolo ʻe Toko Hongofulu Mā Uá:
“Ki ha taha pē … ʻoku faingataʻaʻia, ko e hā pē meʻa ʻokú ke hohaʻa pe faingataʻaʻia aí, ʻoku ʻikai ko e talí ʻa e mate taonakitá. He ʻikai mōlia ai e mamahi ʻokú ke ongoʻí pe ko ia ʻokú ke pehē ʻokú ke fakatupú. ʻI ha māmani ʻoku fuʻu fie maʻu ai ʻa e maama kotoa pē ʻe ala maʻú, ʻoua muʻa naʻá ke fakasiʻia e maama taʻengata naʻe foaki ʻe he ʻOtuá ki ho laumālié kimuʻa pea fakatupu e māmani ko ʻení. Talanoa ki ha taha. Kole ha tokoni. ʻOua muʻa naʻá ke fakaʻauha e moʻui naʻe foaki ʻe Kalaisi ʻEne moʻuí ke fakatolongá. Te ke lava ʻo kātekina e ngaahi faingataʻa ʻo e moʻui fakamatelié ni koeʻuhí te mau tokoniʻi koe ke ke kātekina kinautolu. ‘Okú ke mālohi ange ʻi he meʻa ʻokú ke mafakakaukauá. ʻOku maʻu e tokoní, mei he niʻihi kehé kae tautautefito mei he ʻOtuá. ‘Oku ʻofaʻi, fakamahuʻingaʻi mo fie maʻu koe! ʻOku mau fie maʻu koe!”1
ʻOku ou kei fehangahangai pē mo e ngaahi faingataʻá, ka kuó u ʻilo ʻeni ʻoku ʻi ai ha taumuʻa ʻo ʻeku moʻuí. ʻOku ʻofeina lahi au ʻe heʻeku Tamai Hēvaní mo ha niʻihi kehe tokolahi. ʻOku ou ʻilo te u lava ʻo tokoni fakatuʻasino mo fakalaumālie fakatouʻosi. ʻOku ou faʻa fakamanatu pē kiate au ke u tauhi ha fakakaukau ʻoku taʻengatá, manatuʻi ʻoku mahino ki he Fakamoʻuí ʻa e mamahi mo e taʻe-totonu kotoa pē ʻoku ou ongoʻí, mo fakakaukau ki he founga te Ne lava ai ʻo tokoniʻi au ke u hoko ʻo hangē ange ko Iá ʻi heʻeku fehangahangai mo e ngaahi faingataʻá.
ʻOku ou tui kia Sīsū Kalaisi mo ʻEne ongoongoleleí. ʻOku ou ʻilo te u lava ʻo ʻikuna maʻu pē ʻiate Ia ʻa e ngaahi taimi faingataʻá pea toe maʻu ʻa e māmá. Koeʻuhí ko Ia, kuó u ʻiloʻi ai ʻoku malava moʻoni ke ʻofa ʻi he moʻuí mo maʻu ʻa e fiefiá mo e nongá ʻo aʻu pē ki he lotolotonga ʻo e ngaahi faingataʻá. ʻOku ou houngaʻia he ʻaho kotoa pē koeʻuhí ko e ʻuhinga mo e ʻamanaki lelei ʻokú Ne ʻomi ki heʻeku moʻuí. ʻOku ou ʻilo kapau te tau falala kiate Ia, te Ne ʻomi maʻu pē ha ʻamanaki lelei ki heʻetau moʻuí.