“Talanoaga Taua Faaleaiga,” Liahona, Ian. 2023.
TalanoagaTaua Faaleaiga
O talanoaga taua o le a fesoasoani i a tatou fanau ia iloa mea latou te talitonu i ai ma pe aisea latou te talitonu ai.
Ata na tusia e Noah Regan
Sa fai atu se atalii i lona tama e aoao o ia e uiga i le aeae i mauga. Sa aoao atu e le tama mea uma e manaomia, e aofia ai le fuafuaina, saogalemu, sauniuniga, ma meafaigaluega. Sa fesili atu le atalii pe o afea o le a la talanoa ai e uiga i le mea e fai pe a tupu se faalavelave faafuasei. Na fai mai le tama na te lei manao e faafefe lona atalii ma o lenei talanoaga e mafai ona faatali seia oo ina taua.
Sa la faamaeaina a la aoaoga faamasani ma o atu i le la malaga muamua i luga o le Mauga o Rainier e latalata i Seattle, Uosigitone. Sa amata lelei aafiaga ma tulaga sa i ai seia oo ina liliu ma sili le leaga o le tau, ma e lei umi ae la iloa atu ua la tilotilo atu i mata o se solo mauga aisa o le a oo mai.
La te lei iloa le mea e fai ona la te lei talanoaina. Sa fesili le atalii i lona tama, “Ua ou sauni ea mo lena talanoaga i le mea e fai i faalavelave faafuasei i le taimi nei, Tama?”
O talanoaga taua—i le saogalemu o o tatou aiga—e mafai ona fesoasoani ia i tatou e saunia ai mo le tele o mauga solo o le olaga.
“O le upumoni sili muamua i le atulaulau e faapea e alofa le Atua ia i tatou,” na saunoa ai Elder Jeffrey R. Holland o le Korama a Aposetolo e Toasefululua.1 O ana upu ua faamanatu mai ai ia i tatou o le alofa o le faavae lea mo le faavavau atoa ma mo o tatou olaga i aso taitasi. Faatasi ai ma lena alofa o se manatu, o talanoaga ma fesootaiga tatou te faia ma lo tatou aiga e taua tele.
I le avea ai ma se tane, tamā, faufautua i le aoga, ma se faufautua o le soifua maloloina faalemafaufau ua laiseneina, ua ou iloa ai o talanoaga faaleaiga e taua tele ma e le tatau ona faatuai. O Joy D. Jones o le Peresitene Aoao talu ai o le Peraimeri, na saunoa mai: “E le mafai ona tatou faatali mo le liua ia tau ina tupu i a tatou fanau. … O talanoaga faaleaiga e uiga i le talalelei a Iesu Keriso, talanoaga taua , … e mafai ona valaaulia ai le Agaga.”2
O atalanoaga taua?
Na faauigaina e Sister Jones talanoaga taua o ni talanoaga “faigofie, agaalofa [e] mafai ona taitai atu ai tamaiti [ma i tatou taitoatasi] ia iloa e le gata i mea latou te talitonu i ai, ae o le mea e sili ona taua, aisea e latou te talitonu i ai.”3 O se tasi upu ou te fiafia i ai mai lenei faauigaga o le faigofie. O la tatou talanoaga e le faapea e loloto pe lavelave pe fuafuaina foi. O le mea moni, o nisi o talanoaga sili ona lelei o le a le mafai ona fuafuaina, e ese mai nai lo le saunia e ala i le i ai pea o le Agaga e faatasi ma i tatou e fesoasoani ia i tatou.
Sa aoao mai Tuafafine Jones: “O le liua faafuasei e lē o se mataupu faavae o le talalelei a Iesu Keriso. O le avea ai e faapei o lo tatou Faaola o le a le tupu fua mai.”4 E tupu i lea fuaiupu ma lea fuaiupu, faatasi ai ma le taimi ma taumafaiga faamoemoeina.
E faafia ona tatau ona faia ni talanoaga taua?
E tatau ona tatou talanoa ma a tatou fanau i aso taitasi. O le tele lava o taimi tatou te faia ai ni talanoaga taua, o le tele foi lena o le avea ai o i latou ma ni tagata masani, faalenatura, ma faamalamalamaina.
O le auala sili ona leaga e faia ai ni talanoaga taua o le aua lava nei faia! E masani ona tatou manatu e le o le taimi sa’o lea, e faigata tele, pe o le a le malamalama ai a tatou fanau. Tatou te le mananao e faatiga pe fai atu le mea sese pe le toafimalie i se tasi. Peitai, o le taumafai ia faia se talanoaga e sili atu nai lo le leai o se upu e fai.
E faapefea ona i ai ni a tatou talanoaga taua ma a tatou fanau?
O le fua faigofie ua ou iloaina mo le faia o talanoaga taua o le alofa, faalogo, ma suia. E ui atonu tatou te le atoatoa i soo se tasi o na mea, ae e mafai ona tatou taumafai e mulimuli i le mamanu i taimi uma.
Alofa: A aunoa ma le faavae ma le faaaogaina o le alofa, e le mafai ona tatou maua ni talanoaga taua e sili ona aoga. O le alofa o le o le a, o anafea, aisea, ma le e faapefea o mea uma tatou te faia i o tatou aiga. E manaomia ona lagona e a tatou fanau le saogalemu pe a fesootai ma i tatou, ma o le alofa e maua ai lena siosiomaga taua. E mafai ona tatou faaali atu i taimi uma le alofa. Na faaali mai e Iesu Keriso ia i tatou le ala.
Sa faapea mai Tuafafine Jones: “A o tatou faafailele ma tapena tatou fanau, tatou te faataga i latou e faaaoga lo latou faitalia, e tatou te alolofa ia i latou ma o tatou loto atoa, tatou te aoao i latou i poloaiga a le Atua ma Lana meaalofa o le salamo, ma tatou te lē tai tai, lava, fiu ia i latou. I le maea ai o mea uma, pe le o le ala ea lea a le Alii mo i tatou taitoatasi?”5
Faalogo: Ua ou aoaoina e ala i au lava mea sese e faapea o le faalogo ma le mataala o se vaega taua o soo se talanoaga taua. O le faalogo e tatau ona muamua ma faalua i le tele o taimi. O Iesu Keriso o le faataitaiga sili lea o le auala e faia ai ni talanoaga taua ma faalogo ma le mataala. Ua tatou aoao i le Ioane 8 e faapea ina ua aumai e le au Faresaio ia te Ia le fafine na maua i le mulilua, o mea muamua lava na Ia fetalai atu ai i le fafine o ni fesili: “O ifea ea i latou e na molia oe? ua le faasala mai ea se tasi ia te oe?” (fuaiupu 10). Ina ia fesoasoani ia tupu le aoaoina taua, sa Ia faia ni fesili ma faalogo a o lei aoao atu.
Sui: O le taimi lava tatou te alolofa ai, faalogo, ma fesootai, o le a le mea tatou te faia mai iinei? Pe manaomia ea ona tatou salamo, aoao atu, faalogo atili, auauna atu, faatoese atu, faamagalo atu? O talanoaga taua e tatau ona tuuina mai ia i tatou se avanoa e sui ai. E faamoemoe o loo tatou taumafai pea ia avea ai, e pei ona saunoa mai Peresitene Russell M. Nelson, “ia lelei tele teisi atu i aso taitasi.”6
E mafai faapefea ona tatou faia soo ni talanoaga e taua?
O le a taialaina oe e ala i faaaliga mo mea e sili ona aoga mo lou aiga. Mafaufau i fautuaga nei mai aafiaga o lo matou aiga:
Suesuega faaleaiga o tusitusiga paia: Ina ua ou fesili i la ma fanau po o le a le mea e sili ona fesoasoani ia i latou e faia ai ni talanoaga o le talalelei, sa latou fai mai o le suesueina faatasi o tusitusiga paia i afiafi taitasi e faaaoga ai le Sau, Mulimuli Mai ia te A’u.
Sauniga molimau faaleaiga i Aso Sa anapogi taitasi: E le masani o se sauniga molimau aloaia ae o se taimi mo tagata taitoatasi i lo matou aiga e fefaasoaai ai lagona, talitonuga, tauiviga, ma faamanuiaga. Ma te taumafai lava ma lo’u toalua e molimau atu ia Iesu Keriso. O lenei fonotaga ua avea ma se tasi o aafiaga sili ona aoga i lo matou aiga.
Taumafataga o le afiafi faaleaiga: Pe a ma fai atu, “O le a le taimi ua i ai?” i le taimi o le taumafataga o le afiafi, ua iloa e tamaiti ua oo i le taimi mo tagata taitoatasi e faasoa mai ai se mea se tasi na lelei ma se mea se tasi sa latou moomoo maimau pe ana sili atu ona lelei i lena aso. O lena mea e masani ona taitai atu ai i le faaalia o le lotofaafetai, alofa, o nisi taimi o le le fiafia, ma e masani lava i talanoaga e faatumulia i le talalelei semanu e le tupu lava.
Talanoaga taitoatasi: Ou te faatauaina le taimi i masina taitasi i Aso Sa anapogi e nonofo faatasi ai ma la’u fanau taitoatasi, tatalo mo i latou i o latou igoa, vaai sao atu i o latou mata, ma fai atu ni fesili ia i latou. Ou te taumafai e faalogo ma fesootai ma o latou lagona ma manaoga. Atonu e uiga ese mo i latou i le taimi muamua, ae o lea e latou te misia pe afai matou te le faia. Ou te faamoemoe latou te iloa o lo’u taimi ma i latou e sili atu ona taua nai lo se isi lava mea ma ou te manao ia faia ni talanoaga taua ma i latou i aso taitasi.
Iloiloga o sini: Matou te fatuina ni sini patino, faaleulugalii, ma faaleaiga ia Ianuari taitasi. Ona matou talanoaina lea o lo matou tuputupu ae ma le alualu i luma i ia sini i masina taitasi i le taimi o suesuega o tusitusiga paia po o se lesona o le afiafi faaleaiga. O lenei mea e taitai atu ai i talanoaga taua.
Vaavaalua o ulugalii po o matua e galulue faatasi: O po o Aso Sa uma lava, a o ma vaavaai ma lo’u toalua i a ma kalena faalevaiaso, ma te fesili foi i le tasi ma le isi e uiga i o ma lagona ma mea o loo ma tauivi ai pe manaomia ai se fesoasoani. E i ai a ma talanoaga taua e uiga i la ma faaipoipoga ma le ma fanau taitoatasi ma mea e tatau ona ma faia e totō atili ai le talalelei a Iesu Keriso i o matou loto taitoatasi.
O lo’u toalua o se tagata e sili atu ona lelei le faalogo nai lo au ma e sili atu ona lelei i le fesoasoani ia i maua ia tumau le paleni ma le taulai atu i le ala o luga o feagaiga. E tele mea ua ou aoaoina mai ia te ia ma ua matua faamanuiaina lava a’u na ia filifilia au mo le faavavau.
E le atoatoa lo matou aiga i le faia o nei mea uma, ae matou te faia a matou taumafaiga silisili ma taumafai pea.
Sauni a o lei oo mai le solo
Aua le faatali seia oo ina oo mai le tele o mea e solo o le olaga mo lau faaipoipoga, fanau, po o isi sootaga. E le o se mataupu o le pe afai, peitai po o afea. O le talalelei ma isi talanoaga taua e saunia ai i tatou i le mea sili pe afai e tupu i le loto i ai ma le faia soo.
O le faatasia ma lo’u toalua, fanau, ma le aiga mo le faavavau o la’u sini aupito sili lea ma le faamoemoega o mea uma ou te faia, e aofia ai talanoaga taua taitasi.
Ou te le atoatoa, e pei ona tatou faia uma, ae e ala i le mana o Iesu Keriso ma le salamo, ua sii ae ai au i luga. Ua folafola mai e le Faaola e faamalosia i tatou e ala i Lona mana ma le susulu atoatoa o le faamoemoe ua Ia tuuina mai ia i tatou e ala i Lana Togiola. E le faapea e tatau ona tatou atoatoa, ae e tatau ona tatou taumafai e faaleleia atili! Ua tofu i tatou ma lena mana o loo avanoa mo i tatou. E te le toilalo ai. O le faamanuiaina e masani lava ona i ai i le taumafaiga.
Ua folafola mai e Peresitene Nelson e faapea “a o outou filifili e faamuamua le Atua i o outou olaga, o le a outou lagonaina mo outou lava o lo tatou Atua o ‘se Atua o vavega’ [Mamona 9:11].”7 Lea e mafai ona aofia ai le faamuamua o le Atua i a tatou talanoaga taua. E mafaia mea uma e ala i lo tatou Faaola, o Iesu Keriso, e aofia ai nei talanoaga taua. O le alofa o Lana tali lava lea i taimi uma!
E alala le tusitala i Uosigitone, ISA.