Fakakomipiuta Pē
Ngaahi Tuitui ʻo e Ngāue Tokoní
ʻOku nofo ʻa e tokotaha naʻá ne faʻú ʻi ʻAlapama, ʻIunaiteti Siteiti ʻo ʻAmeliká.
ʻOku faitāpuekina ʻe he faʻē toulekeleka mo e ʻofefine ko ʻení, fakataha mo e kau fafine ʻo e uōtí, ʻa e moʻui ʻa ha ngaahi fāmili naʻe mālōlō haʻanau pēpē valevale.
Naʻe akonaki ʻa Palesiteni Henelī B. ʻAealingi, Tokoni Ua ʻi he Kau Palesitenisī ʻUluakí ʻi he konifelenisi lahí “kuo maʻu ʻe he [fānau] kotoa pē ʻa e ʻOtuá ʻoku fanongo mai ki hoku leʻó ha uiuiʻi mei he ʻEiki ko Sīsū Kalaisí. …
“… Ka ʻoku tofuhia e ngaahi ʻofefine mo e ngaahi foha fuakava ʻo e ʻOtuá ʻi ha uiuiʻi mahuʻinga mo fakafiefia pē ʻe taha. Ke tokoni ki he niʻihi kehé Maʻana.”1 ʻOku moʻoni ʻa e uiuiʻi ko iá ki he kau tauhi fuakava ʻi ha faʻahinga taʻu motuʻa pē—ʻo tatau ai pē pe ko e valu pe 108.
Kuo fakaʻaongaʻi ʻe Luʻisa ʻOloleti, taʻu hivangofulu mā hiva ha konga lahi ʻo ʻene moʻuí ke tokoniʻi ʻa e niʻihi kehé, pea naʻá ne toki ʻilo kimuí ni ha founga foʻou ke tokoni ai mei hono ʻofefine ko Mele Hēlení.
ʻI he taʻu ʻe tolu kuohilí, naʻe ʻikai fekumi ʻa Mele Hēleni ki ha meʻa pau ʻi he taimi naʻá ne hū ai ki he JustServe.org. ʻI heʻene vakai takai holo aí, naʻá ne fakatokangaʻi ha fiemaʻu ʻo ha kau ngāue tokoni naʻe ʻikai fakatupu paʻanga naʻa nau liliu ʻa e vala mali kuo foaki taʻe totongí ki ha vala mate maʻá e fānau valevale naʻe teʻeki ai ke nau mavahe mei he falemahakí.
Laʻitā naʻe maʻu ʻi he angalelei ʻa e tokotaha faʻutohí
Naʻe fetuʻutaki ʻa Mele Hēleni mo ʻene Fineʻofa fakalotofonuá ki he talēkita ʻo e houalotú ʻi he loto-fakapapau kuó ne maʻu ha meʻa naʻá ne fie fakahoko. Naʻe palani ha ʻekitivitī maʻá e kakai fefine ʻo e uōtí, pea naʻe toʻo fakakongokonga ha ngaahi kofu mali ʻe 10–12 ʻi he ngāue tokoní. Naʻe ʻave ʻe Mele Hēleni ʻa e ʻū kongokongá ki ʻapi ʻo faʻu ha ngaahi kofu pēpē meia nautolu.
ʻI hono ngaohi ʻe Mele Hēleni ʻa e kofu takitaha, naʻá ne lotua ʻa e mātuʻa mo e fāmili kotoa pē te nau fakaʻaongaʻi ʻa e kofu naʻá ne ngaohí. Naʻe ongoʻi fiemālie fakalaumālie moʻoni ki ai, ʻo ne ofi ange ai ki he Fakamoʻuí ʻaki ʻene muimui ki Heʻene naʻinaʻi ke feʻofaʻakí (vakai, Sione 13:34–35; vakai foki, 1 Sione 4:11). Naʻe vave ʻaupito hono fakatokangaʻi ʻe Mele Hēleni he ʻikai feʻunga ha ʻekitivitī tuʻo taha pē maʻana. Naʻá ne ʻilo ʻe lava ke hoko ʻa e JustServe.org ko ha hoa ngāue ʻi ha ngaahi ngāue lahi maʻana.
Laʻitā naʻe maʻu ʻi he angalelei ʻa e tokotaha faʻutohí
Naʻe kamata tokoni foki mo e faʻē ʻa Mele Hēlení ko Luʻisá. ʻOkú ne toʻo fakakongokonga ʻa e ngaahi kofu malí ʻi he mataʻi tuitui takitaha. ʻOku fufulu leva ʻa e meʻa kotoa, kosi, fakatahaʻi, mo tuitui ke faʻu ʻaki ʻa e ngaahi kofu ki he pēpeé, pea tuitui nima atu leva ki ai ʻa e ngaahi fakasanisaní. ʻOku meimei houa ʻe ua hono faʻu ʻo e kofu pēpē takitaha.
ʻOku ngaohi fakataha ʻe he faʻē mo e ʻofefine ko ʻení ha ngaahi kofu ʻe 100 tupu ki he ngaahi pēpē kuo pekiá ʻi he taʻu takitaha. ʻOku talitali lelei ʻa e ngaahi foaki ko ʻení ʻe he ngaahi falemahaki kotoa ʻi ʻAlapama, ʻIunaiteti Siteiti ʻo ʻAmeliká.
ʻOku pehē ʻe Mele Hēleni ʻokú ne fiefia mo ʻene faʻeé ʻi he taimi ko ʻeni ʻokú na fakataha ai ʻo tokoni ki he fānau iiki ʻa e Tamai Hēvaní mo honau ngaahi fāmilí ʻi he taimi ʻokú na faingamālie aí. Hangē ko ia kuo akoʻi mai ʻe Palesiteni Lāsolo M. Nalesoní: “ʻOku maʻu ʻetau fiefia lahi tahá ʻi heʻetau tokoniʻi hotau kāingá, ʻo tatau ai pē pe ko e fē feituʻu ʻoku tau nofo ai ʻi he māmani fakaofó ni. ʻI hono tokoniʻi ʻo e niʻihi kehé—ʻo fai ha ngāue tokanga ke tokangaʻi ʻa e niʻihi kehé ʻo tatau pe lahi ange ʻi heʻetau tokangaʻi kitautolú—ʻoku tau fiefia ai. Te u tānaki atu, tautautefito, ki he taimi ʻoku ʻikai ke faingamālie aí pea mo e taimi ʻoku tau mavahe ai mei heʻetau tuʻunga fiemālié. Ko hono moʻui ʻaki ʻa e fekau lahi ko ia hono uá ko e kī ia ke hoko ai ko e ākonga moʻoni ʻa Sīsū Kalaisí.”2
Makehe mei he fiefia ʻoku ʻomi ʻe he ngāue tokoni ko ʻení, ʻoku saiʻia ʻa Luʻisa ʻi he polé mo e ongoʻi lavameʻa ʻokú ne aʻusiá. ʻOku pehē ʻe Mele Hēleni kuo hoko ʻa e ongoʻi vāofi ko ʻeni ʻi hona vā mo ʻene faʻeé ko ha aʻusia ʻoku mataʻikoloa ʻaki.
ʻOku pehē ʻe Mele Hēleni, “ʻE lava ke tokoni ha taha pē,”—ko hoʻo kumi pē ʻa e meʻa ʻe ʻaonga kiate koé!