Ua Na’o Tusiga Faaeletonika: Autalavou Matutua
O Le Matautia o Nai Sese Laiti
O le faatamala faaleagaga e mafai ona aveesea lemu ai i tatou mai le ala o feagaiga.
I se tasi po i le tuneva sa ou alu ai i le fale i le pasi. Sa ou lelava, ae sa gauai ma mataala le ave pasi. Ona ou matauina lea o le matautia o nisi o auala. Sa leai se tafaala, na o le itu auala faafeagai i le isi itu ma se tofe tele i le isi itu. Soo se sese mai le auala e mafai ona mafua ai a le o se faalavelave matuia ma taavale o agai mai le isi itu po o le pa’u matautia ifo mai le tofe.
Sa ou matauina e lei alu ese lava le avetaavale mai laina o le alatanu—e lei i ai lava se taimi na agai ai i se tulaga e ono lamatia ai soo se itu. Sa amata ona ou mafaufau e uiga i le tele o o tatou olaga e pei o lenei tulaga.
O faaosoosoga e mafai, i nisi taimi, ona siomia i tatou mai itu uma a o tatou malaga atu i le olaga i luga o le ala o feagaiga ma agai atu i lo tatou taunuuga e faavavau. Ma e pei lava ona manaomia e le avepasi ona nofo i lona ala ina ia matou taunuu saogalemu ai i lo matou taunuuga, e tatau foi ona tatou tumau i laina o le talalelei lea e puipuia i tatou mai faalavelave faaleagaga i la tatou malaga.
Na aoao mai Sister Rebecca L. Craven, o le sa avea muamua ma Fesoasoani Lua i le Au Peresitene Aoao o Tamaitai Talavou: “O tatou … o loo i ai i luga o se ala, se ala o feagaiga sa tatou tuuto atu i ai ina ua papatisoina i tatou o ni tagata O Le Ekalesia a Iesu Keriso o le Au Paia o Aso e Gata Ai. E ui tatou te ono fetaiai ma faafitauli mai lea taimi i lea taimi i luga o le ala, ae o lenei ala o le a faatumauina lo tatou agai i luma i lo tatou taunuuga tauia e faavavau pe afai tatou te tumau mausali ai i luga.”1
O Le Tulaga Lamatia o le Avea ma Tagata Faasamasamanoa po o le Faatamala
O nisi ua talitonu sese faapea o mea iti mai le ala o feagaiga e le o se mea tele ma e le taitai atu ai i ni taunuuga taua. Peitai, e le sa’o lea mea. O lenei ituaiga o mafaufauga o le mea tonu lava lea e manao Satani tatou te talitonu i ai—o lena laa atu i luga o laina ma agai atu i le ala o tulaga matautia e oo mai (tusa pe na o le faatasi) o le a le afaina ai i tatou.
Peitai, e pei ona lapatai mai Peresitene Dieter F. Uchtdorf a o avea o ia ma Fesoasoani Lua i le Au Peresitene Sili, “I le aluga o tausaga o le auauna atu i le Alii ma i faatalanoaga e le mafaitaulia, ua ou aoaoina ai o le eseesega i le va o le fiafia ma le faanoanoa i tagata taitoatasi, i faaipoipoga, ma aiga e masani ona oo mai i se mea sese i na o ni nai tikeri lava.”2
Ioe, ona o lo tatou Faaola o Iesu Keriso, ua mafai ai ona tatou liliu atu ia te Ia i taimi uma ma salamo ma faia se faasa’oga o le ala pe a tatou faia ni mea sese—aua tatou te le atoatoa uma. Ae o le taumafai e tutu i nofoaga paia o lona uiga tatou te faatauaina lena meaalofa o le salamo ma o loo aoao mai i a tatou mea sese. Ona o mea faalavefau ma leo o le lalolagi, afai tatou te le o valaauliaina e le aunoa le Agaga i o tatou olaga, ua lamatia i tatou i le avea ma ni tagata faasamasamanoa pe faatamala i lo tatou avea ai ma soo ma faia ni mea sese laiti mai le ala o feagaiga.
Sa faasoa mai e Sister Craven se vaaiga i lenei mea ina ua ia fai mai:
Ua tumu le lalolagi i mea faalavefau lea e mafai ona faaseseina ai e oo lava i le au filifilia … Afai tatou te lē faaeteete i le ola ai i a tatou feagaiga ma le sa’olele, e ono taitai atu e a tatou taumafaiga faasamasamanoa i tatou i ala faasaina po o le auai foi ma i latou ua ulu atu i le fale tele ma le ateatea.
“… E le mafai ona tatou fetuutuunaia mea uma tatou te mananao i ai, ae o le mea moni, e leai ma se auala sa’o e fai ai le mea sese!”3
Tumau ia Keriso
Sa iloa e la’u avepasi o le aluese mai lana ituala e ono iai ni taunuuga leaga, ma talu ai lena mea, o le a le aluese ai lava mai lona ala. O le i ai o se mafaufauga faapena e uiga i faaosoosoga ma mea faalavefau faalelalolagi e mafai ona fesoasoani ia i tatou e aloese ai mai tulaga e ono tuu ai i tatou lava po o isi i lamatiaga faaleagaga.
I le Feagaiga Tuai, sa tautino atu ai le nuu o Isaraelu e faia soo se mea na poloaiina ai e le Alii ina ua uma ona laveaiina mai autau a Farao (tagai Esoto 24:3, 7). Ae paga lea, ina ua mae’a ona alu Mose i le mauga e talia Tulafono e Sefulu, sa vave ona galo ia Isaraelu le Alii ma amata ai ona tapuai i le tamai povi auro sa latou faia (tagai Esoto 32:7–8).
E pei lava o le nuu o Isaraelu, o le see ese ma le ala o feagaiga e mafai ona vave tupu pe afai tatou te le faaeteete. E taua le fesili ifo ia i tatou lava pe o le a lo tatou tuuto i le faia o mea ua poloai mai ai Iesu Keriso. Atonu o lenei mea e aofia ai le mafaufau pe o tatou faaavanoaina se taimi mo Ia ma le Tama Faalelagi i aso uma. Po o le iloiloina po o a mausa po o mea faalavefau e mafai ona tatou lafoai ese. O le siakiina ia i tatou lava ma poo le a le tuuto ma le naunau tatou te tumau ai i luga o le ala o feagaiga e mafai ona fesoasoani ia i tatou e tutu mausali ai.
O nisi taimi, e pei o Nifae, tatou te le malamalama i taimi uma i le mafuaaga ua poloaiina ai i tatou e le Tama Faalelagi e fai (tagai i le 1 Nifae 11:17). Peitai, e mafai ona tatou faatuatuaina e alofa o Ia ia i tatou ma finagalo ia tatou tumau i luga o le ala o feagaiga ina ia mafai ai ona tatou toe foi atu ia te Ia. Na te silafia le iuga mai le amataga, o lona uiga e mafai ona tatou faaaogaina ma pipiimau i le faatuatua na te silafia le mea e sili ona lelei mo i tatou, e tusa lava pe tatou te feagai ma faaosoosoga.
Afai tatou te faaali atu i le Tama Faalelagi ma Iesu Keriso la tatou tautinoga e ala i le mulimuli ia Laua poloaiga ma perofeta, faalagolago ia i Laua, ma valaaulia le Agaga i o tatou olaga i aso taitasi, e mafai ona tatou faaauau pea ma le mautinoa ma le saogalemu i luga o le ala o feagaiga i lo tatou taunuuga e faavavau.