“O E Faalogologo i le Konafesi i Ou Taliga—po o Lou Loto?,” Liahona, Oke. 2023.
Autalavou Matutua
O E Faalogologo i le Konafesi i Ou Taliga—po o Lou Loto?
O faaaliga faaletagata lava ia e faatatau uma lava i le faalogo i le Agaga ma lou loto.
Mo a’u, o lauga o konafesi aoao e fesoasoani ou te lagona ai le Agaga Paia. O le faalogologo i le konafesi e aumaia ai ia i tatou le avanoa e lagona ai le alofa o le Atua ma maua ai musumusuga faaleagaga.
Ma talu ai e molimau mai failauga i le upumoni, ua valaaulia ai le Agaga i loto ma mafaufau o tagata uma o i ai (tagai Alema 31:5), ua mafai ai ona tatou malamalama atili i le Atua ma Ona faamoemoega (tagai Mataupu Faavae ma Feagaiga 76:5–10).
Ae o nisi taimi e i ai mea faalavefau po o isi luitau e mafai ona faigata ai ona maua uunaiga faaleagaga i le taimi o le konafesi. Atonu e te lagona le faanoanoa ona sa le’i faamalosia lou faatuatua pe sa le’i taliina au fesili.
O le a la se mea e te faia?
E mafai ona tatou amata i le mafaufau pe i ai se mea e faigata ai mo i tatou ona taulai atu. E mafai ona tatou mautinoa e lē na o lo tatou faalogo ma o tatou taliga ae o loo tatou mafaufau loloto i uunaiga ma lagona e oo mai i o tatou mafaufau ma o tatou loto Ina ia faalogo ma o tatou loto, e mafai ona tatou tatalo mo se fesoasoani ia malamalama ai pe mafai faapefea ona faatatau sāvali ia i tatou lava ia (tagai Mataupu Faavae ma Feagaiga 8).
O le malamalama i faaaliga faaletagata lava ia ma le auala e fesootai ai i savaliā mai auauna a le Atua e mafai ona fesoasoani tatou te iloa ai le uiga o le faalogo ma o tatou mafaufau ma loto.
Fuafuaga a le Atua, o Lou Fiafia lea
O fesootaiga patino i le va o oe ma le Tama Faalelagi o le mea lea tatou te ta’ua o faaaliga faaletagata lava ia. Ma e patino lava. E pei ona ta’ua e Elder Dale G. Renlund o le Korama a Aposetolo e Toasefululua “O faaaligafaaletagata lava ia e fitoitonu i tagata taitoatasi. Mo se faataitaiga, e mafai ona e mauaina faaaliga, e uiga i le mea e te nofo ai, o le a le ala faalematātā e te mulimuli ai, pe o ai foi e te faaipoipo i ai. E mafai e taitai o le Ekalesia ona aoao atu aoaoga faavae ma faasoa atu fautuaga musuia, ae o le tiutetauave mo nei faaiuga e taoto lea ia te oe lava ia. O lau faaaliga lena ia maua.”1
E mafai ona fetalai sa’o atu le Atua i lou mafaufau ma lou loto e uiga i mataupu faaletagata lava ia, ae e tatau ona e naunau e faalogo ia te Ia (tagai Iakopo 1:5). Ua ia te oe pea le faitalia. Ae o Lana fuafuaga o le fiafia e mafai ona e maua ai le fiafia pe afai e te filifili e faalatalata atili atu ia te Ia.
Sa fesili mai Peresitene Russell M. Nelson ia i tatou talu ai nei, “O e naunau e avea le Atua ma faatosinaga aupito sili ona taua i lou olaga? Pe o le a e faatagaina Ana afioga, Ana poloaiga, ma Ana feagaiga e faatosinaina mea e te faia i aso taitasi? Pe o le a e faatagaina Lona siufofoga ia faamuamua i loo se isi lava leo?”2
O lou naunau e faalogo i le siufofoga o le Atua o le a fua tele mai ai le tele o mea e mafai ona e faalogo moni ia te Ia. E tusa lava pe na o lou manao ia naunau i le taimi nei, “ia tuu lenei manao e galue i totonu ia te oe” (Alema 32:27) e suia ai lou loto.
E Saunoa Perofeta i le Upumoni
O nisi ua ,mamao tele lo latou ave sesēina o le vaega “patino” o faaaliga faaletagata lava ia. Ua latou fai mai ma le sesē o aoaoga a perofeta ma aposetolo e lē faatatau i tagata uma—e faapea e mafai ona tatou filifili mo i tatou lava po o le a le mea e faatatau ia i tatou ma “o lena upumoni e faatatau i ai—e tatau i tagata taitoatasi ona filimaoti mo ia lava po o le a le mea moni.” E pei ona lapatai mai Peresitene Nelson, “O se talitonuga faapena ua na o se mafaufauga faivavale mo i latou ua mafaufau sesē o le a latou lē tali atu foi i le Atua.”3
E valaauina e le Atua ia perofeta ma aposetolo e tutū o ni molimau a Iesu Keriso, e saunoa i le upumoni, ma taitaia mataupu o Lona malo i le lalolagi. Ma ua latou taliaina tiutetauave o na valaauga. (Tagai Mataupu Faavae ma Feagaiga 107:23.)
O le upumoni o le gagana a le Agaga, o lea a tatou faalogo i upumoni e faavavau o molimau mai ma le lototoa ma le manino, e oo mai le Agaga Paia e faagaeetia i o tatou luga le moni a’ia’i ma le matagofie o na upumoni. E mafai foi e le Agaga ona fesoasoani ia i tatou ia malamalama i le ala e faatatau ai upu moni a o tatou taitai ia i tatou taitoatasi.
Sa saunoa Elder Renlund, “Ou te valaaulia oe ia maua le talitonuga e maua ai faaaliga patino mo oe lava ia, malamalama i mea ua faaalia mai e le Atua, e ogatusa ma tusitusiga paia ma poloaiga ua Ia tuu mai e ala mai i Ana perofeta tofia, ma i totonu o lau oe lava ia matafaioi ma le faitalia.”4
O Lo Latou Faanaunauga Sili
O nisi taimi atonu e te lagonaina le lē mautonu e uiga i mea o loo aoao mai e le perofeta ma aposetolo. Pe atonu foi e te tauivi ia malamalama pe faapefea ona faatatau a latou upu ia te oe. I nei taimi, ia manatua o lo latou valaauga o le fesoasoani lea e taiala oe, se atalii/afafine faapelepele o lo tatou Tama Faalelagi, e toe foi atu ia te Ia.
Na molimau mai Elder Neil L. Andersen o le Korama a Aposetolo e Toasefululua: “E le tatau ona faapopoleina i tatou pe a feteenai upu a auauna a le Alii ma mafaufauga o le lalolagi ma, i nisi taimi, o o tatou lava mafaufauga. … O lo latou manao silisili o le faafiafiaina lea o le Alii ma fesoasoani i fanau a le Atua ia toefoi atu i Lona afioaga.”5
O le taulai atu i manaoga alofa o perofeta ma aposetolo o le a suia ai le ala e te maua ai a latou upu. O le iloaina o lo latou alolofa ma le tuuto atu i le Tama Faalelagi, le Faaola, ma lou faaolataga o le a fesoasoani e te naunau atili ai e tuu atu a latou upu ia oo ifo i lou loto.
O le avea ma se soo o Iesu Keriso i aso e gata ai e mafai ona faigata. E mafai ona faigata ona faalogo i fautuaga mai le pulelaa lea tatou te lē mananao i taimi uma pe lagona le saunia e faalogo i ai, aemaise lava pe afai e masani ona faaliliu e leo o le lalolagi ia fautuaga a perofeta e pei lava o se isi lisi o tulafono po o tapu.
Ae o le mea moni, ua tuuina mai e le Alii ia i tatou perofeta ma aposetolo e taialaina i tatou ia ola i ni olaga sili ona lelei ma sili ona fiafia e mafai ona maua. Latou te lē faamalosia i tatou e mulimuli i a latou fautuaga. Nai lo lena, latou te tuuina mai ni valaaulia, fesoasoani ia i tatou ia malamalama pe aisea ua i ai i le Alii ni tulaga faatonuina maualuluga mo Ona soo, ma fesoasoani ia i tatou e faalolotoina lo tatou faatuatua i le Atua.
Na aoao mai talu ai nei e Elder Dieter F. Uchtdorf o le Korama a Aposetolo e Toasefululua: “Pe sesē ea le i ai o ni tulafono? E leai. Tatou te manaomia uma lava [tulafono] i aso uma. Ae e sesē le taulai atu na o tulafono nai lo le taulai atu i le Faaola. E manaomia ona e iloa ia aisea ma faapefea ona iloilo lea o taunuuga o au filifiliga. …
“O filifiliga tāua faaletino ma faaleagaga e lē tatau ona fua pau i mea e fiafia i ai le tagata lava ia, pe o mea e talafeagai pe lauiloa. E lē o fetalai mai le Alii, ‘Fai soo se mea e te manao i ai.’
“O loo Ia fetalai mai, ‘Ia faamuamua le Atua.’”6
O Iesu Keriso o lo tatou malosiaga, ma o Ana perofeta ma aposetolo e taitai atu i tatou e toe foi atu ia te Ia. Latou te fesoasoani ia i tatou e saili o Ia i le mea sili tatou te mafaia ina ia mafai ai ona tatou maua faamanuiaga uma ua faapolopoloina e le Atua mo i tatou.
Savali ma le Mautinoa i le Ala o Feagaiga
Faatasi ai ma le faatuatua ia Iesu Keriso ma se loto naunautai, e mafai ai ona e iloa le moni o mea uma (tagai Moronae 10:4–5). A o e faalogo i perofeta ma aposetolo, e mafai ona e malamalama i musumusuga a le Agaga e ala i faaaliga faaletagata lava ia.
E i ai ou taitai ua filifilia e le Atua ma ua agavaa e fesoasoani ia te oe. E mafai ona latou toe taialaina oe i le ala o feagaiga pe a manaomia. E mafai ona latou fesoasoani ia te oe e nofo pe afai e faigata le nofo ai i le taimi nei. Ma po o le a lava lou taimi ua tuanai, e mafai ona latou fesoasoani ia te oe e liliu atu ia Iesu Keriso ma savalia le ala o feagaiga ma le mautinoa.
Na molimau mai Elder Andersen: “O loo i ai se pusa o oa o taitaiga faalelagi o loo faatalitali mo lou mauaina i sāvali o le konafesi aoao. O le suega la mo i tatou taitoatasi o le auala tatou te tali atu ai i mea tatou te faalogo i ai, o mea tatou te faitau i ai, ma mea tatou te lagonaina.”7
Afai e te faalogo i sāvali a le Atua ma taliga lautele ma se loto matala, o le a faatupulaia lau molimau. O le ae iloa le moni o le talalelei ma talitonu i le pule a le perofeta ma aposetolo a le Alii. O le ae maua moni lava ma ola i le olaga sili ona lelei—o le olaga e finagalo le Tama Faalelagi e te ola ai ona e alofa o Ia ia te oe.