“Fafagaina o Mamoe a le Alii i le Faaletino ma le Faaleagaga,” Liahona, Oke. 2023.
Fafagaina o Mamoe a le Alii i le Faaletino ma le Faaleagaga
I le avea ai ma soo o Iesu Keriso, tatou te tautino atu lo tatou alolofa mo Ia e ala i le auala tatou te fafagaina ai Ana mamoe.
Sailia o le Toatasi, saunia e Matt Warren
I se tasi taimi, sa fesili atu ai le Alii toetu o Iesu Keriso ia Peteru, “Pe e te alofa mai ea ia te au?” Na tali atu Peteru, “Ioe, le Alii e; ua e silafia ou te alofa ia te oe.” Sa toe fesili faalua Iesu, “Pe e te alofa mai ea ia te au?” O taimi taitasi, na tali atu ai Peteru ioe. Ma o taimi taitasi na tali atu ai Iesu i le fetalai atu, “Fafaga i a’u tamai mamoe” po o le “Fafaga a’u mamoe” (Ioane 21:15–17).
I lo’u ofisa i le laumua o le Ekalesia, o le tele o ata i luga o le puipui o loo faaalia ai le Alii o loo auauna atu, faamanuiaina, ma le faamaloloina o Ana mamoe. Latou te faamanatu mai ia te a’u lona popole tele i le manuia o fanau uma a Lona Tama. O Ia o le Leoleo Mamoe Lelei. Na te silafia ma alofa i Ana mamoe. O le mafuaaga lena na Ia tuuina atu ai ia Peteru le poloaiga e fafaga Ana mamoe.
I le avea ai ma tagata auai O Le Ekalesia a Iesu Keriso o le Au Paia o Aso e Gata Ai ma soo o le Alii o Iesu Keriso, ua faapena foi ona valaaulia i tatou e auai i le galuega a le Alii e tausia ma faafailele isi. Ua valaauina i tatou e fafaga mamoe a le Alii i le faaletino ma le faaleagaga.
Manaoga Faaletino, Manaoga Faaleagaga
“O au o le malamalama o le lalolagi,” na fetalai ai Iesu (Ioane 8:12). Peitai, a i ai i tagata taitoatasi ma aiga ni manaoga faaletino, e mafai ona faigata ia i latou ona vaai i Lona malamalama ma lagonaina Lona Agaga. Atonu latou te lagona e pei o loo latou ola i le pogisa.
E tele punaoa a le Ekalesia e fesoasoani ai i mamoe a le Alii ia faaleleia lo latou soifua maloloina faaletino ma faalelagona, tulitulimatāgauina aoaoga ma galuega, ma ia saunia faaletino.1 O le tele o taimi e lē iloa e i latou e manaomia le fesoasoani po o fea e liliu i ai po o a punaoa o loo maua. O nisi taimi atonu latou te matamumuli tele pe maasiasi e fesili atu mo se fesoasoani. I le tausia o le poloaiga a le Alii e fafaga Ana mamoe, e mafai ona tatou fesoasoani i tagata ia maua nei punaoa.
O punaoa uma a le Ekalesia e faavae i mataupu faavae o le talalelei. A o faaaoga e tagata taitoatasi nei mataupu faavae faaleagaga i o latou manaoga faaletino, o le a faamalosia ai lo latou faatuatua ia Iesu Keriso. I lenei auala e mafai ai ona latou lagonaina le malamalama o le Faaola i o latou olaga, tuputupu a’e i le malosi faaleagaga, ma faaauau ai pea i luga o le ala o feagaiga lea e toe taitai atu ai i le Tama Faalelagi ma Lona Alo, o Iesu Keriso.
Lotogatasi e ala i le Anapogi, Sefuluai, ma Taulaga
O auala tāua e lua ua tuuina mai e le Alii ia i tatou e fesoasoani ai e fafaga Ana mamoe o le anapogi ma le totogiina o sefuluai ma taulaga.
Pe a faia i le agaga sa’o, o le anapogi e sili atu nai lo le alu e aunoa ma se meaai ma se vaiinu. O se mataupu o le tapuai lea e faamalosia ai a tatou sootaga ma o tatou aiga, uo ma tuaoi, ma mulimuli ane ai le Alii. Ou te iloa pe a ou i ai i se agaga o le anapogi, ou te nofouta atili atu i manaoga o isi. Ou te malamalama sili atu i le auala e mafai ona ou fesoasoani ai ia i latou.
O le totogiina o le sefuluai e manaomia ai le faatuatua tele, ae e faateleina ai foi le faatuatua. A o tuputupu a’e lo tatou faatuatua, o le a uunaia i tatou e le Agaga e tuuina atu se taulaga anapogi limafoai. O taulaga anapogi e maua ai se avanoa e foai atu ai e aunoa ma le faailoaina o a tatou auala e faamanuia ai o tatou uso ma tuafafine i manaoga faaleagaga pe faaletino. O le anapogi ma le totogiina o sefuluai ma taulaga e aumaia ai ia i tatou le lotogatasi ma le Alii, o tatou aiga, ma i latou tatou te auauna i ai i le Ekalesia.
Auaunaga e Sailia le Tasi
Sa auauna atu Iesu Keriso i tagata uma na siomia o Ia. Sa faapitoa ona Ia saili mo le tagata na sili ona manaomia o Ia. Pe a tatou o atu o ni uso po o ni tuafafine o auaunaga, e mafai ona tatou maua ma auauna atu ia i latou o loo manaomia le fesoasoani. Ma a oo ina iloa e i latou e te auauna atu i ai e te alofa moni ia i latou, o le a latou lagonaina le malamalama ma le alofa o le talalelei mai ia te oe ma le Alii. O le a sili atu foi le avanoa latou te talosaga atu mo se lagolago mai ia te oe ma le Ekalesia pe afai latou te manaomiaina.
Afai e te manao e fafaga mamoe a le Alii, o se nofoaga matagofie e amata ai o le auauna atu lea i isi, faasoa atu le malamalama o le Alii ia i latou, ma, afai e manaomia, faasino i latou i punaoa manaomia i le taimi o au asiasiga faaleauaunaga.
Ia Tatala i Musumusuga
I se tasi Aso Sa a o auauna atu o se epikopo i Mekisiko, sa ou saofai ai i luga o le tulaga a o le’i amataina le sauniga faamanatuga ma ou matauina se tuafafine ua sau i totonu o le falesa. O ia o se tagata faatoa liliu mai ma sa foliga matamuli i taimi uma. Sa uunaia a’u e le Agaga e saili pe mafai faapefea e le aufono a le uarota ona fesoasoani ia te ia ia lagona atili le toafimalie i le lotu. Sa ou talosagaina le peresitene o le Aualofa e aapa atu i lenei tuafafine.
I se taimi mulimuli ane, sa ta’u mai ai e le peresitene o le Aualofa ia te a’u, “Epikopo, e manaomia moni lava e lenei tuafafine ona sui ona nifo.”
O se tasi lea o mafuaaga sa matamuli ai lenei tuafafine. E le’i tautala pe ataata o ia ona sa le’i manao o ia e vaai se tasi i ona nifo. Sa fesili le peresitene o le Aualofa po o le a le mea e tatau ona matou faia. Sa ou filifili e faatulaga se fomai nifo e suesue o ia ma saili po o le a le mea e tatau ona fai.
“Ua e mautinoa?” na fesili atu ai le peresitene o le Aualofa. “Atonu e taugata.”
Sa ou fai atu ia te ia e mafai ona matou agai i luma. I le avea ai ma se uarota, sa matou maua ai se auala e fesoasoani ai i lenei tuafafine. Ina ua ou toe vaai ia te ia, sa ia talanoa ma ataata. Ou te le’i vaai muamua lava ia te ia o ataata!
Mai lena taimi, na suia ai le olaga o lenei tuafafine. Sa avea o ia ma se tagata sili ona malosi o le uarota ma i’u ai ina alu i le malumalu. O le asō o ia o se tagata fai sauniga o le malumalu. Ou te mautinoa afai ou te alu i le malumalu i le mea o loo ia auauna atu ai, o le a ou vaaia lona ataata.
Ua ou iloa a tatou tausia manaoga o isi, e mafai ona tatou faamalolosia i latou, fesoasoani ia i latou e faatoilalo o latou luitau, faafailele i latou, ma fesoasoani e aumai i latou ia Iesu Keriso. E lē tatau lava ona tatou manatu po o le a le mea e mafai pe lē mafai ona faia. Faatasi ai ma le fesoasoani a le Alii, e mafai ai ona tatou maua le tele o avanoa e auauna atu ai ma faamanuia Ana mamoe.
Vaai ia Iesu Keriso
I le Feagaiga Fou, tatou te faitau ai i le fafine na puapuagatia mo le 12 tausaga le umi mai se puna toto. Sa ia faatinoina le faatuatua tele i le Alii ina ua ia faalatalata atu ia te Ia i se motu o tagata. Sa talitonu o ia ma lona loto atoa afai na te pa’i atu i Ona ofu, o le a faaatoatoaina o ia. Ina ua ia pa’i atu i le tuupao o le ofu o le Alii, sa vave ona faamaloloina o ia. (Tagai Luka 8:43–44.) Sa ta’u atu e Iesu ia te ia ia faamafanafanaina o ia ma fetalai atu, “Ua e ola i lou faatuatua; ina alu ia oe ma le manuia” (Luka 8:48).
Afai e te manaomia se fesoasoani faaletino pe faaleagaga, mulimuli i le faataitaiga a lenei fafine faatuatua ma vaai atu ia Iesu Keriso. Faaloaloa atu oe lava faaleagaga ma faalatalata atili atu i le Alii nai lo se isi lava taimi muamua. E ala i au lava taumafaiga ma le mana o Iesu Keriso, e mafai ai ona e galue mo lou soifua manuia faaleagaga ma faaletino. O le a saunia e le Alii vavega e te manaomia e maua ai manaoga faaleagaga ma aoga o le olaga e tusa ai ma Lona lava finagalo, ala, ma le taimi.
O Tatou Alolofa ea ia te Ia?
O le fesili a le Alii ia Peteru o se fesili e mafai ona Ia fesili mai ai ia i tatou taitoatasi: “Pe e te alofa mai ea ia te au?” Afai o la tatou tali o le ioe, ona tatau lea ona tatou faatinoina a tatou upu. I le avea ai ma soo o Iesu Keriso, tatou te tautino atu lo tatou alolofa mo Ia e ala i le ala tatou te fafagaina ai Ana mamoe.
Pe tupu iinei po o le isi itu o le veli, o le a liligi mai e le Alii Ana faamanuiaga i o tatou luga a o tatou faaaogaina Ana aoaoga ma auauna atu i isi e pei ona taitaiina ai e le Agaga. O le tele o na faamanuiaga o loo maua i totonu o Lana Ekalesia i aso nei. Afai tatou te faamaoni, ua Ia folafola mai “o mea uma ua i ai i lo’u Tama o le a tuu atu ia te [outou]” (Mataupu Faavae ma Feagaiga 84:38).
O le a e lagonaina le alofa o le Alii mo oe ma maua le olioli i lou olaga a o e faaaluina ou aso e fafaga ai Ana mamoe i le ala o le a Ia soifua ai faatasi ma i tatou i aso nei.