“O Le Uiga ma le E Le o Le Uiga o le Faamagalo,” Liahona, Oke. 2023.
O Le Uiga ma le E Le o Le Uiga o le Faamagalo
O le faamagaloina o i tatou lava ma isi o se meaalofa paia lea e aumaia ia i tatou le filemu i totonu ma faalatalata atili atu ai i tatou i lo tatou Faaola.
I le avea ai ma se fomai o le mafaufau, ou te taumafai e fesoasoani i le toatele o tagata a o latou taulimaina tulaga ma faafitauli o le olaga, e aofia ai le faamagalo atu. Latou te moomoo mo le faamagaloga mai isi, mai tagata lautele, mai le tulafono, pe mai ia i latou lava. Ae pagā lea, o le faamagalo atu e foliga mai e faigata ona maua, ma e i ai taimi o le sailia e maua ai le atuatuvale, popolevale, ma atonu foi o le le to’a. Aisea?
O se galuega faigata moni lava le faamagalo o le tagata lava ia ma isi. O lenei mea e masani ona taunuu i le lē fiafia, lea e faigata ai ona faalogoina pe lagonaina le siufofoga o le Agaga Paia auā ua faatumulia i tatou i mafaufauga popolevale. O le Agaga e “pa’i mai ma le malū lea afai tatou te pisi tele o le a lē mafai lava ona tatou lagonaina.”1
O le suesue ma mafaufau loloto i tusitusiga paia ma aoaoga a perofeta o aso e gata ai o le a faaalia ai le ala e mafai ai ona e iloa ma lagonaina le ute o le faamagaloga—ma le mea e lē o i ai. O le taimi lava e te aoaoina ai nei manatu faavae, e amata ai ona e iloa le auala e mafai ai e le aveesea o le ita ona maua se faamalologa loloto, ma aumaia ai le filemu i lou loto fetaua’i.2
Na saunoa Peresitene James E. Faust (1920–2007), o le sa auauna atu o se Fesoasoani Lua i le Au Peresitene Sili, “Afai e mafai ona tatou maua le faamagaloga i o tatou loto mo i latou o e ua mafua ai ona tatou tiga ma faamanualia, o le a tatou tulai ae i se tulaga maualuga atu o le faatauaina o le tagata lava ia ma le soifua manuia.”3
O Iosefa Samita ma Viliamu W. Phelps, saunia e Robert Anderson Mckay
Faamagalo Atu ia i Latou o E Faamanualia i Tatou
I le popofou o le Ekalesia, sa avea ai Viliamu W. Phelps ma se lagolago malosi ia Iosefa Samita. O ia o se tasi o uluai Au Paia o Aso e Gata Ai sa auina atu i le Itumalo o Siakisone, Misuri, lea na valaauina ai o ia e le Alii e avea ma se fesoasoani i le au peresitene iina.
Ae ina ua amata ona se ese Uso Phelps, sa oo ina matuā matuiā lana amio lea na faaalia ai e le Alii ia Iosefa Samita afai e lē salamo Uso Phelps, o le a “aveesea o ia mai” lona tulaga.4 Sa le’i salamo o ia ma sa tapē lona igoa i le aso 10 Mati, 1838.
E ui ina sa toe papatisoina Viliamu, ae sa faaauau pea ona faigata i le Ekalesia ma taitai o le Ekalesia. Ia Oketopa 1838, sa ia molimau atu ai e faasaga i le Perofeta ma isi taitai o le Ekalesia. O lenei mea na taitai atu ai Iosefa Samita e faafalepuipui ia Novema 1838.
Mo le isi lima masina na sosoo ai, sa faafalepuipuiina ai le Perofeta i ni falepuipui se lua i Misuri, e aofia ai le Falepuipui o Liperate.
E oo atu i le 1840, sa oo ai Viliamu W. Phelps i se suiga loloto o le loto ma tusi atu i le Perofeta e aioi atu mo se faamagaloga. O le tusi na tusia e Iosefa i le tali atu na faaiuina faatasi:
“‘Sau ia, le uso pele, auā o lea ua uma le taua,
“‘O uo sa i ai muamua, ua iu ina toe avea ma uo.’”5
Sa faamagalo saoloto e Iosefa ia Uso Phelps ma toe talia o ia i le faaaumeaina atoatoa.
O le fa tausaga mulimuli ane, ina ua iloa e Uso Phelps ua fasiotia Iosefa ma Ailama e se au faatupu faalavelave, sa matuā faanoanoa lava o ia. O le faamagaloga a Iosefa o Uso Phelps atonu na musuia ai o ia a o ia tusia upu matagofie ma faagaeetia i le viiga “Viia Le na Fetaia’i ma Ieova.”6
O Le Mea e Le o Se Faamagaloga
Ina ia malamalama atili i le uiga o le faamagalo atu i isi, e mafai ona fesoasoani le malamalama i mea e lē manaomia e le faamagaloga.
Muamua, e te lē tau faatuatuaina le vaega ua faamagaloina i le taimi lava e mae’a ai le faagasologa o le faamagaloga. Mo se faataitaiga, sei o tatou faapea atu sa ia te oe se pea seevae tamoe manaia sa ou manao tele i ai ma ou gaoia ai mai ia te oe. I se taimi puupuu mulimuli ane sa ou lagona le tausalaina mo le gaoi, o lea sa ou toe faafoi atu ai seevae ia te oe, ma aioi atu mo se faamagaloga. Sa e tali mai i se tali faamagalo, ma sa ou alu loa. Ae faapea la sa ou alu atu ia te oe i se taimi mulimuli ane ma fesili atu pe mafai ona ou nonōina na seevae. O le faalotolotolua, na e faailoa mai ai ua e faamagaloina a’u, ae o le a umi se taimi ona faatoa e lagonaina lea e mafai ona e toe faatuatuaina a’u. E masani ona manaomia le taimi mo le faamalologa ma le faatuatuaina.
Lona lua, e te lē tau talia le amioga lē talafeagai a le tagata ona o se tulaga o le olaga. I le faataitaiga o seevae na gaoia, e taua le lē faapea mai ia te a’u, “E lē afaina lou gaoia o seevae. Ou te iloa sa e i ai i se taimi faigata.” O le taliaina o amioga lē talafeagai e mafai ai e le tagata na faatiga maii ona aloese mai le tauaveina o le tiutetauave mo faatinoga na e manaomia ai le faamagaloga i le taimi muamua.
Lona tolu, o le faamagalo atu e lē faapea e filimaoti e le isi tagata ou lagona. O le faamagalo atu o lona uiga o le iloaina lea e te filimaotiina ou lagona e ala i le puleaina o ou mafaufauga ma e ala i le avea ma se soo moni o Keriso. Ma le isi foi, i le faataitaiga o seevae na gaoia, afai e te fai mai ia te a’u ua faamagaloina a’u ae na e lagonaina le ita i taimi taitasi na e vaai mai ai ia te a’u, o le a mautinoa lava le manaomia o se lagona loloto atu o le faamagaloga.
Lona fa, o le faamagalo atu e le manaomia ai se mafutaga vavalalata ma le tagata ua faamagaloina. O le faamagalo atu o se faagasologa i totonu, e manaomia ai le aveese atu o le ita. E lē faapea o le siitiaina o le tagata ua faamagaloina i le tulaga o se uo mamae po o se paaga. Mo nisi tagata e sopoia le ala o o tatou olaga, e talafeagai le alofa ia i latou mai se mea mamao.7
Lima, o le faamagaloga e lē manaomia ai le faatoese atu o le tagata ua faamagaloina. O le tiutetauave lena o lena tagata. Na aoao mai Peresitene Faust: “O le toatele o i tatou e manaomia se taimi e taulima ai le feagai ma le tiga ma le maliu. E tele mafuaaga e mafai ona tatou maua e tolopo ai le faamagalo atu. O se tasi o nei mafuaaga o le faatalitali mo le tagata na sesē ia salamo muamua ae tatou te le’i faamagalo atu i ai. Ae o lena faatuatuai e afua ai ona tatou le maua le filemu ma le fiafia e mafai ona avea mo tatou. O le saga mafaufau pea i le tiga ua leva ona te’a e lē aumaia ai se fiafia.”8
Faamagaloina o i Tatou Lava
O le gafatia e faamagalo atu ai i isi e puna mai i lo tatou gafatia e faamagalo ai i tatou lava. Ae ua iloa e nisi o le faamagalo atu o i latou lava o se luitau. Afai e faaauau pea ona latou faasalaina i latou lava i mafaufauga lē lelei e faatatau i agasala ua latou salamo ai, ua latou taofia ma le lē iloa le mana o le Togiola a lo tatou Faaola e faamamā ai i latou mai aafiaga lē lelei o le faasalaga faaletagata lava ia.
Na aoao mai Elder Jeffrey R. Holland o le Korama a Aposetolo e Toasefululua: “E i ai se mea i le toatele o i tatou e faapitoa lava le le faamagalo atu ma galo ai mea sese na muamua atu i le olaga—a le o a tatou mea sese po o mea sese a isi. E lē lelei. E lē Kerisiano. O loo ia tu mai o se tetee matautia i le maualuga ma le mamalu sili o le Togiola a Keriso. O le noatia i mea sesē ua leva o se ituaiga sili lea ona leaga o le nofoa’i i le taimi ua tuanai lea ua valaauina ai i tatou e faamuta loa ma aua le toe faia.”9
Po o se faaupuga e ta’ua soo, “Pe a faamanatu atu e le tiapolo ia te oe lou taimi ua tuanai, tau lava o le faamanatu atu ia te ia o lona lumanai!”
I la’u faatinoga o togafitiga, e masani ona fesili mai tagata mamai ia te a’u, “Ae o le a tonu lava la’u mea e fai e faamagalo ai a’u lava?”
Muamua, e tatau ona tatou taliaina le upumoni faapea ua uma ona puapuagatia le Alii o Iesu Keriso mo a tatou agasala. E pei ona tatou aoao i le Alema 7:13, “E mafatia le Alo o le Atua e tusa ai ma la le tino ina ia mafai ona ia ave i ona luga agasala a ona tagata, ina ia mafai ona ia soloi ese a latou solitulafono e tusa ai ma le mana o lana laveaiga.” O le faasalaina o i tatou lava o se taumafaiga e lē aoga ma faataumaoi!
Lua, e lē tatau ona na ona tatou talitonu i le Faaola ae ia talitonu foi ia te Ia. I se isi faaupuga, e mafai ona tatou talitonu moni ia te Ia ina ua Ia fetalai mai:
“Aua faauta, o A’u, o le Atua, na mafatia i nei mea mo tagata uma, ina ia latou le mafatia pe afai latou te salamo;
Ae afai latou te le salamo, o le a latou mafatia e pei lava o A’u” (Mataupu Faavae ma Feagaiga 19:16–17).
Sa apoapoai mai le Faaola ia i tatou ia faamagalo atu (tagai Mataupu Faavae ma Feagaiga 64:9), o lea la o le lē faamagaloina o i tatou lava po o isi, atonu tatou te i ai i lalo o le manatu sesē faapea o o tatou mafatiaga e mafai ona sili atu ona togiolaina ai i tatou nai lo mafatiaga o le Alii. O lenei manatu faamaualuga ua lamatia ai i tatou i le mulimuli i le fili nai lo le faalagolago i le mana faamalolo o le Togiola a lo tatou Faaola.
E lē tatau ona tatou faamoemoe e faagalo mea sese ua tatou faia, ae e mafai, i se taimi, ona galo ia i tatou le tiga o le ita ma le faasalaga faaletagata lava ia. Ua tatou aoao mai le Alema 36:19 e faapea sa mafai ona agai i luma Alema le Itiiti i tua atu o lona taimi ua tuanai: “sa ou le toe manatuaina o’u tiga; ioe, sa ou le toe lagā atuatuvaleina au i le manatuaina o a’u agasala.”
O le mafai ona faamagalo atu o se meaalofa paia, ma e lē mafai ona fuaina lona tāua. O lona taui o se filemu i le loto lea e i’u ina tatou latalata atili atu ai i lo tatou Faaola.
E alala le tusitala i Iuta, ISA.