E Na’o le Faatekinolosi
Perofeta ma Aposetolo—O O Tatou Taiala Manino ma Faatuatuaina
A o tatou sailia le taitaiga mo o tatou olaga, e mafai ona tatou lagona le mautinoa i le mulimuli i fautuaga mai perofeta ma aposetolo.
Ina ua valu o’u tausaga, sa ave e lo’u tama ma’ua ma lo’u tuagane i se savaliga sopo umi.
A o ma latalata atu i le pito i luga, sa amata ona ma faia ma lo’u uso ia fesili e pagatia ai matua uma:
“O le a le mamao?”
“Pe toetoe o tatou i ai iina?”
O le a tali mai ma le onosai lo’u tama:
“E te toetoe lava!”
“Na o le toe 15 minute!”
Ae e 15 minute o le a mavae atu, ona sosoo ai lea ma le isi 15. Sa alu atu lo’u tama mai le faamalosiauga e faatoga atu i le aioi atu. “Ua na’o si na mamao teisi atu,” o lana tala lea, ma le talitonu e moni. E oo lava ia te ia sa faateia matou te lei oo lava i le iuga.
Ina ua matou pasia ni tagata sopo mai le tumutumu, sa matou fesili ma le naunautai po o le a le tele o le savali sa i o matou luma atu.
“Ua e matua latalata lava!” o la latou tali faamalosiau lea. “Toeitiiti e oo ai iina!”
Sa tupu lenei mea mo ni nai taimi. Mulimuli ane, sa faapalasi ifo e lo’u uso o ia lava i le ogatotonu o le alasopo, piilima ona lima, ma tautino atu, “Ou te le toe alu mamao lava.”
Tagatavaai i luga o le Olo
E pei ona matou iloaina i lena ala savali sopo, e eseese manatu o tagata. Sa tau mai e tagata uma sa matou feiloai i le alasopo ua matou “latalata” atu i le tumutumu, ae sa eseese uma o latou manatu i le uiga o lena mea. E oo lava i lo’u tama lelei—o le sa teuina a matou meaai mama, faatumu a matou faguvai, ma ave i matou i le alasopo—sa ia aveseseina le umi o le savaliga sopo. E aunoa ma se taiala poto masani, sa amata ona ma vaivai ma lo’u uso ma le fiafia i le tulaga o le manao e lafoai.
A o tatou savalia le ala o feagaiga i aso uma, o le a tatou fetaiai ma le tele o faatosinaga ma manatu eseese. E toatele tagata o le a saili e avea ma o tatou taiala—tagata faatosina, au faipolotiti, aiga, uo. O nisi o nei taiala e le o manatui ni mea sili ona lelei mo i tatou i le loto. O isi taiala e mananao i le mea sili mo i tatou, ma e latou te mafai ona fesoasoani ma lagolagosua a o tatou alualu i luma—e pei o lou tama—ae atonu latou te le maua tali mo mea uma.
O le mea e lelei ai, o le Tama Faalelagi ma Iesu Keriso o ni E silafia mea uma la te silafia lelei i tatou ma e iloa tulaga o i ai nei ma le lumanai o le lalolagi o loo tatou ola ai. Ma ua La tuuina mai ia i tatou perofeta ma aposetolo e avea ma o tatou taiala ma o tatou leoleo i luga o le olo (tagai Esekielu 33:1–7).
O ni nai auala nei latou te taialaina ai i tatou i luga o le ala o feagaiga:
Tuuina Atu o le Upumoni A’ia’i
Na aoteleina e Peresitene Russell M. Nelson mea e mafai ona tuuina mai e le sailia ma le faatinoina o upu a perofeta ma aposetolo mo i tatou: “o le upumoni mama, o le mataupu faavae mama a Keriso, ma faaaliga mama.” I se lalolagi ua “toalaiti naua tagata e iloa le mea e liliu i ai mo le upumoni,” e mafai ona tatou lagona le mautinoa o loo tatou aoaoina ma mulimuli i le “upumoni a’ia’i—upumoni e faavavau,” pe afai tatou te faalogo pea i upu a o tatou taitai o aso nei.1
Ae uma ane, e pei ona tatou aoaoina i le Amosa 3:7, E le faia lava se mea e le Alii le Atua, a e faaalia lona finagalo i ana auauna o perofeta.” E pei ona aoao mai Elder Dieter F. Uchtdorf o le Korama a Aposetolo e Toasefululua: “E tasi le puna o le upumoni ua faapea ona atoatoa, sa’o, ma e le mafaapiopioina. O lena punavai o lo tatou Tama Faalelagi e matua atamai ma silafia mea uma.”2
O le Tama Faalelagi o le punavai o le upumoni, ma ua Ia faailoa mai lena upumoni i Ana perofeta. E mafai ona tatou lagona le mautinoa e uiga i lo tatou tomai e saili ma iloatino le upumoni pe a tatou mulimuli i fautuaga faaperofeta.
Fesoasoani ia i Tatou ia Tumau le Ogatusa ma le Lotogatasi
O Le Ekalesia a Iesu Keriso o le Au Paia o Aso e Gata Ai o se Ekalesia i le lalolagi atoa; o o tatou tagata o le ekalesia o loo ola i le lalolagi atoa ma e eseese aafiaga o le olaga. E faapefea ona tatou tumau uma i le ogatusa? E faapefea ona tatou lagona le mautinoa o loo tatou faia uma mea e tatau ona tatou faia?
Na aoao mai Peresitene Dallin H. Oaks, Fesoasoani Muamua i le Au Peresitene Sili, e uiga i le manaomia o se faalapotopotoga i se ekalesia i le lalolagi atoa ma le ala e ausia ai lena mea e ala i perofeta ma aposetolo:
“O le galuega a le Alii e manaomia ai se faalapotopotoga ua taitaia e le Alii e ala mai i taitai ua Ia filifilia ma faatagaina, ma o lē ua Ia taitaia e faataunuuina ai Ona faamoemoega. Ua faaalia i le talafaasolopito faaletusitusiga paia faapea o na ituaiga o taitai a le o se perofeta po o perofeta ma aposetolo.
“Aisea e manaomia ai se faalapotopotoga e faataunuu ai faamoemoega o le Alii? E ui e alofa ma fesoasoani lo tatou Faaola ia i tatou taitoatasi, ina ia ausia Ona faamoemoega mo le tino atoa o fanau a le Atua—aemaise lava Ona tagata o le feagaiga—e galue o Ia e ala i se faalapotopotoga na taitaia e perofeta ma aposetolo.
“E na o se faalapotopotoga lava e mafai ai e tagata auai taitoatasi o le mea na ta’ua e le Aposetolo o Paulo ‘o le tino o Keriso’ (1 Korinito 12:27ona maua avanoa latou te manaomia e ausia ai le tuputupu ae faaleagaga o le faamoemoega lea o lo latou foafoaga.”3
O le faamanuiaga o perofeta ma aposetolo soifua e faatasia ma faamalosia ai i tatou o se Ekalesia. E mafai ona tatou lagona le mautinoa o le mulimuli i a latou upu o le a faatumauina ai lo tatou saogalemu i luga o le ala o feagaiga ma agai atu ai i le itu sa’o.
Faasoaina Atu o le Alofa o le Atua mo i Tatou
Ua tatou iloa o perofeta ma aposetolo o se faamanuiaga matagofie, ae faapefea pe afai latou te talosagaina i tatou e faia se mea e foliga mai e faigata? Po o se mea e feteenai ma mea o loo fai mai ai tagata o siomia ai i tatou? E pei ona faailoa mai e Peresitene Henry B. Eyring, Fesoasoani Lua i le Au Peresitene Sili: “E masani ona talosagaina e le Alii Ana perofeta e tuuina mai fautuaga e faigata i tagata ona talia. O le a taumafai le fili o o tatou agaga e taitai atu i tatou ia ita ma masalosalo i le valaauga o le perofeta mai le Atua.”4
Ae, e pei ona faamalamalama mai e Elder Neil L. Andersen o le Korama a Aposetolo e Toasefululua, o lena mea moni e le tatau ona tatou popole ai: “Aua le popole pe a faafetaiaia e le leo o le lapataiga a le perofeta ia manatu lauiloa o le aso. O le taimi lava e amata ona saunoa ai le perofeta e amata ai foi ona vevela faitioga a le au le talitonu feitagai.”5
Na faasoa mai e Elder Ulisses Soares o le Korama a Aposetolo e Toasefululua le mafuaaga e mafai ai ona tatou lagonaina le mafanafana pe a tatou faalogo i taitai o saunoa mai, e tusa lava pe luitauina a latou fautuaga:
“O se faamafanafanaga lava le iloa e le o tuua na o i tatou i le lalolagi, tusa lava po o a luitau o tatou feagai i le olaga. O le i ai o perofeta o se faailoga o le alofa o le Atua i Ana fanau. Latou te faailoa maia folafolaga ma le natura moni o le Atua ma Iesu Keriso i o La’ua tagata. …
[O Perofeta ma aposetolo] e suitulaga i le mafaufau ma le finagalo o le Alii ma ua valaauina e suitulaga ia te Ia ma aoao mai i tatou i mea e tatau ona tatou faia e toe foi atu ai e mau i le afioaga o le Atua ma Lona Alo, o Iesu Keriso. … O le mulimuli ia te i latou, o le a sili atu ai ona fiafia o tatou olaga ma tuuitiitia le faigata, e faigofie atu foi ona onosaia o tatou faigata ma faafitauli, ma tatou fatuina se ofutau faaleagaga o le a puipuia ai i tatou mai osofaiga a le fili i o tatou aso.”6
O le mea moni e faapea o nisi o aoaoga e feteenai ma aoaoga a le lalolagi o le mafuaaga tonu lava lea tatou te manaomia ai perofeta—e finagalo le Tama Faalelagi e taiala Lana fanau ma puipuia i latou mai mea leaga a le fili.
Lagolagoina o Faamuamua Faaperofeta
Mulimuli ane, sa tui luga lo’u tuagane mai le eleele ma oo atu ai i le vaituloto matagofie sa ma savavali agai i ai i le aso atoa. Sa avea o se aafiaga matagofie ma le tauaogaina.
Ae o le a se isi mea e sili atu pe ana faapea ma te iloa le mea e faamoemoe i ai? Semanu e le pupuu pe itiiti ifo foi le savaliga sopo, ae semanu e sili atu ona matou saunia. E pei ona faamalamalama mai e Peresitene Nelson, “Manumalo i le lalolagi … E faafaigofie aimea umae uiga i le olaga,” e tusa lava pe le faigofie ai mea uma.7
A o tatou lagolagoina perofeta ma aposetolo ma faia “se tautinoga patino o le a tatou faia le mea sili tatou te mafaia e lagolago ai a latou faamuamua faaperofeta,”8 e pei ona aoao mai Peresitene Nelson, o le a tatou maua le taitaiga ma le taialaga mo o tatou olaga.