“O Tofotofoga o le Aposetolo o Paulo,” Liahona, Oke. 2023.
O Tofotofoga o le Aposetolo o Paulo
O le a le mea na fesoasoani ia Paulo e onosaia ai faigata?
Vagana ai Nei Filifili, Falelomitusi © o le Pasefika, ua laiseneina mai le GoodSalt.com
O a Tofotofoga na Onosaia e Paulo?
Sa tusia e Paulo, “Ua atu tolu ona sasaina o au i laau, ua tasi le fetogia o au i maa, ua atu tolu ona malaia o folauga sa ou i ai, ua atoa o le po ma le ao sa ou i le vasa” (2 Korinito 11:25). Ae ui i nei mea uma, sa ia fai mai, “Ou te mitamita i mea ou te vaivai ai” (fuaiupu 30).
Sa taulimaina Paulo “e pei se tagata fai mea leaga” (2 Timoteo 2:9) ma sa faafalepuipuiina i se aofaiga e silia ma le lima tausaga mo le talaiga o le talalelei. Ae sa lē mafai e lenei mea ona taofia o ia mai le tusitusia o ni tusi faamalosiau i uo ma taitai o le Ekalesia. Sa luiina o ia i se “mea matuitui i le tino, o le avefeau a Satani e tui [ia te ia]” (2 Korinito 12:7). E lei aveesea e le Atua lenei tofotofoga ae sa fesoasoani ia Paulo e maua le malosi i ona vaivaiga (tagai fuaiupu 8–10).
Ua Faalau atu e Paulo le Tusi, saunia e Arthur Twidle, © Providence Collection, laiseneina mai le GoodSalt.com
O le a se mea na faaosofia ai Paulo?
E ui lava i sauaga ma le faafalepuipuiina ma le lē tonu, Sa tusia e Paulo, “aua ua aoaoina a’u ia toafilemu lo’u loto i mea ua ia te au” (Filipi 4:11). Sa ia onosaia ona o lona faamoemoe loloto ma le faalagolago ia Iesu Keriso.
Na tusia e Paulo e faapea “o i latou uma foi o e loto ina nonofo ma le amio Atua ia Keriso Iesu, e sauaina i latou” (2 Timoteo 3:12). Ae sa ia faailoa mai foi o o tatou tofotofoga “e tupu mai ai mo i matou le manuia mamafa e matua silisili ese lava ma le faavavau” (2 Korinito 4:17). Sa sailia e Paulo “le pale o le amiotonu” (2 Timoteo 4:8) ma “le taui na valaauina ai a’u mai luga e le Atua” (Filipi 3:14).
E faʻapefea ona tatou tutumau pei o Paulo?
E ui o o tatou tofotofoga atonu e lē aofia ai le afatia o se vaa, sasaina, ma le faafalepuipuiina, ae e mafai ona tatou faataitai i le tutumau o Paulo e ala i le vaai atu ia Keriso. Na saunoa mai Elder Neil L. Andersen o le Korama a Aposetolo e Toasefululua, “Na fautuaina i tatou e le Aposetolo o Paulo ina ia mauaa, faavae, ma faamautu i lo tatou alolofa mo le Faaola ma lo tatou naunautaiga e mulimuli ia te Ia.”1
E tusa ai ma lona valaauga faaaposetolo, sa tusia ai e Paulo, “aua ou te le mā lava: auā ua ou iloa o ia ua ou faatuatua i ai” (2 Timoteo 1:12). Po o a lava o tatou tofotofoga, e mafai ona tatou manatua le tagata tatou te talitonu i ai a o tatou “faafaileleina atoatoa, faamalosia, ma faamalolosia aa o lo tatou faatuatua ia Iesu Keriso.”2