“O Se Lolo Vai ma Faamanuiaga,” Liahona, Oke. 2023.
Atatusi o le Faatuatua
O Se Lolo Vai ma Faamanuiaga
E ono oo mai se lologa o tofotofoga i o tatou olaga, ae tatou te molimau atu o lo tatou faatuatua i le mana o le Atua o le a faamanuiaina ai i tatou.
Atapue mai faaaloaloga a tusitala; ata i totonu na pueina e Christine Hair
I le avea ai ma soa faifeautalai, sa ma malaga i se vaalele mo le 45 minute mai le Motu o Efate i saute i le Motu o Tanna. Sa ma aumaia se faaputuga tele o fomu o papatisoga ma faaaoga se pikiapu a le misiona e amata ai a ma asiasiga i paranesi e valu o le motu. E oo atu i le taimi na ma taunuu ai ia Aokuso, ua faatupulaia le aofai o tagata ua saunia mo le papatisoga i le 114.
I le aso 18 Aokuso, 2022, sa ma o ai i le paranesi i Sideseawi. Sa leai se auala ma te faafesootaia ai le peresitene o le paranesi e ta’u atu ia te ia o le a ma o atu. Sa na ona ma o atu lava ma le faamoemoe e maua o ia.
Pe a e mafaufau ia Tanna, mafaufau i auala o le togavao. Sa ma aveina atu le pikiapu i luga o le mauga i le mea na ma mafaia. Ona ma tuua lea ma amata ona savavali. E tolu itula na alu e taunuu ai i le nuu. Na pau le mea na ma aai ai o ni popo na ma maua i le ala.
Ina ua ma taunuu i le nuu, sa le’i i ai iina le peresitene o le paranesi, ae sa i ai lona fesoasoani. Sa ma talanoa atu ia te ia e uiga i le galuega faafaifeautalai, ona amata lea ona timu. Pe a amata ona timu i Sideseawi, e taumafai tagata i le mea sili latou te mafaia e saili ai se eria saogalemu. Sa ma faanatinati atu i lalo o le mauga i le ma pikiapu.
A leai se timu i Tanna, e saogalemu le tietie. Ae a i ai le timu, o le taimi lena e taufaafefe ai. Ina ua ma taunuu i le ma pikiapu, sa amata ona alu le ma taavale ae na vave lava ona ma pa’ulia i le sopoia o se vaitafe.
Sa ma taumafai e tulei ese le pikiapu, ae sa lē aoga lena mea. O lea, sa ma valaau atu ai i le peresitene o le itu mo se fesoasoani. Na oo mai le fesoasoani ma sa ma toe taumafai foi e faaminoi le pikiapu, ae sa faaauau pea ona faateteleina timuga. E tele vaitafe na tutumu ma tatafe ifo mai eria eseese na siomia ai i maua.
Ata pue mai faaaloaloga a tusitala
“O Ese mai le Taavale”
O i latou sa fesoasoani ia i matou sa o ese mai le vaitafe, ae sa ma pipiimau pea i nofoa o le taavale a o faateteleina le tafe o le vaitafe. Ma te le’i mananao e tiai le taavale. Ua oo atu nei le vai i faitotoa o le taavale i le itu o loo sau ai le tafega.
Sa ma valaau atu i le matou peresitene o le misiona, o Mark Messick, ma tau atu ia te ia le mea na tupu. “O le taimi nei ua faateteleina le tafe o le vai,” o le ma tala lea. Sa ma fesili atu pe afaina le faasaoina o o ma ola ae tuu le taavale.
“Faafetai mo le valaau mai,” o le tala lea a Peresitene Messick ia i maua. “E lē afaina! Tuu le loli i le mea o i ai ae su’e nei lava se nofoaga saogalemu!”
Sa ma latalata atu i le mea na fetaui ai ni vaitafe se lua. O le isi vaitafe sa latalata mai ia i ma’ua ua telē ma saoasaoa, ae o le vaitafe sa ma i ai sa laitiiti lava, e pei o loo faatalitali mai mo i ma’ua ia o ese. Ae peitai, pa!
Sa alaga mai se tagata mai le auvai. Sa malamalama Elder Nalin, mai Tanna, i le lapataiga: “Vai!”
Sa taia le ma taavale mai i le autafa, ma tatafe atu le aave faateleina agai i le faitotoa a Elder Toa. Na muamua oso i fafo Elder Nalin. Sa tatau ia Elder Toa ona pe’a i le nofoa pito i tua ma oso i fafo i le isi itu o le taavale e alu ai i fafo. Sa vave ona ia tilotilo i le nofoa pito i tua mo a matou fomu o papatisoga ma tusitusiga paia peitai na te lei iloa atu. Sa manatu o ia ua uma ona ave e Elder Nalin. O le taimi lava na oso ai i fafo Elder Toa, na ave ai e le vaitafe le taavale.
Afai e faaleagaina e le vai ia fomu, e tatau ona ma toe foi atu i eria sa ma asia ma toe fai faatalanoaga. E tatau foi ona ma toe felelei atu i le ofisa o le misiona i Efate ina ia aumai nisi fomu o papatisoga ona toe foi mai lea i Tanna.
Elder Silas Toa
Ata na pueina e Christine Hair
Elder Brian Moses Nalin
Ata na pueina e Christine Hair
Faatuatua i le Mana o le Atua
A o ma matamata atu i le tafea ese o le taavale, na i’u ina iloa atu e Elder Toa tusitusiga paia ma fomu o papatisoga i le nofoa pito i tua. “Pe mafai faapefea ona tupu lenei mea?” Sa ia mafaufau pe na faapefea ona ia lē vaai muamua i ai.
A o ma i ai pea i le vaitafe, sa ma valaau atu i le mana o le Atua e puipui a ma tusitusiga paia ma fomu o papatisoga. Sa ma faatuatua e mafai ona Ia laveaiina i latou e tusa ai ma Lona finagalo.
Ona ma o ese lea mai le vaitafe ma tootutuli ma tatalo mo le taavale ma a ma fomu o papatisoga ma tusitusiga paia. Sa lē mafai ona ma iloa atu le loli, ae sa ma iloaina o le a lelei mea uma.
Sa maua mulimuli ane e tagata mai Sideseawi le taavale i lena aso ma valaau atu i le peresitene o le itu. E tusa ma le 820 futu (250 m) le mamao na tafea ai le taavale. Sa susū mea uma sa i totonu o le taavale, sei vagana ai a ma fomu o papatisoga ma tusitusiga paia! Sa mamago, sa taatitia i luga o nisi o tamaitusi, api, ma tusi lesona.
Sa ma faapotopoto mai se vaega e fesoasoani ia i ma’ua e aveese mai le taavale mai le vaitafe. Sa tatau ona mago le loli ae sa vave ona lipeaina. Sa leai ni omoomo po o ni maosiosia.
Ina ua mavae le afā, sa tele lava ina matou savavali atu i paranesi eseese i Tanna. Pe a lelavavā e ou vae savali, e te savali i lou loto.
I nai aso na sosoo ai, sa faamaeaina a matou faatalanoaga o papatisoga ma papatisoina tagata e 114, o le toatele o i latou o aiga. O se tasi o paranesi e 48 tagata na saunia mo le papatisoga. Sa amata ona matou faatalanoaina i latou i le 7:00 i le taeao. Ina ua uma, sa matou vaaia le goto ifo o le la.
E ono oo mai se lologa o tofotofoga i o tatou olaga, ae tatou te molimau atu o lo tatou faatuatua i le mana o le Atua o le a faamanuiaina ai i tatou. E oo lava i le lologa o vai o Tanna e lē mafai ona faatoilaloina le lolovaia o faamanuiaga a lo tatou Tama Faalelagi.