Ua Na’o Tusiga Faaeletonika
Ua Taitaiina i Matou i Ona Po Nei
Mai se faigalotu a le BYU–Hawaii na tuuina atu i le aso 18 Fepuari, 2020.
O le mulimuli i perofeta o le a taitai atu ai i taimi uma i faamanuiaga folafolaina ma le tuputupu ae faaletagata.
A o tatou agai atu i luitau o le olaga, o le a avea le taitaiga mai perofeta ma mea taua ia i tatou.
Tatou te vaai i faamanuiaga silisili a o tatou mulimuli i le taitaiga mai perofeta. Ou te manatua se faataitaiga taua tele na tupu i le itiiti ifo ma le tolu vaiaso talu ona ma faaipoipo ma lo’u toalua o Jill. Sa matou auai i se faigalotu lea sa saunoa ai le Peresitene o le Ekalesia i lena taimi, Spencer W. Kimball e uiga i le faaipoipoga.1 Na pei lava na saunoa sa’o mai o ia ia i ma’ua. O lena lauga e tasi na fesoasoani ia i ma’ua e faatulaga ni mamanu a o ma amataina le ma faaipoipoga ma le aiga, ma sa fesoasoani ia i ma’ua e aloese ai mai mailei na musuia ai o ia e le Alii e lapatai atu e faasaga i ai. Ua ou tomanatu i le tele o tausaga i le faamanuiaina o i matou i le mauaina o lena taitaiga i se taimi taua tele mo i matou. I le taimi nei, i le 47 tausaga mulimuli ane, o loo faamanuiaina pea i matou ona o lena fautuaga na ma mauaina o se ulugalii talavou ua faaipoipo.
Pe a Tatou Mulimuli i le Perofeta, E Faamanuiaina i Tatou
Ou te mautinoa e mafai e outou taitoatasi ona faamatala atu ni aafiaga i se taimi na faamanuiaina ai outou e ala i le mulimuli i le perofeta.
O le mulimuli i mea ua musuia perofeta e aoao atu e le mautinoa ai o le a le tauemuina i tatou pe sauaina pe o le a tatou le feagai ma isi faigata ona o lo tatou usiusitai. Ae o lo tatou naunautai e usiusitaie oo lava ina aumaia le “filemu i le lalolagi lenei, ma le ola e faavavau i le lalolagi a sau” (Mataupu Faavae ma Feagaiga 59:23).
O Nifae ma le vaega o aiga o Liae ma Isamaeli o e na mulimuli i aoaoga a Liae na feagai ma luitau ogaoga, ae na iu ina latou ola “e tusa ma le ala o le fiafia” (2 Nifae 5:27) i le nuu folafolaina. O le faatalitali ma le talitonu i faamanuiaga folafolaina i le lumanai e mafai ona avea o se luitau i se aso tatou te le fiafia ai pe afai e silia ma le .62 sekone e alu i se sailiga i luga o le komepiuta.
Pe a Amata Ona Faaopeopea Ia Sosaiete, e Toatele e Teenaina fautuaga a Perofeta
A o ou laitiiti, sa ou mafaufau pe aisea o le a teena ai e tagata i le Tusi a Mamona ia perofeta. Sa toetoe lava a foliga valea ia te au. Pe le mafai ona latou vaai po o a taunuuga o le a i ai? E mafai faapefea e tagata ona oo i se tulaga o le a latou teena ai savali a perofeta ma teena ma inoino ai i perofeta lava ia?
I ni nai tausaga ua mavae, sa ou filifili ai e suesue tali atu i savali mai perofeta. O nisi taimi e teena ai e tagata ia perofeta ona sa latou lotoleaga ia i latou ma lo latou mana.
I le Tusi a Nifae Tolu a o auauna atu Nifae ma le mana tele, “sa latou feita ia te ia, ona sa ia te ia le mana tele atu nai lo i latou” (3 Nifae 7:18). Sa vaai foi le nuu ia Nifae o faatuina mai lona uso mai le oti; “ma sa vaai i ai tagata, ma latou molimau i ai, ma sa feita ia te ia ona o lona mana” (3 Nifae 7:20).
Ina ua toe foi mai Thomas Marsh i le Ekalesia ina ua mavae lona le fiafia, sa ia faamatalaina le mea na tupu:
“Masalo ua ou le maua le Agaga o le Alii mai lo’u loto. …
“Sa oo ina ou lotoleaga i le Perofeta … ma le vaai atu i mea uma sa sa’o, ma faaalu lo’u taimi atoa i le vaavaai mo le leaga; … Sa ou manatu sa ou vaai i se utupoto i le mata o Uso Iosefa, ae sa leai se mea ae nao se fasilaau, ma sa tumu lo’u lava mata i le utupoto; … Sa ou ita ma sa ou manao ia ita isi tagata uma. Sa ou talanoa ia Uso Brigham Young ma Uso Heber C. Kimball, ma sa ou manao ia i latou ia feitai e pei o au ; ma sa ou vaai ua le feitai i laua, ma sa ou ita atili pea ona sa laua le feitai. Sa fai mai Uso Polika Iaga, ma se vaaiga faaeteete, ‘O oe ea o le taitai o le Ekalesia, Uso Thomas?’ “Sa ou tali atu, ‘Leai.’ ‘Ia,’ sa ia fai mai ai, ‘aisea e te le tuua ai lena mea?’”2
E i ai isi mafuaaga ua le mulimuli ai tagata i fautuaga a perofeta. O se tasi o mea e sili ona taatele o le molimau mai lea o perofeta i agasala a tagata ma talai atu le salamo. E le nofo lelei lenei mea i le toatele o tagata. A o lei oo i le fuaiupu muamua i le Tusi a Mamona, i le faatomuaga puupuu na tuuina mai e Nifae i le Tusi Muamua a Nifae, ua tatou vaaia ai le aliae mai o lenei autu. Na tusia e Nifae, “Ua lapataia Liae e le Alii ia alu ese atu i fafo mai le laueleele o Ierusalema, ona sa vavalo atu o ia i tagata e uiga i lo latou amioletonu ma ua latou saili ai e faaumatia lona ola.” O lenei mamanu o loo toe ta’ua foi i tusitusiga paia (tagai, mo se faataitaiga, 1 Nifae 16:2; Mosaea 13:4; Alema 35:15; Helamana 8:4; 13:26–28).
O le toatele o i tatou e le fia faalogo o loo tatou faia se mea sese. Tatou te le mananao e faasa’oina. E avea lenei mea ma luitau sili atu a o agaigai atili ese tagata mai aoaoga ma poloaiga a le Atua. I se sosaiete amiotonu, o tagata ua o ese atu i le agasala e avea ma tagata ese; ae i se sosaiete e lē amanaiaina pe teena aoaoga a le Alii, o i latou o e e usitai i poloaiga e avea ma tagata e o ese mai ai ma ua latou o mai i lalo o uunaiga malolosi.
I le Tusi a Mamona, o na faalapotopotoga sa sili ona loloto i filosofia ma agasala sese—e pei o le nuu o le Tupu o Noa, le nuu o Amonaea, po o sa Sorama—sa foliga mai sa le lelei ona tali atu i savali a perofeta. A o faaopeopea tagata, o le fale tele ma le ateatea e faamalosia ai se faatosinaga malosi atu i tagata taitoatasi. E foliga mai e vavalalata ma tele atu. O tauemuga e foliga mai e sili atu ona malosi ma sili atu ona faasino mai. E foliga mai e tele atu tamailima o loo tusi—ma e mafua ona o loo i ai. Ua i o tatou luga le mamafa e le gata i le liliu ese mai le ala ma le fua o le laau ae ia auai i le tauemuina ma le osofaia o i latou o loo taumafai e tumau i luga o le ala.
O le a se mea na manaomia mo na nuu e oo atu ai i le tulaga o le a latou teena ai perofeta ma galala ai i le fia feinu mo o latou toto? Na faapefea ona faaofuina filosofia ma aoaoga faavae sese i loto o tagata? O a ni mea moni na mafai ai e i latou ona see atu mai le lotomaualalo i le faamaualuga ma mai le usiusitai i le faananau? Atonu o se autu lea mo se isi taimi.
A o tatou vaavaai atu i nei atunuu ma tagata taitoatasi o e liliu ese mai perofeta ma mai le Alii, e mafai ona tatou vaai i taunuuga o le faalavelaveina. Sa faaumatia le aai o Amonaea i se aso e tasi. Sa faapologaina tagata o Noa, ma e toatele na fasiotia. Sa le fiafia sa Sorama ona o nisi o e matitiva sa i ai faatasi ma i latou o e na taliaina le talalelei sa taliaina ma le fiafia i le Laueleele o Seasona. O lenei mea na mafua ai lo latou auai i se taua e faasaga i le malo o sa Nifae.
Tatou te Faia se Filifiliga Faaletagata Lava Ia e Mulimuli ai i le Perofeta pe Leai
Ua tofu i tatou ma le filifiliga e mulimuli i le perofeta, e tusa lava po o le a le tulaga o le sosaiete faapitoa o loo tatou ola ai. Atonu tatou te lagonaina le uunaiga mai tagata ina ia le amanaiaina pe teena foi le savali a le perofeta, ae o loo tatou faatumauina pea le tomai e filifili ai. Afai tatou te tausia a tatou feagaiga ma tumau latalata i le Alii, o le a sili atu ona faigofie mo i tatou le mulimuli i le perofeta. O le a tatou maua le Agaga e taialaina i tatou ma faamalosia lo tatou naunautaiga e gauai atu o tatou loto i le finagalo o le Alii. Ona avea ai lea o i tatou ma e mauaina faamanuiaga a le Alii.
Sa ou i ai i se talanoaga i ni nai tausaga ua mavae e uiga i se autu faapitoa e i ai ni nai tulaga faaupufai, ae e lei talanoaina moni lava le autu e le Ekalesia po o le perofeta. Sa faia e le tagata se faamatalaga faapea afai e fai mai le perofeta ia i tatou e fai le mea sa tatou talanoaina, o le a le faia e lenei tagata ma mo ia o lona uiga e le o toe avea le perofeta ma se perofeta moni. Sa ou tei ma sa ou manatu o se filifiliga faigata tele lena. Ae ina ua uma le talanoaga, sa ou mafaufau: pe sa i ai ea se mea na ou lagonaina le malosi tele e uiga i ai, po o faiga a lena sosaiete i le taimi nei sa matuai malosi lava e faasagatau mai ai, e ono mafua ai ona ou teena le perofeta?
Pe a feteenai le fautuaga a se perofeta ma o tatou lagona patino, manaoga, po o talitonuga maumaututu, po o le tetee ai lena fautuaga i manatu lautele o tagata, o le a la tatou tali atu? Na saunoa mai Iosefa Samita, “Sa ou taumafai mo le tele o tausaga ina ia saunia mafaufau o le Au Paia e talia mea a le Atua; ae e masani ona tatou vaai i nisi o i latou, pe a uma ona mafatia i mea uma ua latou maua mo le galuega a le Atua, o le a lele atu i ni fasi tioata i le taimi lava e oo mai ai soo se mea e feteenai ma a latou tu masani: e le mafai lava ona latou tutu i le afi.”3
Na saunoa peresitene Henry B. Eyring, Fesoasoani Lua i le Au Peresitene Sili, e uiga i le tali atu i fautuaga mai perofeta:
“Pe a foliga mai e tautu i upu a perofeta, e tatau ona taulai la tatou gauai atu ma le faatumulia o o tatou loto i le agaga faafetai e ola ai i se taimi faamanuiaina.
“O le saili atu i le ala i le saogalemu, e ala i fautuaga a perofeta e talafeagai lelei lea ia i latou e malolosi faatuatua. A saunoa se perofeta, o i latou e itiiti le faatuatua e mafai ona latou manatu ane ua latou faalogo i se tagata poto o loo tuuina mai se fautuaga. Afai la o lana fautuaga e foliga mai e toafimalie ma talafeagai, ma fetaui i mea latou te mananao e fai, latou te taliaina. Afai e leai, latou te mafaufau i ai a le o se fautuaga sese pe latou te vaai foi i o latou tulaga e pei o le tauamiotonuina o lo latou avea ma se tuusaunoaga i le fautuaga. O i latou e aunoa ma le faatuatua atonu e manatu e na o alii latou te faalogo i ai o saili e faaaoga faatosinaga mo se faamoemoega manatu faapito…
“… O le le mafai ona taliaina o fautuaga faaperofeta e faaitiitia ai lo tatou malosiaga e taliaina ai fautuaga musuia i le lumanai. …
“O taimi uma lava na ou faalogo ai i fautuaga a perofeta, ma lagonaina le faamautu mai i le tatalo, ma mulimuli i ai, na ou iloa ai lo’u agai atu i le saogalemu…
“O nisi taimi o le a tatou maua ai fautuaga e le mafai ona tatou malamalama i ai pe foliga mai e le faatatau ia i tatou, e ui lava i le maea ai o le tatalo ma le mafaufau totoa i ai. Aua le lafoaia le fautuaga, ae ia taofi mau pea i ai. Afai e tauaao atu e se tasi e te faatuatuaina se mea e foliga mai e leai se taua ae ua na’o ni oneone faatasi ai ma le folafolaga e faapea, o loo i ai ni auro, atonu e te uuina ma le poto lea mea i ou lima mo sina taimi, ma lūlū malie. O taimi uma lava na ou faia ai lena mea i fautuaga mai se perofeta, e mavae se taimi ae amata ona aliali mai fasi auro ma sa ou faafetai ai.”4
O Taiala Tauaso e Taumafai e Vavaeese i Tatou mai ia Iesu Keriso
Ina ua uma ona faamatala atu e Samuelu le sa Lamana i tagata le ala na latou teena ai perofeta ae faalogo i isi o e na aoaoina i latou ia “savavali e tusa ma le faamaualuga o o latou mata, ma fai soo se mea [latou] te mananao i ai [o latou] loto” (Helamana 13:27), sa ia fesili atu i ni fesili ootia se lua: “O le a le umi tou te tuu ai outou lava e taitaiina e taitai valelea ma tauaso?” ma le “O le a le umi tou te filifili ai le pouliuli nai lo le malamalama?” (Helamana 13:29)
E leai se tasi e tautino mai sa latou mananao e taitaia e ni taiala tauaso. O i latou o e sa taitaiseseina semanu e le faaigoaina i latou o e aoaoina i latou i filosofia sese o ni “taiala tauaso.” O le mea moni, e foliga mai o i latou o e sa faia le taufaasese sa masani ona vaai i ai o ni tagata malamalama, tulimatai i luma, pupula, ma nofouta i agafesootai.
Ou te mafaufau pe faapefea ona fetaui nisi o na taiala tauaso mai le Tusi a Mamona i le asō. Mafaufau ia Serema, o le sa aoaoina ma maua se malamalama atoatoa i le gagana a tagata ina ia mafai ai ona ia faaaogaina le tele o le taufaasee. Faatasi ai ma lana poloaiga o le gagana, e mautinoa lava o le a ia aveina le lalolagi o le Twitter i afa. O le a ia maua le tele o tweets atamai o le a toe suia aua sa ia iloa lelei le ala e liliu ai se fasifuaitau pe tuu ai se poloka atamai.
Faatasi ai ma le malosi tele o Neoa, ofu taugata, ma faatosina atu i tagata, o le a ia teuteuina se vaega tele e mulimuli ai i luga o le Instagram—e faataitai ai le “olaga lelei” e aunoa ma le tapulaa o poloaiga ma faaaoga lana mamanu o le tauaveina i lalo o le Ekalesia ma ona aoaoga.
Ma o le a maua e Korioa le faitau miliona o tagata ua lesitala i lana alaata o le YouTube lea o le a ia maua ai le saolotoga e ulagia ai tagata talitonu ma aoao atu mea sa “fiafia i ai le mafaufau faaletino” (Alema 30:53). O le a Ia “tulai i luga i upu malena ae tele … ma … puleaga faasaga i ai” (Alema 30:31) o perofeta ma taitai o le Ekalesia. O le a ia aoina mai nisi tagata ua lesitala a o oo mai lana savali e faapea “o soo se mea e fai e le tagata e le o se solitulafono” (Alema 30:17).
Ioe, o le āu autu o a latou fesootaiga uma o le leai o se Keriso. O a latou aoaoga e le o ni aoaoga faaonaponei po o ni uluai aoaoga. Ua faamaasiasia i latou mai le tusitala o pepelo. E oo lava ia Korioa na iu lava ina tautino mai na aoaoina o ia e le tiapolo i le mea e fai atu (tagai Alema 30:53).
Pe a vavaeese e tagata taitoatasi po o faapotopotoga i latou lava mai aoaoga a le Alii, lea e oo mai e ala mai i perofeta, latou te vaavaai mo isi aoaoga e faatagaina ai i latou e ola i le ala latou te mananao ai—e aunoa ma lena tausalaga taufaavalea.
Sa faamalamalama mai e Elder Jeffrey R. Holland o le Korama a Aposetolo e Toasefululua, “O le mea e faanoanoa ai, au uo talavou e, o se amioga a lo tatou vaitaimi lea afai e mananao tagata i soo se atua, latou te mananao i ni atua e le tele ni mea e manao ai, o atua filemu, e le gata latou te le lueina le vaa ae latou te le aloina foi, o atua ia e milimiliina o tatou ulu, faaata i tatou, ona fai mai lea tatou te tamomoe e piki fugalaau lanu samasama.”5
O taiala tauaso ma valea o le a le taitai atu ai lava i tatou i le olioli ma faamanuiaga e finagalo le Alii tatou te maua. A o tatou mulimuli i perofeta, e manaomia ona tatou naunau e tutu atu mo le mea sa’o i le feagai ai ma le faatauemu ma sauaga, e tusa lava pe le lauiloa.
Ua Talo mai Perofeta ia i Tatou e O Mai i le Faaola
E ui o loo taumafai ia taiala tauaso ma tauemuga a le lalolagi e taitai ese i tatou mai le Atua ma ana faamanuiaga, ae o loo talotalo mai perofeta ia i tatou ia o mai i le Faaola. E le taumafai perofeta e faatalitonu i tatou e tapuai atu ia i latou ae talotalo mai ia i tatou e tapuai ma faalatalata atili atu i lo tatou Tama Faalelagi ma Lona Alo, o Iesu Keriso (tagai, mo se faataitaiga, Liae i le 1 Nifae 8:12).
I ni nai tausaga ua mavae, sa ma talanoa ai ma Jill ma Peresitene Russell M. Nelson. Sa ia fesili mai ia i ma’ua pe ma te naunau e talia se isi tofiga e ese mai ai. Sa matua agalelei pea Peresitene Nelson ia i tatou ma sa ia taulimaina Jill ma le alofa tele ma le faaaloalo. Ina ua uma ona ia fesili mai e uiga i lo matou naunautai, sa fai mai Jill, “Matou te faia soo se mea mo oe, Peresitene Nelson.” Sa vave ona ia tali atu, “Fai mo Ia.” Sa ofoofogia lenei mea mo i ma’ua ma Jill. Na ia aoaoina ia i ma’ua se lesona maoa’e. Sa finagalo Peresitene Nelson ia tatou maua ni faamoemoega talafeagai ma ia taulai atu o tatou mata i le mea e tatau ona faatonuina ai i latou.
Pe a taialaina i tatou e perofeta, tatou te mulimuli moni lava i le fautuaga ona o Ia—le Faaola. Ua lava Lona alofa tunoa mo i tatou taitoatasi.
Faaiuga
Ua tatou iloa le naunautai o Peresitene Nelson lava ia e mulimuli i perofeta i lona olaga atoa. Sa ia lafoaia se avanoa iloga faalegaluega ona o se taunuuga o fautuaga mai le perofeta. I le avea ai ma se fomai tipitipi pisi tele ma se aiga toatele, sa ia suesue i le faa-Saina ona sa faia e le perofeta se faamatalaga e uiga i le manaomia o tagata o le Ekalesia o e e mafai ona tautatala i le faa-Saina. Ua tatou iloa ina ua talosagaina e Peresitene Thomas S. Monson ia tagata o le Ekalesia e suesue i le Tusi a Mamona, sa maulu i totonu Peresitene Nelson. Mata e faape’i le Ekalesia po o le lalolagi pe ana faapea e naunau i tatou taitoatasi e mulimuli i le perofeta e pei ona sa i ai Peresitene Nelson?
Ou te iloa o loo i ai faamanuiaga maoae a o tatou mulimuli i le taitaiga e tuuina mai e le Alii e ala mai i Ana perofeta. Afai o mea latou te fai mai e feteenai ma faiga o i ai nei i le lalolagi, ia tatou maua le lototele e mulimuli ai, lagolago, ma puipuia. O le a le taitai atu ai i taimi uma i se folauga sololelei, ae o le a taitai atu ai pea i faamanuiaga folafolaina ma le tuputupu a’e patino.