“O Loo Matou Alolofa Pea i le Alii,” Liahona, Oke. 2023.
O Leo o le Au Paia o Aso e Gata Ai
O Loo Tatou Alolofa Pea i le Alii
O le taunuuga sa le o le mea lea sa ma faamoemoe i ai, ae sa ou iloa e le’i i’uvale a’u tatalo mo lo’u atalii.
Pe tusa ma le tolu tausaga talu ai, na maua ai lo’u atalii, o Mareko, i le kanesa. Sa fai lona taotoga te fomai tipitipi, ae sa faaauau pea ona salalau le kanesa. Sa tatalo ma anapopogi le aiga atoa mo ia i na masina uumi.
Sa ou faitau i tusitusiga paia ma i lauga eseese o konafesi i le tāua ma le moni o le mana o le faatuatua. Sa ou filifili e anapogi ma tatalo, ma le lagonaina na lava le malosi o lo’u faatuatua o le a tupu ai se vavega. O le a manuia lo’u atalii, pe o le a tafiesesa lona kanesa. Sa ou faaiuina i taimi uma a’u tatalo faatauanau i le “Ia faia Lou finagalo.”
Sa ou faitau i lauga uma e uiga i le faatuatua e mafai ona ou maua i konafesi aoao ua mavae pe faaali mai i isi anomea ua lolomiina e le Ekalesia. Sa ou maua ni lauga a Peresitene Russell M. Nelson e faapitoa lava le faamafanafanaina.
Na maliu le ma atalii i le aso 28 Iuni, 2021. Sa matou matuā faanoanoa uma ma lotonutimomoia. Sa ou lagonaina e le’i lava le malosi o lo’u faatuatua.
I se tasi aso sa ou tilotilo ai i le faavaa i tua o se lomiga o le konafesi aoao o le Liahona ma vaaia ai se ata o Peresitene Nelson o tu i le pulelaa. I lalo o le ata sa i ai se parakalafa na aumai mai se tasi o ana lauga. Sa ia fai mai e manaomia le faatuatua e auai ai i le Ekalesia, mulimuli i perofeta, auauna atu i se misiona, ola i le tulafono o le legavia, ma aoao atu le talalelei. E manaomia le faatuatua e aioi atu ai mo le olaga o se tasi e pele ia te oe ma se faatuatua e sili atu,” na ia faaopoopo mai, “e talia ai se tali faanoanoa.”1
Sa ou faitauina lena fuaiupu i le lē itiiti ifo ma le faatolu ae ou te le’i iloaina sa faatatau lea mo a’u. Na oo mai se lagona filemu ia te a’u. Sa ou iloaina sa le’i faapea e le’i aoga a ma tatalo mo lo’u atalii. Sa malosi lo’u faatuatua i se auala na silafia ma taliaina e le Alii.
Ua oo lo matou aiga i la matou vaega o le maliu, e aofia ai le maliu o lo’u toalua ma fanau a fanau e toatolu. O lo’u faatuatua i le Tama Faalelagi ma Iesu Keriso ua ta’u mai ai ia te au o lo’u atalii ua maliu o loo i ai faatasi ma lo’u toalua ma fanau a fanau. O lena malamalama ua aumaia ia te a’u le filemu. E ui lava i faigata o lo matou aiga, ae o loo matou alolofa pea i le Alii ma Lana talalelei, ma ua tuputupu a’e a matou molimau. Ou te molimau atu o Peresitene Nelson o se perofeta ma o le fautuaga na te tuuina mai e mai le Alii.