Ua Na’o Tusiga Faaeletonika
Fesili e 7 e Fai Atu ina ia Ola Tutoatasi Atili Ai i Mea Tautupe
Saunia oe lava i mea tautupe ma le faaleagaga e tausia ai oe lava ma lou aiga.
Ua aoao mai le Au Peresitene Sili, “Ua folafola mai e le Alii, ‘O lo’u faamoemoe o le faia lea o mea mo la’u au paia’ (MF&F 104:15). O lenei faaaliga o se folafolaga mai le Alii o le a Ia saunia ni faamanuiaga faaletino ma tatala faitotoa o le ola tutoatasi, o le mafai lea e i tatou ona saunia mea e manaomia o le olaga mo i tatou lava ma tagata o o tatou aiga. …
“Faamolemole ia e mautinoa o oe o se atalii po o se afafine o lo tatou Tama oi le Lagi. E alofa o Ia ia te oe ma o le a le tuulafoaia lava oe. Na te silafia oe ma ua sauni e tuuina atu ia te oe faamanuiaga faaleagaga ma faaletino o le ola tutoatasi.”1
E tele punaoa a le Ekalesia e fesoasoani ia i tatou ia avea ai ma tumau i le ola tutoatasi. O nei fesili e fitu, faatasi ai ma punavai o loo fesootai atu i lalo, e mafai ona fesoasoani ia te oe i lou ala.
1. Pe o Ou Totogiina ea se Sefuluai Faamaoni?
O le totogiina o sefuluai ma taulaga limafoai e maua ai se faavae faaleagaga e faamanatu mai ai ia i tatou o mea uma ua tatou maua e mai le Tama Faalelagi. Ua ia i tatou foi le folafolaga o le a “toina mai e le Alii pupuni o le lagi ma sasaa mai faamanuiaga silisili i luga o i latou o e totogi ma le faatuatua sefuluai ma taulaga (tagaiIsaia 58:6–12; Malaki 3:10–11).
“Afai tatou te totogi muamua a tatou sefuluai ma taulaga, o le a faamalosia la tatou tautinoga i lenei mataupu faavae taua o le talalelei ma o le a faaitiitia ai le ono faaaoga sese o mea tautupe [ma faigata tautupe].”2
2. Pe o Ou Taumafai ea e Ola i Mea ua Ou Maua?
Afai e tele atu mea o loo tatou faaaluina nai lo tupe tatou te maua i masina taitasi, e tatau ona tatou sailia ni auala e tipi ese ai ni faatauga e le taua, lea e mafai ona faalavelave ia i tatou mai mea e sili ona taua. E pei ona tautino mai e le Alii i le Mataio 6:19–21:
“Aua tou te toloai oa mo outou i le lalolagi, o i ai le mogamoga ma le ele e faaumatia ai; o i ai foi tagata gaoi e eli atu, ma gaoi ai:
“A ia outou toloai oa mo outou i le lagi, e le o i ai se mogamoga po o se ele e faaumatia ai, e le o i ai foi tagata gaoi e eli atu, ma gaoi ai:
“Aua o le mea o i ai lo outou oa, e i ai atoa foi ma o outou loto.”
Ua faasoa mai foi e leMataupu Faavae ma Feagaiga 48:4 le taua o le teuina o tupe i masina taitasi:
“E tatau ona outou teu tupe uma e mafai ona outou teuina, ma ia outou maua tupe uma e mafai ona outou maua i le amiotonu, ina ia mafai ona outou faatauina i se taimi se laueleele mo se tofi, se aai lava lea.”
E ui atonu e le manaomia ona tatou faatauina taitoatasi ni fanua e pei ona sa faia e le Au Paia anamua, ae o le i ai o tupe i teugatupe e mafai ona fesoasoani ia i tatou e saunia ai mo soo se galuega e finagalo le Alii tatou te faia.
3. Pe o Ou Fuafua ma Mulimuli i se Paketi?
O leMataupu Faavae ma Feagaiga 88:119 ua aoao mai i tatou ia “faatulaga tatau outou lava; ia saunia mea manaomia uma.” O le fuafuaina ma le tausia o se faamaumauga o a tatou mea tautupe e mafai ona fesoasoani ia i tatou e tali atu ai mo mea tatou te maua, mea tatou te faaaluina (e pei o meaai, fale, mea e faaaoga, femalagaaiga, lavalava, ma gaoioiga faafiafia lelei), ma mea tatou te teuina. O le fuafua mamao ma le “faatulagaina” o i tatou lava o le a fesoasoani ia i tatou e faamautinoa ai ua lava mea ua tatou maua mo “mea manaomia uma” i le taimi nei ma i le lumanai.
4. Pe O Lava ea A’u Tupe o Teuina mo Faalavelave Faafuasei?
O faalavelave faafuasei e lei faamoemoeina e mafai ona tulai mai i soo se taimi i lipea o le fale, faalavelave faafuasei faafomai, faalavelave faalenatura, leai se galuega, ma isi faigata tau i le tamaoaiga. O le sauniuni nei e mafai ona fesoasoani ia i tatou e aloese mai le fefe ma faigata tautupe i se taimi mulimuli ane (tagai i le Mataupu Faavae ma Feagaiga 38:30).
E atamai le i ai o se tupe faaleoleo mo le masina e tasi mo mea e tutupu faafuasei. Mafaufau i ni auala e mafai ona e faaitiitia ai tupe faaalu i masina taitasi e fausia ai lenei tupe faaleoleo. Pe fuafua foi pe o i ai se faatauga tele o loo e mafaufau i ai ae e mafai ona tolopoina pe aloese mai ai e faaleoleo ai lenei tupe. O osigataulaga laiti i le taimi nei e mafai ona aumaia le filemu ma le puipuiga i se taimi mulimuli ane ( tagai i le Alema 37:6).
5. E Mafai Faapefea ona ou Vave Totogia La’u Aitalafu?
O nisi o aitalafu i le olaga atonu e manaomia pe fuafuaina, e pei o le faatauina o se fale talafeagai po o se taavale muamua, mauaina o se aoaoga, fausiaina o talafaasolopito faifaatau, ma le sauniaina o mea taua e manaomia.3 Peitai, o aitalafu e le manaomia, e tatau ona aloese mai ai ona e tuu ai i tatou i le nofopologa (tagai i le Mataupu Faavae ma Feagaiga 19:35) ma e mafai ona lamatia ai lo tatou ola tutoatasi i taimi o faigata.
E pei ona aoao mai Peresitene J. Reuben Clark Jr. (1871–1961): “E le moe lava le [tupe] tului pe ma’i pe oti; e le alu lava i le falemai; e faigaluega i Aso Sa ma aso malolo; e le alu lava i se tafaoga. … E te oo loa i le aitalafu, avea loa tupe tului ma au soa i minute taitasi o le ao ma le po; e le mafai ona e tafia pe see ese mai ai; e le mafai ona faatea ese; e le gauai i le aioi, faamalosi, pe faatonu; ma a e faalavelave i lona ala pe tetee i ai pe le mafai ona faamalieina, o le a na faatamaia oe.”4
6. Pe o Maualalo ea La’u Galuega e Fua i O’u Tomai?
Mafaufau pe o faaaoga atoatoa e lau galuega au tomai ma taleni pe mafai foi ona e agavaa mo se isi galuega e lelei atu le totogi ma penefiti mo oe ma lou aiga. Faaauau pea ona maua nisi tomai e ala i le aoaoina i le olaga atoa ma tusi faamaonia (tagai i le Mataupu Faavae ma Feagaiga 88:119). O le faia o lena mea e mafai ona fesoasoani ia te oe e faateleina ai ou totogi a o e alualu i luma i lau galuega po o galuega. Talanoa ma ou taitai i le lotoifale e uiga i punaoa ua ofoina mai e le Ekalesia e fesoasoani ia te oe i lau sailiga galuega, e pei o employment.ChurchofJesusChrist.org.
Ia manatua foi le mea na aoao mai e Peresitene Russell M. Nelson: “E leai se auala ‘alo i le tulaga silisili ma agavaa. O le aoaoga o le eseesega lea i le va o lemoomoomaimau pe ana mafai ona e fesoasoani atu i isi tagata ma lemafai onae fesoasoani atu ia i latou.”5
O a ni auala o le a faamanuiaina ai oe ma isi ona o le saunia mo ma le faafaigaluegaina e fetaui lelei mo ou tomai?
7. O O’u Faaaogaina Ea Punaoa o Loo Avanoa ia te A’u?
O le a tatou oo uma i taimi i o tatou olaga o le a manaomia ai ona tatou fesili atu mo se fesoasoani mai isi, pe saili atu i faamatalaga mai tagata tomai faapitoa po o le mauaina o se fesoasoani le tumau mo mea tautupe. O le iloaina o le taimi ma pe faapefea ona fesili atu mo se fesoasoani o se vaega o le ola tutoatasi. E ala i polokalama ma anomea a le Ekalesia ma e ala i tagata atamamai i le lotoifale, ua tuuina mai ai e le Alii ia i tatou le tele o punaoa (e aofia ai punaoa o loo i lalo) e fesoasoani ia i tatou ia ola tutoatasi i mea tautupe. Faatasi ai ma le galue malosi, ositaulaga, suesue, faalagolago i le Alii, ma le fefautuaai faatasi, e mafai ai ona tatou faia ni laa maoae i le ola tutoatasi. Ma afai e manaomia, pe a tatou faia le mea sili tatou te mafaia e faaaoga ai a tatou punaoa o loo avanoa, ia manatua e mafai foi e taitai o le uarota ona tuuina atu le fesoasoani tautupe; a uma ona “faia taumafaiga uma, e le tatau ona i ai se maasiasi”6 i le sailia o lena fesoasoani.