Mai le Gase i le Faamoemoe

Saunia e Xóchitl Bott Rivera, Mekasini a le Ekalesia

Sa fesoasoani mai le Atua ia te au ia ou iloa auala e mafai ona ou faaaogaina ai lou tofotofoga e fesoasoani ai i isi ua i ai lea lava puapuaga e tasi.

Ata

tamaitai talavou matua

O se āuga masani e lagona e tagata pe a tauivi ma le atuatuvale ma isi faaletonu o le soifua maloloina faalemafaufau o se gase i le Agaga Paia. E masani ona latou tauivi ina ia lagonaina lena lagona malamalama, ma le mafanafana i totonu.

I le avea ai ma se tasi e i ai ni faaletonu matuiā o le faanoanoa ma le lē fiafia tele, sa ou feagai ai ma lenei mea moni mo le tele o tausaga. Ou te le’i iloa pe faape’ī pe a lagona le Agaga. Ina ua faasolo leaga tele o’u āuga i le taimi o le kolisi, sa i’u ina ou i ai i le falemai mo se vaiaso.

I na taimi pogisa i lo’u mafaufau, sa ou mafaufau ai pe faapefea ona fesoasoani nei gasegase ia te a’u i se taimi umi. E faapefea ona faaaoga e le Atua lenei aafiaga faigata mo lo’u lelei? O le a le faamoemoega na ia te Ia mo a’u i le tuuina mai o lenei tofotofoga?

Sa ou talosagaina ni faamanuiaga faaleperisitua i lea taimi, ma sa i ai lava se fuaiupu se tasi sa ou faalogo soo i ai: “Ua tuuina mai e le Atua ia te oe punaoa e faatoilalo ai lenei tofotofoga.” O le i ai o le faatuatua o le a Ia taitai atu au i mea sa ou manaomia ina ia faamaloloina, sa ou filifili ai e talitonuina a’u fomai. I sina mea itiiti i lea taimi ma lea taimi, sa ou maua ai le fesoasoani sa ou manaomia. I le āluga o taimi, sa ou faasoa atu la’u malaga o le soifua maloloina faalemafaufau i luga o le initoneti.

E le’i leva, ae amata ona ou mauaina ni feau mai a’u uo alii, ma fesili mai e uiga i lo’u soifua maloloina faalemafaufau ma faasoa mai o latou manatu ma lagona faapena. Sa latou fesili mai ia te a’u mo se fesoasoani ia iloa pe faapefea ona tau ma lo latou gase. I le taimi muamua, sa ou ofo.

I le tele o aganuu, ua faamoemoeina alii ia foliga malolosi i taimi uma ma ia lē faaalia lava o latou lagona. O lena mea e faigata ai ia i latou ona tautino atu latou te manaomia le fesoasoani, ma e masani ona latou pagatia lē leoa.

Ina ua tupu lenei mea mo le taimi lona tolu, sa ou iloaina o o’u tofotofoga na saunia ai a’u e fesoasoani atu. O na taimi pogisa uma, o na togafitiga uma, o a’u tatalo uma, ma au taumafaiga uma e faatino le faatuatua a o o’u saili atu i le fesoasoaniga faalelagi na aoaoina ai au ia ou iloa le taimi e feagai ai isi ma tofotofoga faapena ma le auala e faasino atu ai i latou i le fesoasoani.

Na ou aoaoina le moni o nei upu mai ia Elder Jeffrey R. Holland o le Korama a Aposetolo e Toasefululua: “Afai e afaina lou pitogaau, o le a faamoemoeina oe e le Atua e te saili atu i se faamanuiaga faaleperisitua ma ia maua se togafitiga sili faafomai. E faapena foi i faaletonu faalelagona. Ua faamoemoeina i tatou e lo latou Tama i le Lagi ia faaaoga ia meaalofa ofoofogia uma ua Ia saunia i lenei tisipenisione mamalu.”¹