“Pe Mafai Ona Avea A’u ma Se Tasi o le Au Filifilia a le Atua?,” Liahona, Oke. 2023.
Autalavou Matutua
Pe Mafai Ona Avea A’u ma Se Tasi o le Au Filifilia a le Atua?
A o tuputupu a’e, sa ou talitonu sa i ai i le Atua se lisi o tamaiti e fiafia i ai, ma ou te le’i talitonu sa ou i ai i lena lisi.
Ata pue na faaali e tagata faataitai
O filifilia oe?
I le tuputupu a’e, sa lē o a’u o se tagata lotu tele. Sa ou iloaina mea faavae o le faaKerisiano, ae sa tele atu a’u fesili nai lo le faatuatua ma ou te le’i mafaufau tele i ai. Ae sa ou faalogo lava i taimi uma i le tamaitai o lo’u aiga e tuuto, ma toaga i le lotu o fai faafia le Mataio 22:14:
“Aua e toatele e ua tala’iina, ae toaitiiti e ua filifilia.”
“Filifilia mo le a?” Sa ou mafaufau ai.
Ou te le’i malamalama lava i le uiga moni o lenei fuaiupu, ma ou te le’i faalavelave lava e fesili atu ia te ia. Sa amata ona ou mafaufau i lenei fuaiupu o le mau o lona uiga e tatau i le Atua ona i ai se lisi o Ana fanau e fiafia i ai o e o le a faatumuina nofoa o le lagi—e toalaiti na Ia filifilia.
Ou te le’i talitonu o a’u o se tasi o nā tagata e sili ona Ia fiafia i ai.
O le faasolo ina ou matua ma le tele o lo’u tilotilo solo i le ala na ola ai isi, sa foliga mai e tusa lava po o a mea sa ou faia i lo’u olaga, pe o mea lelei po o mea leaga, o le a ou lē tāua pe afai e le o a’u o se tasi o Ana “filifilia.”
Ou te le’i iloa pe na faapefea ona ausia lena tulaga!
O le iloaina o lenei mea, sa amata ai ona ou talitonu o le a lē tele lava so’u aoga i fofoga o le Atua. O le a ou lē mauaina Ana faamanuiaga po o folafolaga auā ou te le’i fanau mai o se e sili ona fiafia i ai.
Faitaulia o se Tasi o Ana Filifilia
O nei mafaufauga sa masani ona faatumulia ai a’u i le atuatuvale. Sa ou matua’i manao lava e aoao atili e faatatau i le uiga o le avea ma se tasi o tagata filifilia o le Atua ma le mea na manaomia e maua ai Ana faamanuiaga.
I se tasi aso, sa ou matamata ai i faasalalauga faa-agafesootai ae ou tau ai i se faasalalauga mo le Sau, Mulimuli Mai ia te A’u. Ina ua ou kiliki i luga o le faasalalauga, sa ou maua se auala e fesootai ai ma faifeautalai O Le Ekalesia a Iesu Keriso o le Au Paia o Aso e Gata Ai. O lo’u naunau e saili tali ma le faamoemoe mo lo’u olaga na taitai atu ai a’u ou te ioe e feiloai ma i latou.
E ala ia latou lesona ma le tele o tatalo, sa ou aoaoina ai le tele o mea e uiga i le talalelei a Iesu Keriso, o lo’u faamoemoega i le olaga, ma, o le mea aupito tāua, o le alofa atoatoa o le Tama Faalelagi mo a’u—o Lona atalii/afafine paia.
Sa ou papatiso ma lagonaina le tele o le olioli ma le malamalama na masaa mai i lo’u olaga. Ae ou te le’i lagonaina lava le faamautinoaga sa ou moomoo i ai. O o’u mafaufauga popole a o le’i auai i le Ekalesia sa faaitiitia, ae ou te le’i iloa lava pe o a’u o se tasi o nai tagata toalaiti filifilia o le Atua o le a mauaina mea uma ua ia te Ia. Sa ou lē mautinoa po o le a se isi mea e mafai ona ou faia e avea ai ma se tasi o na tagata faapitoa.
Na suia na mea uma i ni nai masina mulimuli ane a o o’u matamata i le konafesi aoao. Sa ou faamoemoe o le a ou maua ni tali i fesili o loo lagonaina pea le lē mautonu ina ua amata ona saunoa Elder David A. Bednar o le Korama a Aposetolo e Toasefululua. Sa ou te’i ina ua ou faalogo o ia ta’ua le fuaiupu lava lea e tasi lea na tuua ai a’u ma le lē mautonu i le āluga o lo’u olaga.
Sa faafuasei ona taia a’u i le faamoemoe.
Sa faamalamalama mai e Elder Bednar e faapea “O le [Tama Faalelagi] e le faatapulaaina ‘e ua filifilia’ i ni nai tagata toalaiti. Nai lo lena, o o tatou loto, o o tatou manaoga, o lo tatou faamamaluina o feagaiga ma sauniga paia o le talalelei, o lo tatou usiusitai i poloaiga, ma, o le mea e sili ona tāua, o le alofatunoa togiola o le Faaola e filima’oti ai pe faitaulia i tatou o se tasi e filifilia e le Atua.”24
Ma i lena taimi, sa ou iloa ai— ua filifilia a’u.
O upu a Elder Bednar na ou maua ai se lagona loloto o le lotofaafetai lea na lofituina ai a’u. Sa ou lagonaina le sili atu o le faamanuiaina nai lo se isi lava taimi muamua i le mauaina O Le Ekalesia a Iesu Keriso o le Au Paia o Aso e Gata Ai.
Filifilia Foi o Ia
E lē o i ai i le Atua nisi e fiafia faapitoa i ai—E alofa o Ia i Ana fanau uma i le alofa atoatoa—ae o le filifilia o lona uiga tatou te filifilia foi o Ia.
Ua filifilia i tatou ona ua tatou filifili e faamuamua o Ia i o tatou olaga nai lo isi mea uma.
Sa musuia a’u e Elder Bednar ia tumau faamaoni i luga o le ala o feagaiga a o o’u tumau e oo i le iuga. Sa musuia foi a’u e le sāvali a Peresitene Russell M. Nelson e faamuamua lo’u sootaga ma le Tama Faalelagi ma taumafai e lafoai ma faatoilalo le lalolagi2 ina ia mafai ai ona ou toe foi atu ia te Ia!
Ou te molimau atu e tusa lava po o le a lou talaaga, po o a lava au agasala, e tusa lava po o a ou lē atoatoa po o le masalosalo ia te oe lava, ona o Iesu Keriso e mafai ai ona avea i tatou uma ma e “filifilia” a le Atua. E mafai ona tatou toe mau faatasi ma lo tatou Tama Faalelagi ma maua “mea uma ua ia te Ia” (Mataupu Faavae ma Feagaiga 84:38). Afai tatou te o mai ia Keriso, osia ma tausia feagaiga, talia le atoatoaga o Lana talalelei, ma taumafai ia avea e faapei o Ia, o le avea ma se tasi o Ana filifilia e avea o se mea moni. O se meaalofa matagofie lena mai lo tatou Tama Faalelagi alofa.