O Le Molimau Mautinoa a Perofeta o Aso Nei

Saunia e Peresitene Dallin H. Oaks

Fesoasoani Muamua i le Au Peresitene Sili

O le pule o le perisitua e oo mai e ala i le na o le faauuina e faatagaina e le Alii o Iesu Keriso, o lē o loo taitaia Lana Ekalesia toefuataiina i aso nei.

Peresitene ma Sister Nelson i le fonotaga a faifeautalai — O Peresitene Russell M. Nelson ma lona faletua, o Wendy, i se faapotopotoga o faifeautalai i Aukilani, Niu Sila, Me 2019. E pei ona aoao mai Peresitene Nelson, e pulea e le Faaola Lana Ekalesia e ala i “galuega filemu o se fuafuaga paia o le faasologa.”

Sa tusia e le Aposetolo o Paulo o le Ekalesia a Iesu Keriso o loo “atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea” (Efeso 2:20). Sa ou oo i se faaaogaina o lena mataupu faavae autu o le talalelei toefuataiina i le tele o tausaga ua mavae.

Sa aumai e se tagata o le Ekalesia lona tuaoi i lo’u ofisa. O le tane a le tuaoi o se faifeau Porotesano i se faapotopotoga toatele. Mo le tele o tausaga, sa auauna atu ai lenei ulugalii i le Alii ma le filiga tele i le latou tapuaiga faa-Kerisiano. Sa ia papatisoina le toatele o tagata i lena ekalesia.

I le taimi nei, e ala i faatosinaga a ona tuaoi o le Au Paia o Aso e Gata Ai, sa ia faitauina ai le Tusi a Mamona ma sa liliu ai i le Ekalesia a Iesu Keriso o le Au Paia o Aso e Gata Ai. Sa saunia o ia e faamavae mai lana galuega ma auai i le Ekalesia toefuataiina. Ae muamua, sa la manaomia ma lona toalua se tali i le la fesili e faatatau i le pule o le perisitua. I le faamanatu mai ai ia te a’u sa papatisoina e lona toalua le toatele o tagata, sa fesili atu ai lona toalua, “O e ta’u mai ea ia te a’u e leai se pule a lo’u toalua e papatiso ai tagata uma na ia papatisoina?”

Sa uunaia e le Agaga la’u tali, e pei ona o le a i ai i nei tulaga.

“Leai,” na ou fai atu ai. “Ou te mautinoa na i ai i lou toalua le pule e papatiso ai tagata uma na ia papatisoina. Sa ia te ia le pule uma e mafai e lana ekalesia ona avatu ia te ia. E mafai ona ia faatinoina faaipoipoga. E mafai ona ia faia tagata ma sui auai o le faapotopotoga. Sa mafai ona ia faafaigaluegaina se konekarate e tuu ai se taualuga fou i luga o lau lotu. Ae e le o le ituaiga pule lena o loo tatou talanoaina. O le pule i lau fesili o le pule lea na tuu atu e Iesu ia Peteru, o soo se mea na te faia i le lalolagi o le a faamamaluina i le lagi (tagai Mataio 16:19). Ma talu ai o lena pule paia e tatau ona saili atu i Aposetolo, o lea ua na o O Le Ekalesia a Iesu Keriso o le Au Paia o Aso e Gata Ai o loo i ai.”

O Ki o le Perisitua

E lē maua le pule o le perisitua e ala i se kosi suesue po o se tikeri mai se seminare. O tusitusiga paia e mafai ona aoaoina, faateleina le molimau i le Faaola o Iesu Keriso, ma e oo lava i le faatupuina o manaoga e auauna atu i le Atua, ae e lē faaee atu ai le pule. E lē oo mai foi le pule o le perisitua e ala i musumusuga po o faamoemoega. O le pule o le perisitua e oo mai i le na o le faaeega. Ua faamanino mai e le Tusi Paia lenei mea.

I le taimi o Lana galuega i le lalolagi, sa ta’u atu ai e le Faaola o Iesu Keriso i Aposetolo e Toasefululua, “Ua le filifilia a’u e outou, a ua filifilia outou e a’u, ma faauuina outou, ina ia outou o atu ma fua mai ni fua” (Ioane15:16). Na aoao mai le Aposetolo o Paulo, “E le fai fua foi e se tasi lenei faiva mamalu [o le perisitua], tau o lē na filifilia e le Atua, e faapei o Arona foi’ (Eperu 5:4).

E i ai ni mea patino e mulimuli mai i le mea moni e faapea o le pule e na o le filifilia ma le faauuina e le Atua e maua ai. Muamua o le tāua o “ki” na tuu atu e Iesu ia Peteru i lena sauniga paia (tagai Mataio 16:19). “O ki o le perisitua o le pule lea e taitai ai le faaaogaina o le perisitua e fai ma sui o fanau a le Atua.”¹

E pei ona faaalia e le Faaola i le tuuina atu o ki ia Peteru, e tuuina atu ki o le perisitua i Ana Aposetolo. O na ki, ia na leiloloa i le maliliu ai o uluai Aposetolo, sa tatau ona toefuatai ina ia mafai ai ona faaee atu le pule o le perisitua ma faaaoga i le Ekalesia toefuataiina. Sa faia lenei mea ina ua o mai avefeau faalelagi, sa galulue i lalo o le taitaiga a Iesu Keriso, e toefuatai mai le Ekalesia a Iesu Keriso. Sa latou faia lenei mea e ala i le faatonuina ma le faauuina o le Perofeta o Iosefa Samita ma tuuina atu ia te ia ki e tatau ai o le perisitua. O na ki e lē maua lea i fafo atu O Le Ekalesia a Iesu Keriso o le Au Paia o Aso e Gata Ai.

I lenei ala, O Le Ekalesia a Iesu Keriso o le Au Paia o Aso e Gata Ai—o le Ekalesia toefuataiina—ua i ai le pule e faatino ai galuega uma ma sauniga na faatinoina i tisipenisione ua mavae o le talalelei ma ia “fusifusia [iloaina] i le lagi” (Mataio 16:19; Mataupu Faavae ma Feagaiga 128:8). O nei sauniga tāua o le faaolataga ma le faaeaga e aofia ai le papatisoga, faaeeina mai o le Agaga Paia, faaeega paia o le malumalu, ma le faaipoipoga mo le faavavau. O nei mea uma, mo e o soifua ma e ua maliliu, ua mafai ai ona tatou toe foi atu i le Atua le Tama ma le Alo, faatasi ai ma le faaauauina o sootaga faaleaiga e faavavau.

E ala mai i Ana aoaoga ma Lana Togiola, o le Alii o Iesu Keriso o le maatulimanu autu lea i nei mea uma, ma o Lana galuega e faagasolo e ala mai i Ana aposetolo ma perofeta.

Na aoao mai le Perofeta o Iosefa Samita, “O mataupu faavae autu o lo tatou talitonuga o molimau a le au Aposetolo ma Perofeta, e faatatau ia Iesu Keriso, na maliu o Ia, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai.”²

O lenei ata i le 1984 (lalo) o le Korama a Aposetolo e Toasefululua o loo faaalia ai Peresitene e toafa o le lumanai o le Ekalesia. O se Aposetolo lona lima, o Gordon B. Hinckley, sa auauna atu i le Au Peresitene Sili i lena taimi. E ala i auaunaga ma le poto masani, ua saunia ai Aposetolo taitasi mo tiutetauave i le lumanai, e aofia ai, mo nisi, i le avea ai ma Peresitene o le Ekalesia.

Molimau Faapitoa

O Aposetolo e Toasefululua ua valaauina o ni “molimau faapitoa o le suafa o Keriso i le lalolagi atoa” (Mataupu Faavae ma Feagaiga 107:23). E i ai sa latou molimau tulaga ese ia Iesu Keriso. Latou te molimau mai i Lona moni, Lona paia, Lana misiona ma le Togiola, Lona Toetu, Lana perisitua paia, ma lo tatou gafatia mo le ola e faavavau. E lagolagoina Aposetolo i lenei mea e isi ua valaauina e faaaoga “le agaga o valoaga” (Faaaliga 19:10).

I se lalolagi e masalosalo i le paia o le Faaola, ou te molimau atu ai faatasi ma lo’u Usoga i le Au Peresitene Sili ma le Korama a Aposetolo e Toasefululua i Lana misiona paia ma le Togiola. Matou te molimau atu “o ia o le Toatasi na Fanaua e le Tama” (Mataupu Faavae ma Feagaiga 76:23). Matou te molimau atu o Ia “ua i ai … se tino o aano ma ivi e mafai ona paʼi i ai e pei o le tagata” (Mataupu Faavae ma Feagaiga 130:22). Matou te molimau atu ona o Lona Toetu, o le a toetutu ai foi fanau uma a le Atua (tagai 1 Korinito 15:21–22; 2 Nifae 9:6, 22; Mamona 9:13; Mataupu Faavae ma Feagaiga 29:26). Matou te molimau atu e fetalai mai o Ia i Ana auauna i o tatou aso (tagai Mataupu Faavae ma Feagaiga 1:38). Matou te molimau atu “e leai lava se isi igoa i lalo o le lagi ua foaiina mai i tagata e mafai ona faaolaina ai i tatou” (Galuega 4:12; tagai foi i le Mosaea 3:17; Mose 6:52).

Matou te faasoa atu a matou molimau—ma aoaoga a lo tatou Faaola—ma le alofa. Na tautino mai e Peresitene Russell M. Nelson:

“O [Ana] tulafono e uunaia atoatoa lava e Lona alofa lē mafuatia mo i tatou ma Lona finagalo ia tatou avea uma ma tagata e mafai ona tatou avea ai.

“… O le Alii o Iesu Keriso, o lē o lana Ekalesia lenei, ua tofia perofeta ma aposetolo e fesootai mai Lona alofa ma aoao atu Ana tulafono.”³

Na aoao mai foi Peresitene Nelson: “Atonu e te le malamalama i taimi uma i tautinoga uma a se perofeta soifua. Ae afai e te iloaina o se perofeta o se perofeta, e mafai ona e tatalo atu i le Alii i le lotomaualalo ma le faatuatua ma ole atu mo sa oe lava molimau e uiga i soo se mea ua folafola mai e Lana perofeta.”⁴

O nei mea uma e faataunuuina e ala i le Ekalesia a le Alii, e taitaia e le auaunaga faaperofeta a Ana Aposetolo. I le aso na fofogaina mai ai lana taitaiga o le Ekalesia, sa tuuina mai ai e Peresitene Nelson lenei faamalamalamaga tāua o le mea sa ia ta’ua “o le ala mamalu lea e pulea ai e le Alii Lana Ekalesia”:

“A tuumalo se Peresitene o le Ekalesia, e leai se tulaga faalilolilo po o ai o le a sosoo e valaauina e auauna atu i lena tofiga. E leai ni palota, leai ni faatosinaga, ae ua na’o galuega filemu o se fuafuaga paia o le faasologa, ua faatulagaina e le Alii Lava Ia.

“O aso taitasi o le auaunaga a se Aposetolo o se aso lea o le aoaoina ma le sauinuni mo nisi tiutetauave i le lumanai. E manaomia ai le tele o tausaga o le auaunaga mo se Aposetolo e siitia ai mai le nofoa laitiiti i le nofoa sinia i le li’o. I lena taimi, na ia maua ai se aafiaga patino i vaega taitasi o le galuega a le Ekalesia. Na amata foi ona ia masani lelei i tagata o le lalolagi, e aofia ai ma o latou talafaasolopito, aganuu, ma gagana a o aveesea soo atu o ia e ala i tofiga i salafa eseese o le kelope. O lenei faiga o le faagasologa i le taitaiga o le Ekalesia e tulagaese. Ou te le iloa lava se isi mea faapenei. E le tatau ona tatou tete’i ai i lena mea, ona o le Ekalesia lenei a le Alii. E le galue o Ia e tusa ma auala a tagata.”⁵

Ou te molimau atu i lena faagasologa paia, lea e taitaia ai e le Alii Lana Ekalesia i aso nei.