“O Le A le Sootaga i le va o le Muaitofia ma le Faitalia?,” Liahona, Oke. 2023.
Sau, Mulimuli Mai ia te A’u
O Le A le sootaga i le va o le Muaitofia ma le Faitalia?
I le muai olaga, sa muaitofia ai le Faaola ma isi taitai i a latou misiona i le lalolagi.
Ata na tusia e Jim Madsen
Sa ta’u atu e Paulo i Efeso sa filifilia i latou e le Atua e avea ma Ona nuu, “e pei ona ia filifilia i tatou ia te ia a o lei faavaeina le lalolagi” (Efeso 1:4). I le muai olaga, na filifilia ai e le Atua, pe muaitofia, tagata e faataunuu ni misiona patino i o latou olaga. Pe o lona uiga ea o o tatou olaga e lē afaina i a tatou filifiliga?
O Le Matafaioi o le Muaitofia
Sa muaitofia perofeta ma le Faaola ae latou te lei fananau mai (tagai Ieremia 1:5; Faaaliga 13:8; 1 Nifae 10:7–8; Aperaamo 3:22–23), ma “o le aoaoga faavae o le muaitofia e faatatau i tagata uma o le Ekalesia.”1 Ae e lē faapea ai la ua faamaoniaina ni faamanuiaga ia i tatou. I le isi itu, ua folafola mai ia i tatou ni faamanuiaga faapitoa e tusa ai ma lo tatou faatuatua i le Atua ma le usiusitai i Ana poloaiga.
O Le Matafaioi o le Faitalia
Ua tuuina mai e le Atua ia i tatou le faitalia, “o le tomai ma le avanoa ua tuuina mai e le Atua ia i tatou e filifili ma galulue ai mo i tatou lava.”2 E silafia e le Atua o tatou gafatia ma silafia taunuuga o a tatou amioga. Ae e pule i tatou e filifili le ala o le avea ma soo lea e taitai atu ai i tatou e toe foi atu ia te Ia.
“O le muaitofia e lē faapea ua mautinoa ai o ia tagata o le a maua ni valaauga po o ni tiutetauave faapitoa. O nei avanoa e oo mai i lenei olaga o se taunuuga o le faaaogaina ma le amiotonu o le faitalia, e faapei foi ona oo mai le muaitofia o se taunuuga o le amiotonu i le muai olaga.”3