“O Le Faatulagaga o le Ekalesia a Iesu Keriso,” Liahona, Oke. 2023.
O Mataupu Faavae Autu o le Talalelei
O Le Faatulagaga o le Ekalesia a Iesu Keriso
O Le Alii o Iesu Keriso, saunia e Del Parson
O Iesu Keriso o le Ao O Le Ekalesia a Iesu Keriso o le Au Paia o Aso e Gata Ai. Na te musuia perofeta ma aposetolo e taitai le Ekalesia i aso nei, e pei ona Sa Ia faia i taimi o le Feagaiga Fou. E lagolagoina i latou e isi taitai o le Ekalesia.
O Le Ekalesia a Iesu Keriso o le Au Paia o Aso e Gata Ai o le Ekalesia a le Faaola. “O loo ua atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea” (Efeso 2:20). O lona uiga o Ia o le vaega aupito sili ona tāua o le faavae. Na te taialaina le Ekalesia e ala i perofeta ma aposetolo ua Ia filifilia e avea ma taitai.
O Le Au Peresitene Sili
O le Peresitene o le Ekalesia o le perofeta a le Atua i le lalolagi i aso nei. O ia o le Aposetolo sinia ma ua na o le pau lea o le tagata i le lalolagi e mauaina faaaliga e taitaiina ai le Ekalesia atoa. Ua musuia o ia e le Alii ia iloa po o ai Aposetolo e toalua e valaau e auauna atu o ni ona fesoasoani. Latou te faatuina le Au Peresitene Sili. O le toatolu uma o perofeta, tagatavaai, ma talifaaaliga.
Korama a Aposetolo e Toasefululua.
O sui auai o le Korama a Aposetolo e Toasefululua o ni perofeta foi, tagatavaai, ma talifaaaliga. Ua valaauina i latou e avea ma molimau faapitoa o Iesu Keriso. Latou te malaga i le lalolagi atoa e aoao atu ma molimau atu e uiga ia te Ia. (Tagai i le Mataupu Faavae ma Feagaiga 107:23, 33.)
Korama a Fitugafulu
Ua valaauina foi uso o le Au Fitugafulu e avea ma molimau a Iesu Keriso (tagai i le Mataupu Faavae ma Feagaiga 107:25). Latou te fesoasoani i le Korama a le Toasefululua e aoao atu le talalelei ma atinae le Ekalesia i le lalolagi atoa.
Ata na pueina e Machiko Horii
O Taitai i le Lotoifale
O la outou au peresitene o le siteki po o le itu, au epikopo po o le au peresitene o le paranesi, ma au peresitene o le korama a toeaina ma le Aualofa ua valaauina foi e le Atua. E mafai ona latou fesoasoani ia te oe e aoao ma ola i le talalelei. E mafai ona e aoao e uiga i nisi o nei valaauga i le tusiga o Aoaoga Faavae o le Talalelei ia Mati 2022, “Auauna Atu i Valaauga o le Ekalesia.”