Faafetai mo Perofeta ma Aposetolo Soifua

Faatasi ai ma le maliliu ai o Aposetolo a le Alii ma le amataga o le Liliuese Tele, sa tifato ai le lalolagi i se vaitau o le pogisa faaleagaga. Ona oo lea, i le tele o seneturi a o lumanai le taimi o Iosefa Samita, na amata ai e le Alii ona faataatia le galuega o le eleele mo le Toefuataiga o le atoatoaga o le talalelei.

O le gaosiga o le falelomitusi, o le Toefanauina Faaleaganuu, o le Toefaatulagaina, o le mauaina e le au Europa o Amerika, ma isi mea faapena o sauniuniga uma mo le mea o le a tupu i le Vao Paia “o le taeao o se aso matagofie lava ma le manino, i le amataga lava o le tautotogo o le afe valu selau luasefulu” (Joseph Smith—Talafaasolopito 1:14). O lena taeao o le tautotogo, sa toe i ai se perofeta a le Atua i le lalolagi, ma o le vaitau o le pogisa faaleagaga sa iu lava ina mae’a!

I le Liahona, o lenei masina, ua aoao mai ai i tatou e Peresitene Dallin H. Oaks, Fesoasoani Muamua i le Au Peresitene Sili, e uiga i le matafaioi taua a perofeta ma aposetolo o aso nei, o a latou ki o le perisitua ma le pule, ma la latou matafaioi o ni molimau faapitoa o le suafa o Iesu Keriso (itulau e 4).

O se elemene autu o la latou molimau o le uiga paia ma uiga faaalia o le Faaola, ma ua latou toe faaleo Lana valaaulia ia avea “e pei lava o a’u nei” (3 Nifae 27:27).

I le itulau e 10, ou te faasoa atu ai ni malamalamaaga i le auala e mafai ai e i tatou taitoatasi ona “faia e lē aunoa le amiomama” (Mataupu Faavae ma Feagaiga 46:33) i a tatou taumafaiga ia avea atili e faapei o Iesu Keriso.

E maeu lo’u faafetai mo perofeta ma aposetolo soifua—o molimau faapitoa a Iesu Keriso!

Elder Lynn G. Robbins

Fitugafulu o le Pulega Aoao ua Malolo Faamamaluina