Ua Na’o Tusiga Faaeletonika: Autalavou Matutua
Konafesi Aoao: O La Tatou Manai i Ona Po Nei
E ala mai i perofeta ma aposetolo o aso nei, ua tuuina mai ai e le Atua ia i tatou se auala e saili ai meaai faaleagaga tatou te sailia.
Pe o se togavao o le vevela ma le oneone po o se liliuese o le fenumiai ma le masalosalo, sa i ai se matelaina ina ua mavae le Malaga i Aikupito ma se matelaina ina ua mavae le maliu o Iesu Keriso.
O le tasi matelaina sa faaletino, o le isi, faaleagaga.
Ina ia faamalieina manaoga faaletino o Lana fanau, na auina mai ai e le Atua le manai. Ia i latou na mulimuli i le liliuese tele, sa Ia auina atu se faatusa faaleagaga o lenei tausiga: o le afioga a le Atua na tuuina mai e ala mai i se perofeta soifua e taitai i tatou i le manai, o Iesu Keriso.
E pei lava ona sa aoaoina Isaraelu ia faamoemoe i le manai faaletino, e mafai foi ona tatou faamoemoe i le manai faaleagaga i aso nei.
O Lo Tatou Manai Faaleagaga mai le Atua
A o feoa’i Isaraelu i le vao, o i latou sa i ai i le taimi o le liliuese tele sa feofeoa’i “mai lea sami i lea sami, ma mai matu e oo atu i sasae … e saili le afioga a le Alii, ma [sa] le mauaina” (Amosa 8:12).
O lenei feofeoa’i na iu ina taitai atu ai ia Iesu Keriso i le toefuataiina mai o Lana talalelei e ala i le Perofeta o Iosefa Samita.
E pei lava ona faaalia mai e le Alii le mea o le a maua ai e le nuu o Isaraelu lo latou manai faaletino, ua Ia faaali mai foi ia i tatou le mea e mafai ona tatou maua ai meaai moni faaleagaga: mai tusitusiga paia ma upu a o tatou perofeta o aso nei o e aoaoina i tatou i le manai moni—o Iesu Keriso, o le Areto o le Ola—ma Lana talalelei ma upumoni toefuataiina.
E le manaomia ona tatou feofeoai i le sailiga o le upumoni, aua ua tuuina mai ia i tatou se folafolaga e faapea “ le faia lava se mea e le Alii le Atua, a e faaalia lona finagalo i ana auauna o perofeta” (Amosa 3:7).
Na aoao mai Peresitene Russell M. Nelson, “E matua sili ona vaivai le saili o le fiafia i nofoaga e lē mafai ona e maua ai!”1 O le fautuaga a le Alii, na aoao mai e perofeta ma aposetolo i tusitusiga paia ma i konafesi aoao, o le a aumaia ia i tatou le olioli tumau ma le tausiga moni. E pei lava ona semanu e vaivai le fanauga a Isaraelu ma lē fiafia i le taumafai e sue ni meaai e ola ai, o le a faapea foi ona tatou vaivai ma le fiafia pe afai tatou te tamomoe atu i isi punavai e saili ai le upumoni.
Mauaina o le Manai e ala i le Usiusitai
E pei lava ona tatau ai ia Isaraelu ona usitai i le Atua ina ia fafagaina ai faaletino, e manaomia foi ona tatou mulimuli ia te Ia ina ia fafagaina ai faaleagaga.
“Ona fetalai mai lea o le Atua ia Mose, Faauta, ou te faatotoina ifo le mea e ai mai le lagi ma outou; e o atu foi le nuu ma latou faaputuina, o le aso ma ana mea e tusa ai ina ia ou tofotofo ai ia te i latoupe latou te savavali ai i la’u tulafono, pe leai” (Esoto 16:4; faaopoopo le faamamafa).
Sa faaaoga e le Alii le manai o se avanoa e iloa ai pe o le a usiusitai Isaraelu i Ana poloaiga uma. E faapena foi, o le konafesi aoao o se avanoa mo i tatou e faamaonia ai lo tatou usiusitai ia te Ia e ala i lo tatou naunau e faalogo ma usitai i Ana perofeta. Ma e pei lava ona le mafai e Isaraelu ona piki ma filifili po o a mea e usitaia ma mea e le amanaia ma faamoemoe pea i faamanuiaga folafolaina, e faapena foi i tatou.
Sa vave ona iloa e le nuu o Isaraelu o le manai o le a lagolagoina i latou pe afai latou te aoina mai e tusa ai ma faatonuga a le Atua—e tatau ona faapotopotoina i aso taitasi. Ua tatou aoao foi o le faalogo i auauna filifilia a le Atua o le a lagolagoina ai faaleagaga i tatou a o tatou uai atu i mea ua aoaoina. O le manai o afioga a Iesu Keriso na tuuina mai i le taimi o le konafesi aoao e le na o le tasi le faaiuga o le vaiaso e faaaoga ai. A o faaauau pea ona tatou toe asiasia lauga o le konafesi, ua aofia ai a latou upumoni taua i a tatou suesuega i aso taitasi, o le a tatou iloa ai o loo faaauau pea ona fafagaina i tatou.
O Le Manai Moni Tatou te Sailia
Sa iloa e le fanauga a Isaraelu o lenei manai faavavega na sau mai le Atua. Ma e mafai ona tatou iloa ma le mautinoa o savali o konafesi aoao e sau mai le Atua a o tatou o atu ia te Ia i le tatalo ma valaaulia le Agaga i o tatou olaga i aso taitasi. Na aoao mai Moronae “O le mana foi o le Agaga Paia tou te iloa ai le tonu i mea uma lava” (Moronae 10:5).
E mafai ona tatou iloa lenei mea ona o mea o loo aoao mai e perofeta ma aposetolo, o e latou te aoao atu ma molimau atu i ai i taimi uma, ma o le e iu ina latou suitulaga ma tutu e sui ai—o Iesu Keriso.
E pei lava ona auina mai e le Atua le manai, Na te auina mai foi perofeta soifua.
O i laua uma e faatusa i Lona Alo, o Iesu Keriso.
O Iesu Keriso o le manai na sailia e Isaraelu ma o lea foi o loo tatou sailia i aso nei.
“Na aai e o matou tamā le manai i le vao; e pei ona tusia, na Ia avatua ia te i latou le areto mai le lagi e aai ai.
“Ona fetalai atu lea o Iesu ia te i latou, E moni, e moni, ou te fai atu ia te outou, e le o Mose na avatu ia te outou lena areto mai le lagi; peitai o lo’u Tamā na te avatu ia te outou le areto moni mai le lagi.
“Aua o le areto mai le Atua, o le mea ua alu ifo mai le lagi lea, ma au mai le ola i le lalolagi.
“Ona fai mai lea o i latou ia te ia, Le Alii e, aumai ia te i matou lena areto e le aunoa.
“Ua fetalai atu Iesu ia te i latou, “O au nei le areto o le ola: o lē sau ia te au, e lē laina lava ia” (Ioane 6:31–35).
E fesoasoani perofeta ia i tatou e aai i le Areto o le Ola—ia taumamafa i lo tatou Faaola o Iesu Keriso ma Lana talalelei toefuataiina. A o tatou faalogo pea lava pea ma ua’i atu i a latou aoaoga, o le a fafagaina i tatou faaleagaga, faatumuina, ma faamalolosia.
Ou te faamoemoe o le a tatou faalogologo uma i le konafesi aoao.