Auauna atu ma le Filigā

E mafai ona tatou faia se eseesega loloto e ala i le auauna atu ma le filigā.

O Tuiko e le o se igoa e sili ona masani ai i le Feagaiga Fou, ae o ia o se faataitaiga o le auaunaga ma le auauna atu ma le filigā. E ui o lana auaunaga sa i ai i taimi o tua atu, o lona faamaoni na mafai ai e Paulo ona faia lana galuega tāua. Sa tuuina atu e Tuiko ni tusi i le Au Paia i Efeso ma Kolose ma faamafanafanaina ma faamalosiauina i latou (tagai Efeso 6:21–22; Kolose 4:7–8). Sa malaga o ia i eria eseese, e pei o Kereta ma Efeso, e fesoasoani i le galuega, faasaolotoina o taitai e pei o Tito ma Timoteo e fesoasoani ia Paulo (tagai 2 Timoteo 4:12). Sa faaigoa e Paulo ia Tuiko “o se uso pele ma se auauna faamaoni i le Alii” (Efeso 6:21).

O le filigā e aofia ai le tutumau, aemaise lava i le fetaia’i ai ma mea faafeagai. E fesoasoani lo tatou filigā i le Alii ia iloa e mafai ona Ia faalagolago mai ia i tatou auā o le a tatou lē fiu, e tusa lava pe a faigata mea uma. E foliga mai ona o le filigā o Tuiko, sa faatuatuaina ai o ia e Paulo i ni tofiga tāua. Ua faapena foi ona tuuina mai e le Alii ia i tatou ni tofiga tāua. Pe o le a tatou tumau pea ea i a tatou taumafaiga e faamanuia i latou ua Ia poloaiina i tatou e auauna atu i ai?

Atiina A’e o se Loto o le Filigā

Atonu e tele ni mafuaaga tatou te feagai ai ma mea faafeagai pe a tatou galulue e auauna atu i isi. Ae ua faatuatuaina i tatou e le Alii e tutumau pea i a tatou taumafaiga e faia le mea sili tatou te mafaia, e tusa lava pe lē faigofie.

O nisi nei o manatu i auala e mafai ona tatou atiina a’e ai le uiga faa-Keriso o le filigā:

A ou iloa ua tata’iese a’u mai o’u tiute faaleperisitua e isi mea ou te fiafia i ai ma a augani mai lo’u tino mo se malologa, ou te tuuina ia te au le alaga faamalosiau lenei: ‘Manatua o Ia.’ O le Alii o lo tatou faataitaiga atoatoa o le filigā.”¹
Manatua na valaauina e le Alii ia taitai e fesoasoani e faia Lana galuega. O le auauna atu ma le filigā e lē faapea o le a tatau ona e faaauau pea na o oe. Saili le lagolagosua mai le Alii ma ou taitai i le lotoifale.
Tatalo mo musumusuga i auala e mafai ona e atiina a’e ai le filigā atili. E malamalama le Tama Faalelagi o luitau o le olaga o lona uiga o le auauna atu e lē faigofie i taimi uma, ma e tu saunia o Ia e fesoasoani ma musuia i tatou.
Manatua e fiafia le Alii i taumafaiga ma o le aoao ia filigā atili e lē tupu i le taimi lava lena. Faatasi ai ma le faifaisoo ma le onosai, o le a tuputupu a’e ai lou filigā.

Auauna atu ma le Filigā

O le filigā e lē faapea ia tumau ai i se auala e lē toafimalie ai tagata. Faaaloalogia ia moomooga o i latou e te auauna i ai. Ia manatua e ui lava e toalaiti ni tagata e fiafia e faamalosia i ni fegalegaleaiga, e toetoe lava o tagata uma e mananao i ni uo moni e sili atu i o latou olaga.
O le filigā e aofia ai le faaalia o le taimua i lau auaunaga nai lo le tau manaomia ona faatonu atu le mea e fai i taimi uma.
O le filigā e aofia ai faatinoga laiti, faamaoni. O le filigā i le auaunaga e lē manaomia ona avea ma se taga maoae.
O se tasi o auala sili ona lelei e auauna atu ai ma le filigā o le faamasani lea ia i latou e te auauna atu i ai ma mafaufau loloto pe mafai faapefea ona e taulimaina o latou manaoga. Fesili atu, o le a se mea o le a ou talisapaia ai le fesoasoani pe ana ou i ai i le tulaga lava e tasi? O le faia o lenei faagasologa o le a fesoasoani ia te oe e fesootai ai ia i latou e te auauna atu i ai ma faia ai lau auaunaga ia sili atu ona magafagafa ma patino.