Galue i le Maelega Atoatoa
E tatau ona tatou aoao i o tatou tiute mai le Alii, ona tatou galulue ai lea i le maelega atoatoa, ia aua lava ma le paie po o le faatamala.
Uso e, ou te faafetai ina ua tatou mafuta i le po nei. Ma ua faalotomaualaloina lava au i le mea ua ou iloa e uiga i la outou auaunaga faamaoni faaleperisitua. Oute tautala atu ia te outou i le po nei e uiga i le maelega i le galuega a le Alii. O ni aafiaga talu ai nei, ua mafua ai ona ou filifilia lenei autu.
O se tasi o na aafiaga o la’u suesuega mae’ae’a o le tusi fou matagofie mo le Perisitua Arona, e pei ona sa saunoa ai Uso David L. Beck. Ua faaigoaina o le Faataunuuina o Lo’u Tiute i le Atua. Ina ua ou faitauina ma mafaufau i mea ua faamoemoe e fai e alii talavou ma tagata ia avea ai i latou, sa ou iloaina ai o loo faamatalaina ai le mea na folafola mai e Peresitene Polika Iaga i soo se tasi o le au perisitua e maelega i lona olaga atoa: “O se tagata e umia le perisitua, ma tumau lona faamaoni i lona valaauga, e fiafia pea lava pea o ia i le faia o mea e finagalo le Alii na te faia, ma tumau ona ia faatinoina i lona olaga tiute uma e maua ai mo ia lava e le gata i avanoa e maua ai, ae o le iloa foi o le ala e maua ai mea a le Atua, ina ia iloa ai pea lava pea e ia le mafaufau o le Atua.”1
I ni nai vaiaso talu ai, sa ou vaai ai i se tiakono fou o amata atu i lena ala o le maelega. Sa faaali mai ia te au e lona tama se ata na tusia lava e lona atalii, o loo faaalia ai laina nofoa uma i totonu o lo latou falesa, o se numera mo tiakono taitasi o le a tufaina le faamanatuga, ma le faiga o le a pasi ai le faamanatuga i tagata i totonu o le falesa. Sa ma toē ma lea tamā pe a mafaufau i se tamaitiiti, e lei faatonuina e faia lena mea, a ua nofo ma fai se ata ia mautinoa ai e faamanuiaina i lana auaunaga faaleperisitua.
Sa ou iloaina i lona maelega, le mamanu mai le tamaitusi o le Tiute i le Atua. O le aoaoina lea o mea ua faamoemoeina e le Alii mai ia te oe, fai se fuafuaga e fai ai, galue ma le maelega i lau fuafuaga, ona faasoa atu lea i isi pe na faapefea e lou aafiaga ona suia oe ma faamanuiaina ai isi.
Sa tusia e le tiakono lena ata ia mautinoa ai, o le a mafai ona ia faia le mea na valaauina o ia e le Alii e fai. I le amataga o lana auaunaga faaleperisitua, sa aoaoina o ia e le Alii ina ia fiafia pea lava pea i le “faia o mea e finagalo le Atua na te faia.”2
O le isi aafiaga ua mafua ai ona ou talanoa atu ia te outou i le po nei e uiga i le maelega, o le matauina lea o se tagata ua lata i le mutaaga o lana auaunaga faaleperisitua i lenei olaga. E faalua ona epikopo. O lona uluai valaauga e avea ma se epikopo, i le tele o tausaga ae ou te lei feiloai ia te ia, o le taimi a o talavou o ia. A o lea ua toeaina, ua faamalolo mo le taimi lona lua mai le avea ai ma se epikopo. O le faateleina o tapulaa o lona soifua maloloina faaletino, na matua faigata ai lava le auaunaga faaleperisitua.
Ae na i ai lava sana fuafuaga e galue ai ma le maelega. O Aso Sa uma sa mafai ona ia oo atu ai i le lotu, sa nofo ai i autafa o le laina e aupito latalata i le faitotoa e ulufale mai ai le toatele o tagata e malaga mai i le sauniga faamanatuga. Sa vave ona alu ane iina ina ia mautinoa e i ai se nofoa avanoa. O tagata taitasi e taunuu ane, sa mafai ona latou vaaia ona fofoga o le alofa ma le taliaina, e pei lava ona sa latou faia i le taimi sa nofo ai o ia i luga o le tulaga a o avea ma o latou epikopo. O lana uunaiga sa faamafanafanaina ai ma siitia i latou, aua sa matou iloaina se mea e uiga i le tau na ia totogiina e tautua ai. O lana galuega o se epikopo ua mae’a; ae e lei uma ai iina lana auaunaga faaleperisitua.
Ua outou vaai i na ituaiga o faataitaiga o auauna perisitua maoae. O le po nei. O le a ou taumafai ai e faamatala atu ia te outou mea ua ou aoaoina e uiga ia i latou. E amata i lo latou aoaoina ia iloa po o le galuega a ai lea o loo latou galulue ai, ma pe o le a foi le faamoemoega. A oo ina mauaa lena malamalama i o latou loto, ona avea ai lea o i latou ma auauna ua sili atu.
Muamua, o le a ou tautala sa’o atu i alii talavou o le Perisitua Arona. O le a atili ona outou maelega, pe a outou lagonaina le tele naua o le faatuatuaga ua tuuina atu e le Atua ia te outou. O loo i ai se feau mai le Au Peresitene Sili mo outou i lena tamaitusi o le Tiute i le Atua: “Ua ia te oe le faatuatuaga ma le talitonuga tele o le Tama Faalelagi, ma ua i ai se misiona taua mo oe e te faataunuuina. O le a fesoasoani o Ia ia te oe pe a e liliu atu ia te Ia i le tatalo, faalogologo mo uunaiga a le Agaga, usitai i poloaiga, ma tausi feagaiga ua e osia.”3
Na toe foi mai Ioane le Papatiso i le lalolagi e toefuatai mai le perisitua lena ua outou umia alii talavou. Na ia umia ki o le Perisitua Arona. O Ioane lea na alu i ai Iesu e papatisoina o Ia. Sa iloa e Ioane lē na tofia o ia. Na ia fai atu i le Alii, “E ao ona e papatisoina mai o a’u.”4
Sa iloa e Ioane o le perisitua o Arona “e umia ki o le auaunaga a agelu, ma le talalelei o le salamo, ma le papatisoga e ala i le faatofuina mo le faamagaloina o agasala” ina ua auina atu o ia e le Alii e faauu ia Iosefa Samita ma Oliva Kaotui i le aso 15 o Me, 1829.5 Sa ia iloaina foi lē na tofia o ia ma le faamoemoega mamalu na auina mai ai o ia.
O o outou valaauga i le perisitua ua mafai ai ona outou tuuina atu le faamanatuga o le Talisuaga a le Alii i tagata o Lana Ekalesia i ona po nei. O le aia foi lena e tasi na tuuina atu e le Faaola i Aposetolo e Toasefululua i Lana misiona i le olaga nei. Na Ia toe faia foi ina ua Ia tofia soo e toasefululua ina ua mavae Lona Toetu e taitai Lana Ekalesia.
O le Alii lava Ia, e pei ona faamatala mai i le Tusi a Mamona, na saunia faatusa o Lana taulaga lē i’u ma tuuina atu i tagata. Manatu ia te Ia ma Lona faamamaluina o outou pe a outou faatinoina la outou auaunaga faaleperisitua. Pe a outou manatuaina o Ia, o le a outou naunau e faatino lena auaunaga paia, i le mea sili tou te mafaia, ma le faamaoni e faapei foi ona Ia faia.6
E mafai ona avea lena mea o se mamanu i lou olaga, o le a faateleina ai lou malosi e maelega ai i auaunaga faaleperisitua uma o loo saunia ai oe e le Alii ma mea o le a Ia tofia i ai oe. O lena naunautaiga o le a fesoasoani ia te oe e sauniuni ai mo le mauaina o le Perisitua Mekisateko, lea sa ta’ua anamua “o le Perisitua Paia, e tusa ma le Faatulagaga a le Alo o le Atua.”7
O le taimi nei, ou te fia talanoa atu ia i latou ua valaauina ma faamamaluina e galulue i le Perisitua Mekisateko. E faapei o le Perisitua Arona, o le Perisitua Mekisateko e tele atu i le na ona faatuatuaina e faia le mea e finagalo le Alii e fai. O se valaaulia ina ia avea e faapei o Ia. O Lana folafolaga lenei:
“Aua ai se faamaoni i le maua o nei perisitua e lua ua ou tautala atu ai, ma le faalauteleina o lo latou valaaulia, ua faapaiaina e le Agaga i le faafouina o o latou tino.
“E avea i latou ma atalii o Mose ma Arona ma fanau a Aperaamo ma le ekalesia atoa ma le malo, ma le au filifilia a le Atua.
“O lenei foi, o i latou uma o e maua lenei perisitua ua talia a’u, ua faapea mai ai le Alii;
“Aua o lē talia a’u auauna ua talia a’u;
“O lē foi na te talia a’u ua talia lo’u Tama;
“O lē foi na te talia lo’u Tama ua talia le malo o lo’u Tama; o lea o le a tuuina atu ai ia te ia mea uma o i ai i lo’u Tama.”8
E i ai le mamanu e siitia ai i latou uma e umia le perisitua i lena faamanuiaga mamalu. O se tasi vaega i tusitusiga paia o loo aumaia ai e le Alii le mamanu mo i tatou, o le vaega lea e 107 o le Mataupu Faavae ma Feagaiga:
“O lea, ia taitoatasi ai le tagata ma aoaoina lana tiute, ma galue i le tofi ua tofia ai o ia, i le maelega atoatoa.
“O le faatamala e le ta’uaogaina e tumau, o le foi na te le aoao lana tiute ma faaalia ua le faamaonia o ia o le a le ta’uaogaina e tumau. E faapea lava. Amene.”9
E tatau ona tatou aoao i o tatou tiute mai le Alii, ona tatou galulue ai lea i le maelega atoatoa, ia aua lava ma le paie po o le faatamala. E faigofie lava le mamanu ae e le faigofie ona mulimuli ai. E faigofie tele ona faasalaveia i tatou. O le suesue i talafou i aso taitasi, e mafai ona foliga mai e sili atu ona manaia nai lo le tusi lesona a le au perisitua. O le nofo ifo i lalo e malolo e mafai ona sili atu lona faatosina nai lo le faatulagaina o ni taimi e asiasi atu ai ia i latou o loo manaomia la tatou auaunaga faaleperisitua.
A ou iloa ua tata’iese a’u mai o’u tiute faaleperisitua e isi mea ou te fiafia i ai, ma a tagi mai lo’u tino mo se malologa, ou te faamalosiauina lava a’u i upu nei: “Manatua o Ia.” O le Alii o lo tatou faataitaiga atoatoa lea o le maelega i le auaunaga faaleperisitua. O Ia o lo tatou ta’ita’i sili. Na Ia valaauina i tatou. E muamua atu o Ia ia te i tatou. Na Ia filifilia i tatou e mulimuli atu ia te Ia ma tatou aumaia isi.
Ua ou manatua o Ia i lenei afiafi, ma ua ootia ai lava lo’u loto. O le po lenei o le Aso Toonai i luma mai o le Aso Sa o le Eseta lea tatou te manatua ai Lona Toetu. Ou te manatuaina Lana faataitaiga a’o lumanai ai Lona maliu.
Ona o le alofa mo Lona Tama ma mo i tatou, na Ia tuu atu ai o Ia lava e puapuagatia i luga atu o le malosi o le tagata ola. Na ia ta’u mai ia i tatou ni isi o mea na manaomia mai ia te Ia e lena taulaga e lē i’u. Tou te manatuaina upu:
“Aua faauta, o a’u le Atua na puapuagatia i nei mea mo tagata uma, ina ia latou le puapuagatia pe afai latou te salamo;
“Ae peitai, afai latou te le salamo, e ao ina latou tiga e pei o a’u;
“O le tiga lea na faagateteina ai a’u lava, o le Atua, le silisili ese i mea uma, ona o le tiga, ma na maligi ai le toto mai pu laiti uma lava o le tino, ma na tiga le tino atoa ma le agaga—ma sa ou loto ou te le inu i le ipu oona, ae teena—
“Ae ui i lea, ia i le Tama le viiga, ma na ou inu ma faaumaina ai a’u sauniuniga i le fanau a tagata.”10
Mai le satauro i Kalevaria, na faasilasila mai ai e le Faaola, “Ua taunuu.”11 Ona tuua ai lea e Lona agaga Lona tino, ae tuuina ifo ma le alofa Lona tino i se tuugamau. Sa aoao mai e Ia se lesona ia i tatou e ala i le mea sa Ia faia i aso e tolu i le lalolagi o agaga, a’o le’i oo i Lona Toetu, lea ou te manatuaina i soo se taimi lava e faaosoosoina ai au ia ou manatu ua mae’a sina galuega mamafa i Lana galuega ma ua alagatatau ai se malologa.
O le faataitaiga a le Faaola ou te maua ai le lototele e faaauau pea. Na mae’a Lana galuega i le olaga nei, ae na Ia ulufale atu i le lalolagi o agaga ma le naunautai e faaauau Lana galuega mamalu e laveai agaga. Sa Ia faatulagaina le galuega a agaga faamaoni, e laveai i latou o ē o mafai ona faamanuiaina i le alofa tunoa lea ua mafai ona o Lana taulaga togiola. Ia manatua upu mai le vaega 138 o le Mataupu Faavae ma Feagaiga:
“Peitai, faauta, sa faatulagaina e ia ana au ma tofia ana avefeau mai e amiotonu, o e ua faaofuina i le mana ma le pule, ma tofia i latou e o atu ma avatu le malamalama o le talalelei ia i latou sa i ai i le pogisa, e oo atu i agaga uma o tagata; ma sa faapea ona talaiina ai le talalelei i e ua oti.
“Ona o atu ai lea o avefeau filifilia e talai atu le aso talileleia e maua ai e i latou le alofa tunoa o le Alii ma talai atu le saolotoga i e ua noatia, o i latou ia sa saisaitia, e oo lava ia i latou uma o e mafai ona salamo i a latou agasala ma talia le talalelei.”12
Soo se taimi lava tatou te manatua ai o Ia, e faigofie ai lava ona tetee atu i le faaosoosoga e manao e malolo mai a tatou galuega faaleperisitua. Atonu ai sa tatou manatuaina o Ia i le asō, ma o lea ua tatou i ai iinei e aoao i o tatou tiute, ma naunau e faia mea sa tatou osifeagaiga e fai, i le maelega atoatoa. Ma ona o Lana faataitaiga, o le a tatou onosai ai e oo i le iuga o le galuega sa ia tuuina mai ia i tatou i lenei olaga ma tautino atu ai e faia le finagalo o Lona Tama e faavavau, e pei ona sa Ia faia ma o loo faia pea lava.
O le Ekalesia lenei a le Alii. Na Ia valaauina i tatou ma ua faatuatuaina i tatou e ui lava i o tatou vaivaiga sa Ia silafia. Sa Ia silafia tofotofoga o le a tatou feagai. O le auauna atu ma le faamaoni ma e ala i Lana Togiola, o le a tatou aoao ai e manana’o i mea e finagalo ai o Ia ma avea ma ē e tatau ona avea ai i tatou ina ia faamanuia ai i latou o loo tatou auauna atu i ai mo Ia. Pe a tele taimi tatou te auauna atu ai ia te Ia ma le maelega, o le a suia i tatou. E mafai ona tatou avea ai pea i tatou e faapei o Ia.
Ua ou vaai i le faamaoniga o lena vavega i olaga o Ana auauna. Sa ou vaaia i ni nai vaiaso talu ai, i totonu o le potu malolo o se perisitua faamaoni.
Sa ou masani ia te ia a o tiakono, se tamā, se epikopo, ma se sui auai o se au peresitene o le siteki. Sa ou matauina mo le fiasefulu o tausaga lona maelega i le tautuaina o fanau a le Atua, i lona perisitua.
Sa potopoto lona aiga ma siomia o ia i lona potu malolo. Sa soisoi o ia, ma sa laei lona ofutino paepae, suti ma se fusiua. Sa ou ofo, ona sa ou i ai iina auā sa ta’u mai ia te au o la sa fai ona togafitiga faafomai tuga ae e le’i aoga.
Ae sa ia faafeiloa’ia au ma atonu sa faapea ona ia faafeiloa’ia le fiaselau o isi tagata na asiasi atu i le olaga atoa o le auaunaga faaleperisitua i laufofoga fiafia. Sa ou sau ou te fesoasoani ia te ia i faigata sa feagai ma ia, ae faapei lava ona tupu soo i le auaunaga faaleperisitua, sa maua le fesoasoani mo au ma sa ou aoao ai foi.
Sa ma nonofo ma talatalanoa lelei lava. Sa ia faamatala mai ia te a’u le tausiga a lona tamā i lo’u tina ao lalata ina maliu o ia. Ou te le’i iloaina lena mea. Sa ou iloaina ai iina, sa ia aoaoina ma le maelega mai lona tamā perisitua a’o tamaitiiti, le auala e tuu atu ai le fesoasoani. O lena mafaufauga na ou lagona ai le agaga faafetai mo taimi sa ou aveina ai o’u atalii a o laiti, i a’u asiasiga faaleperisitua e faamafanafana ma faamanuia atu.
Ina ua mavae ni nai minute, sa ia talosaga lemu mai, “Faamata e talafeagai pe a ou talosaga atu ia te oe pe mafai ona e tuuina mai so’u faamanuiaga?” Sa faauuina o ia e lona peresitene o le siteki o aso ua mavae, i le suauu ua faapaiaina e ala i le mana o le Perisitua Mekisateko.
A o ou faamauina le faamanuiaga, sa aoaoina au e le Agaga Paia e le itiiti ifo, se vaega o mea ua maea ona faia e le Alii mo lenei perisitua faamaoni. Sa mama o ia, ua fufulueseina ana agasala. Sa suia lona tagata ua manao i mea sa finagalo ai le Faaola. Sa le fefe o ia i le oti. O le faanaunauga o lona loto, o le ola lea e tuuina atu le auaunaga i lona aiga ma isi o fanau a le Tama Faalelagi sa manaomia o ia.
Sa ou savali ese atu i le po ma le agaga faafetai ina ua ou molimauina le agalelei o le Alii i Ana auauna perisitua maelega ma le faatuatuaina. Na te suia o latou loto ina ia mananao i mea e finagalo ai o Ia ma galulue e pei ona Ia finagalo ai.
Ou te faaiu atu nei i le fautuaga lenei i auauna perisitua a le Alii. Ia mafaufau loloto ma le maelega i tusitusiga paia, ma i upu a perofeta soifua. Ia saga tatalo pea mo le Agaga Paia e faaali atu ia te outou le natura o le Atua le Tama ma Lona Alo Pele. Ole atu ina ia faailoa atu ia te outou e le Agaga le mea e finagalo le Alii tou te faia. Fuafua e faia. Folafola atu ia te Ia e usiusitai. Galue ma le naunautai seia oo ina e faia le mea ua Ia poloai mai ai. Ona tatalo ai lea e tuu atu le faafetai mo le avanoa e auauna atu ai, ma ia iloa po o le a le isi mea e tatau ona e faia.
Ou te molimau atu o loo soifua lo tatou Tama Faalelagi ma Iesu Keriso. O i La’ua o ni tamalii toetutu ma e mamalu, e alolofa ma puipui ia i tatou. Na toefuatai mai ki o le perisitua e avefeau paia i le Perofeta o Iosefa Samita. Na faasolo mai i se laina e le’i motusia e oo mai ia Peresitene Thomas S. Monson. O loo umia na ki e Aposetolo taitoatasi o loo soifua.
Ou te tuuina atu la’u faamanuiaga ia outou lagonaina e ala i le Agaga, le tele naua o le faatuatuaga ma folafolaga ua outou maua o ni auauna faaleperisitua ua faauuina, i le Ekalesia moni a le Alii, i le suafa paia o Iesu Keriso, amene.