O Loo Agaigai Pea i Luma Tagata o le Au Paia i Haiti, Ua Mausali i le Talalelei
Ina ua taia Haiti e se mafui’e ia Ianuari 2010, sa tamoe saosaoa Jean-Elie René e faamautinoa o saogalemu lona aiga. Ina ua taunuu atu, sa ia vaaia se tasi o ona atalii e toatolu o tagi mai i le alatele, ma sa mafai ona ia faalogoina le faataio mai o le tasi o ona atalii i lalo o le faaputuga o nutigamea i le mea sa tu ai lo latou fale.
Sa mulimuli atu le tamā e 32 tausaga le matua i le leo o le tagi ma eli i luga le faaputuga ma maua ai lona atalii e lima tausaga le matua, ma le tino o lona toalua ma’itaga, o loo faamalumalu mai ai lava le la pepe e iva-masina le matua mai le taualuga o lo latou fale ua pa’ū.
O Uso Rene o le failautusi a le Uarota a Leogane, i le Siteki a Port-au-Prince Haiti. E ui ina ua maliu lona toalua, o le la tama e le’i fanau mai, ma ua leai se fale, ae e le o faitio lava o ia e uiga i le tulaga ua i ai. O le tele lava o aso talu ona mavae le mafui’e, e maua atu ai Uso Rene i le falelotu o sii le pepe ma isi ona atalii e toalua i ona autafa, o la e fesoasoani i le epikopo e faamaopoopo le galuega fesoasoani mo tagata o le uarota ma isi sa avea le falelotu ma o latou aiga mo se taimi lē tumau.
E faamomoiloto lava le tala ia Uso Rene, ae e le o se tala tulaga ese. Sa matua mafatia tagata o le Ekalesia i Haiti atoa ona o le malosi o le faatafunaga a le mafuie e 7.0, peitai ua avea lea mala ma mea ua faaalia ai le malosi o le faatupulaia o le faitau aofai o tagata o le au paia i Haiti. E pei foi o Uso Rene, e toatele tagata o le au paia—o tagata ua leva ona auai ma tagata o i latou se uluai tupulaga o lo latou ituaiga ua liliu mai—ua latou faatuatuanai i luitau a ua maua le filemu ma le mafanafana i le faamaoni ma le usiusitai.
Ua Faamaonia i le Tofotofoga
I le gasologa atoa o o latou tofotofoga, sa tutu malolosi tagata o le Ekalesia i Haiti i le talalelei a o latou faaauau pea ona fetausiai ma fefaamalosia’i o le tasi ma le isi ma i latou i o latou nuu.
“E moni lava na mou atu a matou mea uma e oo lava ia matou meatotino ma o matou aiga, na mou atu. Peitai o lo matou faatuatua ia Iesu Keriso, e le i faaumatiaina,” na saunoa i ai Yves Pierre-Louis, o le epikopo o le Uarota a Leogane. “O se avanoa lelei mo i matou e iloilo ai i matou lava o ni soo o Keriso.”
O taitai perisitua i le lotoifale o se faataitaiga sili lea o le faatuatua ma molimau, a o latou taulimaina ia luitau, ma aoao e faataunuu o latou valaauga i taimi faigata ma fesoasoani atu i e na manaomia le fesoasoani, o le saunoaga lea a Elder Francisco J. Viñas o le Fitugafulu, le Peresitene o le Eria a le Atu Karipeane.
“Sa latou faaaogaina a latou ki o le perisitua e faamanuiaina ai olaga o tagata o le au paia ma tagata e le auai i le ekalesia,” na ia saunoa ai. “Sa latou galulue i aufono ma mauaina le taitaiga mai le Agaga e feagai ai ma luitau faigata i lea aso ma lea aso.”
O le i’uga o le faatafunaga a le mafuie, na tulai mai ai se luitau, aemaise lava mo epikopo i Haiti, na saunoa ai Prosner Colin, o le peresitene o le Siteki a Port-au-Prince Haiti. Na tuua epikopo ma isi taitai o le Ekalesia ma le matafaioi e vaaia ma fesoasoani i le fiaselau o tagata o uarota, faapea o latou lava aiga.
“Na faaauau pea e [epikopo] ona fesoasoani,” na ta’ua ai e Peresitene Colin. “Ua latou malamalama e tele a latou mea ua leiloloa, ae o loo ia i latou le talalelei. O loo latou faamalosiauina [tagata o le au paia] ia tumau pea ona ola agavaa.”
Na avea Epikopo Pierre-Louis ma se taitai o le nuu ina ua mavae le mafuie. I le tele o vaiaso ma masina talu ona uma le faatafunaga o Haiti, na ia tuuto atu ai lona soifua e auauna atu ai i tagata o le ekalesia ma i latou e le auai, i Leogane—ma vaavaaia mea e manaomia e le fia selau.
“O ia o se auauna maoae, ma le lotomaualalo o le a e feiloai i ai,” o le tala lea a Chad Peterson, o se fomai mai Arizona na galulue faatasi ma Epikopo Pierre-Louis, o se volenitia ina ua mavae le mafuie.
Faatuatua mo le Taimi Nei ma le Lumanai
E tele tala na faamatalaina e uiga i tagata o le au paia i vaega eseese o Haiti, o ē lotototoa ma faatuatua i le Alii na mafai ai ona latou tatalia o latou tofotofoga.
“E ui ina matua mafatia le Au Paia faamaoni o Haiti, ae o loo faatumulia pea i latou i le faamoemoe mo le lumanai,” o le saunoaga lea a Elder Wilford W. Anderson o le Fitugafulu i lana saunoaga i le konafesi aoao ia Aperila, 2010. “E faapei o uluai paionia i le 1846, e nutimomoia o latou loto ae e malolosi o latou agaga. O loo latou aoaoina foi i tatou e faapea, o le faamoemoe ma le fiafia ma le olioli, e le o ni fua o mea e tutupu mai, a o le faatuatua i le Alii.”
O se ata faataitai o lena usiusitai ma le faatuatua, na maua i le taimi lava na maea ai le mafuie, na faaauau lava sauniga Lotu e aunoa ma se faalavelaveina.
Po o le a lava le faatafunaga o lo latou atunuu, sa taunuu ane tagata o le au paia Haiti i le lotu, i o latou laei sili o le Aso Sa, ma o latou laufofoga fiafia. O le talalelei o le vaafaaola lea na faalagolago i ai le toatele e tosoina mai i latou mai lo latou faanoanoa ma le faavauvau.
“E ui ina leai ni o latou fale, galuega, ma tagata o aiga, ae sa tausaafia ma tauagafau tagata, faatuatuaina, ma amio-solia. E maoae lava lo latou faatuatua,” na saunoa ai Brother Peterson.
O le taimi nei, o loo faaauau pea ona lauusiusi le Ekalesia i Haiti. Ua faatoateleina le auai i sauniga faamanatuga, o le tala lea a Peresitene Colin, ma o loo faaauau pea ona galulue tagata i Haiti e toe fausia o latou nuu ma alaalafaga.
“O loo lelei lava le fetausia’i o tagata o le au paia,” o lana tala lea. “Latou te feasiasia’i; o loo sailia ni avanoa faigaluega mo i latou lava ma isi.”
Fai mai Berthony Theodor, o se tagatanuu o Haiti ma o le faatonusili o le uelefea a le Ekalesia i Haiti, ua maua e ia ma isi taitai o i ai nei ma le lumanai o le Ekalesia i Haiti se aafiaga taua tele, o se taunuuga o le faalavelave matuia.
“Ua matou maua le avanoa e auauna atu ai i isi, ma toe faaali atu ai ia te i latou lo matou alolofa tele i ai,” o lana tala lea. “Ua matou toe iloa ai foi, e le o tuulafoaiina lava i matou i le lalolagi, ma o i matou o nisi o le nuu o le Alii.”
Fai mai Brother Theodor o le mafuie—po o se isi lava mala—e le mafai ona aveesea le filemu ma le olioli o tagata o le au paia i Haiti.
“O la’u molimau e le faagaloina lava e le Alii Ana fanau,” o lana tala lea. “Na te silafia le mea lea ou te i ai, ma lo’u tulaga. O le a Ia le tuulafoaiina lava au.”