Elder Patrick Kearon

O Le Fitugafulu

A o nofo ai Elder Patrick Kearon mo sina taimi i Kalefonia, sa nofo o ia i se aiga “e tulaga ese” o le Au Paia o Aso e Gata Ai lea na faafeiloa’ia atu o ia i le talalelei.

I le lua tausaga mulimuli ane, ina ua toe foi i lona aiga i Egelani, sa ia feiloai ai i ni faifeautalai i le magaala o Lonetona ma na iu ai loa ina amata ona sailiili i le Ekalesia. Na ia tau i se mau i le Tusi a Mamona lea e faitauina faapea, “Ua ola tagata ina ia latou maua le olioli” (2 Nifae 2:25). Sa tagitagi pea ia te ia lena mau a o ia toe manatua le olioli na i ai i le fale o le aiga AAG ma i olaga o faifeautalai ia na aoaoina o ia.

“Na tagitagi pea lena mau i o’u taliga,” o le saunoaga lea a Elder Kearon. “Na ou vaaia ia i latou na ou feiloai i ai, le auala e matua faaleleia ai o tatou olaga e ala i le mulimuli i aoaoga a le Faaola ina ia loto tetele.”

Talu mai lona liliu mai i le Ekalesia i le aso 24 o Tesema, 1987, ua aumaia ai e Elder Kearon lena loto tele i le tele o ona valaauga, e aofia ai le peresitene o Alii Talavou a le uarota, fesoasoani i le epikopo, peresitene o le paranesi, peresitene o le siteki, ma le Fitugafulu Eria.

I le avea ai ma se sui fou ua valaauina o le Korama Muamua o Fitugafulu, na saunoa mai o ia na ia “taumafai [lava] ma le malosi ina ia taialaina e ala i mataupu faavae o le Ekalesia. Na ou vaaia le auala na mafai ai ona suia olaga, i le ola ai lea i na mataupu faavae.”

Sa soifua mai Elder Kearon i Carlisle, Cumberland, i Egelani, ia Iulai 1961, ia Paddy ma Patricia Kearon. A o tautua lona tama i le Ea fosi a le British Royal, sa a’otauina Elder Kearon i Sasae Tutotonu ma le Malo o Peretania.

Sa la feiloai ma Carole Hulme a o aoga [Carole] i Egelani ma le Iunivesite o Polika Iaga. Sa la faaipoipo i le Malumalu o Oakland Kalefonia i le 1991. O i laua o ni matua o se fanau e toafa, e toatasi ua maliu.

Sa soifua ma galue ai Elder Kearon i le Malo o Peretania, Saudi Arabia, ma le Iunaite Setete i le tele o pisinisi, e aofia ai tulaga faaupufai, tausiga faalesoifua maloloina, ma le pisinisi i mea tau taavale. A o lei maua lona valaauga, sa pulea e Elder ma Sister Kearon se kamupani faufautua o mea tau fesootaiga i Egelani.