E Galulue Faatasi Mea Uma mo le Lelei
Atonu tatou te le mailoa pe aisea tatou te feagai ai ma mea tatou te faia, ae e mafai ona tatou lagona le mautinoa ona e mafai ona tatou tuputupu ae mai i se aafiaga.
Ao ou laitiiti sa ou tulimatai lava i le taimi o le tautotogo o le tausaga. A mafanafana le tau, ua ou sauni mo le amataga o taaloga peisipolo. E pei lava o le toatele o tama talavou, sa ou manao foi ina ia ou avea ma se tagata taalo peisipolo maoae. Ua toe faamanatu mai ia te au se tala e uiga i se tamaitiiti ma ni ana miti e talitutusa lava. Ma le naunautaiga ina ia avea ma se tagata taalo maoae o le a sosoo ai i lea taaloga o lea na ia filifili ai e alu i fafo e faataitai. Na uuina i lona lima le polo ma togi i luga o le ea, ma i lona fia manao ia mamao le taina o le polo, na ia sasauina ai ma le malosi le pate ae na pau ifo i lalo le polo e aunoa ma le papai i le pate. I le le fia toilalo, na ia toe faia faalua. Ao sauni e togi i luga le polo, na tupu tele lona naunautai ina ua oo mai i lona mafaufau le manatu i se ta malosi lava. Ae peitai, o le taunuuga lava e tasi. Na taatiatia i lalo le polo. Peitai e pei ona iloa e soo se tagata taalo lelei, e tolu lava au ta e le pai i le polo ona e pe lea. Na ia toe taumafai atili, togi i luga le polo, ma na ia sasauina i se sasau sili atu ona malosi na te lei faia muamua. Ina ua toe pau foi i lalo le polo, na amata ona loimatā ona mata, ona, faafuasei lea ona alia’e mai se ataata tele ma sa ia faapea atu, “Oka se faate’a!”
O le a feagai i tatou taitoatasi ma faaosoosoga ma tofotofoga ma e pei o lenei faataitaiga faigofie, o auala o loo tatou tali atu ai i na faafitauli o le a fuafuaina ai lo tatou manuia ma le fiafia. O le a feagai i tatou taitoatasi ma faigata ma e le taulia po o fea o tatou i ai. Ua aoaoina i tatou i tusitusiga paia e “ao lava ina i ai … le faafeagai o mea uma.”1 O le a feagai i tatou taitoatasi ma taimi o faigata ma o le fesili la e le o afea o le a tatou feagai ai ae o le faapefea ona tatou taulimaina.
Na aoaoina e le Aposetolo o Paulo se lesona mataina i le na o ni nai tausaga muamua atu ao lei feagai le Au Paia i Roma ma nisi o sauaga sili ona matautia i soo se vaitausaga faaKerisiano. Na toe faamanatu ai e Paulo i le Au Paia o le a “galulue faatasi mea uma e lelei ai i latou o e ua alofa atu i le Atua.”2 O lo tatou Tama Faalelagi, o lē e alofa atoatoa ma le faamaoni ia i tatou, na te faatagaina i tatou ina ia tatou oo i ni aafiaga e mafai ai ona tatou atiina ae ni o tatou uiga ma amioga tatou te manaomia, ina ia faapei ai o Keriso. O o tatou tofotofoga e tele ituaiga foliga e oo mai ai, peitai o le a taitasi ma faatagaina ai i tatou e avea atili e faapei o le Faaola pe a tatou aoao e iloa le lelei e maua mai i aafiaga taitasi. Pe a tatou malamalama i lenei mataupu faavae o le a tatou maua se faamautinoaga maoae o le alofa o lo tatou Tama. Atonu tatou te le mailoa pe aisea tatou te feagai ai ma mea tatou te faia, ae e mafai ona tatou lagona le mautinoa ona e mafai ona tatou tuputupu ae mai i se aafiaga.
O lea ua ou iloaina e sili atu le faigofie o le toe tilotilo i tua pe a maea se tofotofoga ma vaai po o a ni mea na tatou aoao mai i o tatou aafiaga, ae o le lu’itau o le mauaina lea o lena vaaiga e faavavau ao tofotofoina i tatou. Atonu e foliga maoae o tatou tofotofoga i nisi, ae mo i tatou taitoatasi o loo aafia i nei aafiaga, o tofotofoga e moni ma e manaomia le faamaualaloina o o tatou loto i luma o le Atua ma aoao mai ia te Ia.
I lenei Aso Sa o le Eseta, tatou te manatua ai le soifuaga o lo tatou Faaola. O Ia tatou te naunau e faataitai i ai a tatou amioga uma. Atonu e mafai ona ou faailoa atu mea e lima lea e mafai ona tatou aoao mai i na itula mulimuli o le soifuaga o le Faaola i luga o lenei fogaeleele e mafai ona fesoasoani ia i tatou e taulimaina ai foi o tatou tofotofoga.
Muamua, Na te lei saili e faia Lona finagalo ae na o le finagalo o Lona Tama. Na Ia tuuto i Lana misiona paia e oo lava i taimi o faaosoosoga. Ao Ia faapau fao i Ona fofoga i le Togalaau o Ketesemane, na Ia tatalo atu, “Lo’u Tama e, a e finagalo i ai, ia e aveese lenei ipu ia te au: a e aua le faia lo’u loto, a o lou finagalo.”3 O nisi o taimi tatou te ui atu i tiga ma faanoanoaga lea atonu tatou te tuputupu ae ai ma saunia mo faaosoosoga e ono oo mai i le lumanai. Ou te fesili atu ia te outou tina, “Pe tou te faia ea se mea e ono oo ai le tiga ma maligi ai loimata o lau fanau pe a fai latou te lei faia se mea sese?” Ioe tou te faia! Pe a aveina e tina fanau laiti i se fomai e fai ni tui puipui, toeitiiti lava o tamaiti uma e o ese mai ma loimata i le ofisa o le fomai. Aisea tou te faia ai lena mea? Aua ua outou iloa o sina tiga itiiti i le taimi nei o le a puipuia ai i latou mai tiga ma mafatiaga e ono oo mai i le lumanai. E silafia e lo tatou Tama o i le Lagi le amataga o mea e mulimuli mai. E manaomia lo tatou mulimuli i faataitaiga a le Faaola ma faatuatua ia te Ia.
Lona lua, pe a tatou feagai ma tofotofoga, e tatau ona tatou aoao ia aua nei tetee pe muimui. Na vaai Nifae i se faaaliga maoae o le taulaga togiola a le Faaola ma ta’u mai ia i tatou: “O lea latou te sasa ai ia te ia, e onosai ai foi o ia; latou te taia o ia, e onosai ai foi o ia. Latou te feanu ia te ia, e onosai ai foi o ia ona o lona alofa mutimutivale tele ma lona onosai i le fanauga a tagata.”4 E tatau lava ona tatou taumafai e le aunoa e faasa’o le faafitauli ma manumalo mai tofotofoga, nai lo le fesiligia, “O a’u ea i se a?” po o le “O le a se mea na ou faia ua mafua ai lenei mea?” atonu e tatau ona faapea le fesili, “O le a se mea e tatau ona ou faia? O le a se mea e mafai ona ou aoao mai lenei aafiaga? O le a se mea e tatau ona ou suia?”
I le tele o tausaga ua mavae atu a’o ma auauna atu ma lo’u toalua i Venezuela, sa tuua e le ma tama tama pito i laitiiti le saogalemu o lana aoga maualuga ina ia faatasi ma i ma’ua. E lei tomumu o ia, ae na iloagofie lona tauivi ao i ai i lenei atunuu lea e fou mea uma ia te ia; ae i se suiga matagofie o mea na tutupu, na tulai mai ni aafiaga o se tofotofoga i se faamanuiaga tele i lona olaga. Na ia ausia lenei mea i le suia o lona uiga faaalia ma atiina ae se naunautaiga ina ia manumalo.
Lona tolu, pe a tatou feagai ma o tatou luitau, e tatau ona tatou sailia se fesoasoani sili atu mai le Atua. E oo lava i lo tatou Faaola, na manaomia ina ia tatalo, “ua loloto atili ai” e pei ona Ia faia i le Togalaau o Ketesemane.5 E mafai ona tatou aoao ia maua le faatuatua maoae pe a tatou faia lenei mea. E tatau ona tatou manatua o le tele lava o tali mai lo tatou Tama Faalelagi o le a le aveesea ai tofotofoga mai ia i tatou ae Na te fesoasoani e faamalosia i tatou ao tatou i ai i ia aafiaga. Faapei ona sa Ia faia i ē na mulimuli ia Alema, na mafai e le Alii ona “faamama foi avega ua faaeeina i o outou tauau, ina ia outou le lagona ai lava i o outou tua.”6 I o tatou tofotofoga, aua nei o tatou feitai pe le faamaoni ai, ae ia tatou mulimuli i faataitaiga a le Faaola ma faamalosi atili ai, ma faamaoni atili, ma faatuatua atili ai.
Lona fa, aoao e auauna atu ma mafaufau i isi e oo lava i taimi e tofotofoina ai i tatou. O Keriso o se faataitaiga maoae o le auauna atu. Na tumu Lona soifuaga i faataitaiga o le fesoasoani atu ma le auauna atu i isi, ma o Lana meaalofa silisili o meaalofa uma, o lea na Ia faia mo i tatou. Ao Ia fetalai mai, “Aua faauta, o Au le Atua na puapuagatia i nei mea mo tagata uma, ina ia latou le puapuagatia pe afai latou te salamo.”7 E tatau ona tatou salamo ma ia mulimuli i Ana faataitaiga o le auauna atu. Pe a tatou auauna atu i isi, ua tatou faagaloina o tatou lava faafitauli ma galulue ai ina ia faaitiitia le tiga po o le popole o isi, ua tatou faamalolosia ai i tatou lava.
I la tatou konafesi aoao talu ai nei, na fesiligia ai i tatou uma e lo tatou perofeta pele, o Peresitene Thomas S. Monson e faapea: “Ou te talitonu o loo ta’u mai e le Faaola ia i tatou, vagana ua tatou faamaumau o tatou ola ona o isi, o le a itiiti se faamoemoega o o tatou lava olaga. O i latou o e ola mo na o i latou lava, e iu ina galoma atu i le faaleagaga, ma maumau ai lo latou ola, a o i latou o e faaaoga o latou lava ola e auauna atu ai i isi, e ola ma lauusiusi—ma faasaoina ai o latou ola.”8
Lona lima, faamagalo atu i isi ma aua nei saili e tuuaia i latou i o tatou tulaga. O nisi taimi tatou te fia faapea atu, “Pe ana latou le faia lenei mea, semanu ou te le faia le mea na ou faia.” E i ai le tulaga masani o le tagata o le lalolagi e lafo atu le tuuaiga i se isi tagata ia aua ai nei tuuaia o ia ia latou lava mea na faatinoina. Na silasila atu le Faaola ia i latou o e na tuituia o Ia i le satauro ma augani atu i Lona Tama i le Lagi e “faamagalo atu ia i latou; aua ua latou le iloa le mea ua latou faia.”9 Pe le mafai ea ona faasili atu lo tatou loto faamagalo?
Ao tatou ui atu i tofotofoga o le olaga, ia tatou tumau ai pea i se vaaiga e faavavau, ma aua nei o tatou faitio, a ia tatou tatalo atili, ia tatou auauna atu i isi, ma ia tatou fefaamagaloai. Pe a tatou faia lenei mea “[o le a] galulue faatasi mea uma e lelei ai i [tatou] e ua alofa atu i le Atua.”10 Ou te tuuina atu se molimau faamaoni ma le mautinoa e alofa lo tatou Tama ia i tatou, ma na Ia auina mai Lona Alo e faailoa mai ma faaleleia le ala mo i tatou. Na tiga o Ia, na Ia maliu, ma na Ia toetu mai ina ia tatou ola ma o Lona finagalo, ia tatou “maua le olioli,”11 i o tatou tofotofoga o le olaga. Ou te fai atu ai nei mea uma i le suafa o Iesu Keriso, amene.