Fesoasoani ia i Latou i lo Latou Toe Foi Atu i le Aiga [i le Lagi]
O le auala e sili ona lelei tatou te fesoasoani ai i fanau a le Atua, o le tuuina atu lea i ai o auala e fausia ai le faatuatua ia Iesu Keriso ma Lana talalelei toefuataiina a o laiti i latou.
Uso e ma tuafafine, e finagalo ma e manaomia e lo tatou Tama Faalelagi la tatou fesoasoani i le aumaia o Ana fanau agaga e toe foi atu ia te Ia. Ou te talanoa atu i le aso e uiga i tagata talavou ua i ai i Lana Ekalesia moni, ma o lea ua amata ai la latou faigamalaga i le ala sa’o ma le vaapiapi e toe foi atu i lo latou aiga i le lagi. E finagalo o Ia ina ia latou vave maua le malosi faaleagaga e tumau ai i le ala. Ma Na te manaomia la tatou fesoasoani e toe faafoi vave mai ai i latou i le ala [sa’o] pe a amata ona latou fesēa’i.
Sa avea au ma se epikopo talavou i le taimi na amata ai ona manino la’u vaai i le mafuaaga ua finagalo ai le Alii ina ia tatou faamalolosia ia fanau a o laiti ma vave laveai mai i latou. O le a ou faamatala atu se tala se tasi e uiga i se tagata talavou o le a fai ma sui o le toatele o talavou sa ou taumafai e fesoasoani i ai i le aluga o tausaga.
Sa saofai mai o ia i le isi itu o le kesi a le epikopo. Sa talanoa mai ia te au e uiga i lona olaga. Sa papatisoina ma faamauina o ia o se tagata o le Ekalesia ina ua valu ona tausaga. Sa lei tagi a o ia faamatalaina le silia ma le 20 tausaga na sosoo ai, ae sa faanoanoa lona leo. Fai mai a ia, o lona agaigai i lalo na amataina i filifiliga e faamasani atu ai i tagata sa ia faapea o ni tagata lelei. Sa amata ona ia solia tulafono sa ia manatu i le amataga e le o ni tulafono e taua tele.
Sa ia lagonaina muamua si faanoanoa laitiiti ma sina maini o le ta’usalaina. Ae o mafutaga ma ana uo na ia maua ai se lagona fou o le fiafia o tagata ia te ia, ma na foliga ai e le taua ana tautinoga na seasea faia ina ia salamo. A o faateleina le ogaoga o poloaiga na ia solia, sa foliga ai foi ua mou atu lana miti mo se aiga fiafia e faavavau.
Sa saofai faasaga mai ia te au ma le lagona sa ia ta’ua o le faavauvau. Sa manao o ia ina ia ou laveaia o ia mai le mailei o le agasala lea na manatu ua saisaitia ai o ia. Ae na pau lava le ala e aluese mai ai, e mo ia ina ia faaaoga le faatuatua ia Iesu Keriso, ia i ai se loto momomo, ia salamo, ma faapea ai ona faamamaina, suia, ma faamalosia e ala i le Togiola a Keriso. Sa ou molimau atu ia te ia e mafai lava. Ma sa mafai, ae sa matuai sili atu ona faigata, nai lo le mea na semanu e oo i ai pe ana ia faaaogaina le faatuatua a o talavou lona olaga i le malaga toe foi atu i le Atua, ma i le taimi na faatoa amata ai ona fesēa’i.
O lea la, o le auala e sili ona lelei tatou te fesoasoani ai i fanau a le Atua, o le tuuina atu i ai o auala e fausia ai le faatuatua ia Iesu Keriso ma Lana talalelei toefuataiina a o laiti i latou. Ona tatau lea ona tatou fesoasoani atu e vave faaolaola lena faatuatua a o lei faiifo le mumu a o latou o ese mai le ala.
O lea la, e mafai ona ta faamoemoe mo se avanoa e tauau ina faaauau pea e fesoasoani ai i le au malaga o le fanau a le Atua. Ua ta’u mai e le Faaola le pogai o le a faaauau ai pea, ina ua Ia faamatalaina le malaga matautia mo fanau agaga uma a le Atua e toe foi atu e ui atu i le puao e mafua mai i le agasala ma Satani:
“Ia outou ulu atu i le faitotoa va apiapi; aua e va tele le faitotoa, e lautele foi le ala e tau atu i le malaia, e toatele foi i latou o e ui atu ai;
Aua e va apiapi le faitotoa, e lauitiiti foi le ala e tau atu i le ola, e toaitiiti foi i latou o e maua.”1
O le muai silafiaina o manaoga o Lana fanau, ua tuu ai i o latou ala e se Tama Faalelagi alofa ia faatonuga ma ni tagata laveai. Na Ia auina mai Lona Alo, o Iesu Keriso, ina ia mafai ona uia ma iloa ia auala saogalemu. Ua Ia valaauina e avea ma Ana perofeta i nei aso, ia Peresitene Thomas S. Monson. Talu mai i lona talavou, na aoao mai ai e Peresitene Monson e le gata i auala e tumau ai i le ala ae o le auala foi e laveai mai ai foi i latou ua oo atu i le faanoanoa.
Ua tofia i tatou e le Tama Faalelagi i ni vaega eseese e faamalosia ma, pe a manaomia, ia taitai atu le au malaga i le saogalemu. O o tatou tofiga e sili ona taua ma mamana, o totonu lava o le aiga. E taua ia tofiga aua e i ai i le aiga le avanoa i le amataga o le olaga o se tamaitiiti e faamausali ai lana tu i le ala e toe foi atu ai. O matua, uso ma tuafafine, matua matutua, tuafafine ma uso o matua, e sili atu ona avea ma ni taiala ma ni au laveai malolosi e ala i fusi o le alofa lea e faamatalaina ai le uiga moni o se aiga.
E i ai i le aiga se fesoasoaniga i uluai tausaga e valu o le olaga o se tamaitiiti. I na tausaga o le puipuiga, ona o le Togiola a Iesu Keriso, ua taofia ai le faaaogaina e Satani o le puao o le pogisa e faalafi ai le ala e toe foi atu ai i le aiga [faalelagi]. I na tausaga faapelepele, e fesoasoani mai le Alii i aiga i le valaauina o le aufaigaluega a le Peraimeri e fesoasoani e faamalosi faaleagaga ia fanau. Ua ia tuuina atu foi i e umia le Perisitua Arona e saunia le faamanatuga. I na tatalo o le faamanatuga, e faalogo ai tamaiti i le folafolaga o le a i ai se aso e mafai ai ona latou maua le Agaga Paia e avea ma se taiala, pe afai latou te usiusitai i poloaiga a le Atua. O le taunuuga, e saunia le tamaitiiti e tetee atu i faaosoosoga pe a oo mai ae, i se taimi i le lumanai, ia alu atu ai e laveai mai isi.
E toatele epikopo o le Ekalesia e musuia e tofia ni tagata e sili ona malolosi o le uarota e auauna atu i tamaiti taitasi i le Peraimeri. Ua latou silafia, afai e faamalosia tamaiti, i le faatuatua ma le molimau, o le a le tau manaomia le laveai o i latou pe a talavou. Ua latou iloa o se faavae faaleagaga malosi e mafai ona faia se eseesega i se olaga atoa.
E mafai e i tatou uma ona fesoasoani atu. Tinamatutua, tamamatutua, ma tagata uma lava o le ekalesia e iloa se tamaitiiti e mafai ona fesoasoani atu. E le tau manaomia ai se valaauga aloaia i le Peraimeri. Pe faatapulaa foi le matutua. O se tasi o na tamaitai, a o avea ma se tagata talavou, sa i ai i le pulega aoao o le Peraimeri, lea na fesoasoani e fatufatuai le mautauave o le FMT.
Sa le vaivai o ia i le tautuaina o tamaiti. Sa faiaoga o ia i le Peraimeri a lana uarota, i lana lava talosaga, seia oo ina toeitiiti 90 tausaga o lona soifua. Na mafai ona lagona e tamaiti laiti lona alofa ia i latou. Sa latou vaai i ana faataitaiga. Sa latou aoao mai ana mataupu faavae faigofie o le talalelei a Iesu Keriso. Ma le mea taua, ona o lana faataitaiga, na latou aoao ai e lagona ma iloa le Agaga Paia. Ma ina ua latou iloa uunaiga a le Agaga Paia, na amata ona latou maua le faatuatua e tetee ai i faaosoosoga. O le a le tau laveaiina i latou ma o le a saunia foi e o atu e laveai mai isi.
Na ou aoaoina le mana o le faatuatua faigofie i le tatalo ma i le Agaga Paia a o laiti le ma fanau. Sa lei oo i le taimi e papatiso ai lo ma atalii matua. Sa taumafai ona matua, faiaoga Peraimeri ma auauna perisitua e fesoasoani ia te ia ia lagona ma iloa le Agaga ma iloa le ala e maua ai Lana fesoasoani.
I se tasi aoauli, sa alu lou toalua e momoli o ia i le fale o se tasi o tamaitai na aoaoina o ia e faitau. O la matou fuafuaga, ou te pikiina o ia pe a ou alu i le fale pe a ou manava.
Na vave uma lana lesona nai lo le mea na matou faamoemoeina. Sa mausali lona lagona mautinoa ua ia iloa le auala e tau atu i le fale. O lea na amata ai ona savali. Fai mai lana tala i se taimi mulimuli ane, sa matuai mausali lava lona lagona mautinoa ma sa fiafia foi i le manatu e alu toatasi na o ia. Pe a ma se afa maila, (0.8 km) talu ona alu, ae amata ona oo mai le pogisa. Sa amata ona ia lagonaina na lei taitai lava latalata atu i le fale.
O loo ia manatua pea na nenefu le susulu o moli o taavale na pasia o ia ona o ona loimata. Sa ia lagona ua pei ia o se tamaitiiti laitiiti, a ua lē o le alii to’a ma le mautinoa lea na i ai ina ua amata ona savali i le fale. Sa ia iloaina sa na manaomia se fesoasoani. Ona oo ane lea o se manatu i lona mafaufau. Sa ia iloaina sa tatau ona tatalo. O lea na aluese ai mai le auala ma agai atu i ni laau sa na tau le iloaina ona o le pogisa. Sa ia maua se nofoaga e tootuli ai.
E faalogo mai i pupuvao, o agai atu ni leo ia te ia. Na lagona e ni tagata talavou se toalua lana tagi. Ina ua oo atu i la’ua, sa la fai atu ia te ia, “E i ai se mea ma te fesoasoani atu ai ia te oe?” Sa tagi o ia ma faamatala atu i ai ua leiloa o ia ma ua fia alu i le fale. Sa la fesili atu pe na te iloa le telefoni po o le tuatusi o lona fale. Na te lei iloaina. Sa la fesili atu pe na te iloa lona igoa. Sa ia iloa lena mea. Sa la taitai atu o ia i se nofoaga lata ane sa la nonofo ai. Sa la maua le igoa o le matou aiga i se tusi telefoni.
Ina ua ou maua le valaau mai le telefoni, sa ou faanatinati atu e laveai, ma le faafetai ona o le i ai o ni tagata agalelei i lona auala e agai mai i le fale. Ma, sa ou faafetai pea ona sa aoaoina o ia e tatalo ma le faatuatua, ina ia oo mai le fesoasoani i le taimi na leiloa ai o ia. O lena faatuatua na taitaiina mai ai o ia i le saogalemu ma atili toatele ai isi au laveai nai lo taimi na te manatuaina.
Ua saunia e le Alii se mamanu o le laveai ma tagata laveai i Lona malo. I Lona atamai, ua musuia ai e le Alii ia Ana auauna e tuu nisi o auala e sili ona malolosi e faamalosia ai i tatou, ma ia tuu i ai ni tagata laveai e sili ona lelei, a o tatou uia tausaga o le talavou.
Ua outou silafia ni polokalama se lua e sili ona mamana ua tuuina mai e le Alii. O le tasi, e mo tamaitai talavou, ua ta’ua o le, “Alualu i Luma o le Tagata Lava Ia.” O le isi, e mo e o loo umia le Perisitua Arona, ua taua o le, “Tiute i le Atua.” Matou te uunaia tagata talavou o le tupulaga faiae ia iloa o latou gafatia ina ia fausia ai le malosi faaleagaga maoae. Ma matou te augani atu ia i latou o e alolofa i na tagata talavou ina ia fai ia mea ua finagalo le Alii tatou te faia e fesoasoani atu ai ia i latou. Ma talu ai e faamoemoe le lumanai o le Ekalesia ia i latou, o lea tatou te alolofa uma ai ia i latou.
Ua toe faaleleia atili ia polokalama e lua, ae e le o suia ai lava o laua faamoemoega. Na faaupuina faapenei e Peresitene Monson: e tatau ona tatou “aoaoina mea e tatau ona tatou aoaoina, fai mea e tatau ona tatou faia, ma avea ma tagata e tatau ona avea ai i tatou.”2
O loo ta’ua manino lava i le tamaitusi o le Alualu i Luma o le Tagata Lava Ia mo tamaitai talavou le faamoemoega mo i latou: “O loo faaaoga e le polokalama o le Alualu i Luma o le Tagata Lava Ia, ia tulaga faatauaina e valu a Tamaitai Talavou e fesoasoani ia e malamalama atoatoa ai po o ai oe, pe aisea ua e i ai iinei i le lalolagi, ma le mea e tatau ona e faia o se afafine o le Atua e sauniuni ai mo le aso e te alu atu ai i le malumalu e osia feagaiga paia.”
E faaauau ona faapea mai, o le a “faia e [tamaitai talavou] ni tautinoga, faataunuu, ma lipoti atu lou alualu i luma i se tasi o ou matua po o se taitai.” O loo folafola mai ai foi, “o mamanu e te faavaeina a o e galue i lau [tusi] Alualu i Luma o le Tagata Lava Ia—e pei o le tatalo, suesueina o tusitusiga paia, auauna atu, ma le tausia o se api o talaaga—o le a avea ma aga masani patino i aso taitasi. O nei aga masani o le a faamalosia ai lau molimau ma fesoasoani e te aoao ai ma alualu ai i luma i lou olaga atoa.”3
O le polokalama o le Tiute i le Atua mo alii talavou i le Perisitua Arona ua toe faamalosia ma faafaigofieina. O le a i ai i se tusi faigofie se tasi mo tofi uma e tolu o le Perisitua Arona. O le a maua e alii talavou ma o latou taitai se kopi o lenei tusi fou. O se meafaigaluega mamana. O le a faamalosia ai molimau a alii talavou ma o latou sootaga ma le Atua. O le a fesoasoani latou te iloa ai ma mananao e faataunuu o latou tiute o le perisitua. O le a faamalosia ai o latou sootaga ma o latou matua, ma tagata o le korama, ma o latou taitai.
O nei polokalama uma e lua, ua tuu atu ai se tiutetauave tele i taumafaiga a nei lava tagata talavou. Ua valaauliaina i latou e aoao ma fai ia mea o le a luitauina mo soo se tasi. A ou toe mafaufau i lo’u lava talavou, ou te le manatuaina le i ai o ni luitau faigata faapena. Oi, o ni nai taimi sa valaaulia ai au ia ou ausia ni luitau faigata faapena mai lea taimi i lea taimi. O nei polokalama e manaomia ai le faifaipea, taumafaiga tele, ma le faaputuina o aafiaga e aoao ai ma aafiaga faaleagaga i le aluga o tausaga.
Pe a ou mafaufau i ai, ua ou iloa ai o anotusi o nei tamaitusi sa avea o se faatusa faaletino o le faatuatuaga a le Alii i le tupulaga faiae ma ia i tatou uma o e alolofa ia i latou. Ma ua ou vaaia ni faamaoniga o le fetaui lelei o le tuuina mai o lena faatuatuaga.
I [au] asiasiga, ua ou vaaia ai le faagaoioia o korama o le Perisitua Arona. Ua ou vaai i alii talavou o mulimuli i mamanu o le aoaoina, o le faia o fuafuaga e fai le mea ua finagalo ai le Atua ia i latou, ona latou see atu lea i mea ua latou tautino e fai, ma faasoa atu i isi itu ua suia ai i latou faaleagaga. Ma a o ou vaavaai ma faalogologo, na manino mai na faagaeetia e le Agaga ia tama, tina, taitai, uo, ma e oo lava foi i tuaoi i se aulotu, a o latou faafofoga i le autalavou o molimau atu i le auala na faamalolosia ai i latou Sa faagaeetia le autalavou a o latou tuuina atu a latou molimau ma na faapena foi ia i latou na taumafai e fesoasoani atu ia i latou ia alualu i luma.
O loo i ai foi lena lava mamanu mamana i le polokalama a Tamaitai Talavou, ina ia atiina ae le malosiaga faaleagaga i tamaitai talavou ma ofoina mai ai le avanoa ia i tatou e fesoasoani atu ai. O le Alualu i Luma o le Tagata Lava Ia, e fesoasoani i Tamaitai Talavou ia saunia e maua sauniga o le malumalu. E fesoasoani atu ia i latou faataitaiga a tina, tinamatutua, ma tamaitai amiotonu uma e siomia i latou i le Ekalesia. Ua ou vaai i auala na fesoasoani ai ni matua i se la tama teine ina ia ausia ana sini ma miti i le matauina ma le talisapaiaina o mea lelei uma na te faia.
Na o ni nai aso talu ai, sa ou matamata ai i se tina o tutu faatasi ma lana tama teine talavou, a o la tauaaoina le taui o le aloaiaina mo le avea uma o i laua ma ni faataitaiga tulaga ese o le tulaga faaletamaitai. Ma a o la faasoa mai ia te au le taua o lenei mea ia i laua, na ou lagonaina le faamaoniga ma le uunaiga a le Alii mo i tatou uma.
Mai fesoasoaniga uma e mafai ona tatou tuuina atu i nei tagata talavou, o le fesoasoaniga aupito maoae lava o le tuu atu ia i latou ia lagona lo tatou talitonu mautinoa ua latou i ai i le ala e toe foi atu i le Atua, ma e mafai ona latou ausia. Ma o le faiga e sili ona lelei tatou te faia ai, o le o faatasi ma i latou. Talu ai o le auala e tifato ma o nisi taimi e gaoa ai, o le a i ai taimi latou te lagona ai le lotovaivai pe tautevateva ai foi. Atonu e i ai taimi latou te le mautonu ai i lo latou taunuuga ma agaigai atu ai i sini e itiiti se taua e faavavau. O nei polokalama musuia o le a le ono tulai mai ai na tulaga, aua o le a taitai atu ai le tagata talavou e valaaulia ma maua le mafutaga a le Agaga Paia.
O le fautuaga e sili ona aoga tatou te tuuina atu i tagata talavou o le, e pau lava le ala e mafai ona latou taunuu atu ai i le Tama Faalelagi o le taialaina ma faasaoina o i latou e le Agaga o le Atua. O lea la, afai tatou te popoto, o le a tatou uunaia, viia, ma faataitaia mea uma e valaaulia ai le mafutaga a le Agaga Paia. A latou faasoa mai ia i tatou mea o loo latou faia ma lagonaina, atonu foi ua tatou agavaa mo le Agaga. Ma, o le a latou lagona i a tatou faamalosiauga ma o tatou foliga ataata le faamaoniga a le Atua. Ma a tatou lagonaina ua tatau ona tuuina atu se fautuaga e aoai ai, o le a latou lagona ai lo tatou alofa ma le alofa o le Atua, ae le o le inoino ma le teena lea e mafai ona faatagaina ai Satani e atili taitai mamao ese atu i latou.
O le faataitaiga e sili ona latou manaomia mai ia i tatou o le fai o le mea e tatau ona latou faia. E tatau ona tatou tatalo mo meaalofa a le Agaga. E tatau ona tatou mafaufau loloto i tusitusiga paia ma saunoaga a perofeta soifua. E tatau ona tatou faia ni fuafuaga lea e le gata o ni moomooga ae o ni feagaiga foi. Ma e tatau foi ona tatou tausia a tatou folafolaga i le Alii. Ma e tatau ona tatou siitia isi e ala i le faasoa atu ia i latou o faamanuiaga o le Togiola lea ua oo mai i o tatou olaga.
Ma e tatau ona faataitai i o tatou lava olaga le faamaoni tumau ma le faaumiumi lea o loo faamoemoe mai e le Alii ia i latou. A tatou faia, o le a tatou fesoasoani ia i latou ia lagona mai le Agaga se faamautinoaga e faapea, afai o le a latou finafinau pea, o le a latou faalogo i fetalaiga mai se Faaola ma se Tama Faalelagi alofa: “Ua lelei ia, le auauna lelei e, ma le faamaoni: ua e faamaoni i nai mea itiiti, ou te tofia oe e pule i mea e tele: ina ulufale mai ia i le fiafia o lou alii.”4 Ma o i tatou na fesoasoani atu ia i latou i le ala o le a tatou faalogo atu ma le olioli i na upu.
Ou te molimau atu e alofa le Alii ia te outou ma fanau uma a le Atua. O Lona malo lenei ua toefuataiina mai ma ki o le perisitua e ala mai i le Perofeta o Iosefa Samita. O Thomas S. Monson o le perofeta a le Alii i aso nei. Ou te folafola atu ia te outou uma taitoatasi, a outou mulimuli i taitaiga musuia o lenei Ekalesia moni a Iesu Keriso, o le a faapea ona taunuu saogalemu atu, o tatou tagata talavou, ma i tatou o e fesoasoani ma alolofa ia i latou, i lo tatou aiga faatasi ma le Tama Faalelagi ma le Faaola, e nonofo i ni aiga ma i le fiafia e faavavau. I le suafa o Iesu Keriso, amene.