2010
Ia Avea le Konafesi o se Vaega o o Tatou Olaga
Me 2010

Na Latou Saunoa Mai ia i Tatou

Ia Avea le Konafesi o se Vaega o o Tatou Olaga

Mafaufau e faaaoga nisi o nei saunoaga, gaoioiga, ma fesili e fai ma se amataga o se talanoaga faaleaiga po o le mafaufau loloto i ai o le tagata lava ia.

E mafai ona e maua lauga o le konafesi aoao i le conference. lds.org. E mafai foi ona e matamata ma faasoa ia saunoaga sii mai konafesi aoao ua mavae i le mormonmessages.org.

Faaaliga: O numera o itulau o loo lisi atu i lalo e faailoa atu ai le itulau muamua o le lauga.

Mo Tamaiti

  • E mafai e tagata uma ona auai i galuega o talafaasolopito o aiga! Na ta’u mai e Elder Russell M. Nelson e mafai e tamaiti ona tusi laau o aiga (itulau 91). E mafai ona fesoasoani i ai matua e tuu i ai igoa o o latou tuaa.

  • Faitau pe toe faamatala le tala a Elder Quentin L. Cook e uiga i tamaiti Samoa na sosola ese mai le galulolo (itulau 83). Fai i tagata o le aiga e faataitai e pei ua oo atu lologa i lo latou fale ma fautuaina i latou e sue “nofoaga maualuluga,” e pei o se moega po o se nofoa. Talanoa e uiga i nofoaga e mafai ona tatou maua ai ni nofoaga maualuluga faaleagaga i lologa o le amioleaga ua i ai i aso nei.

  • Na saunoa mai Elder D. Todd Christofferson e uiga ia William Tyndale, o le na faaliliuina le Tusi Paia i le faaPeretania (itulau 32). Fai i tamaiti e matutua atu e faitau se fuaiupu o le mau i se gagana e le tautatala ai. A fai mai latou te le mafaia, fai i ai e faitau i la latou lava gagana. Talanoa i le taua o le mafai ona maua o tusitusiga paia i lau lava gagana.

  • Faatasi ma lou aiga, ia toe faamanatu se tasi o le tele o lauga o le konafesi aoao e uiga ia Iesu Keriso. Usu le pese “Ta’u Mai Tala ia Iesu” (Tusipese a Tamaiti, 36). Tufa atu ni pepa ma ni penitala po o ni vali. Valaaulia lau fanau e tusi se ata o se tala e sili ona fiafia i ai e uiga ia Iesu. Faitau faatasi le tala mai tusitusiga paia.

Mo Le Autalavou

  • Toe faamanatu le saunoaga a Peresitene Dieter F. Uchtdorf e uiga i le onosai (itulau 56). O a nisi o mataupu faavae o le talalelei ma aga masani e mafai ona aoao mai ai ia i tatou le onosai? Mo se faataitaiga, mafaufau i le anapogi po o le le tafao faamasani sei iloga e 16 tausaga le matua. O faapefea ona faamanuiaina oe ma lou aiga mai le faaalia o le onosai i le mulimuli ai i nei mataupu faavae ma isi?

  • Na aoao mai uma ia Elder M. Russell Ballard, Elder Bradley D. Foster, Sister Julie B. Beck, ma Sister Elaine S. Dalton e uiga i natura paia o tamaitai (itulau e 18, 10, 98, ma le 120). Afai o oe o se tamaitai, o faapefea ona aafia ou lagona e uiga ia te oe lava ona o a latou saunoaga? O a ni mea ua e aoaoina e uiga i lou faamoemoega ma meaalofa? Afai o oe o se alii, na faapefea ona uunaia e nei savali ou manatu e uiga i lou tina, tuafafine, uo, ma isi tamaitai ma tamaitai talavou i lou olaga?

  • Na aoao mai Elder Jeffrey R. Holland: “Afai e le lelei se ata o le televise, tape. Afai e mataga se tifaga, savali ese mai ai. Afai ua amata ona faia se mafutaga e le tatau ai, ia faagata loa lava. O le tele o nei faatosinaga … e mafai ona punitia ai a tatou faamasinoga tatau, nenefu ai lo tatou faaleagaga, ma oo atu ai i se mea leaga” (itulau 44). Ia talanoaina o se aiga, po o le a se mea e mafai ona e faia e avea ai lou aiga o se nofoaga e mafai ona i ai le Agaga. Iloilo faatufugaga, musika, tusi, ata vitio, ma isi au mea faafiafia o loo i ai ae tiai ese soo se mea e le talafeagai.

Mo Tagata Matutua

  • Ia toe faamanatu faatasi ma lou aiga le tala na faasoa mai e Peresitene Thomas S. Monson e uiga i le alii talavou e igoa ia Iasona ma lona aiga (itulau 87). Talanoa pe mafai faapefea e le malamalama i le ata o le faaolataga ona faamanuiaina ai i tatou.

  • Na faasoa mai e Elder L. Tom Perry le ala na aoaoina ai e lona tina lana fanau i le faaaogaina o nisi o mea sa ia faaaogaina e aoao ai le Aualofa (itulau 29). O a nisi o auala e mafai ona e tuufaatasia ai lau auaunaga i le Ekalesia ma ou tiutetauave faaleaiga?

  • Na faamamafaina e Elder Robert D. Hales le taua o le talanoa ma le faalogo atu i tamaiti ma le autalavou (itulau 95). O a ni avanoa e mafai ona e fatuina e te talanoa atu ai i lau fanau? O a ni mea ua e aoaoina a o e faalogo atu ia i latou? E mafai faapefea ona e faaali atu lou naunau e faalogo atu ia i latou? O a ni auala e mafai ona e faaaogaina ai le avanoa e tuu atu ai lau molimau i le taimi lava lena i tamaiti ma le autalavou? Mo se faataitaiga, tagai i le saunoaga a Elder David A. Bednar (itulau 40).

  • Sa saunoa nisi o failauga i le taua o le Tiute i le Atua ma le Alualu i Luma o le Tagata Lava Ia (tagai i itulau 22, 54, 60, 95, ma le 117). O a ni mea e mafai ona e faia e fesoasoani ai i le autalavou i lou olaga ia manuia mai nei polokalama?