O Mea e Uiga i le Amiotonu
I le avea ai ma ni matua ma ni taitai e tatau ona tatou tausia o tatou tagata o le ekalesia ma aiga ma fesoasoani ia i latou ina ia aloese mai i mea na e ono taitaiina atu ai i latou i se oti faaleagaga.
Ua tauina mai ia i tatou i le Mataupu Faavae ma Feagaiga ina ua mavae atu le molimau a auauna a le Atua, le molimau i mafuie, ma le molimau i isi mea e tutupu o le a mulimuli mai. “O le a faanunununu foi mea uma; ma e moni lava, o le a meia loto o tagata; aua o le a oo le fefe i tagata uma” (MFF 88:91 tagai foi i fuaiupu e 88–90).
I le avea ai la ma se sui o le Au Peresitene o le Eria o le Atu Keripeane sa ou molimauina patino Au Paia faatuatua o e na suia le matatau i le faatuatua. O lesona na aoaoina mai i Haiti e mafai ona faatusalia i faataitaiga o i le Tusi a Mamona.
O le vaaiga i lena faatafunaga matautia na oo mai ai i lo’u mafaufau upu o i le mataupu e 28 o le Alema: “O aso ia na faalogoina ai le tagi ma le auega tele i le nuu uma” (Alema 28:4).
E fasefululua tagata o le ekalesia na maliliu ai ao o latou aiga ma uo “o loo faanoanoa ona ua leai o latou aiga, a e ui i lea, ua latou fiafia ma olioli i le faamoemoe, ma ua iloa, e tusa ma folafolaga a le Atua, e toe tutu mai i latou e nonofo i le itu taumatau o le Atua i le fiafia e le uma” (Alema 28:12).
Na vave ona auina atu fesoasoaniga a le Ekalesia i tagata e auai i le ekalesia ma ē le auai ma na faasoaina atu i lalo o le taitaiga a taitai perisitua ma le Aualofa o le lotoifale. E le gata ina latou mauaina fesoasoaniga faafomai, o meaai, vai ma isi sapalai autu, ae na latou maua foi fautuaga, taitaiga ma le faamafanafanaga mai o latou taitai o le lotoifale. Na latou mauaina le lagolagosua a tagata o le Ekalesia i le lalolagi atoa lea “na faanoanoa faatasi ma e faanoanoa; ioe, ma faamafanafana i e ua tatau i ai le faamafanafanaga” (Mosaea 18:9).
Na lapataia i tatou e ni perofeta eseese i vaitaimi eseese e uiga i se isi mala lea e le iloagofie ae taua, ma o lena mea o le “oo mai o le oti matautia i e amioleaga; aua e oti i latou i mea i la le amiotonu; aua ua eleelea i latou, e le mafai foi se mea eleelea ona mautofi i le malo o le Atua” (Alema 40:26).
Na aoao atu e Nifae lenei mataupu faavae i ona uso ma ta’u atu ia i latou o e e “oti i a latou amioleaga … e matua lafoaiina i latou, e tusa ma mea i la le agaga, i la le amiotonu lea” (1 Nifae 15:33).
Na aoao mai le perofeta Sa Lamana o Samuelu faapea “ai se le salamo e taia lava ma lafoina i le afi; e toe oo foi ia te i latou le oti faaleagaga, ioe, o le oti faalua, aua e toe vavaeeseina i latou ai mea uma tau le amiotonu” (Helamana 14:18).
O le tulaga matautia o le oti i mea ia e faaleagaga e sili atu lona aafiaga mo i latou o e “ua uma ona faamalamalamagia e le Agaga o le Atua, ma ua maua le poto tele i mea e uiga i le amiotonu, ona latou pauu ai lea i le agasala ma le solitulafono[;] ua avea ai i latou ma tagata ua sili ona faamaaaina, ma ua faapea ona avea ai ma e ua sili ona leaga, a e ana latou le iloa nei mea, po ua lelei” (Alema 24:30).
I le avea ai ma ni matua ma ni taitai e tatau ona tatou tausia o tatou tagata o le ekalesia ma aiga ma fesoasoani ia i latou ina ia aloese mai i mea na e ono taitaiina atu ai i latou i se oti faaleagaga. Tatou te saili foi ina ia laveai mai i latou o e ua oti nei i mea faaleagaga ma fesoasoani ia i latou ina ia “toe fanauina; ioe, ia fanauina i la le Atua, ma ia liua mai le faaletino ma le pau i le amiotonu, ona ua togiolaina e le Atua, ma ua avea mona atalii ma afafine” (Mosaea 27:25).
O le faamaloloina faaleagaga o i latou o e ua feoti i mea e uiga i le amiotonu e oo mai lea e ala i le mana o le Togiola, o le liua i le upu moni ma le usitaia o mataupu faavae o le amiotonu.
O le aoaoina atu o o tatou tagata o le ekalesia ma aiga e faatatau i mea e uiga i le amiotonu e taua lea i le faagasologa o le ausiaina o se liua tumau, talu ai e mafai ona taitaiina atu i latou ina ia maua se malamalamaaga tonu i poloaiga a le Alii, i mataupu ma aoaoga faavae o le talalelei ma tulaga manaomia ma sauniga lea e tatau ona tatou usitaia ina ia ausia le faaolataga i le malo o le Alii.
E tele faataitaiga i tusitusiga paia lea e faamautinoaina le taua o aoaoga o “mea e uiga i le amiotonu” e fesoasoani ina ia maua se liua tumau. I le tala lea na tuuina mai ia Amona ma ona uso o loo talaiina atu le talalelei i tagata Sa Lamana, ua tatou faitau ai: “Ma ua talai atu Amona i le nuu o le tupu o Lamonae, ma ua oo ina aoao atu o ia ia te i latou i mea uma e uiga i le amiotonu” (Alema 21:23).
Ua mafai ona tatou vaaia ia taunuuga o le aoao atu ma le filiga i mea uma e uiga i le amiotonu ao faaauau lo tatou faitauina o le tala i mataupu 23, lea e faapea mai, “O i latou uma na talitonu, o i latou uma foi na aumaia i le malamalama o le upu moni … ua faaliliuina i le Atua [ma] ua le toe liliu ese lava” (Alema 23:6).
Ina ua faatuina le Ekalesia e Alema le Faifeautalai, na ia vaetofia ni alii agavaa o ni faitaulaga ma ni aoao o e “na latou leoleo ai i le nuu ma tausi ia te i latou i mea e uiga i le amiotonu” (Mosiah 23:18).
E taua le matafaioi a matua i le fesoasoani lea i a latou fanau ina ia malamalama i mea e uiga i le amiotonu. I le Tusi a Mamona tatou te mauaina ai Alema le Itiiti, ina ua ia faanoanoa ona o le amioleaga, o taua ma le femisaai lea na tulai mai, ma le le fiafia ona o le faamaaa o loto o lona nuu, “na ia faapotopoto faatasi ai ona atalii, ina ia tuu atu lana poloaiga ia te i latou taitoatasi, e uiga i mea i la le amiotonu” (Alema 35:16; faaopoopo le faamamafa).
E mālie le matauina faapea na ia aoao ma tuuina atu i lana fanau o latou tiute taitoatasi, ma sa ia fetuunai ana aoaoga i atalii taitasi, e tusa ai ma manaoga o lena atalii. Na ia tuuina atu lana molimau ma aoao ia i latou mataupu ma aoaoga faavae, ma saunia i latou e talai atu na lava mataupu faavae i isi.
I se vaitaimi pe a osofaia le aiga e autau a le fili ma pe afai o tulaga lea tatou te ola ai e leai lava se eseesega ma tulaga lea na oo i ai Alema, ua faatulagaina e le Au Peresitene Sili ma le Korama a le Toasefululua i le “O Le Aiga: O Se Folafolaga i le Lalolagi” lea “ua i ai i matua se tiute paia e tausia a latou fanau i le alofa ma le amiotonu” (Liahona, Oke. 2004, 49).
E aofia ai iina le faafaileleina, lagolagoina ma le aoaoina o fanau i mea uma e uiga i le amiotonu ina ia latou tumau mausali, ma fusia o latou sulugatiti i le upu moni, “ma ofu i le ufi-fatafata o le amiotonu, ma faaseevaeina o [latou] vae i le sauniuniga o le talalelei o le filemu” (MFF 27:16).
E pei lava o le vaitaimi o Alema, o loo tausia foi e o tatou taitai ia tagata o le Ekalesia ma fafagaina i latou i mea e uiga i le amiotonu. O le a fesoasoani na mea ia i tatou e ausia se liua tumau. I le pepa o faamatalaga “O Mea e Faamamafa i Aoaoga Faaleautaitai,” lea na toe faatonutonu i le aso 10 o Tesema, 2009, na talosagaina ai e le Au Peresitene Sili ma le Korama a le Toasefululua ia taitai perisitua ma ausilali “ia uunaia tagata taitoatasi o le aiga, matua ma fanau, ia suesue i tusitusiga paia, tatalo e le aunoa, ma ola i le talalelei a Iesu Keriso” (Tusi a le Au Peresitene Sili, 15 Tes. 2009).
O le suesue i tusitusiga paia, tatalo e le aunoa, ma ola i le talalelei a Iesu Keriso o galuega ia a le amiotonu ma ua faaalia e le Alii nei folafolaga matagofie: “O lē faia galuega o le amiotonu, o le a maua ai lona taui, o le filemu lea i lenei lalolagi ma le olaga faavavau i le lalolagi a sau” (MFF 59:23).
Ina ia aoao atili atu ma le tauia i mea e uiga i le amiotonu, e taua le malamalama lea, ina ia faaopoopo i le tuuina atu o faamatalaga, e tatau ona tatou faafaigofieina ia faaaliga. O lenei auala, e mafai ai e le tagata o loo aoaoina ona lagona le naunau ia iloa nei mataupu faavae mo ia lava.
Sa faaalia e le Alii ia Ailama Samita, e ala atu i lona uso, le Perofeta o Iosefa Samita:
“Ou te tuuina atu ia te oe se vaega o lou Agaga, o le a faamalamalamaina ai lou mafaufau, e faatumuina foi lou agaga i le olioli.
“Ma o le a e iloa ai … mea uma e te manao ai mai ia te au, o mea e uiga i le amiotonu, i le faatuatua ma le talitonu ia te au o le a e maua” (MFF 11:13–14).
I le faaiuga, o loo lapataia i tatou e tusitusiga paia e faatatau i le vaivai i mea e uiga i le amiotonu ma le ogaoga o taunuuga o nei mea mo i latou o e, na faamalamalamagia e le Agaga o le Atua, ae ua pau atu i le agasala ma le solitulafono.
O le aoaoina atu o mea e uiga i le amiotonu o se elemene taua i le fesoasoani lea ina ia malamalama tagata i le upu moni, ma ia liua ma tumau mausali i le faatuatua ia Keriso seia oo i le iuga.
Ua i ai i matua se tiute paia e aoao a latou fanau e faatatau i mea e uiga i le amiotonu. E mafai e taitai ma faiaoga ona vaaia ma faafailele ia tagata o le ekalesia i lalo o a latou tausiga, aoao atu ma le filiga i latou i mea e uiga i le amiotonu.
E mafai ona ausia ma tauia lenei tulaga pe afai e faafaigofie ia faaaliga i le taimi o le faagasologa o le aoaoga, ma e fofoa ai i tagata le naunauga ia faamalamalamagia e le Agaga o le Atua. Ma a o latou faatinoina le faatuatua, o le a mafai ona faailoa ia i latou e le Agaga ia mea e uiga i le amiotonu. Ou te molimau atu ai i nei mea uma, i le suafa o Iesu Keriso, amene.