Na Latou Saunoa mai i le Autalavou

Aoao, Galue, ma Faasoa Atu: Faia o Lou Tiute i le Atua

Ua faatuatuaina i tatou e umia le perisitua e galulue ai i le suafa o le Atua. Ua tuuina mai ia i tatou lena faatuatuaga paia. E tele mea ua faamoemoeina mai ia i tatou… . Ia tatou mafaufau i o tatou valaauga, ia tatou toe tepa i o tatou tiutetauave ma ia tatou mulimuli ia Iesu Keriso, lo tatou Alii.

Peresitene Thomas S. Monson, “O Sauniuniga e Aumaia ai Faamanuiaga,” 64.

I ni nai vaiaso talu ai, sa ou vaai ai i se tiakono fou o amata atu i lena ala o le maelega. Sa faaali mai ia te au e lona tama se ata na tusia lava e lona atalii, o loo faaalia ai laina nofoa uma i totonu o lo latou falesa, o se numera mo tiakono taitasi o le a tufaina le faamanatuga, ma le faiga o le a pasi ai le faamanatuga i tagata i totonu o le falesa. Sa ma toē ma lea tamā pe a mafaufau i se tamaitiiti, e lei faatonuina e faia lena mea, a ua nofo ma fai se ata ia mautinoa ai e faamanuiaina i lana auaunaga faaleperisitua.

Sa ou iloaina i lona maelega, le mamanu mai le tamaitusi o le Tiute i le Atua. O le aoaoina lea o mea ua faamoemoeina e le Alii mai ia te oe, fai se fuafuaga e fai ai, galue ma le maelega i lau fuafuaga, ona faasoa atu lea i isi pe na faapefea e lou aafiaga ona suia oe ma faamanuiaina ai isi.

Peresitene Henry B. Eyring, Fesoasoani Muamua i le Au Peresitene Sili, “Galue i le Maelega Uma,” 60.

O tagata matutua o e auai i le Ekalesia e tatau ona malamalama i mea e tatau ona faataunuuina o le Taua o le Tagata Lava Ia ma le Tiute i le Atua, e le na o ni lisi uumi o mea e maka pe a uma. O sini patino ua faataatia e alii talavou ma tamaitai talavou e fesoasoani ia i latou ina ia agavaa ai mo le mauaina o sauniga o le malumalu, o e faamisiona, ulu atu i faaipoipoga e faavavau, ma olioli ai i le faaeaga. Ae ia matua faamalamalamaina: mo alii talavou ma tamaitai talavou o e taumafai e faataunuuina nei sini na o i latou o se matua toilalo ma se faanoanoaga!

Tama, tina, ma taitai o le autalavou, matou te augani atu ia outou auai faatasi ma lau fanau ma le autalavou i le Alualu i Luma o le Tagata Lava Ia ma le Tiute i le Atua. E le gata ai i lo latou tuputupu ae, o le a e tuputupu ae ai foi. E faapena foi le taua, o le a outou tuputupu ae faatasi i se sootaga o le faatuatua ma le faauoga o le a mafai ai ona faamalosia e le tasi le isi ma tumau ai i le ala o le talalelei e faavavau, ia avea moni ai o se aiga e faavavau.

Elder Robert D. Hales o le Korama a Aposetolo e Toasefululua, “O Lo Tatou Tiute i le Atua: O Le Misiona a Matua ma Taitai o le Tupulaga Faia’e,” 95.

Alii Perisitua Arona talavou pelē, o lo outou avanoa lenei. Pe ua outou sauni ea ma le loto i ai e faia lau vaega? E manaomia e le Alii alii talavou agavaa uma ia saunia ma toe tautino atu, e amata ai i lenei afiafi, ina ia agavaa i se valaauga mai le perofeta a le Atua e auauna atu i se misiona.

Elder Ronald A. Rasband o le Fitugafulu, “O Le Tiute Paia o se Faifeautalai,” 51.

O le avea ai ma se tiakono, aoao, ma se ositaulaga, o le a e auai ai i gaoioiga o le a fesoasoani ia te oe e fausia ai le malosi faaleagaga ma aoao ma faataunuu ai ou tiute faaleperisitua. O gaoioiga taitasi e mulimuli i le mamanu faigofie lenei:

Muamua e te aoao i se mataupu faavae o le talalelei po o se tiute o le perisitua. E te iloa ai le mea ua finagalo le Tama Faalelagi e te faia, ma taumafai ai ia e maua se molimau faaleagaga i le mafuaaga ua taua ai.

O le isi vaega e sosoo ai e te faia ni fuafuaga ina ia e galue i le mea ua e aoaoina. Ua fautuaina oe ina ia faavae au fuafuaga i mea e te manaomia, tulaga, ma avanoa e auauna atu ai i isi. O se avanoa matagofie lenei e te nafa ai mo lou lava tuputupu ae ma atiina ae ai le faalagolago faaleagaga o le tagata ia te ia lava.

Ona faasoa atu lea o mea ua e aoaoina ma ou aafiaga i isi. A o e faia lea mea, o le a faamalosia lau molimau ma fausia le faatuatua ia i latou o loo siomia oe. O le a faateleina ai lou mafai ona talanoa atu i isi e uiga i le talalelei.

… Ou te molimau atu o au auaunaga faamaoni i le Perisitua Arona, o le a suia ai olaga o i latou o loo e tautuaina. O loo i ai tagata o loo manaomia lau auaunaga faaleperisitua. E manaomia oe e lou aiga. E manaomia oe e lau korama. E manaomia oe e le Ekalesia. E manaomia oe e le lalolagi.

David L. Beck, peresitene aoao o Alii Talavou, “O Le Perisitua Arona Maoae,” 54.

O loo maua famatalaga e uiga i le polokalama fou o le Tiute i le Atua i le tele o gagana i le DutyToGod.lds.org.

Tu Atu mo le Mama: Alualu i Luma o le Tagata Lava Ia

I le itulau muamua o lau tusi Alualu i Luma o le Tagata Lava Ia a Tamaitai Talavou o le a e maua ai upu nei: “O oe o se afafine faapelepele o le Tama Faalelagi, ua saunia e sau i le lalolagi i lenei taimi faapitoa mo se faamoemoega paia ma le mamalu.”

Tuafafine, e moni na upu! E le o ni upu fatu i se tala faafagogo! Pe le ofoofogia ea le iloa e silafia e lo tatou Tama Faalelagi faavavau oe, e faafofoga mai ia te oe, e leoleo ia te oe, ma alofa ia te oe i se alofa e le uma? O le mea moni, o le tele naua o Lona alofa mo oe ua Ia aumaia ai lenei olaga i le lalolagi o se meaalofa taua o le “i aso a la ua leva,” faauma ane i lau lava tala moni o se malaga, tofotofoga, ma avanoa mo mea silisili, tamalii, lototoa, ma le alofa. Ae o le mea aupito ofoofogia o mea uma, ua Ia ofoina mai se meaalofa e le mafai e tupe ona faatau ma e le oo foi i ai le malamalama. Ua ofoina atu e le Tama Faalelagi ia te outou le meaalofa aupito silisili o meaalofa uma—o le ola e faavavau—ma le avanoa ma le faamanuiaga e le i’u o lou lava “ola fiafia ai lea.”

Peresietene Dieter F. Uchtdorf, Fesoasoani Lua i le Au Peresitene Sili, “O Lou Ola Fiafia Ai Lea,” 124.

Tamaitai talavou o Le Ekalesia a Iesu Keriso o le Au Paia o Aso e Gata Ai, ia manatua pe o ai outou! Ua filifilia outou. O outou o afafine o le Atua. E le mafai ona avea outou o se augatupulaga o tamaitai talavou ua fiafia e “faafetaui i ai.” E tatau ona ia te outou le lototetele e “tulaga ese ai”; e “tutulai ai ma susulu atu, ina ia faia lo outou malamalama ma tagavai mo atunuu” (MFF 115:5). O le a faatalitonuina outou e le lalolagi faapea tou te le taua—ua pasiā a outou tifiga ma ua ese le lalolagi ua siomia ai outou. O loo valaau mai le lalolagi ia te outou i ni leo faatosina, malomaloā e “faafiafia outou lava,” “tofo i mea uma,” “faataitai i ai ma fiafia ai.” I se tulaga e ese mai ai, o loo musumusu mai le Agaga Paia ma o loo valaaulia outou e le Alii ina “ia savavali i le ala o le mama … tuu ese mea a lenei lalolagi … ma piimau i [au] feagaiga” (MFF 25:2, 10, 13).

Elaine S. Dalton, peresitene aoao o Tamaitai Talavou, “Manatua Pe O Ai Oe!” 120.

O le polokalama o le Alualu i Luma o le Tagata Lava Ia o le a tuuina mai ai se auala matagofie mo oe e fafagaina ai lau molimau i laa taitasi. O mea e fai ma galuega faatino o tulaga faatauaina o laa laiti ia o le a fafagaina lau molimau ia Iesu Keriso ao e aoao i Ana aoaoga ma faaaoga e le aunoa i lou olaga. O le fafagaina pea o le a e tumau ai ma le saogalemu i le ala.

Mary N. Cook, fesoasoani muamua i le au peresitene aoao o Tamaitai Talavou, “Aua, Aua, Aua Lava Nei Faavaivai!” 117.

O le a i ai pea lava pea le Alii iina mo i tatou ma o le a le tuulafoaiina lava i tatou. Ua aoaoina i tatou e faapea, e silafia ma alofa le Tama Faalelagi i Ana fanau taitoatasi. I le avea ai ma se tasi o Ona afafine faapelepele, ua mafai ona e mauaina Lana faamautinoaga, ma le taitaiga e ala i le mana o le tatalo.

Ann M. Dibb, fesoasoani lua i le au peresitene aoao o Tamaitai Talavou, “Ia Outou Lototetele,” 114.

Mo ni isi faamatalaga atili e uiga i le Alualu i Luma o le Tagata Lava Ia, alu i le PersonalProgress.lds.org.